Hakaua Oreana amo Ia Mai Revareva

Tadikaka Bona Taihu E:

Dirava bona taunimanima lalokau henia karana ese ita ia durua “bese ibounai be hahediba taudia ai [ita] halaoa, bona . . . idia [ita] bapatisoa” totona. (Mat. 28:​19, 20; Mar. 12:​28-31) Sibona ena ura dadaraia lalokauna be mai ena siahu. Unai kara ese “mauri hanaihanai idia ura kudou maoro taudia” ia durua diba.—Kara 13:48.

Guna, ita be haroro daladia bona pablikeisen ta ita rakatania karana ita laloa bada. To hari, ita be taunimanima ida ita herevahereva karana do ita hanamoa. Ita ura ma haida ese idia laloa bada topik ita herevalaia unai amo idia dekenai lalokau ita hahedinaraia. Anina be iseda hereva dalana ita haidaua bona taunimanima ta ta edia lalohekwarahi bona idia laloa bada gaudia ita laloa. Edena dala ai inai buklet ese ita do ia durua unai ita karaia totona?

Inai buklet ai idia noho leseni 12 ese idia herevalaia kara namodia ta ta ese ita do ia durua, taunimanima ita lalokau henia bona hahediba taudia ai ita halaoa totona. Leseni ta ta ese Iesu bona Keristani taudia ginigunadia idia hahedinaraia kara namodia edia Baibel sivarai ia herevalaia. Iseda tahua gauna be, ita hegaegaelaia haroro herevana do ita laloatao lasi, to dala ita tahua taunimanima dekenai lalokau ita hahedinaraia totona. Momokani, ena be haroro gaukara ai unai kara ta ta ita hahedinaraia be namo, to do ita itaia herevahereva hamatamaia, lou henia, eiava Baibel stadi ita karaia neganai edena kara haida ita hahedinaraia be mai anina bada.

Leseni ta ta oi itaia neganai, namona be emu gabu ai idia noho taudia dekenai unai kara do oi hahedinaraia dalana oi laloa. Oi gaukara goada emu lalokau Iehova bona taunimanima totona oi habadaia. Unai lalokau karana ese oi do ia durua hahediba taudia halaoa karana oi hagugurua totona.

Ai moale bada badina umui ida ai gaukara hebou. (Sef. 3:9) Iehova ese umui do ia hanamoa, taunimanima umui lalokau henia bona hahediba taudia ai umui halaoa noho lalonai!