Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

• Dahaka dainai Mesia ia mase?

Iesu ena mase ese ia hamomokania hahetoho lalonai, goevadae tauna be Iehova ena dala ia badinaia diba. Danu, unai amo ia ese Adamu ena bese edia kara dika davana ia karaia, bona dala ia kehoa mauri hanaihanai ita abia totona.​​—⁠12/15, rau 22-23.

• Natudia ida herevahereva namonamo karana lalonai dahaka oi karaia be namo?

Herevahereva namonamo karana be emu natudia oi hereva henia sibona lasi, to idia dekenai henanadai haida oi henia bona edia haere oi kamonai namonamo. Ruma bese momo idia davaria, aniani negana be nega namona idia herevahereva namonamo totona.​​—⁠1/15, rau 18-​19.

• Edena bamona negadiai ta be reana do ia laloa ia bapatiso lou be namo?

Inai bamona negadia ai: Hegeregere, ta be ia bapatiso neganai reana ena mauri lalonai gau haida be hehuni dalanai ia karaia dainai ia be orea amo idia atoa siri diba.​​—⁠2/15, rau 22.

• Iesu ese ia gwauraia uiti bona ava parabolena ai, uhe namodia hadoa gaukarana be dahaka ia laulaulaia?

Iesu, “Taunimanima ena Natuna” unai, be tanobada ai haroro gaukara ia karaia neganai, tano ia hegaegaelaia hadohado totona. Pentekoste 33 C.E. amo, uhe namodia​​—⁠“Basileia ena taunimanima”​​—⁠ia hadoa matamaia. Unai hadoa gaukarana be lauma helaga amo Keristani taudia idia horoa bona idia be Dirava ena natudia ai idia lao neganai ia matamaia.​​—⁠3/15, rau 20.

• Edena dala ai Iesu ese ena parabole ai ia herevalaia uiti namodia be Iehova ena ruma dekenai idia haboua? (Mat. 13:⁠30)

Unai hereva be inai tanobada dikana ena dokona ia matamaia negana amo ia guguru matamaia, bona unai be nega daudau sisina. Basileia ena taunimanima, uiti namodia unai, be Keristani kongrigeisen ai idia haboua, eiava guba ena helaro idia abia ese ia hahedinaraia idia be Iehova ena ruma dekenai idia haboua.​​—⁠3/15, rau 22.

• Daika ese Keristani Greek Revarevadia ai idia torea Baibel bukadia edia lista ia abia hidi?

Unai lista be dubu kaunsolo ta eiava dubu gunalaia tauna ta ese ia abia hidi lasi. Baibel ia gwau, Keristani kongrigeisen ginigunana be lauma helaga amo ‘harihari gaudia idauidau’ idia abia. (1 Kor. 12:⁠4) Unai dainai, lauma helaga ena heduru amo Keristani taudia haida idia laloparara edena hereva be Dirava amo ia mai bona edena be lasi.​​—⁠4/1, rau 28.