Iesu be Edena Bamona Tauna?

Iesu be tanobada ai ia noho neganai, ia gwauraia bona ia karaia gaudia amo iena kara namodia ita dibaia, bona unai ese ita ia durua Iesu bona ena Tamana, Iehova kahirakahira ita lao totona. Unai kara namodia haida be dahaka? Bona edena dala ai iseda mauri ai Iesu do ita tohotohoa?

1. Edena dala ma haida ai Iesu be iena Tamana hegeregerena?

Lagani bilioni momo lalonai, Iesu be guba ai ena Tamana lalokauna ia itaia bona ia amo diba ia abia. Unai dainai, ena lalohadai, hemami bona kara be ena Tamana hegeregerena. (Ioane 5:​19 duahia.) Oibe, Iesu ese ena Tamana ena kara ia hahedinaraia goevagoeva dainai ia gwau: “Lau ia itaia tauna be Tamana danu ia itaia vadaeni.” (Ioane 14:9) Iesu ena kara oi dibaia noho neganai, oi ese Iehova do oi dibaia namonamo. Hegeregere, Iesu ese taunimanima ia hebogahisi henia karana ese ia hahedinaraia Iehova be oi ia laloa bada.

2. Edena dala ai Iesu ia hahedinaraia Iehova ia lalokau henia?

Iesu ia gwau: “Tanobada taudia do idia diba lau be Tamana lau lalokau henia, lau be Tamana ia hagania hegeregerena do lau karaia.” (Ioane 14:31) Iesu be tanobada ai ia noho neganai, nega aukadia lalonai danu Tamana ia kamonai henia karana amo lalokau bada ia hahedinaraia. Iesu ia ura dikadika ena Tamana ia herevalaia, bona ma haida ia durua ena Tamana idia tura henia totona.​​​—Ioane 14:23.

3. Edena dala ai Iesu ia hahedinaraia taunimanima ia lalokau henidia?

Baibel ia gwau Iesu be “taunimanima [ia] ura henia bada.” (Aonega Herevadia 8:​31) Iesu ese taunimanima ia hagoadaia bona mai ura ida ia durudia karana amo unai lalokau ia hahedinaraia. Ia karaia hoa karadia ese iena siahu ia hahedinaraia sibona lasi, to iena hebogahisi karana danu. (Mareko 1:​40-​42) Taunimanima ibounai ia kara namo henidia bona edia toana ia laloa lasi. Iesu ena hereva ese kudou-maoro taudia ibounai ia hagoadaia bona helaro ia henia. Iesu be taunimanima ibounai ia lalokau henidia dainai, mai ena ura ida idia totona hisihisi ia abia bona ia mase. To iena hahediba herevadia idia badinaia taudia ia lalokau henia bada.​​​—Ioane 15:​13, 14 duahia.

DIBA MA HAIDA ABIA

4. Iesu be ena Tamana ia lalokau henia

Iesu ena haheitalai ese ita dekenai Dirava lalokau henia dalana ia hadibaia. Luka 6:​12 bona Ioane 15:10; 17:26 duahia. Siri ta ta duahia murinai, inai henanadai herevalaia:

• Iesu ena haheitalai hegeregerena, edena dala ai do ita hahedinaraia Iehova ita lalokau henia?

6. Iesu be hariharibada tauna

Iesu be hariharibada karana ia hahedinaraia, herevana ia be kohu momo lasi tauna, bona ita ia hagoadaia hariharibada karana ita hahedinaraia totona. Kara 20:35 duahia, bena inai henanadai herevalaia:

• Iesu ena hereva hegeregerena, edena dala ai ita moale diba?

VIDIO itaia, bona henanadai herevalaia.

VIDIO: “Henia Kara Ena Moale be Bada”—Ena Kahana Ta (4:​00)

• Edena dala ma haida ai henia karana ita hahedinaraia diba, herevana ita dekenai gau momo idia noho lasi?

Inai oi diba, a?

Baibel ese ita ia hadibaia Iesu ladanai Iehova ita guriguri henia. (Ioane 16:​23, 24 duahia.) Unai bamona ita guriguri neganai, ita hahedinaraia Iehova ita tura henia totona Iesu ese ia karaia karana ita lalopararalaia.

POINT BADANA

Iesu be Iehova ia lalokau henia, bona taunimanima ia lalokau henia danu. Iesu be ena Tamana bamona dainai, Iesu oi dibaia namonamo neganai, Iehova do oi dibaia namonamo.

Riviu

• Iesu hegeregerena, edena dala ai Iehova ita lalokau henia diba?

• Iesu hegeregerena, edena dala ai taunimanima ita lalokau henia diba?

• Iesu amo edena kara oi ura henia?

REFERENS ITAIA

Iesu amo ita tohotohoa diba kara namodia haida laloa.

“Iesu Oi Tohotohoa Totona, Oi . . .” (Iesu​​—Dala, Hereva Momokani, Mauri, rau 317)

Oi itaia dahaka dainai Iesu ena ladana ai ita guriguri be namo.

“Dahaka Dainai Iesu Ena Ladana ai Ita Guriguri?” (Gima Kohorona, February 1, 2008)

Baibel ese Iesu ena toana ia herevalaia, a?

“Iesu Ena Toana be Edena Bamona?” (Websait atikol)

Iesu ese hahine ia kara henia dalana amo dahaka ita dibaia?

“Dirava Ia Ura Hahine Ita Matauraia” (Gima Kohorona, October 1, 2012)