“Ita Hekwarahi Noho Lo Taudia ai Ita Lao Totona”

1. Iehova ia ura dahaka ita karaia?

HEADAVA tau bona hahine be edia natuna ia vara neganai idia moale bada. Ena be tama sina ese edia beibi idia lalokau henia, to idia ura lasi unai bamona sibona do ia noho. Momokani, do idia lalohekwarahi bema edia beibi ia tubu daekau lasi. Unai hegeregerena, Iesu murinai ita raka matamaia neganai, Iehova ia moale, to Ia ura lasi lauma dalanai natu maragidia bamona ita noho. (1 Kor. 3:1) Unai dainai, ita ia hamaoroa ‘taunimanima badadia bamona’ Keristani taudia goadadia ai ita lao.—1 Kor. 14:20.

2. Inai atikol ai, dahaka do ita herevalaia?

² Taunimanima badana bamona ai ita lao ena anina be dahaka? Edena dala ai lo Keristani taudia ai do ita lao? Edena dala ai Baibel ena hereva dobudia ita stadilaia karana ese iseda hetura karana Iehova ida do ia hagoadaia? Bona dahaka dainai ita laloa lasi, lo tauna ai ita lao dainai ita hegeregere vadaeni? Inai atikol ai, unai henanadai edia haere do ita herevalaia.

LO KERISTANI TAUNA AI ITA LAO ENA ANINA BE DAHAKA?

3. Ta be lo Keristani tauna ai ia lao ena anina be dahaka?

³ Baibel ai, inai Grik herevana idia hahanaia “taunimanima badana” ena anina be “lo tauna.” (1 Kor. 2:6) Iseda hetura karana Iehova ida ita hagoadaia neganai, ita be lo Keristani tauna ai ita lao. Oibe, ena be unai tahua gauna ita hagugurua, to namona be iseda hetura karana Iehova ida ita hagoadaia noho. (1 Tim. 4:15) Ita ibounai, matamata taudia danu, be lo Keristani taudia ai ita lao diba. To dahaka ese ia hahedinaraia Keristani tauna ta be lo tauna ai ia lao?

4. Edena bamona do oi diba ta be lo Keristani tauna?

⁴ Lo Keristani tauna be ena mauri ibounai lalonai, Dirava ese ia ura henia gaudia ia badinaia bona sibona ena ura ia badinaia lasi. Momokani, ia be goevadae lasi tauna dainai kerere do ia karaia. To, dina ta ta ai ia laloa bona karaia gaudia amo ia hahedinaraia, ia be Dirava ena ura ia badinaia. Ia ese kara matamata ia atoa bona hanaihanai ia gaukara goada Dirava ena lalohadai ia abia totona. (Efe. 4:22-24) Ia ese Iehova ena taravatu bona hakaua herevadia hegeregerena abia hidi ia karaia dainai, taravatu momo do ia badinaia be anina lasi. Bona abia hidi ta ia karaia neganai, do ia gaukara goada unai ia badinaia totona.—1 Kor. 9:26, 27.

5. Keristani tauna ta be Dirava ida ena hetura karana ia goada lasi neganai, dahaka do ia vara? (Efeso 4:14, 15)

⁵ To, Keristani tauna ta be Dirava ida ena hetura karana ia goada lasi neganai, “kara koikoi” bona “koikoi dalanai” idia hakaua kerere diba, bona reana idia halasia koikoi sivaraidia bona aposteit edia hahediba herevadia do ia abia dae.a (Efeso 4:14, 15 duahia.) Danu, ma haida dekenai do ia mama, heai do ia havaraia, do ia badu, eiava hahetoho ia davaria neganai, do ia kara dika.—1 Kor. 3:3.

6. Dahaka dainai lo taudia ai ita lao karana be beibi ia tubu daekau dalana ida ita hahegeregerea? (Laulau itaia danu.)

⁶ Matamanai ita herevalaia bamona, Baibel ese ta be lo tauna ai ia lao dalana be beibi ia tubu daekau dalana ida ia hahegeregerea. Natu maragina be gau momo ia dibaia lasi dainai, taunimanima badana ta ese ia gimaia bona hakaua be namo. Hegeregere, sina ta ese ena natuna kekeni ia hamaoroa dala amo idia hanaia neganai ena imana do ia dogoatao. Kekeni ia tubu daekau neganai, sinana ese maoro do ia henia dala dekenai sibona ia raka hanaia totona, to do ia hadibaia hanaihanai ia sekea bema motuka idia heau mai eiava lasi. Natuna be kekeni badana ai ia lao neganai, unai bamona dika hanaia dalana do ia dibaia. Natuna maragina be taunimanima badadia ese idia durua dika ia hanaia hegeregerena, lauma dalanai ia goada lasi Keristani tauna be lo tauna amo heduru ia abia be namo, unai amo dika do ia hanaia bona abia hidi maorodia do ia karaia. To, lo taudia be abia hidi ta idia ura karaia neganai, Iehova ena lalohadai idia diba totona, Baibel ena hakaua herevadia idia laloa dobu, unai amo abia hidi maorona idia karaia.

7. Lo Keristani tauna be ma haida amo heduru ia abia be namo, a?

⁷ Lo Keristani tauna be ma haida amo heduru ia abia be namo, a? Oibe. Idia danu be ma haida amo heduru idia abia be namo. Reana ia goada lasi Keristani tauna be ia ura, ma haida ese idia hamaoroa dahaka do ia karaia eiava do idia durua abia hidi maorodia ia karaia totona. To, lo Keristani tauna be ma haida edia aonega herevadia bona ekspiriens amo heduru ia abia, bona ia diba ia ese abia hidi do ia karaia, unai amo “sibona ena maduna do ia huaia.”—Gal. 6:5.

8. Lo Keristani taudia be edena dala ai ta ta amo idia idau?

⁸ Taunimanima badadia edia toana be idauidau. Unai hegeregerena, lo Keristani taudia edia kara, aonega, goada, harihari bada, bona hebogahisi karadia be idauidau. Danu, lo Keristani taudia rua be hekwakwanai tamona idia davaria neganai, reana do idia karaia abia hidi be idauidau. To idia ruaosi be Baibel ena hakaua herevadia do idia badinaia. Bona nega momo edia lalomamina ese idia do ia hadibaia unai bamona abia hidi idia karaia totona. Unai dainai, ena be edia abia hidi be idauidau, to ta ta do idia hahemaoro henia lasi. Bona mai lalotamona ida do idia noho.—Roma 14:10; 1 Kor. 1:10.

EDENA DALA AI LO KERISTANI TAUNA AI ITA LAO DIBA?

9. Ta be lo Keristani tauna ai do ia lao kava, a? Herevalaia.

⁹ Natu maragina be nega ia hanaia lalonai ia tubu daekau, to ta be lo Keristani tauna ai ia lao totona ia gaukara goada be namo. Hegeregere, Korinto tadikaka bona taihu be sivarai namona idia abia dae, idia bapatiso, lauma helaga idia abia, bona aposetolo Paulo ese ia hadibaia gaudia amo namo idia davaria. (Kara 18:8-11) To idia bapatiso, bona lagani haida murinai, momo be lauma dalanai idia do goada lasi. (1 Kor. 3:2) Ita dekenai unai ia vara lasi totona dahaka ita karaia be namo?

10. Lo tauna ai ita lao totona dahaka ita karaia be namo? (Iuda 20)

¹⁰ Lo tauna ta ai ita lao totona, gau ginigunana be unai ura ita hagoadaia be namo. ‘Kamonai karana idia hahedinaraia lasi’ Keristani taudia be, lauma dalanai beibi bamona idia ura noho. Unai dainai lo taudia ai do idia lao diba lasi. (Aon. 1:22) Haida be taunimanima badadia ai idia lao vadaeni, to abia hidi karaia totona edia tama sina dekenai idia tabekau, ita ura lasi unai bamona taudia ita tohotohoa. Ita ura ita sibona ita gaukara goada iseda hetura karana Iehova ida ita hagoadaia totona. (Iuda 20 duahia.) Bema oi hekwarahi noho lo tauna ai oi lao totona, Iehova dekenai oi guriguri bona ‘ia ese oi dekenai ura bona goada ia henia, ia ura henia gaudia oi karaia totona.’—Fili. 2:13.

11. Iehova ese dahaka heduru gaudia ia henia lo tauna ai ita lao totona? (Efeso 4:11-13)

¹¹ Iehova ia ura ita ia durua lo Keristani tauna ai ita lao totona. Ia ese Kongrigeisen lalonai mamoe naria taudia bona hahediba taudia ia henia, idia ese ita idia durua lo taudia ai ita lao totona. Unai amo, “Keriso ena bada hegeregerena ita abia.” (Efeso 4:11-13 duahia.) Bona Iehova ese iena lauma helaga ia henia ita ia durua, “Keriso ena lalohadai ita abia” totona. (1 Kor. 2:14-16) Danu, Dirava ese ita dekenai Evanelia bukadia foa ia henia, unai amo Iesu be tanobada ai ia noho neganai ena lalohadai, ena hereva bona ena kara do ita dibaia. Iesu ena laloa dalana bona ena kara ita tohotohoa neganai, lo Keristani tauna ai ita lao diba.

BAIBEL ENA HEREVA DOBUDIA EDIA NAMO

12. “Keriso ena hahediba hereva ginigunadia” be dahaka?

¹² Lo taudia ai ita lao totona, “Keriso ena hahediba hereva ginigunadia,” unai be Keristani hahediba herevadia, ita diba sibona be hegeregere lasi. Unai hahediba herevadia be, helalo-kerehai, abidadama, bapatiso, bona toreisi lou. (Heb. 6:1, 2) Keristani taudia ibounai ese unai gaudia idia abia dae. Unai dainai Pentekoste dinana ai, aposetolo Petero be taunimanima dekenai unai gaudia ia herevalaia. (Kara 2:32-35, 38) Keriso ena hahediba taudia ai ita lao totona, unai hahediba hereva badadia ita abia dae be namo. Hegeregere, Paulo ese ia hahedinaraia bema toreisi lou helarona ita abia dae lasi, Keriso ena hahediba taudia ai ita lao diba lasi. (1 Kor. 15:12-14) To, lo taudia ai ita lao totona namona be diba ma haida ita abia.

13. Heberu 5:14 hegeregerena Baibel ena hereva dobudia amo namo ita abia totona, dahaka ita karaia be namo? (Laulau itaia danu.)

¹³ Hahediba hereva ginigunadia sibona lasi, to Baibel ena hereva dobudia, hegeregere Iehova ena taravatu bona iena hakaua herevadia ese ita ia durua, Iehova ena laloa dalana ita lalopararalaia totona. Unai hereva momokani amo namo ita abia totona, namona be Baibel ita stadilaia, laloa dobu, bona ita hekwarahi ita dibaia gaudia ita badinaia. Unai bamona ita karaia neganai, abia hidi maorodia do ita karaia bona Iehova do ita hamoalea.b—Heberu 5:14 duahia.

14. Edena dala ai Paulo ese Korinto taudia ia durua, lo taudia ai idia lao totona?

¹⁴ Iehova ida edia hetura karana ia goada lasi Keristani taudia be idia hekwarahi Baibel ena hakaua hereva hegeregerena abia hidi idia karaia totona. Haida idia mamia bema Baibel ai taravatu ta ia noho lasi, idia ura karaia gauna idia karaia diba. Haida be reana taravatu totona idia henanadai, ena be taravatu ta ia noho lasi. Hegeregere, Korinto ai idia noho Keristani taudia ese Paulo idia noia, bema taravatu ta ia noho kaivakuku dekenai idia bouboulaia aniani do idia ania eiava lasi. To Paulo ese ia hahedinaraia idia ta ta be ‘mai edia maoro’ edia lalomamina hegeregerena, abia hidi idia karaia totona. Bona idia dekenai Baibel ena hakaua herevadia ia gwauraia, unai amo abia hidi maorodia do idia karaia bona edia lalomamina do ia goeva, danu ma haida do idia hahekwakwanaia lasi. (1 Kor. 8:4, 7-9) Paulo ese Korinto taudia ia hadibaia abia hidi idia karaia neganai, Baibel idia gaukaralaia, to ma haida dekenai idia tabekau lasi bona taravatu idia tahua lasi, unai amo lo taudia ai do idia lao.

15. Edena dala ai Paulo ese Heberu Keristani taudia ia durua, edia hetura karana Iehova ida idia hagoadaia?

¹⁵ Paulo ese Heberu Keristani taudia totona ia torea revareva amo mai anina bada gauna ta ita dibaia. Haida be Iehova ida edia hetura karana idia hagoadaia lasi, ‘idia ura milika sibona idia inua taudia bamona ai idia lao, to aniani korikorina [Baibel ena hereva dobudia] idia ura lasi.’ (Heb. 5:12) Iehova ese Kongrigeisen amo hadibaia hereva matamata ia halasia, to idia ura lasi abia dae bona badinaia. (Aon. 4:18) Hegeregere, Iuda Keristani taudia be Mose ena Taravatu idia do badinaia noho, ena be lagani 30 gunanai Iesu ena boubou gauna ese unai taravatu ia kokia. (Roma 10:4; Tito 1:10) Idia dekenai lagani 30 lalonai nega bada ia noho idia laloparara be namo unai taravatu be ia ore vadaeni! Unai dainai Paulo be ia ura idia ia durua ia hadibaia hereva momokani dobudia idia abia dae totona. Paulo ena revareva ese Keristani taudia ia durua, unai amo do idia abia dae, Iehova ese Iesu amo ia hegaegaelaia tomadiho dala matamatana be maoro. Danu, unai ese idia ia durua mai gari lasi ida idia haroro noho totona, ena be Iuda taudia ese idia dagedage henidia.—Heb. 10:19-23.

DAHAKA DAINAI ITA GAUKARA GOADA LO TAUDIA BAMONA ITA NOHO?

16. Lo taudia bamona ita noho totona, dahaka ita karaia be namo?

¹⁶ Lo taudia ai ita lao neganai, namona be ita hekwarahi unai bamona ita noho totona. Namo lasi ita laloa lo taudia ai ita lao dainai, iseda hetura karana Iehova ida ita hagoadaia be anina lasi. (1 Kor. 10:12) Namona be sibona ita “tahua noho” bema iseda hetura karana Iehova ida ia goada.—2 Kor. 13:5.

17. Edena dala ai Paulo ena revareva amo ia hahedinaraia, ta be lo tauna bamona ia noho be namo?

¹⁷ Paulo ese Kolose taudia ia tore henia neganai, ia hahedinaraia lo taudia bamona ita noho be namo. Ena be Kolose taudia be lo taudia ai idia lao vadaeni, to Paulo ese idia ia hamaoroa, sibona do idia gimaia be namo. Unai amo tanobada ena lalohadai ese idia do ia koia lasi. (Kol. 2:6-10) Bona Epafra be kongrigeisen taudia ibounai ia diba namonamo dainai, idia totona ia guriguri goadagoada. Unai amo do idia “gini goada,” eiava lo taudia bamona do idia noho. (Kol. 4:12) Dahaka ita dibaia? Paulo bona Epafra idia laloparara ta be lo tauna bamona ia noho totona, ia gaukara goada bona Iehova ena heduru ia tahua be namo. Idia ura Kolose taudia be lo Keristani taudia eiava taunimanima badana bamona do idia noho, ena be hekwakwanai idia davaria.

18. Lo Keristani tauna dekenai dahaka ia vara diba? (Laulau itaia danu.)

¹⁸ Paulo ese Heberu taudia ia hamaoroa, bema lo Keristani tauna be ia naria namonamo lasi, Dirava ena lalonamo ia haboioa diba. Bema Keristani tauna ta be ena lalona ia ha-aukaia bona ia helalo-kerehai lasi, Dirava ese ena dika do ia gwauatao lasi. Moale gauna be, Heberu taudia dekenai unai bamona ia vara lasi. (Heb. 6:4-9) To hari inai negai, idia manoka eiava idia atoa siri taudia idia helalo-kerehai, be edena bamona? Mai manau ida idia helalo-kerehai karana ese ia hahedinaraia, idia be Paulo ese ia herevalaia taudia bamona lasi. To, Iehova dekenai idia giroa lou neganai, mai manau ida ia henia heduru idia abia dae be namo. (Ese. 34:15, 16) Elda taudia ese lo tadikaka o taihu ta do idia noia, ia helalo-kerehai tauna ia durua totona, unai amo Iehova ida ena hetura karana do ia hagoadaia lou.

19. Edena tahua gauna ita atoa be namo?

¹⁹ Bema oi ura lo Keristani tauna ai oi lao, emu tahua gauna oi hagugurua diba! Oi gaukara goada noho Baibel ena hereva dobudia oi stadilaia totona, unai amo Iehova ena laloa dalana do oi dibaia. Bona bema oi be lo tauna ai oi lao vadaeni, namona be oi gaukara goada noho, unai bamona oi noho ela bona hanaihanai.