Momo be dubu lao henia karana idia hadokoa, badina edia henanadai ena haere maorodia bona lalona hagoadaia herevadia idia abia lasi. Vadaeni, dahaka dainai Iehova ena Witnes taudia edia kongrigeisen heboudia oi lao be namo? Unuseniai dahaka do oi davaria?

Do oi moale badina oi idia lalokau henia taudia huanai oi noho. Aposetolo edia negai, Keristani taudia be edia kongrigeisen ai idia hebou, unai amo Dirava idia tomadiho henia, Toretore Helagadia idia stadilaia, bona ta ta edia lalona idia hagoadaia. (Heberu 10:24, 25) Idia huanai lalokau ia noho dainai, idia mamia idia be tura namodia​—edia Keristani tadikaka bona taihu​—huanai idia noho. (2 Tesalonika 1:3; 3 Ioane 14) Ai danu be unai dala tamona ai badinaia dainai, ai moale.

Baibel ena hakaua herevadia oi badinaia ena namo. Baibel idia torea taudia edia negai bamona, hari tatau, hahine, bona natudia be gabu tamona ai idia hebou. Dirava ese ia abia hidi taudia ese ai idia hadibaia, emai mauri lalonai Baibel ena hakaua herevadia badinaia daladia ai lalopararalaia totona. (Deuteronomi 31:12; Nehemia 8:8) Unuseniai, ai be henanadai ai haerelaia diba bona ane ai abia, unai amo emai abidadama ai gwauraia hedinarai.​—Heberu 10:23.

Dirava oi abidadama henia karana oi hagoadaia. Aposetolo Paulo be ena negai ia noho kongrigeisen ta dekenai ia gwau: “Lau ura bada umui lau itaia, . . . do ita hagoadaia heheni, umui emui abidadama amo lau umui hagoadaia bona egu abidadama amo umui lau hagoadaia.” (Roma 1:11, 12) Hebou ai, hanaihanai tadikaka bona taihu ai bamoa karana ese emai abidadama ia hagoadaia bona ai ia durua Baibel ena hakaua herevadia ai badinaia totona.

Oi ai boiria emai kongrigeisen hebouna ta dekenai oi mai bona oi sibona ese unuseniai ai karaia gaudia oi itaia diba. Mai moale ida oi do ai welkam henia. Emai hebou iboudiai be fri, o idia mai taudia amo moni ai gogoa lasi.

• Emai kongrigeisen heboudia be daidia edia dala hegeregerena ai karaia?

• Keristani heboudia ita lao ena namo be dahaka?

Herevana medu ia diho o weda ia namo lasi, o uda badadia do ai hanaia, to hanaihanai Kongrigeisen heboudia ai lao. Ena be Iehova ena Witnes taudia edia mauri lalonai hekwakwanai idia davaria bona dina ta ta ena gaukara idia karaia murinai idia hesiku, to dahaka dainai idia hekwarahi edia kongrigeisen taudia idia bamoa totona?

Ai idia durua. Paulo ese kongrigeisen dekenai ai bamoa taudia ia herevalaia neganai, ia gwau: ‘Ta ta ibounai do ai laloa.’ (Heberu 10:24) Unai hereva ena anina be inai: Ma ta ai dibaia namonamo be namo. Unai dainai, Paulo ese ai ia hagoadaia ma haida ai laloa bada totona. Kongrigeisen ai ma haida ai bamoa neganai, ai davaria idia haida ese idia hanaia hekwakwanai be ai ese ai davaria hekwakwanai bamona, bona idia ese ai idia durua diba emai hekwakwanai ai hanaia totona.

Emai hetura karana ia hagoadaia. Kongrigeisen heboudia dekenai, ai be emai tura namodia ida ai hebou. Nega haida idia ida aria o moale karadia ai karaia hebou. Unai hebamo karana ena namo be dahaka? Ta ta laloa bada karana ai dibaia, bona unai ese emai lalokau ia habadaia. Danu, idia ese hekwakwanai idia davaria neganai, idia ai durua, badina idia be emai turadia. (Aonega Herevadia 17:17) Emai kongrigeisen taudia ibounai ai bamoa neganai, ai hahedinaraia ai be ta ta ai laloa bada o “durua heheni.”​—1 Korinto 12:25, 26.

Oi ai hagoadaia Dirava ena ura idia karaia taudia oi bamoa totona. Iehova ena Witnes taudia huanai unai bamona taudia oi bamoa diba. Namona be gau ta ese oi ia koua lasi, to mani ai oi bamoa.

• Dahaka dainai hebou lalodiai emai kongrigeisen taudia ai bamoa?

• Oi ura edena negai emai hebou oi mai, emai kongrigeisen taudia oi dibaia totona?

Keristani taudia ginigunadia be edia hebou lalodiai kara idauidau idia karaia lasi, to ane idia abia, idia guriguri, bona Dirava ena Hereva idia duahia bona herevalaia. (1 Korinto 14:26) Hari inai negai, emai hebou ai unai bamona ai karaia danu.

Baibel amo heduru ai abia. Saturday o Sunday ai, ai be Kingdom Hall dekenai ai hebou, miniti 30 lalonai pablik tok ta ai kamonai totona. Unai tok ese ai ia hagoadaia emai mauri lalonai Baibel ai badinaia bona hari negai idia vara gaudia edia anina ai lalopararalaia totona. Tok henia tauna ese Baibel siri ta ia duahia neganai, ia ese ai ia noia emai Baibel ai unai siri ai itaia. Unai tok murinai, “Gima Kohorona” Stadi be hora tamona lalonai ai karaia. Unai stadi lalonai ai ese Gima Kohorona, stadi gauna, ena atikol ta ai herevalaia hebou. Unai stadi ese ai ia durua emai mauri lalonai Baibel ena hakaua herevadia ai badinaia totona. Tanobada ibounai, emai kongrigeisen 110,000 mai kahana be unai seim Gima Kohorona ena atikol idia stadilaia.

Emai hadibaia karana ai hanamoa. Wiki lalonai ai be hanuaboi ta lalonai hebou toi ai karaia. Hebou ginigunana be Kongrigeisen Baibel Stadi, ia be miniti 30 lalonai henanadai bona haere amo ai karaia. Unai hebou ese ai ia durua Baibel ena hakaua herevadia bona peroveta herevadia ai lalopararalaia totona. Hebou iharuana be Tiokratik Haroro Sikuli, ia be miniti 30 lalonai ai karaia. Unai hebou ena tok ginigunana ai, Baibel ena karoa rua o toi​—emai kongrigeisen taudia ese edia ruma ai idia duahia vadaeni karoa​—ai herevalaia. Unai murinai, sikuli ai idia vareai stiuden taudia ese tok kwadogina idia henia. Sisiba henia tauna o tisa ese emai duahiduahi bona hereva daladia ia itaia, bena heduru herevadia ia gwauraia. (1 Timoteo 4:13) Hebou ihatoina be Hesiai Hebou, ia be miniti 30 lalonai ai karaia. Unai hebou ai tok, haheitalai bona intaviu ai karaia, unai amo Baibel amo ma haida hadibaia daladia ai dibaia.

Emai hebou oi mai neganai, Baibel amo gau matamatadia do oi dibaia bona do oi moale.​—Isaia 54:13.

• Iehova ena Witnes taudia edia hebou dekenai dahaka gaudia do oi kamonai?

• Wiki lalonai ai karaia heboudia amo, oi ura edena hebou oi mai?

Inai buklet ena laulau oi itaia: Dahaka dainai Iehova ena Witnes taudia be kongrigeisen heboudia idia lao neganai, dabua namodia idia hahedokilaia? Dahaka dainai emai dabua bona toana ai laloa bada?

Ai hahedinaraia emai Dirava ai matauraia. Momokani, Dirava be eda toana ia laloa lasi. (1 Samuela 16:7) To, Dirava ai tomadiho henia totona ai hebou neganai, ai ura bada ai hahedinaraia, ai be Dirava bona emai kongrigeisen taudia ai matauraia. Bema kota ena diadi ta vairanai do ita gini, iena dagi ita matauraia dainai, dabua namodia do ita hahedokilaia. Unai hegeregerena, kongrigeisen heboudia totona dabua namodia ai hahedokilaia neganai, ai hahedinaraia, ai ese “tanobada ibounai ena kota biaguna,” Iehova Dirava, bona ia ai tomadiho henia gabuna ai matauraia.​—Genese 18:25.

Ai hahedinaraia Baibel ena taravatu ai laloa bada. Baibel ese Keristani taudia ia hagoadaia, “mai hemataurai bona laloa maoromaoro ida dabua namona do idia hahedokilaia.” (1 Timoteo 2:9, 10) “Mai hemataurai” ida dabua namona ai hahedokilaia ena badina be inai: Ai ura lasi emai dabua dainai ma haida ai hahekwakwanaia, bona ai ura lasi dabua taitidia o tauanina ena kahana ia hahedinaraia dabua ai hahedokilaia. Danu, “laloa maoromaoro” karana be ai ia durua dabua namodia bona maorodia ai abia hidi o hoia totona. Ena be ai sibona ese ai ura henia dabua ai abia hidi o hoia, to 1 Timoteo 2:9, 10 ena hakaua herevadia ai badinaia be namo. Dabua namodia ai hahedokilaia neganai, unai ese ‘emai Hamauria Tauna, Dirava, ena hadibaia hereva idia hahairaia’ bona ‘Dirava ia hanamoa.’ (Tito 2:10; 1 Petero 2:12) Danu, ai ura ma haida idia itaia, ai be Iehova tomadiho henia karana ai laloa bada.

Emai Kingdom Hall ena hebou oi mai diba, herevana emu dabua toana be namo o lasi. Dabua mai edia sitaelo o davana bada dabua ita hahedokilaia be gau badana lasi, to gau badana be inai: Eda dabua idia goeva bona edia toana ia namo.

• Dahaka dainai Dirava tomadiho henia totona, dabua namodia ai hahedokilaia be gau badana?

• Edena hakaua herevadia dainai, emai dabua bona toana idia namo be namo?

Bema oi be Iehova ena Witnes ta ida Baibel oi stadilaia, reana umui do stadi lasi neganai, emu stadi bukana oi riviulaia. Kongrigeisen hebouna oi moalelaia totona, hebou gaudia oi riviulaia guna be namo. Bema sediual namona ita karaia bona badinaia, namo bada do ita davaria.

Hebou gaudia stadilaia negana bona gabuna abia hidi. Edena nega be namo oi stadi totona? Daba ai gaukara ta oi do hamatamaia lasi neganai oi stadi, a? Eiava hanuaboi ai natudia idia mahuta murinai oi stadi, a? Ena be emu stadi negana be kwadogi o lata, to namona be oi abia hidi miniti o hora hida do oi stadi, bona namo lasi gau ta ese unai nega ia hadikaia. Regerege lasi gabuna ta ai oi stadi, bona lalona veria gaudia hegeregere, reidio, TV bona mobael fon oi koua. Namona be guriguri murinai oi stadi, unai ese oi do ia durua gau idaudia ma haida oi laloa momo lasi, to Dirava ena Hereva sibona do oi laloa.​—Filipi 4:6, 7.

Hebou gaudia oi makaia, bona oi hegaegae oi haere totona. Matamanai, namona be oi ura hegaegaelaia gauna ena point badana oi lalopararalaia toho. Hereva kwarana o karoa oi lalohadailaia, sinado maragidia be edena dala ai hereva kwarana ia durua, laulau oi itaia, bona point badadia idia hahedinaraia henanadai oi riviulaia. Bena paragraf ta ta oi duahia, bona idia torea henanadai edia haere oi tahua. Idia torea siridia oi duahia, bona oi itaia edena dala ai point badadia ia durua. (Kara 17:11) Paragraf ai henanadai ena haere oi davaria neganai, point badana oi makaia, unai ese oi do ia durua emu haere oi laloatao totona. Bena hebou ai oi ura haere neganai, emu imana oi abia isi, bona sibona emu hereva amo haere kwadogina oi henia diba.

Wiki ta ta ena hebou gaudia ta ta oi stadilaia neganai, Baibel amo oi dibaia gau matamatadia be emu darana, “dava bada kohu haboua rumana” unai, dekenai do oi haboua.​—Mataio 13:51, 52.

• Hebou totona oi hegaegae neganai, edena bamona sediual oi karaia bona badinaia diba?

• Hebou ai haere oi henia totona, edena dala ai oi hegaegae diba?

Idaunega amo ema bona hari, Iehova ia ura ruma bese be gau haida idia karaia hebou, unai amo Iehova idia tura henia, bona famili memba taudia idia hetura. (Deuteronomi 6:6, 7) Unai dainai, Iehova ena Witnes taudia be wiki ta ta ai dina ta idia abia hidi edia ruma bese ta ta be Iehova idia tomadiho henia hebou totona​—mai moale ida Dirava tura henia daladia idia herevalaia hebou. To bema oi be sibona oi noho, vadaeni unai nega oi gaukaralaia diba Dirava ena Hereva, eiava oi ura henia Baibel topik ma ta, oi stadilaia totona.

Unai be Iehova tura henia negana. Baibel ia gwau, “Dirava kahirakahira do umui lao bona ia be umui kahirakahira do ia mai.” (Iamesi 4:8) Baibel ita stadilaia neganai, Iehova ena kara ta ta do ita dibaia namonamo. Ruma bese ena tomadiho oi hamatamaia dala haragana ta be inai: Baibel umui duahia hebou, reana Tiokratik Haroro Sikuli ena sediual umui badinaia diba. Famili memba ta ta oi abia hidi Baibel ena karoa o siri ta ta idia duahia, bena Baibel amo ia dibaia gaudia ia herevalaia diba.

Unai be famili memba taudia idia hetura negana. Ruma bese ena tomadiho karana ese tau bona hahine eiava tama sina bona natudia edia hetura karana ia hagoadaia. Bema unai tomadiho negana be moale negana, vadaeni famili memba taudia do idia ura lasi wiki ta ta ai unai idia reaia. Namona be tama sina ese natudia edia mauri lagani idia laloa, bena Baibel topik namodia idia abia hidi, reana Gima Kohorona bona Awake! idia gaukaralaia o iseda Web sait, jw.org amo idia abia diba. Reana emu natuna ese sikuli ai ia davaria hekwakwanai ta bona hanaia dalana oi herevalaia diba. Reana ruma bese ena tomadiho murinai, kongrigeisen heboudia ai do umui abia anedia umui praktislaia bona aniani haida umui ania hebou.

Wiki ta ta ai ruma bese ena tomadiho ese emu famili do ia durua Dirava ena Hereva idia moalelaia, bona Iehova ese emu hekwarahi do ia hanamoa bada.​—Salamo 1:1-3.

• Dahaka dainai nega ita atoa ruma bese ena tomadiho totona?

• Tama sina be dahaka idia karaia diba, edia famili ese edia tomadiho negana idia moalelaia totona?

Dahaka dainai inai laulau ai idia noho taudia idia moale? Idia be emai hebouhebou ta ai idia noho. Idaunegai, Dirava ese ena hesiai taudia ia haganidia lagani ta ta ai nega toi hebou dekenai idia lao be namo. Unai hegeregerena, ai danu be mai moale ida emai hebouhebou badadia dekenai ai lao. (Deuteronomi 16:16) Lagani ta ta ai, ai ese dina-tamona sekit hebouhebou be nega rua ai karaia bona dina-toi rijinol hebouhebou ai karaia. Unai hebouhebou ese edena bamona ai idia durua?

Unai ese emai orea taudia ia hagoadaia. Israela taudia be mai moale ida “edia hebou badana lalonai” Iehova idia hanamoa hegeregerena, ai danu be mai moale ida hebouhebou badadia ai Iehova ai tomadiho henia. (Salamo 26:12; 111:1) Unai hebouhebou ai, kongrigeisen o gabu idauidau amo idia mai Iehova ena Witnes taudia ida ai hedavari. Dina tubu ai, emai hebouhebou gabudiai, ai aniani hebou bona ai hebamo. (Kara 2:42) Unuseniai, tanobada ai “tadikaka oreana ibounai” ia hatamonaia lalokauna ai mamia.​—1 Petero 2:17.

Unai ese ai ia durua Iehova ai tura henia noho. Danu, Israela taudia be namo idia abia, badina hahelaga taudia ese idia dekenai Dirava ena “hereva ibounai ena anina idia hedinaraia namonamo.” (Nehemia 8:8, 12) Ai danu be emai hebouhebou dekenai ai abia Baibel ena hadibaia herevadia ai laloa bada. Program ta ta edia sinado be Baibel amo idia abia. Hebouhebou ai tok namodia bona haheitalai amo, ai ese emai mauri lalonai Dirava ena ura do ai badinaia daladia ai dibaia. Danu, emai tadikaka o taihu be inai nega aukadia lalonai hekwakwanai idia davaria bona hanaia ena ekspiriens idia gwauraia neganai, unai ese ai ia hagoadaia. Rijinol hebouhebou ai idia karaia drama amo, Baibel sivaraidia ai mamia momokani bona mai anina bada gaudia ai dibaia. Hebouhebou ai, haida be ranu lalonai bapatiso idia abia, unai amo edia gwauhamata Dirava dekenai idia hamomokania.

• Dahaka dainai hebouhebou negadia ai moalelaia?

• Edena dala ai hebouhebou lao henia karana amo namo oi abia diba?

Iesu ena mase negana ia kahirakahira neganai, ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mataio 24:14) To, edena dala ai haroro gaukara be tanobada ibounai dekenai do ai karaia? Namona be Iesu ese tanobada ai haroro gaukara ia karaia dalana ai tohotohoa.​—Luka 8:1.

Ai ura ruma ai taunimanima ai haroro henia. Iesu be ena aposetolo taudia ia hadibaia, ruma-ta-ruma-ta ai sivarai namona idia harorolaia totona. (Mataio 10:11-13; Kara 5:42; 20:20) Idia be Iesu ese ia makaia teritori dekenai idia haroro. (Mataio 10:5, 6; 2 Korinto 10:13) Hari inai negai danu, emai haroro gaukara ai karaia namonamo, bona kongrigeisen ta ta be mai edia haroro teritori. Unai amo taunimanima momo herea ai haroro henia diba, badina “Iesu ese ai ia hagania taunimanima dekenai ai haroro” be namo.​—Kara 10:42.

Ai ura dala idauidau ai taunimanima ai haroro henia. Danu, Iesu be kone ai, o ranu guri gabudiai, bona gabu idauidau ai taunimanima ia haroro henia. (Mareko 4:1; Ioane 4:5-15) Unai hegeregerena, ai danu be dala ai, bisinesi gabudiai, loaloa gabudiai, o telefon amo taunimanima dekenai Baibel ai herevalaia. Danu, nega haida emai neiba, moni gaukara turadia, sikuli turadia bona varavara ai haroro henia. Unai haroro daladia amo, tanobada ibounai, taunimanima milioni momo be hahemauri ena “sivarai namona” idia kamonai.​—Salamo 96:2.

Dirava ena Basileia sivarai namona bona vaira negai do ia havaraia gaudia be daika dekenai do oi herevalaia? Namona be unai sivarai namona oi hunia lasi, to idia dekenai oi gwauraia hedinarai haraga!

• Dahaka “sivarai namona” ai harorolaia?

• Edena dala ai Iehova ena Witnes taudia be Iesu ena haroro dalana idia tohotohoa?

Iesu be painia tauna ta bamona​—Dirava ese ia siaia tanobada ai haroro gaukarana ia karaia bona dala ia kehoa taunimanima ese hahemauri idia abia totona. (Mataio 20:28) Hari inai negai, Iesu ena murinai idia raka taudia danu be edia nega bada idia henia, taunimanima be ‘hahediba taudia ai idia halaoa’ totona. (Mataio 28:19, 20) Unai bamona gaukara idia karaia taudia haida ai gwauraia, painia taudia.

Idia be ful-taim haroro gaukara idia karaia. Iehova ena Witnes taudia ibounai be pablisa taudia, sivarai namona idia harorolaia. To, haida be edia noho dalana idia haidaua bena regula painia gaukara idia karaia, anina be hua ta ta ai haroro gaukara lalonai hora 70 idia gaukaralaia. Idia momo be pat-taim moni gaukara idia karaia. Ma haida be spesel painia gaukara idia karaia, anina be Basileia harorolaia taudia be momo lasi gabudia dekenai idia lao bona hua ta ta ai haroro gaukara lalonai hora 130 idia gaukaralaia. Painia taudia idia laloa idia dekenai idia noho gaudia be hegeregere, bona idia abia dae Iehova ese edia dabu gaudia be idia dekenai do ia henia. (Mataio 6:31-33; 1 Timoteo 6:6-8) Haida be unai ful-taim painia gaukara idia karaia lasi, to heduru painia gaukara idia karaia, anina be hua tamona ai haroro gaukara lalonai hora 30 o hora 50 idia gaukaralaia.

Idia be Dirava bona taunimanima idia lalokau henia. Iesu bamona, ai itaia taunimanima momo idia ura dikadika Dirava bona ena ura idia dibaia. (Mareko 6:34) To ai abia dibana amo unai bamona taudia be hari ai durua diba, bena idia ese vaira negai do idia vara gau namodia idia naria diba. Ena neiba ia lalokau henia painia tauna ese ena nega bona goada ia gaukaralaia, ma haida ia durua sivarai namona idia diba totona. (Mataio 22:39; 1 Tesalonika 2:8) Painia tauna be unai bamona ia karaia neganai, iena abidadama ia goada, Dirava kahirakahira ia lao, bona ia moale bada.​—Kara 20:35.

• Painia tauna be daika?

• Dahaka dainai haida be ful-taim painia gaukara idia karaia?

Idaunega amo ema bona hari, Iehova ena Witnes taudia be ­sikuli idauidau amo Dirava ena dala idia dibaia. Unai sikuli ese hanaihanai Basileia sivaraina idia harorolaia taudia ia ­durua dainai, ‘edia hesiai gaukara idia hagugurua’ diba.—2 Timoteo 4:5.

Painia Sikulina. Bema ta be lagani ta lalonai regula painia gaukara ia karaia vadaeni, ia be dina siks lalonai Kingdom Hall ta dekenai idia karaia Painia Sikulina ai ia vareai diba. Unai sikuli ese painia taudia ia durua Iehova idia badinaia, haroro daladia idauidau idia karaia namonamo, bona painia gaukara idia goadalaia.

Basileia Evanelia Sikulina. Bema ta be lagani momo lalonai painia gaukara ia karaia vadaeni bona ia ura ena kongrigeisen ia rakatania bona idau gabu ai haroro gaukara ia durua, ia be hua rua lalonai idia karaia Basileia Evanelia Sikulina dekenai ia vareai diba. Unai painia taudia be Iesu Keriso, guna tanobada ai ia noho Evanelia Tauna Hereadaena, idia tohotohoa idia gwau, “Lau be inai, do lau lao! Lau do oi siaia!” (Isaia 6:8; Ioane 7:29) Idia lao henia gabunai, idia dekenai gau ibounai be matamata, hegeregere mauri dalana, kastom, weda, bona aniani. Reana gado matamatana do idia dibaia. Namona be Basileia Evanelia Sikulina idia lao taudia edia mauri lagani be 23 ia lao 65, bona unai sikuli ese singul tadikaka, singul taihu, bona headava taudia do ia durua edia hesiai gaukara ai kara namodia idia hahedinaraia noho, bona unai sikuli idia haorea taudia be Iehova bona ena orea ese dala idauidau ai idia gaukaralaia diba.

Gilead Sikulina. Heberu gado herevana, “Gilead,” anina be, Witnes o haroro. Lagani 1943 amo, Gilead sikulina amo idia gradueit misinari taudia 8,000 mai kahana be “tanobada ibounai” dekenai idia haroro, bona momo idia durua. (Kara 13:47) Emai misinari taudia be nega ginigunana Peru ai idia ginidae neganai, kongrigeisen ta be lasi. Hari, unuseniai kongrigeisen be 1,000 mai kahana. Emai misinari taudia be Japan ai edia gaukara idia hamatamaia neganai, Iehova ena Witnes taudia be 10 bamona. Hari, unuseniai kongrigeisen be 200,000 mai kahana. Gilead sikulina be hua faiv lalonai idia karaia, bona sikuli taudia be Baibel idia stadilaia namonamo. Spesel painia taudia, misinari taudia, Betele taudia, bona sekit taudia be Gilead Sikulina dekenai idia lao diba, unuseniai do idia abia treinini ese idia do ia durua, tanobada ibounai dekenai idia karaia haroro gaukarana idia goadalaia totona.

•  Painia Sikuli idia karaia ena badina be dahaka?

•  Daidia be Basileia Evanelia Sikulina idia lao diba?