“Oiemu Basileia Ia Mai be Namo”

Iehova ia gwauhamata: ‘Taitai, hisihisi, gorere, bona mase be do idia ore. Lau ese edia mata ranu ibounai be edia matana amo do lau dahua ore. Guna idia vara gau dikadia be do umui laloa lou lasi.’

Iehova ese Adamu bona Heva be Eden umana ai ia atodia, maino bona moale ai idia noho totona. Bona edia guba Tamana do idia tomadiho henia bona tanobada be edia natudia amo do idia hahonua. To Adamu bona Heva be Iehova idia kamonai henia lasi, to unai ese iena ura ia senisia lasi. Inai buka ai ita itaia bamona, Dirava ena gwauhamata ibounai do idia vara momokani. Iena Basileia ese tanobada ai hahenamo momo do ia mailaia, Aberahamo dekenai ia gwauhamata hegeregerena.

Kahirakahira Satani, iena demoni, bona taunimanima dikadia ibounai do idia ore. Bona mauri taudia ibounai ese Iehova do idia tomadiho henia. Do ita gorere eiava mase lasi. To daba ta ta ai do ita noga mai goada bada ida, bona do ita moale badina ita mauri. Tanobada be paradaiso ai do ia lao. Ibounai be mai edia aniani namodia bona ruma namodia. Taunimanima edia kara be do ia namo, bona dagedage karadia be lasi. Uda animal be ita do idia gari henia lasi, bona idia dekenai do ita gari lasi.

Iehova ese mase taudia ia hatorea isi lou neganai, do ita moale bada. Idaunegai idia mase taudia, hegeregere Abela, Noa, Aberahamo, Sara, Mose, Ruta, Eseta, bona Davida do ita welkam henia. Idia be ita ida do idia gaukara hebou Tanobada be paradaiso ai ita halaoa totona. Gaukara namodia momo do ita karaia hanaihanai.

Iehova ia ura paradaiso ai do oi noho. Unai nega ai Iehova do oi diba namonamo. Namona be dina ta ta ai Iehova kahirakahira ita lao, hari amo ela bona hanaihanai!