HENANADAI 9

Evolusen Hereva Lau Abia Dae be Namo, A?

DAHAKA DAINAI UNAI LAU LALOA BE NAMO?

Bema evolusen lalohadaina be momokani, vadaeni mauri be anina lasi. Bema Dirava ese gau ibounai ia havaraia lalohadaina be momokani, ita ese henanadai badadia—⁠hari inai nega bona vaira negana totona—⁠edia haere be ita davaria diba.

DAHAKA DO OI KARAIA?

Haheitalai ta laloa: Alex ia daradara. Hanaihanai ia abia dae Dirava be ia noho bona gau ibounai ia havaraia. To hari, Alex ena baioloji tisa ia gwau, evolusen lalohadaina be momokani, bona saiens taudia ese idia davaria gaudia be unai idia hamomokania. Alex ia ura lasi haida ese ia idia kirikirilaia. Ia sibona dekenai ia henanadai: ‘Bema saiens taudia ese idia davaria, evolusen lalohadaina be momokani, vadaeni edia lalohadai lau abia dae be namo, ani!’

Bema oi be Alex, oi ese evolusen lalohadaina do oi abia dae badina buka ta ese ia hamomokania, a?

STOPU BONA LALOA!

Nega momo, Dirava idia abia dae taudia bona evolusen lalohadaina idia abia dae taudia be idia abidadama henia gauna idia gwauraia haraga diba to ena badina be idia diba lasi.

Haida idia abia dae, Dirava ese gau ibounai ia havaraia badina dubu ai unai idia dibaia.
Haida idia abia dae, evolusen lalohadaina be momokani badina sikuli ai unai idia dibaia.

HENANADAI 6 OI LALOA

Baibel ia gwau: “Ruma ibounai be mai edia karaia tauna, to gau ibounai ia karaia tauna be Dirava.” (Heberu 3:4) Unai hereva oi abia dae, a?

Mero ta be ruma ta ia itaia — Haida idia gwau gau ibounai be Dirava ese ia havaraia lasi; unai be hegeregere, haida idia gwau inai ruma be tau ta ese ia haginia lasi

HAIDA IDIA GWAU: Gau haida idia pou murinai, iunives ai, gau ibounai idia vara.

1. Daika o dahaka ese unai gaudia ia hapoua?

2. Edena hereva be maoro: Gau ibounai be idia vara kava eiava gau ibounai ia karaia tauna ia noho?

HAIDA IDIA GWAU: Animal amo taunimanima idia vara.

3. Bema animal—⁠hegeregere ape o maniki badana—⁠ta amo taunimanima idia vara, vadaeni dahaka dainai taunimanima edia aonega ese animal edia ia hanaia?

4. Bema aonega tauna ta ese robot ta ia karaia bena ia program dainai robot be gau idauidau ia karaia diba, vadaeni daika ese iseda tauanina lalonai sel idauidau ia karaia?

HAIDA IDIA GWAU: Evolusen lalohadaina be momokani.

5. Unai bamona ia hereva tauna be sibona ena research amo unai ia hamomokania diba, a?

6. Evolusen lalohadaina idia abia dae taudia hida idia gwau idia kamonai, aonega taudia ibounai be unai lalohadai idia abia dae?

“Bema oi be uda ai oi raka lalonai ruma mai hairaina ta oi itaia, vadaeni dahaka do oi gwau? ‘Ruma namona! Reana au idia moru murinai, karaharaga inai ruma ia gini.’ Oi be unai bamona do oi hereva, a? Lasi, unai be lalohadai kavakavana. To, dahaka dainai ita abia dae, gau ibounai be Dirava ese ia havaraia?”—⁠Julia.

“Mani oi laloa: Tau ta ese oi ia hamaoroa, ‘Buka printaia faktori ai, bomu ta ia pou murinai, ink o peni be haba bona silin dekenai idia toretore ela bona diksenari ta ia vara, bona unai diksenari lalonai be ita ura henia hereva ibounai idia noho.’ Unai hereva do oi abia dae, a?”—⁠Gwen.

DAHAKA DAINAI DIRAVA OI ABIA DAE?

Baibel be oi ia hagoadaia “emui darana” oi gaukaralaia totona. (Roma 12:1) To namo lasi Dirava oi abia dae badina be

OI SIBONA OI LALOA DALANA (Lau laloa goada o siahu bada tauna ta ia noho)
HAIDA EDIA LALOA DALANA (Egu komiuniti ai idia noho taudia ibounai be mai edia dubu)
FAMILI EDIA LALOA DALANA (Egu tama sina ese lau idia durua Dirava lau abia dae totona)

To, Dirava oi abia dae ena badina namodia haida idia noho be namo.

“Egu klas tisa ese eda tauanina ia gaukara daladia ia herevalaia neganai, lau sibona be egu lalona dekenai lau gwau, ‘Dirava be ia noho momokani.’ Eda tauanina ena kahana ibounai—⁠badadia bona maragidia—⁠be mai edia gaukara ta ta, to haida idia gaukara dalana be ita itaia lasi. Momokani, iseda tauanina dekenai ita hoa bada!”—⁠Teresa.

“Bema ruma badana ta, o bouti badana ta, o motuka ta lau itaia, lau sibona lau nanadaia, ‘Daika ese inai ia karaia?’ Hegeregere, aonega tauna ta be motuka ia karaia neganai, ia ese gau maragidia ibounai be edia gabu korikori ai ia atoa dainai, motuka be ia heau namonamo. So bema motuka be mai ena karaia tauna, anina be taunimanima ia karaia tauna ia noho danu.”—⁠Richard.

“Herevana saiens gaudia lau stadilaia namonamo, to lau davaria evolusen lalohadaina be koikoi. . . . Lau dekenai, evolusen lalohadaina lau abia dae be auka to Dirava ese gau ibounai ia havaraia lalohadaina lau abia dae be auka lasi.”—⁠Anthony.

MANI OI LALOA

Herevana lagani momo lalonai, saiens taudia be research idauidau idia karaia, to evolusen lalohadaina idia hamomokania gauna ta idia do davaria lasi. Bema saiens taudia—⁠diba bada taudia—⁠ese evolusen lalohadaina be idia hamomokania diba lasi, vadaeni oi laloa unai lalohadai oi hepapahuahulaia be kerere, a?