Iehova ese Kara Dika amo Ita Ia Hamauria Totona Ia Karaia Gauna

1-2. (a) Kara dika ena anina be dahaka, bona edena dala ai ena hahetoho ita hanaia diba? (“Hereva Ena Anina” itaia danu.) (b) Inai atikol bona inai Gima Kohorona ena atikol ma haida ai dahaka do ita herevalaia? (“Hereva ta Duahia Tauna Totona” itaia danu.)

IEHOVA Dirava ese oi ia lalokau henia ena bada oi ura diba, a? Unai oi diba totona, inai oi karaia diba: Iehova ese kara dika bona mase amo oi ia hamauria totona ia karaia gauna oi stadilaia. Kara dikaa be iseda inai tauna dikana, bona oi sibona ese oi halusia diba lasi. Dina ta ta ai ita kara dika, bona kara dika dainai ita mase. (Roma 5:12) To sivarai namona be inai, Iehova ena heduru amo kara dika ita halusia diba. Momokani, Iehova ia gwauhamata kara dika bona mase amo ita do ia hamauria!

² Lagani 6,000 bamona lalonai, Iehova Dirava ese taunimanima ia durua noho kara dika ena hahetoho idia hanaia totona. Dahaka dainai? Badina ita ia lalokau henia. Matamana amo Iehova ese taunimanima ia lalokau henia, unai dainai kara dika ena hahetoho idia hanaia totona ia ese gau momo ia karaia idia ia durua totona. Dirava ia diba kara dika ese mase ia havaraia, bona ia ura lasi ita mase. Ia ura do ita mauri hanaihanai. (Roma 6:23) Unai be ena ura oi totona. Inai atikol ai, henanadai toi do ita herevalaia: (1) Edena dala ai Iehova ese kara dika taudia dekenai helaro ia henia? (2) Edena dala ai Baibel negadiai idia noho kara dika taudia be Iehova ena lalonamo idia abia? (3) Edena dala ai Iesu ese taunimanima be kara dika bona mase amo ia hamauria?

EDENA DALA AI IEHOVA ESE KARA DIKA TAUDIA DEKENAI HELARO IA HENIA?

3. Edena dala ai Adamu bona Heva idia kara dika?

³ Iehova ese tau bona hahine ginigunana ia havaraia neganai, ia ura do idia moale. Idia dekenai noho gabuna namona ia henia, idia headava, bona gaukara namona idia abia. Idia ese tanobada be edia bese amo do idia hahonua, bona tanobada ibounai be paradaiso ai do idia halaoa, Eden umana bamona. To Dirava ese taravatu ta ia henia. Bona idia ia hadibaia bema unai taravatu idia badinaia lasi, bona mai ura ida idia gwau-edeede, edia kara dika dainai do idia mase. Bona ita diba dahaka ia vara. Satani be Dirava bona idia ia lalokau henia lasi. Ia ese idia ia koia bona unai taravatu idia utua. Adamu bona Heva be Satani ena ura idia badinaia. Idia be Iehova idia badinaia lasi dainai, edia mauri lalonai hisihisi idia davaria. Hegeregere, idia buruka idia lao, bena idia mase.—Gen. 1:28, 29; 2:8, 9, 16-18; 3:1-6, 17-19, 24; 5:5.

4. Dahaka dainai Iehova be kara dika ia inai henia bona ita ia durua ita dadaraia totona? (Roma 8:20, 21)

⁴ Iehova be ita ia durua totona Baibel ai unai sivarai ia atoa. Unai amo Iehova ese kara dika ia inai henia ena badina ita lalopararalaia. Kara dika dainai ita be iseda guba Tamana amo ita daudau. Danu kara dika ese mase ia havaraia. (Isa. 59:2) Unai dainai Satani, unai hekwakwanai ibounai ia havaraia gwau-edeede aneruna unai, be kara dika ia ura henia bona hari taunimanima ia tohoa noho idia kara dika totona. Reana ia laloa Eden umana ai ia vara gauna dainai ia kwalimu. To ia laloparara lasi Iehova be lalokau bada Diravana. Dirava ena ura Adamu bona Heva edia bese taudia totona be ia haidaua lasi. Dirava ese taunimanima ia lalokau henia, unai dainai karaharaga dala ia karaia taunimanima ibounai ia hamauria totona. (Roma 8:20, 21 duahia.) Iehova ia diba Adamu ena bese taudia haida be abia hidi do idia karaia ia idia lalokau henia bona badinaia totona. Bona ia be edia Tamana bona Havaraia Tauna dainai, dala do ia karaia kara dika amo idia ia ruhaia bona ena turana ai idia lao totona. Iehova be dahaka do ia karaia unai ibounai ia hagugurua totona?

5. Edena nega ai Iehova ese taunimanima dekenai helaro ia henia? Herevalaia. (Genese 3:15)

⁵ Genese 3:15 duahia. Iehova ia gwau Satani do ia hadikaia ore neganai, unai ese taunimanima dekenai helaro ia henia. Dirava ia peroveta, “natuna” ta ese taunimanima do ia hamauria. Unai natuna ese Satani do ia moia patapata, bona ena gaukara ibounai do ia haorea momokani. (1 Ioa. 3:8) To, unai natuna be hisihisi do ia davaria. Satani ese ia do ia haberoa, bona do ia mase. Unai ese Iehova ena lalona do ia hahisia bada. To unai hisihisi ia davaria dainai, taunimanima be kara dika bona mase amo ia hamauria diba.

BAIBEL NEGADIAI EDENA DALA AI TAUNIMANIMA BE IEHOVA ENA LALONAMO IDIA ABIA?

6. Abidadama taudia hegeregere Abela bona Noa, be Iehova ena turana ai idia lao totona dahaka idia karaia?

⁶ Lagani momo lalonai, metairametaira Iehova ese taunimanima ia durua ia idia diba namonamo totona. Eden ai Adamu bona Heva idia kara dika murinai, edia natuna iharuana Abela be Iehova abidadama henia tauna ginigunana ai ia lao. Abela be Iehova ia lalokau henia, ia ura Dirava ia hamoalea bona ia tura henia dainai, boubou gauna ia henia. Abela be mamoe naria tauna, unai dainai mamoe natudia haida ia alaia bona boubou gauna bamona Iehova dekenai ia henia. Iehova be dahaka ia karaia? Ia ese “Abela ia lalonamo henia bona ena boubou gauna ia abia dae.” (Gen. 4:4) Iehova be unai bamona boubou gaudia idia henia taudia haida ia lalonamo henia danu, badina ia idia lalokau henia bona abidadama henia, idia ta be Noa. (Gen. 8:20, 21) Iehova be unai boubou gaudia ia abia dae dainai, ia hahedinaraia kara dika taudia be ena lalonamo idia abia bona ena turana ai idia lao diba.b

7. Aberahamo ia ura ena natuna tamona sibona ia bouboulaia karana amo dahaka ita dibaia?

⁷ Iehova ese abidadama tauna Aberahamo ia noia iena natuna tamona Isako be boubou gauna bamona ia henia totona. Aberahamo ia lalometau bada. To ia ese Iehova ena hereva ia badinaia. To ia ura ena natuna ia hamasea neganai, Dirava ese ia koua. Unai ese abidadama taudia ibounai dekenai mai anina bada gauna ta ia hadibaia. Iehova ia ura ena Natuna lalokauna be boubou gauna bamona ia henia. Unai ese ia hahedinaraia taunimanima ia lalokau henia bada.—Gen. 22:1-18.

8. Taravatu hegeregerena idia henia boubou momo be dahaka idia laulaulaia? (Levitiko 4:27-29; 17:11)

⁸ Lagani momo murinai, Dirava ese Israela taudia dekenai ia henia Taravatu hegeregerena, edia kara dika gwauatao totona boubou gaudia do idia henia. (Levitiko 4:27-29; 17:11 duahia.) Unai boubou gaudia be gabeai Iehova ese do ia henia boubou gauna ia laulaulaia, unai be taunimanima ibounai hamauria totona. Dirava ena peroveta taudia idia peroveta unai gwauhamata natuna, Dirava ena Natuna unai, be hisihisi do ia abia bona do ia mase. Ia be mamoe bamona do idia hamasea bona bouboulaia. (Isa. 53:1-12) Mani oi laloa: Iehova be dala ia karaia ena lalokau Natuna ia bouboulaia totona, unai amo taunimanima ibounai—oi danu—be kara dika bona mase amo do ia hamauria!

EDENA DALA AI IESU ESE TAUNIMANIMA IA HAMAURIA?

9. Ioane Bapatiso be Iesu ia itaia neganai, dahaka ia gwau? (Heberu 9:22; 10:1-4, 12)

⁹ Lagani 29 C.E. ai, Dirava ena hesiai tauna Ioane Bapatiso be Nasareta tauna Iesu ia poinia bona ia gwau: “Itaia, Dirava ena Mamoe Natuna, ia be tanobada taudia edia kara dika kokia tauna!” (Ioa. 1:29) Unai hereva ese ia hahedinaraia Iesu be idaunegai idia perovetalaia tauna. Iesu be ena mauri do ia bouboulaia. Iehova ese ia gwauhamatalaia tauna be ia ginidae vadaeni, taunimanima be kara dika amo do ia hamauria.—Heberu 9:22; 10:1-4, 12 duahia.

10. Edena dala ai Iesu ia hahedinaraia ia be kara dika taudia ‘boiria totona ia mai’?

¹⁰ Iesu be kara dika dainai idia lalohisihisi taudia ia durua bona idia ia boiria ena murinai idia raka totona. Ia diba kara dika dainai taunimanima be hisihisi idia davaria noho. Unai dainai unai bamona tatau bona hahine ia durua. Haheitalai ia gaukaralaia, ia gwau: “Gorere lasi taudia be doketa idia tahua lasi, to gorere taudia sibona ese idia tahua.” Bena ia gwau: “Kara maoromaoro taudia boiria totona lau mai lasi, to kara dika taudia boiria totona lau mai.” (Mat. 9:12, 13) Iesu be ena hereva hegeregerena ia kara. Iesu ese hahine ta ena dika ia gwauatao, unai hahine ese ena mata ranu amo Iesu ena aena ia huria. (Luka 7:37-50) Ia ese Samaria hahinena dekenai hereva momokani ia hadibaia, ena be unai hahine ena matabodaga maurina ia diba. (Ioa. 4:7, 17-19, 25, 26) Danu Dirava ese Iesu dekenai siahu ia henia mase ia haorea totona. Edena dala ai? Iesu ese mase amo taunimanima ibounai—tatau, hahine, bona natudia—ia hatorea isi lou.—Mat. 11:5.

11. Dahaka dainai kara dika taudia idia ura Iesu dekenai idia lao?

¹¹ Unai dainai kara dika idia karaia taudia idia ura Iesu dekenai idia lao. Ia ese edia hemami ia lalopararalaia bona ia hebogahisi henia. Idia gari lasi ia dekenai idia lao totona. (Luka 15:1, 2) Bona Iesu be unai bamona taudia ia hanamoa bona ia idia abidadama henia dainai davana namona ia henia. (Luka 19:1-10) Ia ese ena Tamana ena hebogahisi karana ia hahedinaraia goevagoeva. (Ioa. 14:9) Iena kara bona hereva amo ia hahedinaraia, ena hebogahisi bada Tamana be taunimanima ia lalokau henia bona ia ura idia ta ta ia durua kara dika ena hahetoho idia hanaia totona. Iesu ese kara dika taudia ia durua edia kara idia haidaua bona ena murinai idia raka totona.—Luka 5:27, 28.

12. Iesu be ena mase amo dahaka ia hadibaia?

¹² Iesu ia diba ena mauri do ia bouboulaia. Nega haida iena murinai idia raka taudia ia hamaoroa, ia be ena inai taudia edia imana dekenai do idia atoa bona au dekenai do idia kokoa kau. (Mat. 17:22; 20:18, 19) Ia diba ena boubou gauna ese taunimanima edia kara dika do ia kokia, Ioane bona peroveta taudia edia hereva hegeregerena. Danu Iesu ia hadibaia ena mauri be boubou gauna bamona ia henia murinai, “taunimanima idauidau” be ia dekenai do ia veria mai. (Ioa. 12:32) Kara dika taudia be Iehova idia hamoalea totona, namona be idia abia dae Iesu be Lohiabada bona ia murinai do idia raka. Bema unai idia karaia, idia be ‘kara dika amo do ia ruhaia.’ (Roma 6:14, 18, 22; Ioa. 8:32) Unai dainai Iesu be mai ura ida bona gari lasi ida hisihisi ia haheaukalaia ela bona ia mase.—Ioa. 10:17, 18.

13. Edena dala ai Iesu ia mase, bona ena mase amo Iehova Dirava dekenai dahaka ita dibaia? (Laulau itaia danu.)

¹³ Iesu be ena inai taudia dekenai idia henia, idia dogoatao, idia gwauraia dika, ena ladana idia hadikaia, samania koikoi, bona ia idia hahisia bada. Tuari taudia ese do ia mase gabuna dekenai idia hakaua lao bona au ai idia kokoa. Unai ibounai idia vara noho lalonai, Iehova Dirava ena lalona ia hisihisi bada. Dirava be ena siahu bada ia gaukaralaia lasi unai ia koua totona. Dahaka dainai lalokau Tamana be unai bamona ia karaia? Badina ita ia lalokau henia. Iesu ia gwau: “Dirava ese tanobada ia lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”—Ioa. 3:16.

14. Iesu ena boubou gauna amo dahaka oi dibaia?

¹⁴ Iesu ena boubou gauna ese Iehova ena lalokau Adamu bona Heva edia bese taudia dekenai ia hamomokania. Unai dainai Iehova ese oi ia lalokau henia bada. Ia ese ena lalokau Natuna ia bouboulaia neganai, ena lalona ia hisihisi bada herea, to unai ia karaia kara dika bona mase amo oi ia hamauria totona. (1 Ioa. 4:9, 10) Oibe, ia ura ita ta ta ia durua kara dika ena hahetoho ita dadaraia bona ita kwalimu totona.

15. Iesu ena mauri davalaia boubouna amo namo ita davaria totona dahaka ita karaia be namo?

¹⁵ Dirava ena harihari gauna, ena lalokau Natuna tamona ena mauri davalaia boubouna unai, ese dala ia kehoa iseda kara dika ia gwauatao totona. To Dirava ese iseda kara dika ia gwauatao totona, gau ta ita karaia be namo. Unai be dahaka? Ena haere be Ioane Bapatiso ese ia gwauraia guna, bona gabeai Iesu ese ia gwauraia: “Umui helalo-kerehai, badina guba Basileia be ia kahirakahira vadaeni.” (Mat. 3:1, 2; 4:17) Kara dika ita dadaraia bona iseda lalokau Tamana kahirakahira ita lao totona, ita helalo-kerehai be gau badana. To ita helalo-kerehai totona dahaka ita karaia be namo, bona edena dala ai unai ese ita ia durua Iehova ita hamoalea totona? Stadi gabena be unai do ia haerelaia.