Idia Hunia Dava Bada Gaudia Idia Davaria

GABU idauna ta dekenai dava bada hunia gauna ta oi davaria, a? March 27, 2005 ai, Estonia ai Iehova ena Witnes tauna ta, Ivo Laud, dekenai unai ia vara. Ia be Witnes taihu burukana ta, Alma Vardja ia durua ruma gunana ta idia kokia totona. Ruma ena haba idia kokia neganai, idia itaia au palakana ta be du ena kahana ta ia koua. Unai au palakana idia kokia neganai, idia itaia du ena lalona be idia geia, ena lababa be 10 sentimita, ena lata be 1.2 mita, bona ena dobu be 10 sentimita, bona du ida ia hegeregere auna ta amo idia koua. (1) Unai du lalonai be idia hunia dava bada gaudia idia noho! Unai dava bada gaudia be dahaka? Daika ese ia hunidia?

Unai du lalonai pepa aukadia amo idia kumia namonamo gaudia haida idia davaria. (2) Idia kumia gaudia lalonai be Iehova ena Witnes taudia edia buka bona magasin idia noho, idia momo be Gima Kohorona edia stadi herevadia, idia haida be lagani 1947 ena stadi herevadia. (3) Unai gaudia be imana amo idia torea namonamo, Estonia gado ai. Idia kumia pepa haida ese idia hahedinaraia unai gaudia be ta ese ia hunia. Unai pepa lalodiai be Alma ena adavana, Villem Vardja idia nanadaia ena sivarai ia noho. Danu, idia davaria pepadia haida lalonai, Villem be lagani momo lalonai dibura ruma ai ia noho ena sivarai idia noho. Dahaka dainai ia be dibura ruma ai ia noho?

Villem Vardja be Tartu Kongrigeisen dekenai maduna haida ia huaia, bona gabeai Estonia dekenai, Otepää Kongrigeisen ai maduna haida ia huaia. Reana ia be Tanobada Tuarina Iharuana ia do vara lasi neganai, Baibel ena hereva momokani ia dibaia. Lagani haida murinai, December 24, 1948 ai, Tadikaka Vardja be ena tomadiho gaukaradia dainai Komiunis taudia ese dibura ruma ai idia atoa. Pulisi taudia ese idia nanadaia bona idia doria Witnes taudia ma haida edia ladana ia gwauraia hedinarai totona. Kota dekenai ena hereva idia abia dae lasi, to maoromaoro idia siaia Russia ena dibura kamepa ai lagani 10 ia noho totona.

Villem Vardja be Iehova ia badinaia ela bona March 6, 1990 ai ia mase. Iena adavana ia diba lasi unai buka bona magasin idia noho. Reana Villem ia ura lasi ena adavana be pulisi ese do idia nanadaia, unai dainai ena adavana gimaia totona, unai gaudia ia hunia gabuna ia hadibaia lasi. Dahaka dainai unai buka bona magasin ia hunidia? Badina gavamani ena sekuriti orea gunana ta (KGB) be nega momo Iehova ena Witnes taudia edia ruma dekenai idia lao, buka bona magasin idia tahua totona. Reana tadikaka Vardja ese unai buka bona magasin ia hunidia, unai amo unai orea taudia ese tadikaka ma haida edia buka bona magasin idia abia neganai, ia hunia gaudia amo tadikaka be heduru idia abia diba. Lagani 1990 ai, idia hunia buka bona magasin ma haida idia davaria. Unai hunia gauna ta be Tartu, southern Estonia dekenai idia davaria. Unai danu be Villem Vardja ese ia hunia.

Dahaka dainai ia torea gaudia ibounai ita gwauraia dava bada gaudia? Badina unai be imana amo ia torea bona ia hunia namonamo, bona unai ese ia hahedinaraia unai nega ai idia noho Witnes taudia be idia abia lauma aniani idia laloa bada. (Mat. 24:45) Hari emu kongrigeisen amo oi abia buka bona magasin oi laloa bada, a? Idia ta be Gima Kohorona, Estonia gado bona gado 170 mai kahana ai idia hahanaia.