“Ai Ibounai Ai Lalotamona”

1, 2. (a) Keristani kongrigeisen ginigunana ena hakaua oreana ese dahaka mai anina bada henanadai ia laloa be namo? (b) Dahaka ese unai tadikaka ia durua disisen maorona idia karaia totona?

IERUSALEMA ai, hebou taudia ibounai be mai ura ida hakaua oreana ena disisen idia naria. Aposetolo taudia bona tau badadia be ta ta idia raraia, idia laloparara unai be mai anina bada negana, disisen idia karaia totona. Kopina utua hepapahuahuana ese mai anina bada henanadai haida ia havaraia. Keristani taudia be Mose ena Taravatu henunai, a? Iuda Keristani taudia be Idau Bese Keristani taudia amo idia idau, a?  

² Unai hebou idia gunalaia taudia be hamomokania hereva momo idia kamonai vadaeni. Dirava ena peroveta Hereva idia tahua bona idia kamonai gaudia ese ia hahedinaraia Iehova ese gaukara ia hanamoa. Bona ta ta edia lalohadai idia gwauraia hedinarai vadaeni. Kopina utua karana dekenai idia herevalaia gaudia ese ia hahedinaraia, Iehova ena lauma ese idia ia hakaua. Idia ese unai hakaua dalana do idia badinaia, a?

3. Kara karoa 15 ai ia noho sivaraina ita stadilaia karana amo, dahaka namo do ita davaria?

³ Unai tatau ese lauma helaga ena dala idia badinaia totona, abidadama bona gari lasi karana idia hahedinaraia be namo. Idia karaia disisen dainai, Iuda tomadiho gunalaia taudia ese idia dagedage henia garina. Bona kongrigeisen lalonai haida ese idia inai henidia, badina idia ura Dirava ena taunimanima ese Mose ena Taravatu idia badinaia. Hakaua oreana ese dahaka do ia karaia? Mani ita itaia. Inai kahana ita stadilaia lalonai, do ita itaia unai tatau ese haheitalai namona idia hahedinaraia, hari Hakaua Oreana ese ia badinaia totona. Ita Keristani taudia eda mauri ai disisen ita karaia eiava hekwakwanai ita davaria neganai, edia haheitalai ita tohotohoa be namo.

“Peroveta Taudia Edia Hereva Hegeregerena” (Kara 15:13-21)

4, 5. Iamesi be edena peroveta herevadia ia gwauraia?

⁴ Hahediba tauna Iamesi, Iesu ena tadina unai, ia hereva.a Unai negai reana ia be unai hebou ena seamani. Bona toana be ena hereva amo, ia ese hakaua oreana ia karaia vadaeni gwaubou herevana ia hagoadaia. Iamesi be idia hebou taudia dekenai, ia gwau: “Simeona ese ita ia hamaoroa goevagoeva vadaeni, edena bamona nega ginigunana ai Dirava ese idau bese taudia ia laloa, bona idia huanai haida ia abia hidi ena ladana idia abia totona. Bona unai be Peroveta Taudia edia hereva hegeregerena.”​—Kara 15:14, 15.

⁵ Simona Petero, Paulo, bona Banaba edia hereva dainai, Iamesi ese Baibel ena siri haida ia laloatao, unai siri ese kopina utua karana dekenai diba ma haida idia hahedinaraia. (Ioa. 14:26) Iamesi ia gwau unai be “peroveta taudia edia hereva hegeregerena,” unai murinai ia ese Amosa 9:11, 12 ena hereva ia gwauraia lou. Amosa bukana be Heberu Toretoredia—idia gwauraia “Peroveta Taudia”—ena lista lalonai ia noho. (Mat. 22:40; Kara 15:16-18) Do oi davaria, Iamesi ia herevalaia gaudia be hari ia noho Amosa bukana amo ia idau. Toana be Iamesi ese Septuagint Baibel—Grik amo idia hahanaia Heberu Toretoredia—edia hereva ia gwauraia.

6. Kopina utua herevana dekenai, Baibel ese dahaka hereva ma haida ia hahedinaraia?

⁶ Peroveta tauna Amosa amo, Iehova ia gwau nega do ia mai bona “Davida ena ruma”—Mesia Basileiana unai—do ia haginia. (Ese. 21:26, 27) Iehova be Iuda taudia korikoridia sibona do ia kara henia, a? Lasi. Peroveta hereva ese ia hahedinaraia, “bese idauidau taudia ibounai” do idia haboua bona ‘Dirava ena ladana do idia abia.’ Laloatao, Petero ia gwau: “Dirava ese ia hahedinaraia idia [Idau Bese abidadama taudia] bona ita [Iuda Keristani taudia] be idau lasi, to idia be edia abidadama dainai, ia ese edia kudouna ia hagoevaia.” (Kara 15:9) Unai dainai ita gwau diba, Dirava ia ura Iuda bona Idau Bese taudia be Basileia ena lohia taudia ai idia lao. (Roma 8:17; Efe. 2:17-19) Peroveta herevadia ese idia hahedinaraia lasi, Idau Bese taudia be kopina do idia utua eiava Iuda tomadihona do idia abia dae.

7, 8. (a) Iamesi be dahaka hereva ia gwauraia? (b) Edena dala ai Iamesi ena hereva ita lalopararalaia be namo?

⁷ Iamesi ese Baibel amo hamomokania herevadia ia itaia bona unai hebou amo ia kamonai hereva mai siahuna dainai, ia gwau: “Unai dainai egu lalohadai be inai, Dirava idia ura hesiai henia idau bese taudia do ita hametaua lasi, to ita tore henidia bona hadibadia kaivakuku ese idia hamiroa gaudia, matabodaga karadia, aiona idia gigia animal edia hidio, bona rara do idia dadaraia. Badina guna negadia amo, siti ta ta ai haida ese Mose ena toretore idia harorolaia, badina Sabati ibounai sinagoga lalodiai unai toretore idia duahia badabada.”​—Kara 15:19-21.

⁸ Iamesi be unai hebou ena seamani dainai, ena siahu ia gaukaralaia tadikaka totona abia hidi ia karaia, a? Lasi vaitani! Iamesi ia gwau, “unai dainai egu lalohadai be inai” ese ia hahedinaraia, ia be tadikaka oreana totona abia hidi ia karaia lasi, to ia ura idia kamonai gaudia bona Baibel ese kopina utua karana ia herevalaia dalana dekenai, edia lalohadai idia gwauraia.   

9. Iamesi ia gwauraia herevana ese dahaka namo ia havaraia?

⁹ Iamesi ese lalohadai namona ia gwauraia, a? Oibe, badina gabeai aposetolo taudia bona tau badadia ese iena hereva idia abia dae. Unai ese dahaka namo ia havaraia? Unai disisen ese Idau Bese Keristani taudia ia “hametaua” lasi Mose ena Taravatu idia badinaia totona. (Kara 15:19) Bona unai disisen ese Iuda Keristani taudia edia lalomamina ia matauraia, idia be lagani momo lalonai ‘Sabati ibounai Sinagoga lalodiai Mose ena toretore’ idia kamonai.b (Kara 15:21) Unai dala ese Iuda bona Idau Bese Keristani taudia edia hetura karana do ia hagoadaia momokani. To mai anina bada gauna be inai: Unai disisen ese Iehova do ia hamoalea, badina unai be iena ura hegeregerena. Unai hekwakwanai ese kongrigeisen ena lalotamona bona noho namo karana ia hadikaia, to dala namona amo unai hekwakwanai idia hamaoromaoroa! Bona hari Keristani kongrigeisen dekenai unai be haheitalai hereadaena!

10. Edena dala ai, hari inai negai Hakaua Oreana ese aposetolo edia negai ia noho hakaua oreana ia badinaia?

¹⁰ Karoa 13 ai ita herevalaia bamona, aposetolo edia negai ia noho hakaua oreana bamona, hari Iehova ena Witnes taudia edia Hakaua Oreana ese gau ibounai lalonai Guba bona Tanobada edia Lohia Badana, Iehova, bona kongrigeisen ena Kwarana, Iesu Keriso, edia hakaua dalana idia badinaia.c (1 Kor. 11:3) Edena dala ai unai idia karaia? Tadikaka, Albert D. Schroeder be lagani 1974 amo Hakaua Oreana ida ia gaukara ela bona March 2006 ai ena tanobada maurina ia rakatania, ia gwau: “Hakaua Oreana ena memba taudia be Wednesday ai idia hebou, guriguri amo hebou idia kehoa bona Iehova idia noia ena lauma helaga amo do ia hakaudia. Namona be idia herevalaia bona abia hidi gaudia ibounai be Dirava ena Hereva, Baibel, ida ia hegeregere.” Ma danu, nega daudau lalonai Hakaua Oreana ida ia gaukara bona March 2003 ai ena tanobada maurina ia rakatania tauna, Milton G. Henschel, ese Gilead sikuli ena 101 klas taudia dekenai mai anina bada henanadai ia henia. Ia gwau, “Tanobada dekenai orea ta ese disisen badana ta ia do karaia lasi neganai, ena gunalaia taudia ese Dirava ena Hereva, Baibel, idia tahua guna, a?” Haere ita diba vadaeni, ani?

‘Tatau Haida Idia Abia Hidi Bona Idia Siaia Lao’ (Kara 15:22-29)

11. Hakaua oreana ia karaia disisen be edena dala ai kongrigeisen taudia dekenai idia gwauraia?

¹¹ Ierusalema ai, hakaua oreana ese kopina utua ena hepapahuahu hamaoromaoroa ena disisen ia karaia. To, kongrigeisen tadikaka idia lalotamona totona, unai disisen be lalona hagoadaia bona lalokau dalanai idia gwauraia be namo. Edena dala ai unai idia karaia diba? Baibel ia gwau: “Aposetolo taudia, tau badadia bona kongrigeisen taudia ibounai ese edia lalona idia hadaia, idia huanai tatau haida idia abia hidi Paulo bona Banaba ida Antioka dekenai do idia siaia lao. Idia ese Iuda, ena ladana ma ta be Barasaba, bona Sila idia siaia, idia be tadikaka idia gunalaia taudia.” Ma danu, revareva ta be unai tatau ida idia siaia bona Antioka, Suria, bona Kilikia ai idia noho kongrigeisen dekenai idia duahia diba.​—Kara 15:22-26.

12, 13. Dahaka namo ia vara, (a) Iuda bona Sila idia lao neganai? (b) hakaua oreana ena revareva amo?

¹² Iuda bona Sila be “tadikaka idia gunalaia taudia” dainai, idia hegeregere momokani hakaua oreana ena gwaukau taudia ai idia lao totona. Unai tatau foa be kopina utua dainai ia vara hepapahuahu ena haere sibona idia abia lao lasi, to hakaua oreana ese ia gwauraia dala matamatana danu. Oibe, unai “abia hidi” tatau be unuseniai idia noho dainai, unai ese Ierusalema ai idia noho Iuda Keristani taudia bona kongrigeisen ma haida ai idia noho Idau Bese taudia edia hetura karana do ia hagoadaia. Unai be aonega bona lalokau dalana! Oibe, unai ese Dirava ena taunimanima huanai maino bona lalotamona ia havaraia.

¹³ Unai revareva ese Idau Bese Keristani taudia dekenai kopina utua ena lalohadai maorona ia hahedinaraia sibona lasi, to Iehova ena hahenamo bona lalonamo abia totona do idia karaia gaudia ia hahedinaraia danu. Unai revareva ena hereva badana be inai: “Lauma helaga ena heduru dainai emai lalona ai hadaia, umui dekenai maduna ma haida do ai henia lasi, to inai mai anina bada gaudia sibona: Kaivakuku dekenai idia bouboulaia gaudia, rara, aiona idia gigia animal edia hidio, bona matabodaga karadia umui dadaraia noho. Bema unai gaudia umui dadaraia, namo do umui davaria. Bamahuta!”​—Kara 15:28, 29.

14. Inai heiriheiri tanobadana ai, edena dala ai Iehova ena taunimanima be mai lalotamona ida idia gaukara?

¹⁴ Hari, tanobada hegegemadai idia noho kongrigeisen 100,000 mai kahana lalonai, Iehova ena Witnes taudia 8,000,000 mai kahana edia abidadama bona kara be tamona. Inai heiriheiri bada tanobadana ai, Iehova ena taunimanima be edena bamona mai lalotamona ida idia noho? Oibe, lalotamona ia noho badina kongrigeisen ena Kwarana, Iesu Keriso, ese “hesiai tauna mai ena kamonai bona mai ena aonega” Hakaua Oreana unai, amo hakaua hereva ia henia. (Mat. 24:45-47) Bona tanobada hegegemadai tadikaka oreana be mai moale ida Hakaua Oreana ena hakaua dalana idia badinaia dainai, lalotamona ia vara danu.

“Unai Hagoadaia Herevana Dainai Idia Moale” (Kara 15:30-35)

15, 16. Kopina utua hepapahuahu hamaoromaoroa karana ese moale ia havaraia eiava? Dahaka dainai unai ese anina namona ia havaraia?

¹⁵ Kara bukana ena sivarai ese ia hahedinaraia, tadikaka be Ierusalema amo Antioka dekenai idia ginidae neganai, “taunimanima momo idia haboua bona idia dekenai unai revareva idia henia.” Antioka tadikaka be hakaua oreana amo unai revareva idia abia neganai, dahaka idia karaia? “[Unai revareva] idia duahia murinai, unai hagoadaia herevana dainai idia moale.” (Kara 15:30, 31) Danu, Iuda bona Sila ese “hagoadaia hereva momo amo tadikaka idia durua bona hagoadaia.” Unai dainai ita gwau diba, unai tatau rua be “peroveta taudia,”—Banaba, Paulo, bona ma haida idia gwauraia peroveta taudia bamona—idia be Dirava ena ura idia gwauraia hedinarai taudia.​—Kara 13:1; 15:32; Eso. 7:1, 2.

¹⁶ Oibe, Iehova ese unai hepapahuahu hamaoromaoroa totona idia karaia dala ibounai ia hanamoa. Dahaka dainai anina namona ia vara? Badina hakaua oreana ese Dirava ena Hereva bona lauma helaga ena hakaua dalana amo, nega korikorina ai unai hakaua dalana ia hahedinaraia. Danu, unai disisen be lalokau dalanai kongrigeisen taudia dekenai idia gwauraia.

17. Aposetolo edia nega bamona, hari inai negai loaloa naria taudia ese dahaka idia karaia?

¹⁷ Iehova ena Witnes taudia edia Hakaua Oreana ese unai dala ia badinaia danu, bona nega korikori ai tadikaka oreana dekenai hakaua herevadia ia siaia. Oibe, hakaua oreana ese disisen idauidau ia karaia neganai, auka lasi dalanai kongrigeisen taudia dekenai ia hadibaia. Bona unai bamona ia karaia dalana ta be, sekit naria taudia edia vadivadi karana amo. Sibona edia ura idia dadaraia tadikaka ese kongrigeisen ta ta idia vadivadi henia, bona hakaua bona hagoadaia herevadia idia henia. Paulo bona Banaba bamona, hesiai gaukara lalonai edia nega bada idia gaukaralaia, “bona taunimanima momo ida Iehova ena hereva ena sivarai namona idia harorolaia.” (Kara 15:35) Bona Iuda bona Sila bamona, idia ese “hagoadaia hereva momo amo tadikaka idia durua bona hagoadaia.”

18. Dirava ena taunimanima be edena bamona idia diba, Iehova ena hahenamo do idia abia noho?

¹⁸ To kongrigeisen be edena bamona? Inai heiriheiri tanobadana ai, dahaka ese kongrigeisen ibounai ia durua maino bona noho namo idia moalelaia totona? Hahediba tauna Iamesi be gabeai inai hereva ia gwauraia, ia gwau: “Ia abia tauna be ia kara goeva, ia be maino tauna, ia laloa maoromaoro, hereva ia badinaia haraga, . . . Danu, maino idia karaia taudia ese kara maoromaoro ena huahua be maino negana ai idia hadoa.” (Iam. 3:17, 18) Iamesi ese Ierusalema ai idia karaia hebouna ia laloa bena unai hereva ia gwauraia eiava lasi be ita diba lasi. To Kara karoa 15 ena sivarai tahua karana amo ita diba, bema lalotamona bona gaukara hebou karana idia noho, Iehova ese unai ia hanamoa.

19, 20. (a) Dahaka ese ia hahedinaraia Antioka kongrigeisen ai maino bona lalotamona ia noho? (b) Paulo bona Banaba be dahaka idia karaia?

¹⁹ Ia hedinarai goevagoeva, Antioka kongrigeisen lalonai maino bona lalotamona idia noho. Antioka ai idia noho tadikaka be Ierusalema amo idia mai tadikaka dekenai idia badu lasi, to Iuda bona Sila edia vadivadi karana idia laloa bada, badina “Nega sisina daudau unuseniai idia noho murinai, tadikaka ese mai maino ida idia siaidia giroa, guna idia ruaosi idia siaia mai taudia dekenai.” Oibe, unai be Ierusalema dekenai.d (Kara 15:33) Ierusalema ai idia noho tadikaka be unai tatau rua edia sivarai idia kamonai neganai, idia moale bada. Iehova ena hebogahisi hereadaena dainai, mai moale ida edia misinari gaukara idia hagugurua diba!

²⁰ Paulo bona Banaba be Antioka dekenai idia noho bona unuseniai haroro gaukara idia goadalaia, hegeregere hari sekit naria taudia ese idia karaia bamona, edia henari henunai idia noho kongrigeisen ta ta idia vadivadi henia. (Kara 13:2, 3) Iehova ena taunimanima dekenai unai be hahenamo badana! To, edena dala ai Iehova ese idia rua ia gaukaralaia bona ia hanamodia? Unai be karoa gabena ai do ita itaia.