LESENI 51
Edena Dala ai Emu Hereva amo Iehova Oi Hamoalea Diba?
Iehova ese ita ia havaraia neganai, ita dekenai harihari gauna namona ta ia henia—herevahereva karana. Iehova ese unai harihari gauna ita gaukaralaia dalana ia laloa bada, a? Oibe! (Iamesi 1:26 duahia.) Edena dala ai iseda hereva amo Iehova ita hamoalea diba?
1. Edena dala ai unai harihari gauna ita gaukaralaia diba?
Baibel ese ita ia hamaoroa ‘ta ta do ita durua bona ta ta do ita hagoadaia noho.’ (1 Tesalonika 5:11) Idia lalomanoka taudia haida oi diba, a? Dahaka oi karaia diba idia oi hagoadaia totona? Namona be oi hahedinaraia idia oi laloa bada. Bona reana oi hadibaia edia kara namona ta oi ura henia. Ma ta oi hagoadaia totona siri namona ta oi laloatao, a? Oi gaukaralaia diba siri namodia momo idia noho. Danu laloatao, oi gaukaralaia herevadia bona emu hereva dalana ese ta ia hagoadaia diba. Unai dainai, namona be hanaihanai mai manau bona gado namo ida ita hereva.—Aonega Herevadia 15:1.
2. Edena bamona hereva ita dadaraia be namo?
Baibel ia gwau: “Namo lasi hereva bodagadia umui gwauraia.” (Efeso 4:29 duahia.) Anina be ta ena lalona hahisia totona hereva mirodia, hereva dikadia bona badu herevadia ita gwauraia lasi. Danu udu mauri bona ta ena ladana hadikaia herevadia do ita gwauraia lasi.—Aonega Herevadia 16:28 duahia.
3. Dahaka ese ita do ia durua ma haida hagoadaia herevadia ita gwauraia totona?
Nega momo ita herevalaia gaudia ese iseda kudouna o lalona ai idia noho gaudia ia hahedinaraia. (Luka 6:45) Unai dainai, sibona do ita hadibaia gau namodia hegeregere, ‘kara maoromaoro, kara goeva, lalokau, bona taunimanima hanamoa gaudia’ do ita laloa hanaihanai. (Filipi 4:8) Unai bamona ita karaia totona, namona be ita bamoa turadia, muvi o miusiki do ita abia hidi namonamo. (Aonega Herevadia 13:20) Danu ita ia durua gauna ma ta be, ita do hereva lasi neganai, namona be ita ura gwauraia herevadia bona gwauraia dalana do ita laloa guna. Haida ese emu hereva idia kamonai neganai, edia hemami be edena bamona? Baibel ia gwau: “Ia laloa namonamo lasi tauna ena hereva be tuari kaia amo ta ia gwadaia bamona, to aonega tauna ena hereva ese namo ia havaraia.”—Aonega Herevadia 12:18.
DIBA MA HAIDA ABIA
Iehova oi hamoalea bona ma haida oi hagoadaia hereva dalana do oi dibaia.
4. Emu hereva dalana oi naria namonamo
Nega haida, ita ibounai be ita gwauraia herevana dainai ita lalohisihisi. (Iamesi 3:2) Galatia 5:22, 23 duahia, bena inai henanadai herevalaia:
Edena kara namodia totona do oi guriguri, unai amo emu hereva dalana oi hanamoa diba? Edena dala ai unai kara namodia ese oi idia durua diba?
Korinto Ginigunana 15:33 duahia, bena inai henanadai herevalaia:
Edena dala ai oi abia hidi turadia bona moale karadia ese emu hereva dalana idia biagua diba?
Dahaka ese emu hereva dalana idia haidaua diba?
Hadibaia Tauna 3:1, 7 duahia, bena inai henanadai herevalaia:
Dahaka dainai gau ta ita do hereva lasi, o ita naria ela bona nega namona ai do ita hereva be aonega karana?
5. Haida edia kara namodia herevalaia
Edena dala ai hahisia herevadia o hereva dikadia gwauraia karana ita dadaraia diba? VIDIO itaia, bona henanadai herevalaia.
Vidio ai, dahaka dainai tadikaka ia ura ma haida ia herevalaia karana ia haidaua?
Dahaka ia karaia ena hereva dalana ia hanamoa totona?
Hadibaia Tauna 7:16 duahia, bena inai henanadai herevalaia:
Bema ita ura ta ita gwauraia dika, dahaka ita laloatao be namo?
Hadibaia Tauna 7:21, 22 duahia, bena inai henanadai herevalaia:
Bema ta ese oi ia gwauraia dika, edena dala ai inai siri ese oi ia durua oi badu lasi totona?
6. Mai hemataurai ida emu ruma bese taudia oi hereva henia
Iehova ia ura iseda ruma bese taudia dekenai mai lalokau bona hemataurai dalanai do ita hereva. VIDIO itaia, bona henanadai herevalaia.
Dahaka ese oi do ia durua emu ruma bese taudia be mai hemataurai ida oi hereva henia totona?
Efeso 4:31, 32 duahia, bena inai henanadai herevalaia:
Edena dala ai iseda ruma bese taudia ita hereva henia dalana amo do idia mamia idia ita lalokau henia?
Iehova ese ena Natuna Iesu totona, ena lalokau ia gwauraia hedinarai. Mataio 17:5 duahia, bena inai henanadai herevalaia:
Emu ruma bese taudia ida oi herevahereva neganai, edena dala ai Iehova oi tohotohoa diba?
Ma haida oi hamaoroa edia kara namona ta dainai oi moale
HAIDA IDIA GWAU: “Egu lalona ai idia noho gaudia lau gwauraia sibona. Bema egu hereva idia ura lasi, unai be edia wari.”
Unai oi abia dae, a? Dahaka dainai?
POINT BADANA
Hereva be mai edia siahu. Namona be edena negai do ita hereva, bona edena dala ai do ita hereva, ita laloa namonamo guna.
Riviu
Edena dala ai emu hereva dalana oi gaukaralaia diba ma haida oi durua totona?
Edena bamona hereva dalana oi dadaraia be namo?
Dahaka ese ita do ia durua unai amo mai hemataurai ida ma haida ita hereva henia bona hagoadaia diba?
REFERENS ITAIA
Dahaka ese ita do ia durua unai amo iseda hereva dalana amo ma haida ita hagoadaia diba?
Hereva mirodia oi dadaraia diba dalana do oi dibaia.
“Hereva Mirodia Ita Gwauraia be Dika Lasi, A?” (Websait atikol)
Haida gwauraia dika karana oi dadaraia dalana do oi dibaia.
Do oi itaia edena dala ai Iehova ese tau ta ia durua hereva mirodia gwauraia karana ia rakatania totona.
“Sibona Lau Nanadaia: ‘Gabeai Egu Mauri be Edena Bamona?’” (Gima Kohorona, October 1, 2013)