Dirava ese Tau Bona Hahine Ginigunana Ia Karaia

Iehova ese uma gabu ta ia karaia, ena ladana be Eden. Unai uma be flaoaflaoa, au, bona animal idauidau amo ia honu. Bena Dirava ese tano kahu amo tau ginigunana Adamu ia karaia, bena ena udu baubau lalonai mauri ena laga ia hiriria vareai. Oi diba dahaka ia vara? Unai tau be ia mauri! Iehova ese Adamu dekenai uma gabu naria gaukarana ia henia, bona ia hamaoroa animal edia ladadia do ia hatoa.

Iehova ese Adamu dekenai mai anina bada taravatu ta ia henia. Adamu ia hamaoroa: ‘Uma ai idia noho au ibounai edia huahua oi ania diba, to au tamona sibona ena huahua be do oi ania lasi, badina do oi mase.’

Gabeai Iehova ia gwau: ‘Lau ese Adamu totona durua tauna ta do lau karaia.’ Dirava ese Adamu ia hamahutaia, bona Adamu ena ruduna turia amo hahine ia karaia. Hahine ena ladana be Heva. Adamu bona Heva be famili ginigunana. Adamu ena hemami be edena bamona? Adamu be ia moale bada dainai ia gwau: ‘Inai be Iehova ese egu ruduna turia amo ia karaia! Oibe! Ia be egu toana bamona.’

Iehova ese Adamu bona Heva ia hamaoroa natudia do idia havaraia bona tanobada do idia hahonua. Dirava ia ura mai moale ida do idia gaukara hebou tanobada ibounai be paradaiso eiava uma gabu hairaina ai do idia halaoa, Eden umana bamona. To unai bamona ia vara lasi. Dahaka dainai? Karoa 3 ai unai do ita dibaia.