DVD Ladana ‘Walk by Faith, Not by Sight’

Ierusalema idia do koua hagegea bona hadikaia lasi neganai, aposetolo Paulo ese Keristani taudia, Keriso ena tuari taudia namodia unai, ia tore henidia ia gwau, idia be hisihisi do idia davaria bona namo lasi kohu bona moale karadia idia laloa bada. (2 Tim. 2:3, 4) Dirava ese inai tanobada dikana ia do haorea lasi neganai, namona be eda abidadama hagoadaia totona ita itaia diba lasi gaudia ita abidadama henia. (2 Kor. 4:18; 5:7) Inai vidio ‘Walk by Faith, Not by Sight’ itaia. (Oi lao jw.org, bona PUBLICATIONS > VIDEOS ena kahana itaia.) Nahama bona Abitala be kohu laloa bada karana ena tarapu lalonai idia moru dalana do oi itaia. Unai murinai inai henanadai oi haerelaidia.

(1) Keristani ginigunadia edia negai “gau dika rohorohona . . . helaga gabuna dekenai ia gini” be dahaka? Bona Ierusalema dekenai idia noho Keristani taudia be dahaka idia karaia haraga be namo? (Mat. 24:15, 16) (2) Dahaka dainai Ierusalema amo idia heau totona edia abidadama ia goada be namo? (3) Idia heau mauri totona dahaka gau haida idia rakatania? (4) Dahaka dainai Nahama bona Abitala ese hanua idia rakatania haraga lasi? (Mat. 24:17, 18) (5) Rahela be Ierusalema ia rakatania gwauraia neganai dahaka ese ena abidadama ia tohoa? (Mat. 10:34-37; Mar. 10:29, 30) (6) Edena dala ai Etana ia hahedinaraia ia be Iehova ia kamonai henia bona abidadama henia? (7) Pela dekenai idia noho Keristani taudia be dahaka hekwakwanai idia davaria? (8) Edena dala ai Nahama bona Abitala edia abidadama be metairametaira ia manoka ia lao? (9) Iehova ese Pela ai idia noho Keristani taudia be edena dala ai ia naridia? (Mat. 6:33; 1 Tim. 6:6-8) (10) Inai tanobada oromana ena dokona ita lao henia lalonai edena dala ai Aberahamo bona Sara edia abidadama karana ita tohotohoa diba? (Heb. 11:8-10) (11) Dahaka dainai Nahama bona Abitala idia ura Ierusalema dekenai giroa lou, bona dahaka dainai unai be abia hidi kererena? (Luka 21:21) (12) Nahama bona Abitala be Ierusalema dekenai idia giroa lou neganai mauri be edena bamona? (13) Inai nega oromana ena dokona ia do ginidae lasi neganai, dahaka dainai hari iseda abidadama ia goada be namo?—Luka 17:31, 32; 21:34-36.

Abidadama amo ita raka ena anina be (1) Iehova ena hakaua dalana ita abidadama henia, (2) Iena taravatu ese iseda raka dalana ia biagua, bona (3) ita hahedinaraia Ia tomadiho henia karadia ita laloa bada bona kohu o moni ita laloa maragi. Namona be eda lalona ita hadaia abidadama amo ita raka, badina ita diba “tanobada bona ena ura be do ia ore, to Dirava ena ura ia karaia tauna be do ia noho hanaihanai.”—1 Ioa. 2:17.