GAUDIA EDIA PRAIS IA BADA

Kohu Momo Lasi Maurina

Haida be idia moale badina idia mamia idia dekenai idia noho gaudia be hegeregere. Bona edia noho dalana ia idau neganai, edia moni idia gaukaralaia namonamo.

DAHAKA DAINAI UNAI BE MAI ANINA BADA?

Doketa (Psychologist) hahine ta ladana Jessica Koehler ia itaia, taunimanima haida be idia abia dae idia dekenai ia noho gaudia be hegeregere. Bona ia davaria unai bamona taudia be ma haida dekenai idia mama lasi. Oibe, kohu momo lasi taudia be nega momo idia moale bona idia lalohekwarahi momo lasi. Badina edia famili bona turadia totona nega bada idia atoa. Unai be mai anina bada bona moni amo ita hoia diba lasi.

“Bema ita be mai iseda aniani, dabua bona noho gabuna, unai be hegeregere.”—1 Timoteo 6:8.

OI KARAIA DIBA GAUDIA

Haida ida sibona oi hahegeregerea lasi. Bema kohu momo taudia ida emu noho dalana oi hahegeregerea, do oi mamia oi dekenai idia noho gaudia be hegeregere lasi bona oi mama diba. Herevana haida be mai edia kohu momo, to abitorehai momo idia karaia. Nicole be Senegal ai ia noho, ia gwau: “Lau moale badina, lau dekenai idia noho gaudia be hegeregere. Kohu momo ese lau dekenai moale do ia henia lasi. Herevana lau itaia haida be mai edia kohu momo.”

Inai oi karaia: Haida ese idia atoa advataisment bona intanet ai edia taga maurina idia herevalaia, oi itaia lasi.

“Ena be tau ta ena kohu be momo, to ena kohu ese ia dekenai mauri do ia henia lasi.”—Luka 12:15.

Haida edia kara namodia laloa bada. Roberton be Haiti ai ia noho, ia gwau: “Nega lau atoa ma haida ese lau bona egu famili dekenai idia hahedinaraia kara namodia lau laloa totona. Bena idia lau hamaoroa edia kara namodia lau laloa bada. Bona egu natuna mero ena mauri lagani be 8 lau hadibaia, ma haida ese ia dekenai gaudia idia henia neganai idia ia tanikiu henia be namo.” Ma haida edia hariharibada karana idia laloa bada taudia be gau momo totona idia lalohekwarahi lasi.

Inai oi karaia: Dina ta ta ai oi moalelaia gaudia be emu noutbuk ai oi torea. Hegeregere; emu helt ia namo, emu famili bona turadia edia hebamo namodia bona dina ia diho ena hairai.

“Kudouna ai ia moale tauna be dina ta ta ai mai moale ida ia noho.”—Aonega Herevadia 15:15.

Ita ibounai be nega haida ita hekwarahi kohu momo lasi maurina ita noholaia totona. To unai ese namo ia havaraia. Kohu momo lasi maurina ita abia hidi neganai, moale do ita davaria danu. Moni ese unai ia hoia diba lasi.