HENANADAI 7

Bema ta ese Lau Ia Doria Ai Mahuta Hebou Totona be Edena Bamona?

DAHAKA DAINAI UNAI LAU LALOA BE NAMO?

Mahuta hebou karana (sex) dekenai oi karaia disisen ese emu vaira negana maurina do ia hadikaia diba.

DAHAKA DO OI KARAIA?

Haheitalai ta laloa. Ena be hua rua lalonai, Heather be Mike ia bamoa, to Heather ia laloa ia be Mike ia diba namonamo. Nega momo teks idia siaia heheni, hora momo lalonai fon ai idia herevahereva, bona gau ibounai idia herevalaia namonamo diba!

Unai hua rua lalonai, nega haida Mike be Heather ena imana ia dogoatao bona kisi henia. Hari, Mike ia ura kara ma haida do idia karaia. Heather ia ura lasi. To danu, ia ura lasi Mike ia haboioa. Badina ia laloa Mike sibona ena kara be namo herea. Heather ia gwau, ‘Lau bona Mike be ai lalokau heheni . . . ’

Bema oi be kekeni badana bona mai emu mero, bena ia ese oi ia doria umui mahuta hebou totona, dahaka do oi karaia?

STOPU BONA LALOA

Dabua hairaina ta be gabu mirona dahua totona idia gaukaralaia — Dirava be headava taudia sibona dekenai maoro ia henia idia mahuta hebou totona. Headava lasi taudia ese mahuta hebou karana idia gadaralaia be kerere. Unai be hegeregere, tau ta ese dabua mai hairaina be oi dekenai ia henia oi hahedokilaia totona, to oi ese unai dabua be gabu mirona hagoevaia totona oi gaukaralaia.

Bema au ta amo oi paudobi badina oi ura manu ta bamona oi roho, reana dika do oi davaria. Unai hegeregerena, dika do oi davaria bema inai bamona taravatu oi badinaia lasi: “Matabodaga karadia umui dadaraia.”—⁠1 Tesalonika 4:3

Unai taravatu oi utua neganai, dahaka do ia vara? Baibel ia gwau: “Matabodaga karana ia karaia noho tauna be ia sibona ena tauanina dekenai ia kara dika.” (1 Korinto 6:18) Edena dala ai unai hereva be ia momokani?

Researchers idia gwau, matamata taudia momo be idia headava lasi to mahuta hebou karana idia karaia, bona dika momo idia davaria.

LALOHISIHISI. Idia headava lasi matamata taudia momo idia gwau idia mahuta hebou murinai lalohisihisi bada idia abia.
IDIA TRUST HEHENI LASI. Matamata taudia be idia mahuta hebou murinai, idia gwau: ‘Ia be daika danu ia mahuta hebou vadaeni?’
LALOHADAI KEREREDIA. Kekeni momo idia gwau, ‘Lau ura lasi koikoi merona lau adavaia, lasi, lau ura adavaia merona be lau do ia naria namonamo.’ Memero momo idia gwau, ‘Mero ma ta ida ia mahuta hebou kekenina be lau ura henia lasi.’
Gau badana be inai: Bema oi headava lasi to ta ida oi mahuta hebou, oi ese emu singul maurina do oi hadikaia. (Roma 1:24) Emu tauanina be dava bada gauna ta bamona dainai, ma ta dekenai oi henia kava lasi.

Oi hahedinaraia emu lalona ia goada, anina be “matabodaga karadia [oi] dadaraia.” (1Tesalonika 4:3) Bema gabeai oi headava, vadaeni emu adavana ida umui mahuta hebou be kerere lasi. Bona unai negai unai kara oi moalelaia diba—⁠madi, idia headava lasi taudia be idia mahuta hebou murinai, idia hemarai, idia lalohekwarahi, idia lalohisihisi, bona idia noho namonamo lasi.—⁠Aonega Herevadia 7:22, 23; 1 Korinto 7:3.

DAHAKA OI LALOA?

Oi ia lalokau henia momokani merona eiava kekenina ese emu tauanina o lalomamina do ia hadikaia, a?
Oi ia lalokau henia momokani merona eiava kekenina ese emu hetura karana Dirava ida ia hadikaia diba, a?—⁠Heberu 13:4.