Lau Tomadiho Henia Diravana be Hari Lau Diba

LAU be December 10, 1968 ai, lau vara, Ilocos Norte, Philippines dekenai. Ai natudia 10 amo lau be namba 7. Filipino taudia momo bamona, ai danu be Katolik tomadiho lalonai ai tubu daekau. Lagani 1986 ai, haisikuli lau haorea bona lau ura nesi gaukara lau karaia. To egu ura gauna ia vara lasi, badina gorere badana ta lau abia. Lau laloa do lau mase. Unai negai lau lalohisihisi bada bona Dirava lau noia lau ia durua. Lau hamaoroa bema gorere amo lau namo, egu mauri ibounai lalonai ia do lau hesiai henia.

Gorere amo lau namo murinai, Dirava dekenai lau karaia gwauhamata lau laloatao. Unai dainai, June 1991 ai, Pentecostal Bible sikuli ai lau vareai. Unai sikuli ena taravatu ia gwau “lauma helaga ena harihari gauna” do ai abia. Lau ura gorere hanamoa siahuna lau abia. Sikuli ese ai ia hadibaia unai siahu ai abia dalana be do ai aniani lasi bona ai guriguri. Nega ta, lau ura hahedinaraia lau be unai “harihari gauna” lau abia, unai dainai guriguri negana lalonai, egu klas turana ta be kona ta dekenai ia gini bona ia guriguri badabada neganai, lau be hunia dalanai ena guriguri lau kamonai. Ena guriguri ia hadokoa gwauraia neganai, karaharaga lau giroa lou tui diho gabuna dekenai. Unai murinai, ia gurigurilaia gaudia be ia dekenai lau gwauraia, bona ia abia dae lau dekenai “harihari gauna” ia noho!

Sikuli dekenai lau stadi noho neganai, egu henanadai be momo. Hegeregere, Mataio 6:9 ese “Tamana” bona iena “ladana” ia herevalaia. Lau henia henanadai haida be inai, “Iesu ese ia herevalaia Tamana be daika?” bona “Daika ena ladana ita hahelagaia be namo?” Egu tisa edia haere lau lalopararalaia lasi bona lau moale lasi. Idia gwau Dirava be Toi Tamona, bona ia be hehuni gauna ta. Unai lau daradaralaia bada. Herevana unai ia vara, to pasto ai lau lao totona lau stadi noho.

Iehova Ena Witnes Taudia Lau Davaria

Sikuli dekenai, ai idia hadibaia Iehova ena Witnes taudia be tomadiho koikoi idia durua. Taunimanima ese Witnes taudia idia gwauraia Keriso tuari henia taudia. Unai tomadiho lau inai henia matamaia.

Lagani iharuana ena sikuli holidei ai, ruma dekenai lau lao tama sina lau vadivadi henia totona. Egu kakana ta, Carmen, ia kamonai lau be ruma dekenai lau noho bona ia mai lau ia itaia totona. Ia be ia bapatiso vadaeni bona Iehova ena Witnes ta ai ia lao, bona hanaihanai haroro gaukara ia karaia. Ia ese lau dekenai Dirava ia herevalaia toho neganai, mai badu ida lau gwau: “Lau tomadiho henia Diravana lau diba vadaeni!” Bona lau gwau henia murinai, ia lau doria raka-lasi bona nega lau henia lasi lau ia hereva henia totona.

Sikuli dekenai lau giroa lou murinai, Carmen ese buklet ta ladana, Toi Tamona Herevana Oi Abia Dae be Namo, Eiava?a be lau dekenai ia siaia. Ia dekenai lau badu noho dainai, unai buklet lau abia neganai lahi dekenai lau negea.

Pasto Gaukara Lau Karaia

Pentecostal Bible sikuli ai lau stadi noho neganai, egu kara haida lau haidaua. Egu sinana bona kakana mero be Pentecostal tomadiho ai idia vareai neganai lau moale.

March 1994 ai, lau be Pentecostal Bible sikuli lau haorea. Matamanai lau herevalaia bamona, Pentecostal dubu tauna be unai negai ia noho. Ai sikuli taudia ibounai ai ura ia danu ai noho badina ai abia dae ia be gorere hanamoa siahuna ia abia. Ia ida steij dekenai ai gini, ai roho bona imana ai patapataia, miusiki ai badinaia. Bena ia dogoatao taudia ta ta idia moru, bona “lauma ena siahu” idia abia.b Lau ia dogoatao neganai, lau danu lau moru bona lau maserea. Lau noga neganai, lau gari, to lau laloparara lau be gorere hanamoa siahuna lau abia, unai dainai lau moale.

Unai murinai, lau ese unai siahu lau gaukaralaia natu maragina ta ena gorere lau hanamoa totona. Lau guriguri neganai, unai natu maragina ena varahu ia diho bona ena gorere ia ore. Lau mamia Dirava dekenai lau karaia gwauhamatana lau hagugurua diba. To lau laloa gau ma haida lau karaia be namo. Lau diba Dirava tamona ia noho, to lau diba lasi ia be daika. Bona dubu ena hahediba herevadia momo dekenai lau daradara.

Egu Lalohadai Idia Haidaua Gaudia

Unai gaudia idia vara murinai, Iehova ena Witnes taudia dekenai egu badu ia bada. Witnes taudia edia buka bona magasin lau davaridia neganai, lau gabudia. Bena, lau laloa lasi gauna ta ia vara. Egu Sinana ia ura Pentecostal dubu ia rakatania neganai lau hoa. Carmen be ia danu Baibel idia stadilaia! Carmen dekenai lau badu dikadika.

Egu sinana ena ruma ai Awake! magasin ta lau davaria. Nega momo unai bamona magasin lau gabudia. To egu sinana ia duahia gaudia lau ura diba dainai, unai magasin lau kehoa bona ena hereva lau itadia. Unai magasin ena atikol ta ai tau ta ena sivarai lau duahia, ia be ena dubu ai idia hadibaia gaudia ia badinaia goada. To, Witnes taudia edia buka bona magasin ia duahia bona ena Baibel ida ia hahegeregerea neganai, ia laloparara Toi Tamona, hel lahina, bona mase diba lasi souli edia hadibaia herevadia be Baibel amo lasi. Unai ese egu kudouna ia hamarerea. Lau ura unai gaudia lau lalopararalaia. Unai nega amo, lau ura Baibel ena hereva momokani lau lalopararalaia.

Awake! magasin ta ai, inuinu kekero bona drag ania momo tauna ta ena mauri sivaraina lau duahia, ia be Baibel ia stadilaia dainai ena mauri ia haidaua. Unai nega amo lau be Iehova ena Witnes taudia edia buka bona magasin momo lau duahia matamaia. Lau ese buklet ta ladana, The Divine Name That Will Endure Forever lau davaria.c Unai buklet lau duahia neganai, lau diba Dirava ena ladana be Iehova. Unai ese lau ia hamoalea bada bona lau ura Dirava momokani tamona lau dibaia!​—Deuteronomi 4:39; Ieremia 10:10.

Hunia dalanai unai Baibel bukadia lau duahia bona Baibel ena hereva momokanidia lau dibaia. Hegeregere, Pentecostal sikuli dekenai ai idia hadibaia Iesu be Dirava, to Baibel amo lau dibaia gauna be inai, Iesu be “mauri Diravana ena Natuna.”​—Mataio 16:15, 16.

Egu Mauri Lau Haidaua

Carmen lau itaia lou neganai, ia lau noia buklet ladana The Divine Name That Will Endure Forever, bona buka ma haida do ia henia, bona Carmen be ia hoa. Ena be Pentecostal sikuli dekenai lagani momo lau noho, to hereva momokani idia hadibaia lasi; toana be lau matakepulu. Lau moale bada badina Baibel amo hereva momokani lau dibaia. Iesu ena hereva lau mamia momokani, ia gwau: “Umui be hereva momokani do umui diba, bona hereva momokani ese umui do ia ruhaia.” (Ioane 8:32) Hereva momokanidia ese egu mauri idia haidaua matamaia.

Guna, lau laloa hunia dalanai Iehova Dirava do lau tomadiho henia bona pasto gaukarana lau karaia noho. Gabeai lau laloparara lau ese dubu ena hahediba herevadia momo lau hahedibalaia lasi. To, lau gari badina bema pasto dagi amo lau risain, edena dala ai moni do lau abia? Danu, bema dubu ena pasto ta be Iehova ena Witnes ai ia lao be hemarai gauna! Unai dainai pasto gaukarana lau karaia noho, to dubu ena hahediba hereva koikoidia lau dadaraia.

Carmen lau itaia lou neganai, lau ia hadibaia Iehova ena Witnes taudia edia hebou ta dekenai do lau lao. Nega momo lau be Pentecostal ena dubu badana, Laoag siti dekenai lau lao. Unuseniai lau lao neganai, lau be hunia dalanai Witnes taudia edia Kingdom Hall lau tahua. Lau ese Alma Preciosa Villarin, ena ladana ta be “Precious,” lau hedavari henia, ia be Iehova ena Witnes hahinena. Ena be Witnes taudia lau do badu henia noho, to Precious lau abia dae lau dekenai Baibel ia hadibaia totona.

Egu kakana be mai haheauka ida lau dekenai Baibel ena hereva momokani ia hadibaia. unai haheauka karana be Precious dekenai lau itaia danu. Ia ese lau ia durua Baibel lau lalopararalaia totona, ena be lau badu, ia ida lau hepapahuahu, bona guna lau idia hadibaia gaudia haida dainai nega haida lau hereva goada. Precious bona Witnes taudia haida edia manau bona laloa bada karana ese egu kudouna ia hamarerea. Unai dainai lau ura Iehova lau tomadiho henia.

July 1995 ai, lau laloparara bema lau ura Dirava lau hamoalea, namona be pasto dagi lau rakatania. Dahaka dainai? Apokalupo 18:4 ese tomadiho koikoi ia herevalaia neganai, ia gwau: “Lauegu taunimanima e, bema umui ura lasi ia ida kara dika do umui karaia hebou bona bema umui ura lasi ia ida iena davana dikana umui abia hebou, vadaeni namona be ia amo umui raka-lasi.” To egu mauri durua totona, edena dala ai moni do lau abia? Heberu 13:5 amo lau diba, bema Dirava ena ura ita karaia, ia gwauhamata, ia gwau: “Lau ese umui do lau negea lasi, bona umui do lau rakatania lasi momokani.”

Egu tamana bona kakana mero be lau idia dagedage henia. To, wiki rua idia do noho bona do lau bapatiso bona Witnes ta ai do lau lao neganai, lau be mai gari lasi ida ruma dekenai lau lao bona guna pasto dagina lau abia neganai lau gaukaralaia gaudia ibounai lau gabua. Unai lau karaia murinai, lau diba guna lau abia siahudia ibounai be idia ore. Guna, lau mahuta neganai, lau mamia gau ta be lau ia hametaua. Unai danu be ia ore. Guna egu daiutu ena windo dekenai lau itaia laulaudia (o shadow) be idia hedinarai lou lasi. Baibel stadilaia karana amo lau diba, hari idia gwauraia harihari gaudia, hegeregere gorere hanamoa siahuna, be Dirava amo lasi, to lauma dikadia amo ia mai. Lau moale bada badina lauma dikadia edia siahu ese lau idia biagua lasi, Paulo ese “demoni ta ese ia biagua” hesiai kekenina idia hanamoa bamona.​—Kara 16:16-18.

September 1996 ai, lau bona egu sinana be bapatiso ai abia bona Iehova ena Witnes taudia ai ai lao, unai be moale gauna! Lau bapatiso murinai, lau be hanaihanai haroro gaukara lau karaia, bona lagani momo lalonai unai gaukara lau moalelaia.

Hari lau be Silver lau adavaia. Ai ruaosi ai gaukara goada emai natuna kekeni dekenai Baibel ena hereva momokani ai hadibaia totona. Egu kakana bona tadina haida danu be Iehova idia hesiai henia. Ena be lau lalohisihisi badina lagani momo lalonai Dirava lau dibaia namonamo lasi, to lau moale badina lau tomadiho henia Diravana be hari lau diba.