Iehova ena Witnes taudia ida Baibel oi stadilaia neganai hereva momokani ena dala oi dibaia. Oi dibaia gaudia ese oi idia durua emu hetura karana Dirava ida oi hanamoa, bona vaira nega ena helaro namona ia henia bona Dirava ena Basileia henunai, tanobada paradaisona ai hahenamo idauidau do oi abia. Unai ese emu abidadama Dirava ena Hereva dekenai ia hagoadaia, bona Keristani kongrigeisen oi bamoa dainai, hahenamo momo oi davaria vadaeni. Hari, Iehova ese ena taunimanima ia kara henia dalana oi dibaia.​—Sek. 8:23.

Oi hagaegae bapatiso totona, Keristani hahediba herevadia oi riviulaia elda taudia ida amo hahenamo do oi abia. (Heb. 6:1-3) Emu hekwarahi ibounai Iehova oi dibaia totona do ia hanamoa bona oi dekenai ia gwauhamatalaia hahenamo do ia henia.​—Ioa. 17:3.

1. Dahaka dainai oi ura oi bapatiso?

2. Iehova be daika?

• “Iehova be Dirava momokanina guba bona tanobada ai, ma ta be lasi.”​—Deu. 4:39.

• “Oiemu ladana be Iehova, Oi sibona be tanobada ibounai ena Ataiai Momokani Diravana.”​—Sal. 83:​18.

3. Dahaka dainai Dirava ena ladana ita gaukaralaia be mai anina bada?

• “Vadaeni inai bamona do umui guriguri: ‘Aiemai Tamana guba dekenai oi noho, namona be ibounai ese emu ladana idia hahelagaia.’”​—Mat. 6:9.

• “Iehova ena ladanai idia boiboi taudia ibounai be mauri do idia abia.”​—Roma 10:13.

4. Baibel ese dahaka hereva haida ia gaukaralaia Iehova ena dagi ma haida ita lalopararalaia totona?

• “Iehova, tanobada ena kahana ibounai ia Havaraia Tauna, be noho hanaihanai Diravana.”​—Isa. 40:28.

• “Aiemai Tamana guba dekenai oi noho.”​—Mat. 6:9.

• “Dirava be lalokau.”​—1 Ioa. 4:8.

5. Dahaka do oi henia Iehova Dirava dekenai?

• “Iehova emu Dirava do oi lalokau henia mai emu kudouna ibounai, mai emu mauri ibounai, mai emu lalona ibounai, bona mai emu goada ibounai ida.”​—Mar. 12:30.

• “Iehova oiemu Dirava oi tomadiho henia be namo, bona ia sibona do oi hesiai henia.”​—Luka 4:8.

6. Dahaka dainai oi ura Iehova oi badinaia?

• “Egu natuna e, oi aonega bona egu kudouna oi hamoalea, Unai amo lau ia gwauraia dika tauna do lau haere henia.”​—Aon. 27:11.

7. Daika oi guriguri henia, bona daika ena ladana amo oi guriguri be namo?

• “Umui lau [Iesu] hamaoroa momokani, bema egu ladanai Tamana dekenai gau ta umui noia, umui dekenai do ia henia.”​—Ioa. 16:23.

8. Dahaka gaudia ma haida totona do oi gurigurilaia?

• “Vadaeni inai bamona do umui guriguri: ‘Aiemai Tamana guba dekenai oi noho, namona be ibounai ese emu ladana idia hahelagaia. Oiemu Basileia ia mai be namo. Emu ura gauna tanobada dekenai ia vara be namo, guba dekenai ia vara bamona. Mani ai dekenai hari dina ena aniani oi henia; bona mani emai kara dika oi gwauatao, ai dekenai idia kara dika taudia edia dika ai gwauatao hegeregerena. Bona ai oi durua hedibagani lalonai do ai moru lasi, to Satani amo ai oi hamauria.’”​—Mat. 6:9-13.

• “Bona Dirava dekenai inai ita diba momokani, herevana dahaka ita gurigurilaia, bema unai be iena ura hegeregerena ia ese ita do ia kamonai henia.”​—1 Ioa. 5:14.

9. Dahaka dainai Iehova ese ta ena guriguri do ia kamonai diba lasi?

• “Iehova dekenai heduru totona do idia boiboi, to idia do ia haere henia lasi . . . Idia kara dika dainai.”​—Mika 3:4.

• “Badina Iehova ena matana be kara maoromaoro taudia ia itaia, bona iena taiana be edia noinoi ia kamonai, to Iehova ese kara dikadia idia karaia noho taudia ia inai henia.”​—1 Pet. 3:12.

10. Iesu Keriso be daika?

• “Simona Petero ia haere: “Oi be Keriso, mauri Diravana ena Natuna.’”​—Mat. 16:16.

11. Dahaka dainai Iesu be tanobada dekenai ia mai?

• “Taunimanima ena Natuna ia mai, taunimanima ese ia idia hesiai henia totona lasi, to ma haida hesiai henia totona ia mai, bona ena mauri ia henia, taunimanima momo edia mauri davana karaia totona.”​—Mat. 20:28.

• “Siti ma haida dekenai Dirava ena Basileia ena sivarai namona lau [Iesu] harorolaia danu be namo, unai karaia totona Dirava ese lau ia siaia.”​—Luka 4:43.

12. Edena dala ai emu tanikiu karana do oi hahedinarai Iesu ena boubou dekenai?

• “Ia be taunimanima ibounai dainai ia mase, unai amo idia mauri taudia be sibona totona do idia mauri lasi, to idia dainai ia mase bona ia toreisi lou tauna totona do idia mauri.”​—2 Kor. 5:15.

13. Iehova ese Iesu dekenai dahaka siahu ia henia?

• “Dirava ese lau dekenai siahu ia henia, guba bona tanobada gaudia ibounai lau biagua totona.”​—Mat. 28:18.

• “Dirava ese ia dekenai dagi hereadaena ia henia bona mai hariharibada ida, ia dekenai ladana ibounai ia hereaia ladana ta ia henia.”​—Fili. 2:9.

14. Oi abia dae Iehova ena Witnes taudia edia Hakaua Oreana be “hesiai tauna mai ena kamonai bona mai ena aonega” bona unai be Iesu ese ia abia hidi taudia?

• “Hesiai tauna mai ena kamonai bona mai ena aonega, ena biaguna ese ia abia hidi ena hesiai taudia do ia naria, bona nega korikori ai edia aniani do ia henia tauna be daika?”​—Mat. 24:45.

15. Lauma helaga be dahaka?

• “Vadaeni aneru ese ia haere henia, ia gwau: ‘Lauma helaga be oi latanai do ia diho, bona Ataiai Momokani Diravana ena siahu ese oi do ia koua. Bona unai dainai, ia vara natuna be do idia gwauraia helaga, Dirava ena Natuna.’”​—Luka 1:35.

• “Unai dainai, bema umui kara dika taudia ese emui natudia dekenai harihari gaudia namodia umui henia diba, namona be umui diba momokani, emui Tamana, guba ai ese lauma helaga be idia noinoi taudia dekenai do ia henia!”​—Luka 11:13.

16. Edena dala ai Iehova ena lauma helaga ia gaukaralaia?

• “Iehova ena hereva dainai guba ia vara,bona iena uduna amo ia hahodi bena guba lalonai gau ibounai idia vara.”​—Sal. 33:6.

• “To lauma helaga be umui latanai ia diho neganai, siahu do umui abia. . .bona tanobada ena daudau momokani gabudia dekenai lau do umui gwauraia hedinarai.”​—Kara 1:8.

• “Toretore Helagadia ai idia noho peroveta herevadia be tau ta ese sibona ena lalohadai amo ia gwauraia lasi. Badina peroveta herevadia be tau ta ese sibona ena ura dekenai ia gwauraia lasi, to lauma helaga ese taunimanima ia hasiahua hegeregerena, idia ese Dirava amo idia mai hereva idia gwauraia.”​—2 Pet. 1:20, 21.

17. Dirava ena Basileia be dahaka?

• “Guba Diravana ese basileia ta do ia haginia, ta ese do ia hadikaia lasi. Bona unai basileia be taunimanima ma haida dekenai do idia henia hanai lasi. Unai basileia ese basileia ibounai do ia hamakohia bona haorea momokani, bona ia sibona do ia gini ela bona hanaihanai.”​—Dan. 2:44.

18. Dirava ena Basileia ese oi totona dahaka hahenamo do ia mailaia?

• “Ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore. Gau gunadia be idia ore vadaeni.”​—Apok. 21:4.

19. Edena bamona oi diba Dirava ena Basileia be kahirakahira do ia mai?

• “Hahediba taudia sibodia be ia dekenai idia lao, idia gwau: ‘Ai oi hamaoroa, unai gaudia be edena negai do idia vara, bona do oi noho negana bona inai nega oromana ena dokona ena toana be dahaka?’ Iesu ese ia haere henidia: ‘. . . Bese ta do ia toreisi bese ta do ia tuari henia, bona basileia ta ese basileia ta do ia tuari henia, bona gabu momo ai hitolo bada bona tano mareremarere do idia vara. Bona Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.’”​—Mat. 24:3, 4, 7, 14.

• “Dina gabedia ai nega aukadia do idia vara, unai ese taunimanima do idia hametaua bada. Badina taunimanima be sibona do idia laloa bada, moni do idia ura henia bada, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia diba lasi, ma haida do idia badinaia lasi, famili lalonai lalokau do ia noho lasi, do idia lalotamona lasi, ladana do idia hadikaia, sibona do idia biagua lasi, do idia dagedage, kara namodia do idia ura henia lasi, edia turadia edia mauri hadikaia dalana do idia karaia, do idia kwara auka, do idia heagi, moale karadia do idia ura henia bada, bona Dirava do idia lalokau henia lasi, Dirava badinaia karana be toana sibona do idia hahedinaraia, to edia mauri ai Dirava do idia badinaia lasi.”​—2 Tim. 3:1-5.

20. Edena bamona do oi hahedinaraia Basileia be mai anina bada?

• “Nega ibounai Dirava ena Basileia bona ena kara maoromaoro do umui tahua guna, bona unai gaudia ibounai be umui dekenai do ia henia.”​—Mat. 6:33.

• “Iesu be ena hahediba taudia dekenai ia gwau: “Bema ta ia ura egu murinai ia raka, sibona ena ura ia dadaraia be namo bona ena hisihisi auna do ia huaia bona egu murinai do ia raka noho.’”​—Mat. 16:24.

21. Satani bona demoni be daidia?

• “Umui be emui tamana, Diabolo amo. . . Matamana amo ia be ala-ala tauna.”​—Ioa. 8:44.

• “Unai huala badana be idia negea diho, ia be idaunegai gaigaina, iena ladana be Diabolo bona Satani, ia be tanobada ibounai ia hakaua kerere noho; ia bona ena aneru be tanobada dekenai idia negea diho.”​—Apok. 12:9.

22. Satani be edena bamona Iehova bona Ia idia tomadiho henia taudia dekenai hereva koikoi ia gwauraia?

• “Hahine be gaigai dekenai ia gwau: “Uma ai idia noho au huahua ibounai ai ania diba. To uma huanai ia gini au ena huahua totona Dirava ia gwau: ‘Unai au ena huahua do umui ania lasi, oibe, do umui dogoatao lasi, dika umui mase.’” Unai neganai gaigai be hahine dekenai ia gwau: “Lasi, do umui mase lasi. Badina Dirava ia diba unai au ena huahua umui ania dinana ai, emui matana do idia kehoa, bona umui be Dirava bamona do umui lao, namo bona dika do umui diba.”​—Gen. 3:2-5.

• “Satani be Iehova dekenai ia haere, ia gwau: ‘Kopina ena davana be kopina. Tau ta be ena gau ibounai do ia henia ena mauri ia dogoatao totona.’”​—Iobu 2:4.

23. Edena bamona do oi hahedinaraia Satani ia gwauraia herevana oi hakoikoia?

• “Mai kudouna ibounai ida . . . Dirava oi hesiai henia.”​—1 Siv. 28:9.

• “Lau ese egu Dirava do lau badinaia noho ela bona lau mase!”​—Iobu 27:5.

24. Dahaka dainai taunimanima idia mase?

• “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona mase be taunimanima ibounai dekenai ia hanaia lao, badina idia ibounai be idia kara dika vadaeni.”​—Roma 5:12.

25. Ta ia mase neganai dahaka ia vara?

• “Idia mauri noho taudia idia diba do idia mase, to mase taudia be gau ta idia diba lasi.”​—Had. 9:5.

26. Idia mase taudia totona dahaka helaro ia noho?

• “Kara maoromaoro taudia bona kara maoromaoro lasi taudia be do idia toreisi lou.”​—Kara 24:15.

27. Taunimanima hida be Iesu Keriso ida do idia lohia guba dekenai?

• “Itaia, Mamoe Natuna be Siona Ororo dekenai ia gini bona ia ida be taunimanima 144,000, bona edia baguna ai iena ladana bona iena Tamana ena ladana idia noho.”​—Apok. 14:1.

Emu Baibel stadi ai, Iehova ena kara maoromaoro taravatudia bona oi badinaia daladia oi dibaia. Unai oi diba dainai, emu mauri ai kara ma haida bona emu lalohadai mauri totona oi haidaua. Hari oi ura momokani Iehova ena kara maoromaoro taravatudia oi badinaia bona unai ese ia hahedinaraia, oi hegeregere vadaeni Iehova ena hesiai gaukara oi karaia totona.

Inai henanadai oi riviulaia neganai oi do ia durua Iehova ena taravatu oi lalopararalaia namonamo bona do oi diba dahaka gaudia ma haida do oi karaia unai amo Iehova ena hesia tauna ta ai oi lao diba. Inai infomeisen ese oi do ia durua bada mai lalomamina goevana ida gau ibounai oi karaia bona unai ese Iehova do ia hanamoa.​—2 Kor. 1:12; 1 Tim. 1:19; 1 Pet. 3:16, 21.

Baibel oi stadilaia ema bona hari, oi ura dikadika Iehova ena lohia dalana henunai oi noho bona iena orea ida oi gaukara hebou. Henunai idia noho henanadai bona Baibel siridia ese oi do idia durua Iehova ena hakaua dalana oi lalopararalaia bona badinaia totona, hegeregere kongrigeisen lalonai, ruma bese lalonai, eiava inai nega oromana ena politikol oredia edia gaukara idauidau lalonai. Iehova ese ena taunimanima ia hadibaia bona edia abidadama ia hagoadaia dalana, oi itaia negania, emu lalokau Iehova dekenai do ia hagoadaia. Dala ma ta be kongrigeisen heboudia bona do oi ura unai hebou dekenai oi lao diba bona hebou dekenai gau ma haida oi karaia diba bema oi hegeregere.

Danu, inai kahana ese hanaihanai Basileia harorolaia gaukarana ita karaia, ma haida ita durudia Iehova idia dibaia bona dahaka Ia karaia noho taunimanima totona do ia herevalaia. (Mat. 24:14; 28:19, 20) Dokonai, do oi laloparara emu gwauhamata Iehova Dirava dekenai bona emu bapatiso be mai anina badana. Namona be oi diba Iehova be ia moale bada badina iena hebogahisi bada karana ia hahedinaraia oi totona oi abia dae.

1. Keristani taravatu headava dekenai be dahaka? Baibel ia gwau headava hadokoa bona ta ia headava lou diba dalana tamona sibona be dahaka?

• “Umui duahia lasi, a? Matamana negana amo, idia ia havaraia tauna ese idia ia karaia tau bona hahine, bona ia gwau: ‘Unai dainai tau ese ena tamana bona sinana do ia rakatania bona ena hahine danu do ia hakapua, bona idia ruaosi be tauanina tamona ai do idia lao.’ Vadaeni idia be rua lasi, to tauanina tamona. Unai dainai Dirava ese ia hakapua taudia be ta ese do ia hapararaia lasi be namo.” . . . Bema tau ta be matabodaga karadia dainai lasi, to badina ma ta dainai ena hahine ia divosia bona hahine ma ta ia adavaia, ia be ia heudahanai unai.”​—Mat. 19:4-6, 9.

2. Dahaka dainai idia noho hebou tau bona hahine be dala maorona ai idia headava be namo? Bema oi headava vadaeni, emu headava be gavamani ena taravatu hegeregerena oi rejista, eiava emu kastom dalana hegeregerena oi karaia vadaeni, a?

• “Tadikaka oi hadibaia noho gavamani bona siahu taudia henunai do idia noho bona do idia kamonai henia.”​—Tito 3:1.

• “Taunimanima ibounai ese headava idia matauraia be namo, bona headava geda idia hamiroa lasi, badina Dirava ese matabodaga taudia bona heudahanai taudia do ia hahemaoro henia.”​—Heb. 13:4

3. Ruma bese lalonai emu maduna be dahaka?

• “Egu natuna e, emu tamana ena sisiba oi kamonai henia, bona emu sinana ena hadibaia hereva oi dadaraia lasi.”​—Aon. 1:8.

• “Tau be ena hahine ena kwarana, Keriso be kongrigeisen ena kwarana hegeregerena . . . Tatau e, emui hahine do umui lalokau henidia noho, Keriso ese kongrigeisen ia lalokau henia. . . hegeregerena.”​—Efe. 5:23, 25.

• “Tamadia e, emui natudia do umui habadua lasi, to idia tubu noho lalonai, Iehova ena matahakani bona sisiba amo idia umui hadibaia be namo.”​—Efe. 6:4.

• “Umui natudia e, gau ibounai dekenai emui tama sina do umui kamonai henia, badina Lohiabada ese unai ia moalelaia.”​—Kol. 3:20.

• “Umui hahine e, emui adavadia henunai do umui noho.”​—1 Pet. 3:1

4. Dahaka dainai mauri ita matauraia be namo?

• “[Dirava] ese taunimanima ibounai dekenai mauri, laga bona gau ibounai ia henia. . . . Ia dainai ita mauri, ita raka loaloa bona ita noho.”​—Kara 17:25, 28.

5. Dahaka dainai taunimanima ta eiava bogana lalonai ia noho beibi ita hamasea lasi be namo?

• “Bema tatau idia heatu bona ta ese rogorogo hahinena ia haberoa bona . . . bema idia ta ia mase, vadaeni ala-ala tauna ia mase danu be namo.”​—Eso. 21:22, 23.

• “Egu sinana ena bogana ai lau vara matamaia neganai, lau oi itaia. Ena be egu tauanina ena kahana ta ta idia do vara lasi bona idia vara ena dina ia do abia lasi, To oi ese buka dekenai oi torea vadaeni.”​—Sal. 139:16.

• “Iehova. . .ia inai henia . . . kerere lasi tauna ena rara ia bubua imana.”​—Aon. 6:16, 17.

6. Dirava ena taravatu rara dekenai be dahaka?

• “Rara [bona] aiona idia gigia animal edia hidio . . . unai gaudia umui dadaraia.”​—Kara 15:29.

7. Dahaka dainai iseda tadikaka taihu ita lalokau henia?

• “Umui dekenai taravatu matamata lau henia inai: Do umui lalokau heheni. Lau ese umui lau lalokau henia hegeregerena, umui danu do umui lalokau heheni. Unai amo taunimanima ibounai do idia diba umui be egu hahediba taudia, bema umui huanai lalokau ia noho.”​—Ioa. 13:34, 35.

8. Ma haida ese hanaia gorere dikana idia abia lasi totona: (a) Dahaka dainai unai gorere ia abia tauna be ma haida ia rosia eiava kisi henia lasi? (b) Dahaka dainai ia badu lasi bema haida ese edia ruma dekenai ia idia boiria lasi? (c) Dahaka dainai headava ia laloa single tauna be reana mai ena hanaia gorerena ese hospital dekenai ena rara ia sekea guna be namo? (d) Dahaka dainai hanaia gorere dikana ia abia tauna be bapatiso ia do abia lasi neganai, hakaua naria tauna ia hadibaia be namo?

• “Namo lasi umui be mai emui abitorehai ma ta dekenai, to umui lalokau heheni sibona. . . . ‘Namona be emu dekena tauna oi lalokau henia, oi sibona oi lalokau henia hegeregerena.’ Mai ena lalokau tauna ese ena dekena tauna ia kara dika henia lasi.”​—Roma 13:8-10.

• “Sibona emui namo do umui laloa lasi, to ma haida edia namo do umui laloa danu.”​—Fili. 2:4.

9. Dahaka dainai Iehova ia ura ma haida edia kerere ita gwauatao?

• “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona umui karaia.”​—Kol. 3:13.

10. Dahaka do oi karaia bema tadikaka ese oi dekenai hereva koikoi ia gwauraia eiava emu kohu ia abia koikoi dalanai?

• “Bema emu tadikaka be kara dika ta ia karaia, oi lao bona umui ruaosi sibona huanai iena kerere oi hahedinaraia. Bema oi ia kamonai henia, emu tadikaka be dala maorona dekenai oi hakaua lou vadaeni. To bema ia kamonai lasi, taunimanima ta eiava rua oi hakaua lao, unai amo hereva hamomokania taudia rua eiava toi edia hereva amo gau ibounai do idia hamomokania. Bema idia ia kamonai henia lasi, tadikaka oi hadibaia. To bema kongrigeisen tadikaka danu ia kamonai henia lasi, namona be oi dekenai ia be abidadama lasi tauna bamona bona takisi gogoa tauna bamona ai do ia lao.”​—Mat. 18:15-17.

11. Iehova be edena bamona inai kara dikadia ia laloa?

▪ Matabodaga karadia

▪ Kaivakuku tomadiho henia karana

▪ Tatau be tatau ida eiava hahine be hahine ida idia mahuta hebou

▪ Henaohenao

▪ Laki gadara

▪ Inuinu kekero karana

• “Umui sibona do umui koia lasi: Matabodaga taudia, kaivakuku tomadiho henia taudia, heudahanai taudia, hahine edia kara bamona idia karaia tatau, tatau ida idia mahuta hebou tatau, henaohenao taudia, mataganigani taudia, kekero momo taudia, hereva dika taudia, bona koikoi dalanai kohu idia abia taudia be Dirava ena Basileia do idia abia lasi.”​—1 Kor. 6:9, 10.

12. Matabodaga karadia idauidau ai, hegeregere headava lasi taudia ese matabodaga idia karaia karana dekenai, oi laloa dahaka do oi karaia diba?

• “Matabodaga karadia amo umui heau siri!”​—1 Kor. 6:18.

13. Dahaka dainai Keristani taudia ese drag, kuku eiava buatau idia dadaraia be namo?

• “Emui tauanina do umui henia, ia be boubou gauna bamona mai mauri, mai helaga, bona Dirava ese ia moalelaia, unai amo mai laloa namonamo ida hesiai gaukara helagana do umui karaia. Bona inai nega oromana ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho. Vadaeni umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.”​—Roma 12:1, 2.

14. Dirava ese ia taravatua demoni edia gaukara haida be dahaka?

• “Namo lasi emui huanai ta ese . . . lauma dikadia edia heduru amo vaira nega ia perovetalaia, meamea karadia ia karaia, toa idauidau edia anina ia tahua, vada karadia ia karaia, ma haida dekenai puripuri ia karaia, mase taudia edia lauma ia hereva henia eiava vaira nega ia gwauraia tauna ia tahua, eiava mase tauna ida ia herevahereva.”​—Deu. 18:10, 11.

15. Bema tau ta be kara dika badana ta ia karaia to ia ura Iehova ena lalonamo ia abia, vadaeni maoromaoro dahaka ia karaia be namo?

• “Oi dekenai egu kara dika lau gwauraia hedinarai, Egu kerere lau hunia lasi. Lau gwau: ‘Lau ese Iehova dekenai egu dika do lau gwauraia hedinarai.’”​—Sal. 32:5.

• “Umui huanai ta ia gorere, a? Namona be kongrigeisen ena elda taudia ia boiria, bona idia ese ia totona do idia guriguri, bona Iehova ena ladanai iena kwarana dekenai dehoro do idia bubua. Bona abidadama tauna ena guriguri ese gorere tauna do ia hanamoa, bona Iehova ese ia do ia abia isi. Danu, bema ia be kara dikadia ia karaia, Dirava ese ena dika do ia gwauatao.”​—Iam. 5:14, 15.

16. Bema oi diba emu tadikaka be kara dika badana ta ia karaia, dahaka oi karaia be namo?

• “Bema tau ta be kara dika ta ia itaia eiava ia dibaia, bona ia hamomokania diba. Bona bema kerere tauna ena dika ia gwauraia hedinarai totona hadibaia hereva ia kamonai, to unai kerere ia ripotilaia lasi, unai be kara dika. Ia be ena kerere dainai idia panisia be namo.”​—Lev. 5:1.

17. Bema kongrigeisen dekenai hadibaia herevana idia gwauraia, ta be Iehova ena Witnes tauna ta lasi, edena bomana ia do ita kara henia?

• “Bema tadikaka ta be matabodaga tauna, eiava mataganigani tauna, eiava kaivakuku tomadiho henia tauna, eiava hereva dika tauna, eiava kekero momo tauna, eiava koikoi dalanai kohu ia abia tauna, ia do umui bamoa lasi bona ia ida do umui aniani lasi danu.”​—1 Kor. 5:11.

• “Bema tau ta be umui dekenai ia mai bona unai hadibaia herevadia ia gwauraia lasi, emui ruma dekenai ia umui abia dae lasi eiava ia umui hanamoa lasi.”​—2 Ioa. 10.

18. Dahaka dainai Iehova idia lalokau henia taudia oi tura henia be namo?

• “Aonega taudia ida ia raka tauna be do ia aonega, to kavakava taudia ia bamoa tauna be dika do ia davaria.”​—Aon. 13:20.

• “Namo lasi haida ese umui idia koia. Hebamo dikadia ese ta ena kara namodia idia hadikaia diba.”​—1 Kor. 15:33.

19. Dahaka dainai Iehova ena Witnes taudia be politikol karadia amo idia gini siri?

• “Idia be tanobada ena lasi, lau hegeregerena, lau [Iesu] be tanobada ena lasi.”​—Ioa. 17:16.

20. Dahaka dainai inai tanobada ena lohia taudia ita kamonai henidia be namo?

• “Namona be taunimanima ibounai be gavamani henunai do idia noho, badina bema Dirava ese gwaumaoro ia henia lasi, gavamani ta be do ia noho lasi. Idia noho gavamani ibounai be Dirava ese ia henia dagi idauidau hegeregerena idia noho.”​—Roma 13:1.

21. Bema tanobada ena lohia taudia edia taravatu be Dirava ena taravatu ia utua, dahaka do oi karaia?

• “Dirava be lohia dainai ia ai kamonai henia be maoro, to taunimanima lasi.”​—Kara 5:29.

22. Moni gaukara oi ura abia neganai, edena Baibel siridia ese oi do ia durua inai tanobada amo oi gini siri totona?

• “Bese ta ese bese ma ta do ia tuari henia lasi, bona tuari do idia dibaia lou lasi.”​—Mika 4:3.

• “Egu taunimanima e, bema umui ura lasi ia ida kara dika umui karaia hebou bona bema umui ura lasi ia ida iena davana dikana umui abia hebou, namona be ia [Babulonia Badana] amo umui raka-lasi.”​—Apok. 18:4.

23. Edena moale karadia do oi abia hidi bona edena do oi dadaraia?

• “Iehova . . . ese dagedage karadia ia ura henia tauna ia badu henia.”​—Sal. 11:5.

• “Kara dika do umui inai henia, bona kara namo do umui dogoatao auka.”​—Roma 12:9.

• “Momokani gaudia, mai anina bada gaudia, kara maoromaoro gaudia, kara goeva gaudia, lalokau gaudia, ladana namo gaudia, namo gaudia ibounai, bona taunimanima ese idia hanamoa gaudia.”​—Fili. 4:8.

24. Dahaka dainai Iehova ena Witnes taudia be tomadiho idauidau ida idia tomadiho lasi?

• “‘Iehova ena pata’ ai bona demoni edia pata ai nega tamona umui aniani diba lasi.”​—1 Kor. 10:21.

• “‘Iehova ia gwau: . . .umui raka siri, bona idia amo do umui parara, bona miro gauna do umui dogoatao lasi.’”​—2 Kor. 6:17.

25. Bema oi ura moale karana ta dekenai oi vareai, edena hakaua herevadia ese oi do ia durua disisen maorodia oi karaia?

• “Idia be bese idauidau idia bamoa bona edia kara idia badinaia. Idia ese unai bese edia kaivakuku idia tomadiho henia noho, bona idia dekenai unai be tarapu ta bamona.”​—Sal. 106:35, 36.

• “Mase taudia be gau ta idia diba lasi.”​—Had. 9:5.

• “Idia be tanobada ena lasi, lau hegeregerena, lau be tanobada ena lasi.”​—Ioa. 17:16.

• “Guna umui be nega bada umui haorea tanobada taudia edia ura umui badinaia totona. Umui ese tauanina ena ura idauidau umui biagua lasi, gwau-edeede hemarai karadia, inuinu kekero, regerege bada pati, inuinu helulu, bona kaivakuku tomadiho henia karadia dika rohorohodia umui karaia.”​—1 Pet. 4:3.

26. Baibel ai idia noho haheitalai ese edena dala ai oi idia durua disisen maorona oi karaia vara dinana moalelaia karana dekenai?

• “Dina ihatoina be Farao ena vara dinana, bona ena hesiai taudia ibounai totona aria ia karaia, bona ena hesiai taudia edia vairanai wain bubua taudia edia biaguna bona paraoa gabua taudia edia biaguna ia abia raka-lasi. Bona wain bubua taudia edia biaguna dekenai ena wain bubua gaukarana ia henia lou . . . To paraoa gabua taudia edia biaguna ia tauadae.”​—Gen. 40:20-22.

• “Heroda ena vara dinana idia moalelaia neganai, Herodia ena natuna kekeni ia mavaru bona Heroda ia hamoalea bada dainai, kekeni dekenai gwauhamata ia karaia, herevana dahaka ia noia do ia henia sibona. Vadaeni, kekeni be ena sinana ese ia hamaoroa hegeregerena, ia gwau: ‘Mereki palakana ta latanai Ioane Bapatiso ena kwarana be lau dekenai oi henia.’ Vadaeni oda ia henia bona dibura rumana lalonai Ioane ena kwarana idia utua oho.”​—Mat. 14:6-8, 10.

27. Dahaka dainai oi ura elda taudia edia hakaua dalana oi badinaia be namo?

• “Umui idia hakaua taudia do umui kamonai henia, bona idia henunai do umui noho, badina idia ese umui idia naria noho, gabeai Dirava ena vairanai edia gaukara ena anina do idia gwauraia hedinarai. Idia henunai umui noho neganai, mai moale ida edia gaukara do idia karaia, bona do idia lalohisihisi lasi, badina bema mai lalohisihisi ida idia karaia, namo ta do umui davaria lasi.”​—Heb. 13:17.

28. Dahaka dainai oi bona emu ruma bese be nega umui atoa hanaihanai Baibel umui duahia bona stadilaia be namo?

• “ Ia be Iehova ena taravatu dekenai ia moale, bona dina bona hanuaboi ai Dirava ena taravatu be gado maragi ai ia duahia. Ia be sinavai badinai idia hadoa au bamona, Unai au be ena nega ai huahua ia havaraia, bona ena raurau idia kakoro lasi. Bona unai tauna be ia karaia gaudia ibounai lalonai do ia kwalimu.”​—Sal. 1:2, 3.

29. Dahaka dainai oi ura hebou dekenai oi lau bona haere oi henia diba?

• “Lau ese emu ladana be egu tadikakadia dekenai do lau harorolaia, bona hebou taudia huanai oi do lau hanamoa.”​—Sal. 22:22.

• “Namona be ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia. Iseda hebou karana ita rakatania lasi, haida ese idia karaia bamona, to ita hagoadaia heheni, bona unai kara do ita habadaia noho, badina umui itaia dina be ia kahirakahira noho.”​—Heb. 10:24, 25.

30. Iesu be dahaka mai anina bada gaukarana ia henia ita dekenai?

• “Unai dainai umui lao, bese ibounai taudia be hahediba taudia ai umui halaoa, . . .idia do umui bapatisoa . . . , idia umui hadibaia, umui dekenai lau henia hahegani ibounai idia badinaia totona.”​—Mat. 28:19, 20.

31. Doneisen ita henia Basilaeia gaukara totona eiava tadikaka taihu ita durudia neganai, edena kara ese Iehova ia moalelaia?

• “Emu dava bada kohudia amo Iehova oi hanamoa.”​—Aon. 3:9.

• “Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.”​—2 Kor. 9:7.

32. Dahaka hekwakwanai ese Keristani taudia do idia davaria diba?

• ““Kara maoromaoro dainai dagedage idia davaria taudia be idia moale, badina guba Basileia be idia edia. “Lau dainai taunimanima ese umui idia gwauraia dika, idia dagedage henia bona hereva koikoi idauidau idia gwauraia neganai, umui moale. Umui moale bada herea badina emui davana guba dekenai be bada. Badina guna peroveta taudia danu be unai bamona idia dagedage henidia.”​—Mat. 5:10-12.

33. Dahaka dainai ta ia bapatiso bona Iehova ena Witnes tauna ai ia lao neganai, unai be hahenamo badana ta?

• “Emu hereva dainai lau moale bada, badina tuari oreadia edia Dirava Iehova e, lau be emu ladana ai gaukara lau karaia.”​—Ier. 15:16.

Bapatiso be lagani ta ta ai Iehova ena Witnes taudia idia karaia edia hebou maragidia bona badadia dekenai. Bapatiso tok ena dokona ai, tok ia henia tauna ese bapatiso idia abia gwauraia taudia do ia noia idia gini bona inai henanadai rua be mai gado badana ida do idia haerelaia:

1. Emu kara dika amo oi helalo-kerehai, Iehova dekenai emu mauri oi gwauhamatalaia vadaeni, bona Iesu Keriso ena hahemauri amo iena dala oi abia dae, a?

2. Oi laloparara emu bapatiso ese ia hahedinaraia, hari dina ai oi be Iehova ena Witnes ta ai oi lao bona Iehova ena orea do oi bamoa, a?

Bapatiso idia abia gwauraia taudia ese edia haere amo idia hahedinaraia idia ese mauri davalaia boubouna idia abidadama henia bona danu idia hahedinaraia idia ese edia mauri be Iehova dekenai idia gwauhamatalaia. (Roma 10:9, 10) Unai dainai, bapatiso idia abia gwauraia taudia be mai guriguri ida unai henanadai idia laloa guna be namo, unai amo idia ta ta sibona idia abia dae gaudia hegeregerena haere idia henia diba.

Guriguri amo Iehova dekenai emu mauri oi gwauhamatalaia vadaeni, ia sibona do oi tomadiho henia bona iena ura do oi karaia emu mauri ibounai lalonai?

Hari oi laloa oi hegeregere momokani bapatiso do oi abia, a?

Edena bamona dabua be maoro bapatiso totona? (1 Tim. 2:9, 10; Ioa. 15:19; Fili. 1:10; )

Namona be “mai hemataurai bona mai laloa maoromaoro ida” dabua do ita karaia unai amo ita hahedinaraia ita be “Dirava tomadiho henia” taudia. Unai dainai, bapatiso idia abia gwauraia taudia ese hemataurai lasi digudigu dabua eiava dabua mai edia toretore idauidau idia karaia lasi be namo. Namona be idia karaia dabua ena toana be namo bona ia goeva bapatiso totona.

Ta ia bapatiso neganai, edena bamona ia kara be namo? (Luka 3:21, 22)

Hari inai negai, Keristani taudia ese Iesu ena bapatiso dalana idia tohotohoa. Iesu ese ena lalohadai bona kara amo ia hahedinaraia bapatiso be mai anina bada gauna. Unai dainai, bapatiso gabuna be hevaseha eiava digudigu gabuna lasi, eiava unai bamona kara ma haida amo unai mai anina bada negana ita hadikaia lasi. Bona namo lasi Keristani tauna matamatana ese ena kara amo ia hahedinaraia ia kwalimu vadaeni. Ena be bapatiso be moale negana, to unai moale be hemataurai dalana ai idia hahedinaraia be namo.

Edena dala ai hebou hanihanai bona Kongrigeisen oi bamoa momo karana ese oi ia durua emu gwauhamata Iehova dekenai oi hamomokania totona?

Bapatiso oi abia murinai danu, dahaka dainai stadi sediual namona do oi badinaia bona haroro gaukara do oi karaia noho be gau badana?