Herevahereva Dokona Bapatiso Idia Abia Gwauraia Taudia Ida

Bapatiso be lagani ta ta ai Iehova ena Witnes taudia idia karaia edia hebou maragidia bona badadia dekenai. Bapatiso tok ena dokona ai, tok ia henia tauna ese bapatiso idia abia gwauraia taudia do ia noia idia gini bona inai henanadai rua be mai gado badana ida do idia haerelaia:

1. Emu kara dika amo oi helalo-kerehai, Iehova dekenai emu mauri oi gwauhamatalaia vadaeni, bona Iesu Keriso ena hahemauri amo iena dala oi abia dae, a?

2. Oi laloparara emu bapatiso ese ia hahedinaraia, hari dina ai oi be Iehova ena Witnes ta ai oi lao bona Iehova ena orea do oi bamoa, a?

Bapatiso idia abia gwauraia taudia ese edia haere amo idia hahedinaraia idia ese mauri davalaia boubouna idia abidadama henia bona danu idia hahedinaraia idia ese edia mauri be Iehova dekenai idia gwauhamatalaia. (Roma 10:9, 10) Unai dainai, bapatiso idia abia gwauraia taudia be mai guriguri ida unai henanadai idia laloa guna be namo, unai amo idia ta ta sibona idia abia dae gaudia hegeregerena haere idia henia diba.

Guriguri amo Iehova dekenai emu mauri oi gwauhamatalaia vadaeni, ia sibona do oi tomadiho henia bona iena ura do oi karaia emu mauri ibounai lalonai?

Hari oi laloa oi hegeregere momokani bapatiso do oi abia, a?

Edena bamona dabua be maoro bapatiso totona? (1 Tim. 2:9, 10; Ioa. 15:19; Fili. 1:10; )

Namona be “mai hemataurai bona mai laloa maoromaoro ida” dabua do ita karaia unai amo ita hahedinaraia ita be “Dirava tomadiho henia” taudia. Unai dainai, bapatiso idia abia gwauraia taudia ese hemataurai lasi digudigu dabua eiava dabua mai edia toretore idauidau idia karaia lasi be namo. Namona be idia karaia dabua ena toana be namo bona ia goeva bapatiso totona.

Ta ia bapatiso neganai, edena bamona ia kara be namo? (Luka 3:21, 22)

Hari inai negai, Keristani taudia ese Iesu ena bapatiso dalana idia tohotohoa. Iesu ese ena lalohadai bona kara amo ia hahedinaraia bapatiso be mai anina bada gauna. Unai dainai, bapatiso gabuna be hevaseha eiava digudigu gabuna lasi, eiava unai bamona kara ma haida amo unai mai anina bada negana ita hadikaia lasi. Bona namo lasi Keristani tauna matamatana ese ena kara amo ia hahedinaraia ia kwalimu vadaeni. Ena be bapatiso be moale negana, to unai moale be hemataurai dalana ai idia hahedinaraia be namo.

Edena dala ai hebou hanihanai bona Kongrigeisen oi bamoa momo karana ese oi ia durua emu gwauhamata Iehova dekenai oi hamomokania totona?

Bapatiso oi abia murinai danu, dahaka dainai stadi sediual namona do oi badinaia bona haroro gaukara do oi karaia noho be gau badana?

HADIBAIA HEREVA KONGRIGEISEN ENA ELDA TAUDIA TOTONA

Bapatiso lasi pablisa ia ura bapatiso neganai, namona be ia idia hagoadaia inai buka ena rau 185-207 dekenai, “Idia Ura Bapatiso Idia Abia Gwauraia Taudia Edia Henanadai,” ia riviulaia be namo. Namona be ia idia hamaoroa rau 182 ai ia noho herevana, “Hereva ta Bapatiso Lasi Pablisa Dekenai,” ia itaia totona; unai kahana ese ia hahedinaraia edena bamona ia hegaegae elda taudia ida ia herevahereva totona. Unuseniai ia hahedinaraia bamona, edia herevahereva lalonai bapatiso ia abia gwauraia tauna ese pepa ma ta dekenai ia torea herevadia ia gaukaralaia diba eiava inai buka ia kehoa diba. To, elda taudia ida edia herevahereva idia do hamatamaia lasi neganai, tadikaka o taihu ma ta ida unai henanadai idia riviulaia hebou be anina lasi.

Bema ta ia ura bapatiso ia abia, namona be elda oreana ena kodineita ia hadibaia. Ia ura bapatiso ia abia tauna ese “Idia Ura Bapatiso Idia Abia Gwauraia Taudia Edia Henanadai,” ia riviulaia murinai elda oreana ena kodineita ese unai tauna do ia nanadaia bema guriguri amo Iehova dekenai ia gwauhamata ena ura ia karaia totona. Bema bapatiso ia abia gwauraia tauna be ena mauri ia gwauhamatalaia vadaeni, elda oreana ena kodineita ese dala do ia karaia elda rua be ia ida “Idia Ura Bapatiso Idia Abia Gwauraia Taudia Edia Henanadai,” do idia herevalaia. Namona be elda idaudia rua idia abia hidi unai kahana rua idia karaia totona . Namo lasi idia naria ela bona hebouhebou negadia idia gwauraia bena unai herevahereva idia karaia.

Unai kahana rua be nega rua do idia hebou bona do idia karaia, idia ta ta be hora tamona, to bema idia ura nega idia halataia, vadaeni idia karaia diba. Namona be guriguri amo kahana ta ta idia kehoa bona koua. Namo lasi bapatiso ia abia gwauraia tauna eiava elda taudia ese haragaharaga dalanai unai henanadai idia karaia. Idia abia hidi elda taudia be edia sediual ai inai riviu kahana idia atoa guna.

Namona be bapatiso idia abia gwauraia taudia ta ta ida unai henanadai oi riviulaia, to grup dekenai oi karaia lasi. Badina bapatiso idia abia gwauraia taudia ta ta ese henanadai ta ta ia haerelaia neganai, elda taudia be unai tauna ena laloparara Baibel dekenai do idia diba, bona do idia hamomokania bema unai tauna be ia hegeregere bapatiso ia abia eiava lasi. Danu, unai bamona idia karaia neganai bapatiso ia ura abia tauna be do ia hekwarahia lasi ena lalohadai ia gwauraia hedinara. Ia headava tau bona ena adavana be edia henanadai idia karaia hebou diba.

Bema bapatiso ia abia gwauraia tauna be taihu ta, vadaeni namona be elda tauna be ia sibona ida unai henanadai ia karaia lasi. To namona be elda tauna ta eiava hesiai tauna ta ida ia karaia.

Elda momo lasi kongrigeisen dekenai, laloa maoromaoro bona laloa kehoa ia hahedinaraia hesiai tauna ese bapatiso henanadai ena “Kahana 1: Keristani Hahediba Herevadia” be bapatiso idia abia gwauraia taudia ta ta ida ia riviulaia diba. Elda taudia sibona be “Kahana 2: Keristani Maurina” do idia karaia. Bema kongrigeisen ai hesiai taudia eiava elda be lasi, namona be sekit nari tauna hadibaia unai amo dala ia karaia diba kahirakahira ia noho kongrigeisen ta ena elda taudia ese heduru idia henia diba.

Bema bapatiso ia abia gwauraia tauna be natu maragina, iena tama sina idia noho be namo. Bema idia hegeregere lasi idia noho totona, vadaeni namona be elda rua (eiava elda bona hesiai tauna ta) idia noho be namo unai kahana ta ta idia riviulaia totona.

Elda taudia do idia tahua bapatiso ia abia gwauraia tauna be Baibel ena hahediba hereva badadia ia lalopararalaia vadaeni eiava lasi. Danu, do idia tahua bema ia ese hereva momokani ia abia dae bona ia hahedinaraia ia be Iehova ena orea ia matauraia eiava lasi. Bema unai tauna ese Baibel ena hahediba hereva badadia ia lalopararalaia namonamo lasi, elda taudia ese dala do idia karaia heduru ma haida ia abia totona, unai amo gabeai do ia hegeregere bapatiso do ia abia. Haida dekenai nega do idia henia haroro gaukara laloa bada karana idia hahedinarai, eiava orea ena dala idauidau idia badinaia namonamo totona. Namona be elda taudia ese hora do ia haria namonamo kahana ta ta idia karaia neganai, unai amo do idia itaia bema ta be ia hegeregere do ia bapatisoeiava lasi. Ena be henanadai haida dekenai nega bada do idia gaukaralaia bona ma haida dekenai be nega sisina sibona, to namona be henanadai ibounai idia riviulaia.

Idia abia hidi elda taudia be kahana iharuana ena henanadai idia riviulaia murinai do idia hebou, bona do idia abia hidi bema unai tauna be ia hegeregere bapatiso do ia abia diba eiava lasi. Elda taudia be bapatiso idia abia gwauraia taudia ta ta edia mauri dalana, diba, bona ma gau haida do idia laloa. Elda taudia edia ura gauna be, bema ta beena hetura karana Iehova ida ia laloa bada bona Baibel ena hereva momokani badadia ia lalopararalaia. Mai lalokau ida idia ura bapatiso idia abia taudia oi durua neganai, do idia hegaegae namonamo edia hesiai gaukara, sivarai namona harorolaia gaukarana idia hagugurua diba.

Gabeai, kahana idia karaia elda ta eiava idia ruaosi be bapatiso ia abia gwauraia tauna idia boiria bona do idia hamaoroa bapatiso do ia abia diba eiava lasi. Bema unai tauna do ia bapatiso, namona be elda taudia ese rau 206-207 dekenai inai hereva, “Herevahereva Dokona Bapatiso Idia Abia Gwauraia Taudia Ida,” do idia riviulaia hebou. Bema bapatiso ia abia gwaraia tauna be Mauri Moalelaia Hanaihanai! buka ia haorea lasi, namona be elda taudia ese idia hagoadaia ia bapatiso murinai unai buka ia haorea be namo. Bapatiso ia abia gwaraia tauna hadibaia, ena bapatiso deit be ena Kongrigeisen Pablisa Rekod dekenai do idia atoa. Umui hadibaia, elda taudia be inai pesenol infomeisen idia abia badina orea ese tanodaba hegegemadai Ieheva ena Witnes taudia edia tomadiho ena gaukara iduaidau idia naria noho bona unai amo kongrigeisen lalonai hesiai gaukara do ia karaia diba bona lauma dalanai heduru do ia abia diba. Danu, elda taudia be pablisa matamata idia hadibai pesenol infomeisen ibounai idia gaukaralaia be Iehova ena Witnes taudia edia Global Data Protection Policy ena taravatu jw.org ai ia noho hegergerena. Inai herevahereva be miniti 10 lalonai idia karaia be namo.

Pablisher ia bapatiso bona lagani ta murinai, namona be elda rua be ia ida idia hebou bona idia hagoadaia bona heduru herevadia haida idia henia. Namona be inai elda rua huanai, idia ta be ena grup naria tauna. Bema bapatiso ia abia tauna be natu maragina ta, namona be ena abidadama tama sina idia noho be namo. Inai hebou be lalokau bona hagoadaia dalanai oi karaia. Elda taudia be ena tubu lauma dalanai do idia herevalaia bona heduru daladia haida do idia henia edena dala ai ena pesenol stadi, ena Baibel duahiduahi, ruma bese tomadiho, hebou lao karana, kongrigeisen durua daladia bona wiki ta ta ai ena haroro gaukara ia hanamoa diba. (Efe. 5:15, 16) Bema Mauri Moalelaia Hanaihanai! bukana ia stadilaia to ia haorea lasi, elda taudia ese dala idia karaia pablisa ta ese ia ia durua unai buka rua ia haorea totona. Namona be elda taudia be ia idia hanamoa mai lalokau ida. To gau bada be, sisiba bona heduru tamona eiava rua be hegeregere.