OI DUAHIDUAHI badabada neganai, hereva haida gwauraia totona oi hekwarahi, a? Eiava helai taudia vairanai oi hereva neganai, nega momo hereva maorodia davaria totona oi hekwarahi, a? Bema oibe, reana oi hereva namonamo lasi. Hereva namonamo tauna ena duahiduahi bona hereva dalana dainai, hereva bona lalohadai idia heau namonamo, hekwarahi be lasi. To ita gwau lasi anina be ia hereva hanaihanai, ia hereva haragaharaga, bona ia herevalaia gaudia laloa lasi dalanai ia hereva. Lasi, to ena hereva ese mamina namona ia havaraia. Hereva namonamo karana be Tiokratik Haroro Sikuli dekenai ita laloa bada karana ta.

Oi hereva namonamo lasi ena badina be reana momo. Inai gaudia ta do oi laloa namonamo be namo, a? (1) Ma haida dekenai oi duahiduahi neganai, hereva haida oi diba lasi dainai oi gwauraia maoromaoro lasi. (2) Nega momo oi laga-ani sisina dainai, emu hereva oi hamatamaia, oi hadokoa, bona oi hamatamaia lou. (3) Bema oi hegaegae namonamo lasi, unai hekwakwanai ia bada. (4) Taunimanima vairanai hereva oi henia neganai, nega momo oi hereva namonamo lasi ena badina be oi herevalaia gaudia oi atoa namonamo lasi. (5) Bema gado ena hereva momo oi diba lasi, reana hereva maorona davaria totona oi hekwarahi. (6) Bema hereva momo herea edia anina oi hahedinaraia toho, reana oi hereva namonamo lasi. (7) Grama ena taravatu oi diba namonamo lasi dainai, unai hekwakwanai ia bada.

Bema oi hereva namonamo lasi, Kingdom Hall dekenai helai taudia be do idia raka siri lasi, to reana emu hereva idia laloa lasi. Unai dainai, oi gwauraia gaudia momo idia boio bamona.

To oi naria namonamo, oi ura do idia badinaia herevana bona ia heau namonamo herevana ese kamonai taudia ia doria auka bona reana idia ia hahemaraia mamina ia havaraia garina. Bema oi tubu gabuna ena kastom be idau dainai, taunimanima idia laloa oiemu hereva dalana be doria auka bamona eiava mai momokani ida lasi, emu hereva ena badina do ia boio. Danu, ena be aposetolo Paulo be hereva namonamo tauna, to mai ‘goada lasi, gari, bona heudeheude momo’ ida Korinto taudia ia hereva henia, unai amo edia lalona ia veria lasi ia idia laloa bada totona.​—1 Kor. 2:3.

Oi Karaia Lasi Karadia. Taunimanima momo be idia hereva neganai inai bamona hereva “a-a-a” idia gwauraia momo. Ma haida be nega momo inai hereva “bona” amo lalohadai idia hamatamaia, eiava herevana dahaka idia herevalaia to inai hereva “oi laloa” eiava “inai dahaka” idia gwauraia loulou. Reana unai bamona herevadia oi gaukaralaia ena momo oi diba lasi. Ia namo bema ta ese oiemu hereva ia kamonai bona unai bamona herevadia oi gwauraia neganai, idia ia gwauraia danu. Reana do oi hoa.

Taunimanima haida idia duahiduahi bona hereva neganai, sentens ta idia hamatamaia bena huanai edia hereva idia hadokoa bona idia gwauraia vadaeni gaudia haida idia gwauraia lou.

Bona ma haida edia hereva ena haraga ia namo, to lalohadai ta idia hamatamaia, bena sentens huanai idia hadokoa, bona gau ma ta idia gwauraia matamaia. Ena be hereva idia heau namonamo, to lalohadai idia haidaua haraga dainai idia hereva namonamo lasi.

Hanamoa Daladia. Bema oiemu hekwakwanai be hereva maorona oi tahua loulou, namona be oi hekwarahi gado ena hereva momo oi dibaia totona. Gima Kohorona, Awake!, bona oi duahia bukadia ma haida dekenai oi diba lasi herevadia oi laloa. Diksenari ai oi tahua, edia anina oi itaia, bona idia haida oi gaukaralaia matamaia. Bema oi dekenai diksenari be lasi, heduru abia totona gado ia diba namonamo tauna oi noia.

Duahiduahi badabada loulou karana ese emu hereva ia hanamoa. Hereva aukadia oi laloa, bona oi gwauraia badabada nega momo.

Oi duahiduahi namonamo totona, sentens lalonai hereva idia gaukara hebou dalana oi lalo-pararalaia be namo. Nega momo hereva oi duahidia hebou be gau badana, torea tauna ia ura hahedinaraia lalohadaina ia hedinarai totona. Unai bamona idia noho hebou herevadia oi laloa. Idia oi makaia, bema unai be oi do ia durua. Emu tahua gauna be hereva oi gwauraia maoro sibona lasi, to lalohadai oi hahedinaraia goevagoeva. Sentens ta oi laloa namonamo murinai, ma ta oi laloa ela bona paragraf oi stadilaia ore. Lalohadai ia heau dalana oi itaia. Bena oi duahiduahi badabada loulou. Paragraf oi duahia loulou ela bona ibounai oi duahia neganai nega ta oi daradara lasi bona gabu kererena dekenai oi laga-ani lasi. Bena paragraf ma ta oi karaia.

Unai murinai, mani oi duahia haraga. Bema sentens lalonai hereva idia gaukara hebou dalana oi diba, hereva tamona lasi to hereva momo nega tamona oi itaia diba bona oi diba dahaka do ia hedinarai gabeai. Unai ese oiemu duahiduahi amo ia vara anina do ia habadaia.

Nega ginigunana oi itaia gaudia oi duahia karana be treinini namona. Hegeregere, oi hegaegae lasi to dina ena siri bona hereva oi duahia; unai bamona oi karaia loulou. Namona be emu matana ese hereva ta ta lasi, to lalohadai tamona idia hahedinaraia herevadia ibounai nega tamona idia itaia karana oi manadalaia.

Herevahereva lalonai oi hereva namonamo ena anina be oi do hereva lasi neganai oi laloa guna. Dina ta ta ai unai oi karaia. Oi ura gwauraia lalohadai oi abia hidi bona emu lalona ai oi atoa namonamo; gabeai oi hereva matamaia. Oi haragaharaga lasi. Lalohadai ta oi gwauraia noho lalonai oi hadokoa lasi eiava oi haidaua lasi ela bona oi gwauraia ore. Bema auka lasi sentens kwadogidia oi gaukaralaia reana oi do ia durua.

Bema oi ura gwauraia gauna oi diba namonamo, hereva do idia heau namonamo. Do oi gaukaralaia herevadia oi abia hidi be gau bada hereana lasi. Momokani, do oi hereva namonamo totona, namona be lalohadai ta oi diba goevagoeva bona oi hereva lalonai oi gaukaralaia herevadia oi abia hidi. Bema oi hereva neganai unai oi karaia bona hereva ta ta lasi to unai lalohadai oi laloa noho, hereva do oi davaria haraga, bona emu lalohadai ese emu hemami idia hahedinaraia namonamo. Oi ese lalohadai lasi to hereva oi laloa neganai, emu hereva ia heau namonamo lasi. Hereva namonamo karana oi tohoa loulou neganai, do oi dibaia, bona emu hereva bona duahiduahi ese anina idia havaraia totona unai be gau badana.

Iehova ese Israela besena bona Aigupito ena Farao vairanai Iena hereva gwauraia totona Mose ia abia hidi neganai, Mose ia laloa ia hegeregere lasi. Dahaka dainai? Ia be hereva namonamo tauna lasi; iena hereva be reana mai ena dika ta. (Eso. 4:10; 6:12) Mose ese ekskius momo ia gwauraia, to Dirava ese unai ia abia dae lasi. Iehova ese hereva gwauraia totona Arona ia siaia, to danu, Ia ese Mose ia durua ia hereva totona. Mose be nega momo bona anina ia havaraia dalanai, taunimanima ta ta sibona lasi, to unai bese ibounai dekenai ia hereva. (Deu. 1:​1-3; 5:1; 29:2; 31:​1, 2, 30; 33:1) Bema emu hereva hanamoa totona oi karaia diba gaudia ibounai oi karaia bona Iehova dekenai oi tabekau, oi danu ese emu hereva amo Dirava oi hanamoa diba.

HEREVA lalonai, gabu maorona ai oi laga-ani be mai anina bada. Unai be maoro herevana platfom ai oi hereva eiava ta ida oi hereva. Bema oi laga-ani lasi, emu hereva ese rege sibona ia havaraia to lalohadai ta ia hahedinaraia lasi. Laga-ani dalana maorona dainai oi herevalaia gaudia idia hedinarai goevagoeva. Bona laga-ani oi gaukaralaia namonamo dainai, hereva badadia do idia laloaboio lasi.

Edena dala ai oi diba edena gabudia ai oi laga-ani be namo? Laga-ani edia lata maorona be edena bamona?

Maka Maragidia Gabudiai Laga-Ani. Maka maragidia be idia torea herevadia edia kahana badana. Lalohadai eiava henanadai ta ena dokona idia hahedinaraia. Gado haida ai idia torea hanai herevadia idia hahedinaraia. Maka maragidia haida ese sentens ena kahana ta ena anina kahana ma ta dekenai idia hahedinaraia. Duahiduahi tauna ese unai maka maragidia ia itaia. To ma haida dekenai ia duahiduahi neganai, ia duahia herevana lalonai idia noho maka maragidia be ena gado regena amo ia hahedinaraia be namo. (Diba ma haida abia totona Stadi 1, “Duahia Maoro,” itaia.) Bema maka maragidia idia noho gabudiai oi laga-ani lasi, ma haida ese oi duahia gauna idia lalo-pararalaia be auka bona reana hereva edia anina ia idau.

Maka maragidia sibona lasi, to sentens lalonai lalohadai idia noho dalana danu ese ia hahedinaraia edena gabudia ai oi laga-ani be maoro. Taunimanima momo idia diba piano gadaralaia tauna be nega ta ia gwau: “Nouti be piano gadaralaia taudia ma haida hegeregerena lau karaia. To nouti edia huanai idia noho laga-ani gabudia, io, idia ese miusiki idia hahairaia.” Hereva be unai bamona danu. Laga-ani dalana maorona ese oi hegaegaelaia namonamo herevana ena hairai bona anina idia habadaia.

Taunimanima vairanai duahiduahi totona oi hegaegae neganai, do oi duahia herevana dekenai maka oi atoa be reana heduru dalana ta. Laga-ani sisina, reana hadokoa sisina sibona, gabudiai laini tamona oi atoa. Laga-ani ia lata sisina gabudiai laini rua oi atoa. Bema oi itaia oi dekenai hereva haida be auka bona gabu kererena dekenai oi laga-ani loulou, pensolo amo unai lalohadai aukana idia hahedinaraia herevadia oi makaia. Bena unai hereva matamana amo oi duahia ela bona dokona. Idia hereva namonamo taudia momo be unai idia karaia.

Dina ta ta ai oi hereva neganai laga-ani be hekwakwanai lasi, badina oi ura oi gwauraia lalohadai oi diba. To, bema oiemu kara be hereva haida murinai hanaihanai oi laga-ani, herevana lalohadai be dahaka, reana emu hereva be mai ena siahu lasi bona lalohadai idia hedinarai goevagoeva lasi. Hanamoa daladia be Stadi 4, “Hereva Namonamo,” dekenai idia noho.

Lalohadai Ta Ta Murinai Laga-Ani. Hereva badana ta murinai ma ta oi matamaia neganai, laga-ani dainai kamonai taudia ese oi gwauraia gauna idia laloa bona do oi gwauraia gauna totona idia hegaegae diba, idia itaia oi herevalaia gauna ia idau, bona do oi gwauraia lalohadai do idia lalo-pararalaia goevagoeva. Lalohadai ta murinai ma ta oi matamaia neganai oi laga-ani be mai anina bada, dala ta amo ma ta dekenai oi lao neganai kona ai emu motuka ena sipidi oi hamaragia be mai anina bada hegeregerena.

Hereva henia taudia haida be lalohadai ta amo ma ta dekenai idia lao haragaharaga ena badina ta be gau momo idia herevalaia toho. Haida be dina ta ta ai unai bamona idia hereva. Reana edia gabu taudia ibounai be unai bamona. To hadibaia karana lalonai unai be namo lasi. Bema oi herevalaia gauna idia kamonai bona idia laloatao be namo, unai lalohadai oi hahedinaraia goevagoeva totona namona be emu laga-ani negana ia maoro. Namona be oi lalo-parara hereva lalonai lalohadai idia hedinarai goevagoeva totona laga-ani be mai anina bada.

Bema autlain amo hereva do oi henia, namona be hereva badadia oi atoa namonamo, laga-ani gabudia idia hedinarai namonamo totona. Bema maniuskrip do oi duahia, hereva badana ta murinai ma ta ia matamaia gabudia oi makaia.

Lalohadai ta ta murinai laga-ani ena lata ese maka maragidia gabudiai oi laga-ani ena lata ia hanaia​—to, namo lasi edia lata dainai oi hereva metairametaira. Bema laga-ani idia lata momokani, toana be oi hegaegae namonamo lasi bona dahaka do oi gwauraia oi laloa noho.

Mai Anina Gaudia Hahedinaraia Totona Laga-Ani. Mai anina gaudia hahedinaraia totona oi laga-ani ena mamina ia goada, unai laga-ani be lalohadai ta vairanai eiava murinai eiava mai siahu ida henanadai oi henia neganai oi karaia. Unai bamona laga-ani dainai helai taudia ese oi gwauraia gauna idia laloa, eiava do oi gwauraia gauna idia naria. Unai ruaosi be idau. Oi abia hidi edena oi gaukaralaia be namo. To namona be oi laloatao, mai anina bada gaudia sibona hahedinaraia totona unai oi gaukaralaia. Bema oi gaukaralaia momo, unai lalohadai edia anina ia boio bamona.

Iesu be Nasareta ena dubu dekenai Buka Helaga ia duahia neganai, ia ese dala namona ai laga-ani ia gaukaralaia. Ia ese peroveta tauna Isaia ena lokua bukana amo, ia abia gaukarana ia duahia guna. To, ena anina ia do gwauraia lasi neganai, unai lokua bukana ia koua, naria tauna dekenai ia henia lou, bona ia helai. Bena, dubu dekenai idia noho taudia ibounai be ia idia raraia neganai, ia gwau: “Inai umui kamonaia herevana, be hari dina ia momokani vadaeni.”​—Luka 4:​16-21.

Regerege Ia Vara Negadiai Laga-Ani. Nega haida regerege ia vara bona emu hereva lalonai oi laga-ani sisina be namo. Reana haroro gaukara ai oi davaria ruma tauna ida oi herevahereva lalonai, dala dekenai idia lao motuka eiava ia taitai natuna dainai oi laga-ani be namo. Bema hebouhebou gabuna ai ia vara regerege ta be bada momokani lasi, reana emu gado regena oi habadaia sibona bona oi hereva noho diba. To bema unai regerege ia bada momokani bona ia noho daudau, oi laga-ani be namo. Badina unai regerege dainai helai taudia do idia kamonai lasi. Unai dainai, dala namona ai laga-ani oi gaukaralaia be namo, unai amo kamonai taudia oi durua bena oi gwauraia hereva namodia amo namo do idia abia.

Kamonai Taudia Idia Haere Totona Laga-Ani. Ena be emu hereva lalonai kamonai taudia idia haere lasi, to gau badana be idia dekenai nega oi henia, edia gadona amo lasi, to edia lalona dekenai idia haere totona. Bema kamonai taudia idia laloa totona henanadai oi gwauraia to oi laga-ani namonamo lasi, unai henanadai edia anina ia boio bamona.

Momokani, platfom amo oi hereva neganai sibona lasi, to ma haida oi haroro henia neganai danu oi laga-ani be mai anina bada. Toana be taunimanima haida idia laga-ani lasi. Bema oi be unai bamona, namona be oi gaukara goada laga-ani karana amo emu hereva oi hanamoa totona. Emu herevahereva karana do ia namo bona emu haroro gaukara ai oi havaraia anina do ia bada. Laga-ani be rege lasi negana ta, bona idia gwau rege lasi negana ese hereva ia hadokoa sisina, anina ia hahedinaraia, lalona ia veria, bona kamonai karana ia durua.

Dina ta ta ai oi herevahereva karana be lalohadai gwauraia bona kamonai karana. Ma haida edia hereva oi kamonai bona idia gwauraia gaudia oi laloa bada neganai, idia ese oiemu hereva do idia kamonai. Unai ia vara totona namona be emu laga-ani ena nega ia hegeregere edia lalohadai idia hahedinaraia totona.

Haroro gaukara lalonai, nega momo anina ita havaraia bema herevahereva dalanai ita haroro. Witnes taudia momo idia davaria hanamoa herevadia murinai, idia ura herevalaia gauna idia hahedinaraia bona henanadai idia henia be namo. Idia laga-ani, ruma tauna ia haere diba totona, bena iena hereva hegeregerena do idia hereva. Herevahereva lalonai nega momo ruma tauna dekenai nega idia henia ia hereva totona. Idia diba ta do idia durua be auka lasi, bema idia herevalaia gauna dekenai iena lalohadai idia diba.​—Aon. 20:5.

Momokani, taunimanima iboudiai ese haere namodia idia henia lasi. To unai ese Iesu ia koua lasi, ena laga-ani edia lata idia hegeregere ia idia dagedage henia taudia danu idia hereva totona. (Mar. 3:​1-5) Bema ta dekenai nega oi henia ia hereva totona, ia oi hagoadaia do ia laloa, bena iena kudouna dekenai ia noho gaudia ia hahedinaraia diba. Momokani, ita haroro ena badina ta be taunimanima dekenai Dirava ena Hereva amo gau badadia, idia dekenai edia lalona idia hadaia gaudia, ita hahedinaraia bona unai dala ai edia kudouna ita hamarerea.​—Heb. 4:12.

Haroro gaukara lalonai laga-ani karana maorona be diba namona ta. Bema oi gaukaralaia namonamo, lalohadai oi hahedinaraia goevagoeva bona do idia laloaboio lasi.

OI HEREVA eiava duahiduahi badabada neganai, gau badana be hereva ta ta oi gwauraia maoro bona mai anina herevadia bona lalohadai ta idia hahedinaraia hebou herevadia oi hahedinaraia maoro, lalohadai idia hedinarai goevagoeva totona.

Mai anina herevadia hahedinaraia maoro karana be hereva haida eiava momo hahedinaraia karana sibona lasi. Gau badana be hereva maorodia oi hahedinaraia. Bema hereva kereredia oi hahedinaraia, kamonai taudia ese emu hereva ena anina do idia lalo-pararalaia namonamo lasi, bena emu hereva do idia laloa lasi. Ena be oi herevalaia gauna be namo, to bema mai anina herevadia oi hahedinaraia maoro lasi, kamonai taudia do oi hagoadaia lasi.

Dala idauidau ai mai anina herevadia oi hahedinaraia diba, nega momo inai dala haida idia gaukaralaia hebou: gado regena oi habadaia, hemami ena goada oi habadaia, oi hereva metairametaira, lalohadai ta vairanai eiava murinai (eiava ruaosi ai) oi laga-ani, bona emu imana bona vairana ena toana amo. Gado haida ai, gado regena idia abia isi eiava idia hadihoa karana amo mai anina herevadia idia hahedinaraia diba. Oi herevalaia gauna bona oi herevalaia gabuna hegeregerena do oi gaukaralaia dalana oi abia hidi.

Do oi hahedinaraia gaudia oi abia hidi neganai, inai oi laloa. (1) Sentens ta ta ai, do oi hahedinaraia herevadia oi abia hidi neganai unai sentens sibona lasi to unai paragraf ena sentens ma haida oi laloa danu. (2) Lalohadai matamatana, herevana ia be hereva badana matamatana eiava lalohadai badana herevalaia dalana matamatana, oi hahedinaraia totona mai anina herevadia hahedinaraia daladia oi gaukaralaia diba. Unai amo oi herevalaia gauna ena dokona idia laloa diba danu. (3) Reana hereva henia tauna ese mai anina herevadia ia hahedinaraia, iena hemami ia herevalaia gauna dekenai ia hahedinaraia totona. (4) Mai anina herevadia hahedinaraia maoro karana amo hereva ta ena hereva badadia oi hahedinaraia diba danu.

Hereva henia tauna eiava taunimanima vairanai ia duahiduahi tauna ese unai dala 4 ai mai anina herevadia ia hahedinaraia totona, gau badana be ia herevalaia eiava duahia gauna ia lalo-pararalaia namonamo bona mai momokani ida ia ura kamonai taudia ese unai hereva do idia abia dae. Nehemia 8:8 ese Esera ena negai taunimanima idia hadibaia dalana ia hahedinaraia, ia gwau: “Idia ese taunimanima idia durua, bona Taravatu ena hereva ibounai [“idia duahia bona,” NW] ena anina idia hedinaraia namonamo.” Ia hedinarai Dirava ena Taravatu idia duahia bona idia gwauraia hedinarai taudia idia diba kamonai taudia idia durua be gau badana, idia duahia herevadia edia anina idia lalo-pararalaia, idia laloatao, bona idia badinaia totona.

Hekwakwanai Ia Havaraia Gaudia. Taunimanima momo be dina ta ta ai idia herevahereva neganai, edia hereva ena anina idia hahedinaraia diba. To, reana ta ese ia torea gauna idia duahia neganai, do idia hahedinaraia hereva eiava lalohadai idia abia hidi be auka. Durua gauna badana be unai gauna ibounai idia lalo-pararalaia namonamo. Anina be unai hereva idia stadilaia namonamo be namo. Unai dainai, bema oi idia noia kongregesen ena hebou dekenai gau ta do oi duahia, namona be oi hegaegae namonamo.

Taunimanima haida be nega ta ta ai hereva haida idia hahedinaraia sibona. Reana sentens ta ta ai hereva ta idia hahedinaraia, herevana unai be mai anina eiava lasi. Ma haida ese reana ta, dekenai, bona neganai, eiava to bona danu bamona herevadia idia hahedinaraia. Bema hereva hahedinaraia karana ese lalohadai ia hahedinaraia goevagoeva lasi, kamonai karana ia hadikaia.

Hereva henia taudia haida ese mai anina herevadia idia hahedinaraia totona edia gado regena idia habadaia bena kamonai taudia idia laloa idia ia gwau henia. To unai ese namo ia havaraia lasi. Bema hereva henia tauna ese dala namona ai mai anina herevadia ia hahedinaraia lasi, mamina be ia laloa kamonai taudia idia hegeregere lasi. To dala namona be mai ena lalokau ida edia lalona ia veria bona do idia diba ia gwauraia gauna be Baibel ena hereva bona ia be maoromaoro!

Hanamoa Daladia. Nega momo mai anina herevadia ia hahedinaraia maoro lasi tauna be unai ia diba lasi. Reana ia namo bema ma ta ese ia dekenai unai ia herevalaia. Bema unai kara oi hanamoa be namo, sikuli naria tauna ese oi do ia durua. Danu, ia hereva namonamo tauna ta ena heduru oi noia diba. Ia oi noia emu duahiduahi bona hereva do ia kamonai bona hanamoa daladia do ia gwauraia.

Reana oi ia durua tauna do ia gwau unai kahana tohoa totona Gima Kohorona ena hereva ta oi gaukaralaia. Reana oi do ia hamaoroa sentens ta ta oi laloa, bena oi itaia edena mai anina hereva eiava herevadia oi hahedinaraia be namo, kamonai taudia ese anina idia lalo-pararalaia haraga totona. Reana oi ia hadibaia italik ai idia torea herevadia oi laloa namonamo. Oi laloatao sentens lalonai idia noho herevadia idia gaukara hebou. Nega momo hereva ta ta sibona lasi, to hereva momo oi hahedinaraia hebou.

Dahaka do oi hahedinaraia oi diba totona, reana oi ia durua tauna ese oi ia hagoadaia unai sentens tamona sibona lasi to sentens ma haida do oi laloa danu. Unai paragraf ese dahaka lalohadai badana ia hahedinaraia? Unai ena anina sentens ta ai oi hahedinaraia herevadia dekenai be dahaka? Hereva kwarana bona oi duahia gauna ataiai ia noho hereva kwarana maragina oi laloa. Do oi hahedinaraia herevadia dekenai edia anina be dahaka? Unai ibounai oi laloa be namo. To namona be hereva momo oi hahedinaraia goada lasi.

Herevana oi hereva eiava oi duahiduahi, reana oi ia durua tauna ese oi ia hagoadaia gau ta oi herevalaia dalana hegeregerena mai anina herevadia oi hahedinaraia. Gau badana be gau ta oi herevalaia dalana ia ore gabudia eiava anina bada lalohadai ta ia ore bona ma ta ia matamaia gabudia oi laloa. Kamonai taudia do idia moale bema oiemu hereva amo unai gabudia idia itaia. Unai do ia vara bema inai bamona hereva, hegeregere gau ginigunana be, iharuana be, dokonai, unai dainai, bona ita gwau diba, oi hahedinaraia.

Danu, oi ia durua tauna ese emu lalona ia veria, edia mamina oi hahedinaraia be namo lalohadai oi lalodia totona. Unai oi karaia totona reana inai bamona hereva, hegeregere dika eiava namo momokani, lasi, gau badana, bona nega ibounai, do oi hahedinaraia. Unai oi karaia neganai kamonai taudia edia hemami oi herevalaia gauna dekenai oi haidaua diba. Stadi 11, “Hebogahisi Bona Hemami,” lalonai unai do ita herevalaia.

Mai anina herevadia hahedinaraia karana hanamoa totona oi do ia hagoadaia, oi ura kamonai taudia ese do idia laloatao hereva badadia oi diba goevagoeva. Taunimanima vairanai oi duahiduahi neganai unai oi karaia daladia be Stadi 7, “Lalohadai Badadia Hahedinaraia,” dekenai bona hereva oi henia neganai unai oi karaia daladia be Stadi 37, “Hereva Badadia Hahedinaraia,” dekenai do ita laloa.

Bema oi ura emu haroro gaukara oi hanamoa, siri oi duahia dalana oi laloa namonamo. Namona be oi sibona oi nanadaia, ‘Inai siri lau duahia ena badina be dahaka?’ Oi be hadibaia tauna dainai, hereva oi gwauraia maoro sibona be hegeregere lasi. Ena be mai hemami ida oi duahiduahi, to unai danu ia hegeregere lasi. Bema ta ena henanadai oi haerelaia eiava hereva momokani badana ta oi hadibaia, unai siri lalonai oi herevalaia gaudia idia durua herevadia do oi hahedinaraia. Bema unai oi karaia lasi, reana oi duahia hereva ia kamonai tauna be mai anina herevana ia itaia lasi.

Hereva henia karana ia diba namonamo lasi tauna ese mai anina hereva eiava hereva haida ia hahedinaraia neganai, reana idia ia hahedinaraia goada momokani. Unai be miusiki gadaralaia karana ia dibaia matamaia tauna ese nouti ia gadaralaia bamona. To, karaia loulou karana amo unai “nouti” ta ta be “miusiki” mai ena hairai ai ia halaoa.

Karaia daladia badadia oi dibaia murinai, hereva henia namonamo taudia edia kara oi itaia karana ese oi do ia durua. Nega sisina murinai, hereva hahedinaraia daladia amo oi havaraia namo do oi itaia. Bona oi herevalaia gaudia edia anina ia hedinarai goevagoeva totona hereva hahedinaraia daladia idauidau edia namo do oi laloa bada. Mai anina herevadia hahedinaraia maoro karana oi hanamoa neganai, emu duahiduahi bona hereva amo anina oi havaraia diba.

Mai anina herevadia hahedinaraia karana oi dibaia sisina sibona lasi. Emu hereva ese anina ia havaraia totona do oi hanamoa noho ela bona mai anina herevadia hahedinaraia karana oi diba namonamo bona ia amo ma haida oi hamoalea diba.

DUAHIDUAHI namonamo tauna ese sentens sibona eiava unai sentens ia noho paragraf sibona ia laloa lasi. Ia duahiduahi neganai, ia duahia herevana ibounai ena lalohadai badadia ia laloa. Do ia hahedinaraia gaudia be unai hegeregerena ia abia hidi.

Bema unai bamona ia karaia lasi, iena duahiduahi lalonai hereva badadia idia hedinarai lasi. Hereva ta ia hedinarai goevagoeva lasi. Iena duahiduahi ia haorea murinai, gau badana ta idia laloatao be auka.

Nega momo lalohadai badadia hahedinaraia namonamo karana ese Baibel duahiduahi ia hanamoa bada. Unai bamona hereva hahedinaraia karana ese ruma bese ena Baibel stadi ai eiava kongregesen hebou ai paragraf duahia karana ia durua bada. Bona maniuskrip amo hereva idia henia neganai, iseda hebouhebou dekenai idia karaia bamona, unai kara be mai anina bada.

Do Oi Karaia Dalana. Reana sikuli lalonai Baibel duahiduahi do oi karaia. Dahaka do oi hahedinaraia be namo? Bema do oi duahia kahana be mai ena lalohadai badana ta eiava ia lalonai mai anina bada gauna ta ia vara, unai oi hahedinaraia be namo.

Herevana do oi duahia kahana be ane ta, aonega herevana ta, eiava sivarai ta, kamonai taudia do ia durua bema unai oi duahia namonamo. (2 Tim. 3:​16, 17) Unai oi karaia totona do oi duahia kahana bona kamonai taudia oi laloa be namo.

Bema Baibel stadi eiava kongregesen hebou dekenai buka eiava magasin ena kahana ta do oi duahia badabada, dahaka lalohadai badadia oi hahedinaraia be namo? Do oi laloa idia printaia henanadai edia haere be unai kahana ena lalohadai badadia. Kwara hereva maragina ena hereva idia gwauraia lalohadai oi hahedinaraia danu.

Namona be kongregesen lalonai oi henia herevadia totona maniuskrip oi gaukaralaia hanaihanai lasi. To, nega haida hebouhebou ena kahana haida totona maniuskrip idia henia, unai amo dala tamona ai hebouhebou iboudiai dekenai lalohadai do idia halasia. Hereva henia tauna ese unai bamona maniuskrip ena lalohadai badadia ia hahedinaraia diba totona maniuskrip ia stadilaia namonamo guna. Hereva badadia be dahaka? Unai do ia itaia be reana auka lasi. Hereva badadia be iena lalona idia veria gaudia sibona lasi. Idia be lalohadai badadia, idia latanai hereva ibounai idia haginia bamona. Nega haida maniuskrip lalonai lalohadai badana be hereva kwadogi amo idia hahedinaraia guna, bena sivarai ta eiava badina ta ia herevalaia hamatamaia. To nega momo, gau ta hamomokania gaudia idia hahedinaraia guna bona murinai lalohadai goadana idia gwauraia. Hereva henia tauna ese unai hereva badadia ia itaia neganai, namona be maniuskrip dekenai ia makaia. Nega momo idia be foa eiava faiv sibona. Unai murinai, kamonai taudia ese unai gaudia idia kamonai haraga dalanai ia duahia loulou. Unai gaudia be hereva ena kahana badadia. Bema ena hereva lalonai mai anina kahadia ia hahedinaraia maoro, lalohadai badadia do idia laloatao. Unai be hereva henia tauna ena tahua gauna.

Hereva henia tauna ese dala idauidau ai kamonai taudia ia durua diba, hereva badadia idia laloatao totona. Unai dala haida be ena ura badana, ena hereva ena haraga, bona ena hemami ena dobu ia hahedinaraia eiava ena imana ia gaukaralaia.