Iesu Ena Boubou Gauna ese Ita Ia Hamauria Dalana
“Dirava ena Natuna ia abidadama henia tauna ese mauri hanaihanai do ia abia, to iena Natuna ia kamonai henia lasi tauna be mauri do ia itaia lasi, badina Dirava ena badu be iena latanai do ia noho.”—IOA. 3:36.
1, 2. Dahaka dainai Zion’s Watch Tower ginigunana idia halasia?
OCTOBER 1879 ai idia halasia Zion’s Watch Tower, ia gwau: “Baibel idia stadilaia namonamo taudia idia abia dae Keriso ena mase be mai anina bada. . . . Namona be ita naria namonamo badina hahediba koikoi herevadia haida idia gwau Iesu ena boubou gauna be anina lasi. Unai bamona koikoi herevadia ita dadaraia be namo.”—1 Ioane 2:1, 2 duahia.
2 July 1879 ai, Zion’s Watch Tower ginigunana idia halasia badina idia ura Baibel ena lalohadai mauri davalaia boubouna dekenai idia hamomokania. Unai magasin be ‘nega korikori ai aniani ia henia.’ Badina lagani 1886 bamona ai sibodia idia gwauraia Keristani taudia momo be Iesu ena boubou gauna ese iseda kara dika ia kokia diba dalana idia dadaraia. (Mat. 24:45) Unai nega ai, idia momo be evolusen lalohadaina idia abia dae. Idia gwau taunimanima be idia goeva idia lao noho dainai, Iesu ena boubou gauna be anina lasi. Unai dainai, Paulo ena sisiba be mai anina bada, ia gwau: “Timoteo e, Dirava ese oi dekenai ia henia dagi do oi naria namonamo. Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri. Inai bamona taudia edia diba be aonega koikoi sibona. Inai aonega koikoi ese haida ia koia vadaeni. Idia gwau, ‘Ai ese aonega ai davaria vadaeni.’ Unai dainai idia moru, badina edia abidadama Iesu dekenai idia rakatania.”—1 Tim. 6:20, 21.
3. Edena henanadai toi do ita herevalaia?
3 Momokani, ita ura lasi Iesu abidadama henia karana ita rakatania. Unai dainai, inai mai anina bada henanadai ita lalodia be namo: Dahaka dainai Iesu ena boubou gauna lau abidadama henia be namo? Iehova bona Iesu be mauri davalaia boubouna idia henia neganai edia hemami be edena bamona? Edena dala ai unai harihari gauna amo namo lau davaria, bona Iehova ena badu dinana ai lau roho mauri diba?
Dirava Ena Badu amo Ita Ia Hamauria
4, 5. Dahaka gaudia ese idia hamomokania Dirava ena badu be tanobada taudia latanai ia do noho?
4 Baibel bona histori lalonai idia vara gaudia ese idia hahedinaraia Adamu ia kara dika negana amo, Dirava ena badu be tanobada taudia ‘latanai ia do noho.’ (Ioa. 3:36) Unai ia hamomokania gauna be taunimanima ese mase idia koua diba lasi. Satani ena lohia dalana ese dika amo ita ia gimaia lasi, bona gavamani ta be hegeregere lasi taunimanima edia dabu gaudia idia henia totona. (1 Ioa. 5:19) Unai dainai tuari, kara dika bona ogogami be bada herea.
5 Inai tanobada ena oromana dikana ese ia hahedinaraia Iehova ena hahenamo be taunimanima latanai ia noho lasi. Paulo ia gwau: “Dirava ena badu guba dekena amo ia diho mai noho, taunimanima edia kara dikadia bona edia kerere ibounai dainai.” (Roma 1:18-20) Unai dainai, idia helalo-kerehai lasi bona Dirava ese ia moalelaia lasi mauri dalana idia badinaia taudia be dika do idia davaria. Hari, iseda Baibel bukadia momo ese Iehova ena hahemaoro herevadia be Satani ena tanobada dekenai idia halasia noho.—Apok. 16:1.
6, 7. Horoa Keristani taudia be dahaka gaukara idia gunalaia noho, bona taunimanima be Dirava ena turana ai idia lao totona nega be lasi, a?
6 Anina be Satani ena siahu henunai idia noho taudia dekenai nega be lasi edia kara idia haidaua bona Dirava idia tura henia totona, a? Lasi, nega ia do noho idia be Iehova idia tura henia totona. Horoa Keristani taudia o “Keriso ena hereva gwauraia hedinarai taudia” be haroro gaukara idia gunalaia noho, bona idia ese bese idauidau taudia idia boiria idia gwau: “Dirava . . . danu do umui turana karaia.”—2 Kor. 5:20, 21.
7 Aposetolo Paulo ia gwau, Iesu “ese Dirava ena badu, gabeai do ia mai gauna, dekena amo ita ia hamauria.” (1 Tes. 1:10) Idia helalo-kerehai lasi kara dika taudia be Aramagedono ai Dirava ese do ia haoredia momokani. (2 Tes. 1:6-9) To, daidia do idia roho mauri? Baibel ia gwau: “Dirava ena Natuna ia abidadama henia tauna ese mauri hanaihanai do ia abia, to iena Natuna ia kamonai henia lasi tauna be mauri do ia itaia lasi, badina Dirava ena badu be iena latanai do ia noho.” (Ioa. 3:36) Tanobada ena dokona ia ginidae neganai, idia mauri noho taudia bona Iesu ena boubou gauna idia abidadama henia taudia be Dirava ena badu amo do idia roho mauri.
Mauri Davalaia Boubouna ese Ita Ia Hamauria Dalana
8. (a) Bema Adamu bona Heva idia gwau-edeede lasi, dahaka hahenamo idia moalelaia diba? (b) Edena dala ai Iehova ese ia hahedinaraia ia be hahemaoro goevagoeva Diravana?
8 Dirava ese Adamu bona Heva ia havaraia neganai, idia be goevadae taudia. Bema Dirava idia gwau-edeede henia lasi, hari ita be mai moale ida Paradaiso ai idia ida do ita noho hebou. To, Adamu bona Heva be mai edia ura ida Dirava ena taravatu idia utua. Unai dainai, Dirava ese ia hahemaoro henidia bona Paradaiso amo ia luludia. Edia natudia idia havaraia neganai, taunimanima ibounai dekenai kara dika ia hanaia, bona idia ruaosi idia buruka idia lao bona idia mase. Unai ese ia hahedinaraia Iehova ena hereva be ia momokani bona ia be hahemaoro goevagoeva Diravana. Matamanai, Dirava ese Adamu ia hagania bema taravatua au huahua ia ania do ia mase, bona Iehova ena hereva be ia vara momokani.
9, 10. (a) Dahaka dainai ita mase? (b) Edena dala ai mauri hanaihanai ita abia diba?
9 Adamu ia kara dika neganai, ena natudia ia do havaraia lasi. To, gabeai natudia idia vara neganai, idia be mai edia kara dika. Unai dainai, ita danu ita vara neganai, ita buruka ita lao bona ita mase. To, bema Iehova be buruka bona mase ia kokia bona mauri davalaia boubouna ia henia lasi, ita gwau diba Iehova be Adamu dekenai ia gwauraia hahemaoro herevana ia badinaia lasi unai. Momokani, Paulo be ita ibounai ia herevalaia, ia gwau: “Ita diba vadaeni Taravatu be lauma ena, to lau be tauanina ena, kara dika ese lau ia guia, vadaeni lau be kara dika ena hesiai tauna. Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria?”—Roma 7:14, 24.
10 Iehova Dirava sibona ese hahemaoro dalana goevana ai iseda kara dika ia gwauatao bona mase amo ita ia hamauria diba. Unai ia karaia dalana be, iena lalokau Natuna ia siaia tanobada ai goevadae tauna bamona do ia vara bona ena mauri do ia bouboulaia ita ibounai totona. Iesu be Adamu bamona lasi badina kara dika ta ia karaia lasi. (1 Pet. 2:22) Iesu be goevadae natudia ia havaraia diba, to unai ia karaia lasi. To, Dirava ena inai taudia ese idia hamasea, unai amo Adamu ena natudia be iena natudia ai ia halaoa diba, bona iena boubou gauna idia abidadama henia taudia be mauri hanaihanai idia abia diba. Baibel ia gwau: “Badina be Dirava be tamona, Dirava bona taunimanima ia hakapudia tauna danu be tamona. Unai tauna be Keriso Iesu. Keriso sibona ese iena mauri ia henia, taunimanima ibounai hamauria totona.”—1 Tim. 2:5, 6.
11. (a) Mauri davalaia boubouna ena haheitalai mani oi gwauraia. (b) Mauri davalaia boubouna be daidia dekenai namo ia mailaia danu?
11 Mauri davalaia boubouna ita lalopararalaia namonamo totona, mani inai haheitalai ita laloa: Taunimanima haida be banika ta ai edia moni idia atoa, to unai banika taudia ese edia moni idia henaoa dainai edia abitorehai davana idia karaia diba lasi. Unai banika ena biaguna taudia be dibura rumana dekenai idia atoa. To, banika ai edia moni idia atoa taudia be idia ogogami bona edia noho dalana ia auka. Gabeai, unai banika be taga tauna ta ese ia hoia bona unai banika ai moni idia atoa taudia edia moni ia henidia lou bona edia abitorehai davana idia karaia diba. Unai hegeregerena, Iehova Dirava bona ena lalokau Natuna Iesu be ia bouboulaia rarana amo Adamu ena natudia idia hoia lou bona edia kara dika idia gwauatao. Unai dainai, Ioane bapatiso ia gwau: “Itaia, Dirava ena Mamoe Natuna ia mai inai, ia be tanobada ena dika kokia tauna.” (Ioa. 1:29) Tanobada taudia ibounai, anina be mauri taudia sibona lasi, to idia mase taudia danu edia dika ia gwauatao vadaeni.
Iehova Bona Iesu ese Idia Mamia Hisihisina
12, 13. Aberahamo bona Isako edia sivarai amo dahaka ita dibaia?
12 Momokani, iseda guba Tamana bona iena lalokau Natuna ese idia henia boubou gauna dainai idia mamia hisihisina be ita ese do ita lalopararalaia diba lasi. To, Baibel ai idia noho haheitalai haida ese ita idia durua edia hemami ita lalopararalaia totona. Hegeregere, mani Aberahamo ita laloa, Dirava ese ia hamaoroa: “Oiemu natuna oi abia, oi sibona oiemu natuna korikori, Isako, oi lalokau henia merona. Moraia tano dekenai do umui lao. Unuseni oi do lau hamaoroa, ororo ta ena ataiai, mero be lahi boubou gauna do oi halaoa.” Aberahamo be Iehova ena hahegani ia badinaia totona dina toi lalonai Moraia ororona dekenai ia raka lao neganai, ena hemami mani oi laloa.—Gen. 22:2-4.
13 Aberahamo be Iehova ese ia gwauraia gabuna ai ia ginidae. Ena be ia lalohisihisi bada bona ia auka Isako ia bouboulaia totona, to ena imana bona aena ia kwatua bona boubou patana ai ia hahekurea. Iena kaia ia abia isi bona ena natuna ia hamasea gwauraia neganai ena hemami mani oi laloa! Bona Isako danu ia lalohisihisi bada, to tamana ia koua lasi. Boubou patana ai ia hekure sibona bona ia naria tamana ese kaia amo do ia hamasea! Aberahamo be Isako ia gwadaia gwauraia neganai, Iehova ena aneru ese ia koua. Aberahamo bona Isako ese idia karaia karana be Iehova bona Iesu edia kara ia haheitalaia. Unai ese ita ia durua, Satani ena taunimanima be Iesu idia hamasea gwauraia neganai, Dirava ese idia ia koua lasi bona Iena hemami ita lalopararalaia totona. Bona, Isako ese ena tamana ia koua lasi bamona, Iesu ese ena Tamana ia koua lasi bona mai ena ura ida ita dainai ia mase karana ia haheitalaia.—Heb. 11:17-19.
14. Iakobo ena sivarai ese edena dala ai ita ia durua Iehova ena hemami ita lalopararalaia totona?
14 Iakobo ena sivarai ese ita ia durua Iehova bona Iesu edia hemami ita lalopararalaia totona. Iena natuna memero ibounai amo, Iakobo ese Iosepa ia lalokau henia bada. Unai dainai, Iakobo ena natuna memero ma haida be Iosepa idia mama henia bona idia ura henia lasi. To, Iosepa be tamana ese ia siaia ena kakadia do ia sekea neganai, mai ena ura ida ia lao. Unai nega ai, idia be Heberona ena not kahana dekenai edia mamoe idia naria noho. Iakobo ena natudia ese Iosepa ena dabua be mai rara ida Iakobo dekenai idia henia bona ia itaia neganai, mai taitai ida ia gwau: “Inai be lauegu natuna ena kouti dabua. Uda boroma ta ese ia koria mase vadaeni. Momokani, Iosepa ia mase vadaeni.” Iakobo ia lalohisihisi bada, bona dina bona hanuaboi momo lalonai Iosepa totona ia taitai. (Gen. 37:33, 34) Iehova be goevadae lasi taudia bamona ia taitai lasi. To Iakobo ena sivarai ita laloa neganai, ita ia durua Iesu be tanobada ai dagedage ia davaria bona ia mase neganai, Iehova ena hemami ita lalopararalaia totona.
Iesu Ena Boubou ese Ita Ia Durua Dalana
15, 16. (a) Edena dala ai Iehova ese ia hahedinaraia Iesu ena boubou gauna ia abia dae? (b) Unai boubou gauna amo dahaka namo oi davaria?
15 Iehova Dirava ese ena lalokau Natuna ia hatorea isi lou neganai, mase diba lasi laumana ai ia halaoa. (1 Pet. 3:18) Dina 40 lalonai Iesu be ena hahediba taudia dekenai ia hedinarai, edia abidadama ia hagoadaia bona gabeai do idia karaia haroro gaukara totona idia ia durua. Bena guba dekenai ia daekau, bona ia bouboulaia rarana be Dirava dekenai ia henia, unai amo iena mauri davalaia boubouna idia abidadama henia taudia ese mauri do idia davaria. Iehova Dirava ese Keriso ena boubou gauna ia abia dae, bona ia dekenai gwaumaoro ia henia Pentekoste 33 C.E. ai Ierusalema dekenai lauma helaga be iena hahediba taudia latanai ia bubua totona.—Kara 2:33.
16 Keriso murinai idia raka horoa Keristani taudia be ma haida idia durua Iesu ena ladana ai bapatiso idia abia be namo, unai amo edia kara dika do ia gwauatao bona Dirava ena badu dinana ai do idia roho mauri diba. (Kara 2:38-40 duahia) Unai nega amo ema bona hari, bese idauidau taudia milioni momo be Iesu ena boubou gauna dainai Dirava idia tura henia diba. (Ioa. 6:44) Namona be inai henanadai rua ita laloa: Iseda kara namodia dainai Dirava ese ita dekenai mauri hanaihanai helarona ia henia, a? Unai helaro namona ita halusia diba, a?
17. Dirava oi tura henia diba dainai, emu hemami be edena bamona?
17 Iehova ena hebogahisi dainai Iesu ia siaia ita totona ia mase. Iesu ena boubou gauna idia abidadama henia dainai, taunimanima milioni momo be Dirava ena turana ai idia lao bona tanobada paradaisona ai mauri hanaihanai idia abia diba. To, Iehova ena turana ai ita lao karana ita haboioa diba. Unai dainai, Dirava ena badu dinana ai ita roho mauri totona, Iesu Keriso ena boubou gauna ita laloa bada noho be gau badana.—Roma 3:24; Filipi 2:12 duahia.
Iesu Ena Boubou Gauna Abidadama Henia Noho
18. Iesu ena boubou gauna ita abidadama henia ena anina be dahaka?
18 Ioane 3:36 ese ia hahedinaraia Lohiabada Iesu Keriso ita abidadama henia anina be ia do ita kamonai henia. Iena boubou gauna ita abia dae anina be ena hahediba herevadia bona kara maoromaoro taravatudia be iseda mauri lalonai do ita badinaia. (Mar. 7:21-23) To, heudahanai, sihari kava, matabodaga karadia idia karaia taudia bona ponografi idia itaia taudia danu be edia kara idia haidaua lasi neganai, “edia latanai Dirava ena badu do ia ginidae momokani.”—Efe. 5:3-6.
19. Edena dala haida ai ita hahedinaraia Iesu ena boubou gauna ita abiadadama henia?
19 Iesu ena boubou gauna ita abidadama henia ena anina be iseda “kara ibounai do idia helaga be namo.” (2 Pet. 3:11) Namona be nega ita atoa guriguri, sibona eda Baibel stadi, hebou ita lao, ruma bese tomadiho ita karaia, bona Basileia sivaraina harorolaia gaukarana ita goadalaia totona. Bona Heberu 13:15, 16 ena hereva ita badinaia, ia gwau: “Kara namodia do umui laloaboio lasi, bona kohu lasi taudia danu, umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.”
20. Iesu ena boubou gauna idia abidadama henia taudia ibounai be vaira negana ai dahaka hahenamo idia abia diba?
20 Iehova ese inai tanobada dikana ia haorea neganai, do ita moale badina ita ese Iesu ena boubouna gauna ita abidadama henia bona ita laloa bada! Dirava ena gwauhamata tanobada matamatana ai, do ita moale bada badina Iesu ena boubou gauna ese Dirava ena badu amo ita ia hamauria.—Ioane 3:16; Apokalupo 7:9, 10, 13, 14 duahia.
Edena Bamona Do Oi Haere?
• Dahaka dainai Iesu ena boubou gauna ita abidadama henia be namo?
• Dirava bona Iesu ese mauri davalaia boubouna idia henia dainai idia mamia hisihisina be edena bamona?
• Iesu ena boubou gauna amo dahaka hahenamo ita abia?
• Edena dala ai ita hahedinaraia Iesu ena boubou gauna ita abidadama henia?
[Picture on page 13]
Nega ia do noho Iehova ena turana ai ita lao totona
[Pictures on page 15]
Aberahamo, Isako bona Iakobo edia sivarai ese ita ia durua Dirava bona Iesu ese mauri davalaia boubouna idia henia neganai idia mamia hisihisi ita lalopararalaia totona