Haroro Gaukara Oi Goadalaia

HARI, tanobada hegegemadai sivarai namona harorolaia gaukarana be mai anina bada. Ita be Iehova ena hesiai taudia dainai, ita diba unai hahediba taudia halaoa gaukarana ita karaia be hahenamo. To, ita laloparara painia bona pablisa ese haroro gaukara idia goadalaia be mai ena hekwarahi, badina nega haida hekwakwanai idia davaria.

Basileia harorolaia pablisa ta be ruma ena iduara ai ia pidipidi — Haroro gaukara oi goadalaia totona dahaka ese oi ia durua diba?

Pablisa haida be idia hekwarahi ruma-ta-ruma-ta haroro gaukara ai kamonai taudia idia hereva henia totona. Reana taunimanima momo be ruma ai idia noho lasi. Ruma taudia haida idia ura lasi Basileia ena sivarai idia kamonai. Pablisa haida idia moale badina edia haroro teritori be bada bona kamonai taudia be momo, to idia gari badina idia laloa edia maduna do idia hagugurua lasi. Bona lagani momo idia haroro tadikaka taihu haida be idia lalomanoka.

Ita diba momokani Iehova ena taunimanima ese hekwakwanai idia davaria neganai edia haroro gaukara idia goadalaia lasi. Badina inai tanobada be “dika tauna” Satani Diabolo, ena siahu henunai ia noho, bona Dirava ena mauri sivaraina ita harorolaia be mai ena hekwarahi.—1 Ioa. 5:19.

Herevana sivarai namona harorolaia gaukarana ai dahaka hekwakwanai oi davaria, to namona be oi diba Iehova ese oi do ia durua unai hekwakwanai oi hanaia totona. Dahaka oi karaia diba emu haroro gaukara oi habadaia totona? Mani unai dala haida ita herevalaia.

PABLISA MATAMATADIA DURUA

Basileia harorolaia pablisa ta ese pablisa matamata ia durua

Lagani ta ta ai, taunimanima tausen momo idia bapatiso bona Iehova ena Witnes taudia ai idia lao. Bema oi be vanegai sibona Dirava dekenai emu mauri oi gwauhamatalaia bona ranu lalonai oi bapatiso. Lagani momo haroro gaukara idia karaia pablisa amo diba ma haida oi abia diba. Bona bema oi be lagani momo lalonai Basileia oi harorolaia, pablisa matamatadia oi durua diba, a?

Iesu ia diba ena hahediba taudia be haroro taudia namodia ai idia lao totona, idia ia hakaua be namo. Bona unai haroro gaukara karaia dalana ia haheitalaia. (Luka 8:1) Hari danu, namona be ma haida ita hadibaia unai amo haroro taudia namodia ai do idia lao.

Namo lasi ita laloa pablisa matamatadia be haroro gaukara idia karaia amo dala matamatadia haida do idia dibaia. Pablisa ese hahediba tauna namona mai ena lalokau amo hakaua herevadia ia abia be namo. Ia ese pablisa do ia hadibaia, edena dala ai (1) hamatamaia herevadia ia hegaegaelaia bona praktislaia, (2) ruma tauna o dala amo ia raka hanai tauna ta ia hereva henia, (3) magasin ia hariharilaia, (4) kamonai tauna ia lou henia, bona (5) Baibel stadi ia hamatamaia. Bema pablisa be ena hadibaia tauna ena haroro dalana ia itaia bona ia tohotohoa, namo do ia davaria. (Luka 6:40) Pablisa matamatana be do ia moale bema ta ese ia kamonai henia bona durua. Unai bamona pablisa dekenai hanamoa hereva bona heduru herevadia ita gwauraia neganai, do ia moale bada.—Had. 4:9, 10.

HARORO HEBOU TAUNA IDA HEREVAHEREVA

Basileia harorolaia pablisa ta be ena haroro hebou tauna ida ia herevahereva

Ena be oi hekwarahi haroro gaukara ai ruma taudia ida oi herevahereva totona, to nega haida emu bamona ida emui herevahereva karana do oi moalelaia. Laloatao Iesu ese ena hahediba taudia be haroro gaukara totona, “rua rua” ia siaia. (Luka 10:1) Idia gaukara hebou lalonai ta ta idia hagoadaia bona durua. Unai dainai, haroro gaukara ai emu bamona ida oi gaukara neganai, umui “hagoadaia heheni” be namo.—Roma 1:12.

Dahaka gaudia haida umui herevalaia diba? Vanegai umui davaria ekspiriens namona ta umui herevalaia diba, a? Famili stadi o sibona emu stadi lalonai hagoadaia hereva haida oi laloa diba, a? Hebou dekenai dahaka gaudia ese oi ia hagoadaia? Reana, oi ia bamoa pablisa be hanaihanai oi ida ia gaukara hebou lasi. Orea lalonai ia vareai dalana oi diba, a? Dahaka dainai ia abia dae momokani inai be Iehova ena orea? Dahaka hahenamo o ekspiriens haida ia davaria? Reana emu ekspiriens haida oi herevalaia diba. Herevana haroro gaukara ai haida idia kamonai o lasi, to emu bamona ida oi gaukara hebou ese dala ia kehoa umui “durua heheni bona hagoadaia heheni noho” totona.—1 Tes. 5:11.

STADI NAMONAMO KARANA OI BADINAIA

Basileia harorolaia pablisa be sibona ena stadi ia karaia noho

Haroro gaukara oi goadalaia totona, stadi namonamo karana oi hagoadaia bona badinaia noho be gau badana. “Igui hesiai tauna mai ena kamonai bona mai ena kara maoromaoro” be Baibel ena topik idauidau ia halasia. (Mat. 24:45) Unai dainai, oi stadilaia gaudia be idauidau, unai ese oi do idia durua Dirava amo ia mai herevadia oi diba totona. Mani sibona eda stadi karana lalonai ita stadilaia gauna ta ita herevalaia: Dahaka dainai Basileia harorolaia gaukarana be mai anina bada? Ena badina haida be rau 16 ai ia noho maua ai oi itaia diba.

Maua dekenai idia noho point badadia oi laloa karana ese oi do ia durua haroro gaukara oi goadalaia noho totona. Sibona emu stadi karana lalonai, badina ma haida oi tahua bona oi torea diba. Bena unai badina ta ta bona Baibel siri oi lalodia dobu. Unai bamona oi karaia neganai, oi do ia durua haroro gaukara do oi goadalaia totona.

DALA MA HAIDA OI TOHOA DIBA

Basileia harorolaia pablisa rua be haroro totona haheitalai ta idia karaia noho

Iehova ena orea be hanaihanai iseda haroro gaukara hanamoa daladia ia halasia. Hegeregere, reana ruma-ta-ruma-ta sibona lasi, to revareva, telefon, taunimanima idia lao mai gabudia o pablik gabudiai, nega bona gabu idauidau, bona bisinesi teritori ai sivarai namona ita harorolaia diba. Danu, reana dala ita karaia momo idia haroro lasi gabudia ai ita haroro totona.

Unai bamona dala namodia haida oi lalohadailaia, a? Unai dala ta oi tohoa vadaeni, a? Unai bamona idia karaia taudia momo be idia moale bada. Mani inai haheitalai toi oi laloa.

Haheitalai ginigunana ai, Iseda Basileia Gaukara ena kahana ta, Baibel stadi hamatamaia dalana ena namo ia hahedinaraia. Unai kahana ese taihu ta ladana April ena lalona ia veria dainai ena gaukara turadia toi dekenai Baibel stadi dalana ia hahedinaraia. Ia moale badinai idia toi ese Baibel stadi idia abia dae bona gabeai hebou idia lao henia danu.

Haheitalai iharuana ese magasin hariharilaia karana ia hahedinaraia. Iehova ena orea ese ita ia hagoadaia iseda magasin idia ura duahia taudia do ita tahua. United States ai, sekit naria tauna ta ia gwau, gabu ta dekenai ia be taea idia hoihoilaia stoa edia biagudia dekenai, taea ia herevalaia Awake! magasin ia hariharilaia. Danu, ia bona ena adavana ese Awake! magasin mai ena kahana ladana “Understanding Your Doctor,” be edia teritori lalonai doketa taudia edia ofesi 100 mai kahana dekenai idia abia lao. Tadikaka ia gwau: “Unai bamona vadivadi karana ese dala ia kehoa ma haida ese ai bona iseda pablikeisen idia diba totona. Ai vadivadi henia taudia ta ta ai dibaia namonamo murinai, dala ia kehoa gabeai idia ai hereva henia lou diba.”

Haheitalai ihatoina ese telefon haroro karana ia hahedinaraia. Taihu ta ladana Judy be revareva ta amo hedikwota ia tanikiu henia, badina ia idia hagoadaia telefon haroro ia karaia totona. Ia gwau ena sinana ena mauri lagani be 86, bona mai ena gorere, to hanaihanai telefon haroro ia karaia bona ia moale badina telefon amo mauri lagani 92 hahinena ta ia stadi henia!

Iseda pablikeisen ai idia noho haroro daladia ese namo idia havaraia noho. Namona be oi gaukaralaidia! Unai ese oi do ia durua haroro gaukara oi goadalaia bona do oi moale bada.

OI HAGUGURUA DIBA TAHUA GAUDIA ATOA

Namo lasi ita laloa ita kwalimu vadaeni, badina haroro gaukara ai pablikeisen momo ita hariharilaia, Baibel stadi momo ita karaia, o taunimanima momo ita durua Iehova ena hesiai taudia ai idia lao totona. Ena be Noa be haroro tauna namona, to ia ese ena famili lasi taudia hida ia durua Iehova idia tomadiho henia totona? To, mai anina bada gauna be inai: Namona be mai abidadama ida Iehova do ita hesiai henia.—1 Kor. 4:2.

Basileia harorolaia taudia momo idia itaia haroro gaukara idia moalelaia totona, namona be idia hagugurua diba tahua gaudia idia atoa. Unai tahua gaudia haida be dahaka? Rau 18 dekenai ia noho maua ese unai ia hahedinaraia.

Iehova ena heduru oi noia, bona dala oi tahua emu haroro gaukara ese anina namona ia havaraia totona. Emu tahua gaudia oi hagugurua neganai, do oi moale badina oi diba oi be sivarai namona harorolaia gaukarana oi goadalaia.

Momokani, sivarai namona harorolaia be mai ena hekwarahi. To, Basileia harorolaia goadagoada tauna ta ai oi lao totona, namona be gau haida oi karaia. Haroro hebou tauna ida emui hagoadaia heheni karana umui moalelaia, stadi namonamo karana oi badinaia, hakaua oreana ese ia halasia haroro daladia oi tohoa, bona oi hagugurua diba tahua gaudia oi atoa. To gau badana be oi laloatao, Dirava ese oi dekenai hahenamo badana ta ia henia, unai be iena Witnes Tauna ta ai oi lao bona sivarai namona oi harorolaia. (Isa. 43:10) Haroro gaukara oi goadalaia noho lalonai do oi moale bada!

DAHAKA DAINAI HARORO GAUKARA ITA GOADALAIA?

Haroro gaukara ita karaia amo Baibel ena peroveta herevadia ita hagugurua.—Mar. 13:10.
Hahediba taudia halaoa gaukarana ita karaia ese ia hahedinaraia ita ese Iehova bona Iesu ita badinaia.—Mat. 28:19, 20.
Iehova ia ura kara dika taudia ita hadibaia edia kara dika dainai dika bada do idia davaria.—Ese. 3:19.
Ita diba taunimanima dekenai sivarai namona ita herevalaia be mai anina bada.—Kara 20:26, 27; Roma 1:14, 15.
Haroro gaukara ita karaia neganai, rara dekenai do ita kerere lasi.—Ese. 3:18.
Baibel ena hereva momokani ita harorolaia neganai, ita bona ma haida ese mauri hanaihanai do ita abia.—1 Tim. 4:16.
Taunimanima vairanai Iehova ita herevalaia bona hanamoa be iseda tomadiho ena kahana badana.—Heb. 13:15.
Iehova bona Iesu ita badinaia bona haroro gaukara ita karaia ese ia hahedinaraia idia ita lalokau henia.—Ioa. 14:15; 1 Ioa. 5:3.
Haroro gaukara ese ita ia durua Satani ese Iehova dekenai ia gwauraia koikoi herevadia ita koua totona.—Isa. 43:10-12; 2 Kor. 4:4.