Iehova ena Witnes taudia hida oi diba? Ai haida be reana emu neiba, moni gaukara o sikuli turadia. Eiava ai be reana oi dekenai Baibel ai herevalaia. Ai be daidia, bona dahaka dainai ai abia dae herevadia be taunimanima dekenai ai harorolaia?

Ai be emu neiba. Emai tano bona mauri daladia be idauidau. Guna ai haida emai dubu be idau o Dirava ai abia dae lasi. To, Iehova ena Witnes ta ai ai do lao lasi neganai, nega ai atoa Baibel ena hahediba herevadia ai tahua namonamo totona. (Kara 17:11) Ai dibaia gaudia ai abia dae, bena ai sibona ese abia hidi ai karaia Iehova Dirava ai tomadiho henia totona.

Baibel ai stadilaia amo heduru ai abia. Taunimanima ibounai bamona, ai danu be hekwakwanai haida ai davaria bona mai emai manoka gaudia. To, dina ta ta ai Baibel ena hakaua herevadia ai badinaia dainai, unai ese ai ia durua emai mauri ai haidaua totona. (Salamo 128:1, 2) Unai dainai, ai ura Baibel amo ai dibaia gaudia be ma haida dekenai ai harorolaia.

Dirava ena hakaua herevadia ai badinaia. Baibel amo ai dibaia gaudia ai badinaia dainai, emai tauanina ai naria namonamo, ma haida ai matauraia, ai koikoi lasi, bona hebogahisi karana ai hahedinaraia. Baibel ena hakaua herevadia ese ai ia durua dainai, emai komiuniti lalonai gaukara namodia ai karaia, emai famili lalonai lalotamona ia noho, bona kara maoromaoro ai badinaia. Ai abia dae “Dirava be taunimanima edia toana ia laloa lasi” dainai, ai be ruma bese badana ta bamona, Dirava ena Hereva ese ai ia hatamonaia, bona ai ura lasi emai kopina ena kala, tano o politikol karadia dainai ai heiriheiri. Ena be ai be taunimanima ibounai bamona, hekwakwanai ai davaria bona mai emai manoka gaudia, to emai noho dalana amo ai hahedinaraia emai orea be idau.​—Kara 4:13; 10:34, 35.

• Edena dala ai Iehova ena Witnes taudia be ma haida bamona?

• Witnes taudia be Baibel idia stadilaia amo dahaka idia dibaia?

Taunimanima momo idia laloa inai ladana, Iehova ena Witnes taudia, be dubu matamata ta ena ladana. To, lagani 2,700 mai kahana gunanai, Baibel ese hesiai taudia haida edia ladana ia gwauraia, Dirava momokani tamona ena “witnes taudia” o hereva hamomokania taudia. (Isaia 43:10-12, NW) Ela bona lagani 1931 ai, momo ese emai ladana idia gwauraia, Bible Students. To, dahaka dainai inai ladana, Iehova ena Witnes taudia, ai abia?

Emai Dirava ena ladana ia hahedinaraia. Maniuskrip gunadia haida ese idia hahedinaraia, Baibel lalonai Dirava ena ladana, Iehova, be nega tausen momo ia hedinarai. Hari, Baibel momo lalodiai, unai ladana ena gabu ai dagi ladadia idia atoa, hegeregere Lohiabada o Dirava. To, Dirava momokanina sibona ese ena ladana korikorina, Iehova, ia hahedinaraia: “Unai amo inai bese taudia oredia, bona egu ladana idia abia idau bese taudia be mai edia ura bada ida Iehova do idia tahua. Unai be Iehova ena hereva bona ia ese unai gaudia ia hagugurua noho.” (Kara 15:17) Dirava ena ladana helagana be dirava koikoidia ibounai amo ia idau, bona ai moale badina unai ladana helagana ai abia.

Emai gaukara ena badina ia hahedinaraia. Kara maoromaoro tauna Abela ena nega amo, Noa, Aberahamo, Sara, Mose, Davida bona “witnes orea badana” lalonai idia noho taudia ibounai ese idia hamomokania, idia be Iehova idia abidadama henia. (Heberu 11:4–12:1) Kota ai, witnes tauna ta be kerere lasi tauna ena hereva ia hamomokania hegeregerena, ai danu ai gaukara goada emai Dirava ena sivarai momokanina be ma haida dekenai ai gwauraia hedinarai totona.

Iesu ai tohotohoa. Baibel ia gwau, Iesu be “kamonai bona witnes tauna momokanina.” (Apokalupo 3:14) Iesu sibona ia gwau, ia ese Dirava ‘ena ladana be taunimanima dekenai ia gwauraia hedinarai vadaeni,’ bona nega ibounai Dirava ena “hereva momokani” be ma haida dekenai ia harorolaia. (Ioane 17:26; 18:37) Unai dainai, namona be Keriso ena murinai idia raka taudia ese Iehova ena ladana idia abia bona harorolaia. Ai Iehova ena Witnes taudia ai gaukara goada, unai bamona ai karaia totona.

• Dahaka dainai Bible Students be inai ladana, Iehova ena Witnes taudia, idia abia?

• Edena nega amo Iehova be mai ena witnes taudia, tanobada ai idia noho?

• Iehova ena Witnes tauna hereadaena be daika?

Baibel ia gwau, Keriso ia mase murinai, Keristani taudia ginigunadia huanai, hadibaia taudia koikoidia ese hereva momokani do idia mogea. (Kara 20:29, 30) Unai peroveta herevana be gabeai ia guguru. Idia ese Iesu ena hahediba herevadia be kaivakuku tomadiho henia taudia edia lalohadai ida idia miksia, unai amo Keristani tomadiho koikoi ia matamaia. (2 Timoteo 4:3, 4) Edena bamona ita diba, hari ita abia dae gaudia be Baibel ena hereva hegeregerena?

Iehova ese hereva momokani ia hahedinaraia negana ia ginidae. Ia peroveta, ‘dokona ia ginidae’ neganai, ‘aonega do ia bada herea.’ (Daniela 12:4) Lagani 1870 ai, Baibel ena hereva ia tahua grup maragina ta ia itaia, dubu momo edia hadibaia hereva be Baibel ena hereva hegeregerena lasi. Unai dainai, idia be Baibel ena hereva momokanidia idia tahua matamaia, bona Iehova ese idia ia durua hereva momokani idia lalopararalaia totona.

Kudou maoro taudia ese Baibel idia stadilaia namonamo. Unai Bible Student taudia ese Baibel stadilaia dalana idia hamatamaia, bona hari, ai danu be unai dala ai badinaia noho. Idia ese Baibel ena topik ta ta idia herevalaia. Baibel ena siri ta idia lalopararalaia lasi neganai, siri ma haida dekenai ena anina idia tahua. Bema idia itaia, edia lalohadai be Baibel ena siri ibounai ida ia hegeregere, vadaeni noutbuk ai unai idia torea. Edia stadi karana amo idia davaria hereva momokani haida be inai: Dirava momokanina ena ladana, Basileia, Dirava ia ura taunimanima do idia mauri hanaihanai, tanobada do ia dika diba lasi, mase taudia be gau ta idia karaia lasi, bona toreisi lou helarona. Hereva momokani idia davaria dainai, hahediba hereva koikoidia bona kara dikadia ibounai idia dadaraia.​—Ioane 8:31, 32.

Lagani 1879 ai, Bible Student taudia idia laloparara, taunimanima ibounai dekenai hereva momokani idia harorolaia be namo. Unai dainai unai lagani ai, idia ese magasin ladana Gima Kohorona​—Iehova Ena Basileia Ia Harorolaia idia halasia matamaia, bona hari, unai magasin ai do halasia noho. Danu, ai ese Baibel ena hereva momokanidia be tano 239 bona gado 700 mai kahana dekenai ai harorolaia. Unai dainai, hari aonega ia bada ia lao, guna be unai bamona lasi!

• Keriso ia mase murinai, Baibel ena hereva momokani dekenai dahaka ia vara?

• Dahaka ese ai ia durua Baibel ai hereva momokani ai davaria lou totona?

Lagani momo lalonai, Iehova ena Witnes taudia be Baibel idauidau idia gaukaralaia, printaia bona hariharilaia. To gabeai ai itaia, Baibel matamata ta ai hahanaia be namo, unai amo taunimanima do ia durua “hereva momokani ena diba maoromaoro do idia abia,” badina unai be Dirava ena ura. (1 Timoteo 2:3, 4) Unai dainai, lagani 1950 ai, English gado New World Translation Baibel ena kahana haida ai halasia matamaia. Ai ese unai Baibel be gado 120 mai kahana​—bona Hiri Motu gado​—dekenai ai hahanaia maoromaoro.

Ita lalopararalaia haraga Baibel ta ia noho be namo. Badina gado momo be idia senisi, bona Baibel momo edia hereva haida be hari ita lalopararalaia lasi o ita gaukaralaia lasi. Danu, vanegai sibona, haida be maniuskrip gunadia idia davaria, bona unai ese ai ia durua Heberu gado, Aramia gado, bona Greek gado ai idia torea Baibel ai lalopararalaia namonamo totona.

Dirava ena hereva ia badinaia Baibel ta ia noho be namo. Namo lasi Baibel hahanaia taudia ese Dirava ena hereva helagana idia haidaua, to idaunegai toretoredia idia badinaia be namo. To, Baibel momo ai Dirava ena ladana, Iehova, ia noho lasi.

Dirava ia hanamoa Baibel ta ia noho be namo. (2 Timoteo 3:16) Baibel maniuskrip gunadia (henunai laulau itaia) ai Iehova ena ladana be nega 7,000 bamona ia hedinarai dainai, New World Translation Baibel ai unai ladana be ena gabu maorodia ai idia atoa lou. (Salamo 83:18) Lagani momo lalonai, unai bamona gaudia ai tahua bena Baibel ai hahanaia namonamo dainai, taunimanima idia moale unai Baibel idia duahia totona, badina ia be Dirava ena lalohadai ia hahedinaraia goevagoeva. Ena be New World Translation Baibel be emu gado ai ia noho o lasi, to oi ai hagoadaia dina ta ta ai Iehova ena Hereva oi duahia totona.​—Iosua 1:8; Salamo 1:2, 3.

• Dahaka dainai New World Translation Baibel ai hahanaia?

• Bema ta ia ura Dirava ena ura ia dibaia, dina ta ta ai dahaka ia karaia be namo?