Iesu be Hahediba Taudia Dekenai Guriguri Dalana Ia Hadibaia

Farisea taudia idia karaia gaudia be taunimanima hamoalea totona. Bema kara namona ta idia karaia, idia ura haida ese do idia itaia. Taunimanima ese idia itaia totona, pablik gabudia ai idia guriguri. Farisea taudia be sinagoga bona strit ena kona dekenai guriguri latadia idia lalodia bona gwauraia loulou, ma haida ese idia kamonai totona. Unai dainai taunimanima be Iesu ena hereva dekenai idia hoa, ia gwau: ‘Farisea taudia bamona umui guriguri lasi. Idia laloa Dirava be edia guriguri latana dainai do ia moale, to ia moale lasi. Guriguri be oi bona Iehova sibona huanai. To namo lasi gau tamona sibona oi gwauraia loulou. Iehova ia ura emu hemami korikorina oi gwauraia.’

‘Vadaeni inai bamona do umui guriguri: “Aiemai Tamana guba dekenai oi noho, namona be ibounai ese emu ladana idia hahelagaia. Oiemu Basileia ia mai be namo. Emu ura gauna tanobada dekenai ia vara be namo, guba dekenai ia vara bamona.”’ Danu Iesu be idia ia hamaoroa dina ta ena aniani, kara dika gwauatao, bona gau ma haida totona idia guriguri be namo.

Iesu ia gwau: ‘Umui guriguri noho. Emui Tamana Iehova dekenai, gau namodia totona do umui noinoi. Tama sina idia ura edia natudia dekenai gau namodia idia henia. Bema emu natuna mero be beredi ia noia, nadi do oi henia, a? Bema gwarume totona ia noinoi, gaigai do oi henia, a?’

Bena Iesu ese unai hereva ena anina ia herevalaia: ‘Bema emui natudia dekenai gau namodia umui henia diba, namona be umui diba momokani emui Tamana, Iehova ese umui dekenai lauma helaga do ia henia, ani? Umui noinoi sibona.’ Iesu ena sisiba oi badinaia, a? Dahaka gaudia be guriguri ai do oi gwauraia?