Iehova be Iseda Moale Ena Badina

1-2. (a) Hari inai negai momo be dahaka idia mamia? (b) Inai atikol ai dahaka do ita herevalaia?

TAUNIMANIMA momo be gau idauidau idia karaia mauri idia moalelaia totona. To moale korikori idia davaria lasi. Momo idia mamia edia mauri be anina lasi bona idia lalohisihisi. Nega haida Iehova ena taunimanima danu be unai bamona idia mamia. Dahaka dainai? Badina ita be “dina gabedia ai” ita noho bona ita idia “hametaua bada” hekwakwanai be momo.—2 Tim. 3:1.

² Inai atikol ai, iseda moale ia hadikaia diba gaudia do ita herevalaia. Danu bema iseda moale ia boio, do ita moale lou diba daladia do ita herevalaia. To, namona be moale korikorina ena badina ita herevalaia guna.

MOALE KORIKORINA ENA BADINA

3. Iehova ese ia havaraia gaudia amo edena dala ai ia ita dibaia? (Laulau itaia danu.)

³ Iehova ese ia havaraia gaudia amo ia hahedinaraia ia be hanaihanai ia moale. Hegeregere ia ese tanobada hairaina, kala idauidau, animal edia kara idauidau bona aniani namodia momo herea ia karaia. Unai amo ita diba ita ia lalokau henia bada bona ia ura ita moale!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Ena be Iehova ia itaia taunimanima be idia hisihisi noho, to dahaka dainai ia moale noho? (b) Iehova ena harihari gauna ita dekenai be dahaka? (Salamo 16:11)

⁴ Ena be Iehova be “moale Diravana,” to taunimanima ese idia davaria noho hisihisi idauidau ia laloa danu. (1 Tim. 1:11) To unai ese ena moale ia hamaragia lasi. Badina ia diba hekwakwanai ibounai be do idia noho hanaihanai lasi, bona ia sibona ese nega ia makaia vadaeni unai ibounai ia haorea totona. Iehova be ia haheauka noho, bona daudau lasi iseda hisihisi ibounai do ia haorea momokani. Hari, ia be ita davaria hisihisi ia diba bona ia ura ita ia durua. Edena dala ai? Ia ese moale korikori ita davaria dalana be ita dekenai ia hadibaia. (Salamo 16:11 duahia.) Mani Iehova ena Natuna Iesu ia moale ena badina ita laloa.

5-6. Dahaka dainai Iesu ia moale bada?

⁵ Iehova ese Iesu ia havaraia neganai, Iesu be moale bada tauna. Dahaka dainai? Badina be rua: (1) “Ia be ita itaia diba lasi Diravana ena toana hegeregerena” bona ena Tamana ena kara namodia ia hahedinaraia goevagoeva. (Kol. 1:15; 1 Tim. 6:15) (2) Iesu be nega daudau ena Tamana, moale Diravana unai, ida ia noho.

⁶ Iesu be ia moale badina hanaihanai ena Tamana ena ura ibounai ia karaia. (Aon. 8:30, 31; Ioa. 8:29) Unai dainai Iehova be ia dekenai ia moale bada bona ia lalonamo henia.—Mat. 3:17.

7. Edena dala ai moale korikorina ita davaria diba?

⁷ Ita danu moale korikorina ita davaria diba, bema moale Diravana Iehova ena turana ai ita lao. Bema nega bada ita atoa Iehova ita dibaia totona bona ena kara ita tohotohoa, iseda moale be do ia bada. Danu Dirava ena ura ita karaia bona ita diba ita ia lalonamo henia neganai, ita moale.a (Sal. 33:12) To bema nega haida eiava nega daudau ita moale lasi be edena bamona? Unai ena anina be Iehova ena lalonamo ita abia lasi, a? Lasi! Ita be goevadae lasi taudia dainai nega haida hisihisi ita mamia, ita lalohisihisi bona ita lalometau. Bona Iehova be unai ia lalopararalaia. (Sal. 103:14) Iseda moale ia hadikaia gaudia bona ita moale lou diba daladia mani ita herevalaia.

OI MOALE NOHO DIBA

8. Hekwakwanai ita davaria neganai, ita dekenai dahaka ia vara?

⁸ Moale ia hadikaia gauna: Mauri ena hekwakwanai. Oi be dagedage, disasta, ogogami, gorere eiava oi buruka dainai oi lalohisihisi, a? Oibe, unai bamona hekwakwanai dainai iseda moale ia boio diba, badina unai gaudia ita koua eiava haorea diba lasi. Baibel ia gwau: “Ta ena kudouna ia hisihisi neganai, ia lalomanoka.” (Aon. 15:13) Elda tadikaka ta ladana Babis be ena tama sina bona ena tadina be lagani foa sibona lalonai idia mase. Ia gwau: “Lau mamia ta ia noho lasi lau ia durua totona. Danu lau lalometau bada badina idia do mauri noho neganai, nega momo idia ida lau hebamo lasi.” Mauri ena hekwakwanai ese iseda goada ia haorea diba.

9. Dahaka ese ita do ia durua ita moale lou totona? (Ieremia 29:4-7, 10)

⁹ Dahaka ese ita do ia durua ita moale lou totona? Ita moale diba bema ita haidaua diba lasi gaudia dekenai ita laloa momo lasi bona ita dekenai idia noho gaudia dainai ita tanikiu. Taunimanima momo idia laloa bema edia mauri ia namo bona gau namodia momo idia abia, unai ese moale ia havaraia. To unai be momokani lasi. Badina Iehova ese Babulonia dekenai idia noho igui hesiai Iuda taudia ia hamaoroa, namona be unai igui hesiai mauri dalana idia abia dae bona do idia gaukara goada, unai amo do idia moale diba. (Ieremia 29:4-7, 10 duahia.) Unai amo dahaka ita dibaia? Namona be emu noho dalana oi abia dae bona oi dekenai idia vara gau namodia oi laloa bada. Laloatao, Iehova ese oi do ia durua noho. (Sal. 63:7; 146:5) Aksiden dainai ia paralais taihu ta ladana Effie, ia gwau: “Iehova, egu famili bona kongrigeisen taudia ese lau idia durua bada. Unai dainai egu tanikiu karana hahedinaraia totona, lau moale noho, lau hesiku lasi.”

10. Ena be hekwakwanai ita davaria, to dahaka dainai ita moale noho diba?

¹⁰ Ita eiava iseda famili dekenai hekwakwanai haida idia vara neganai, ita moale noho diba.b (Sal. 126:5) Dahaka dainai? Badina iseda moale be iseda noho dalana dainai lasi. Painia taihu ta ladana Maria, ia gwau: “Hekwakwanai oi davaria neganai, oi tai eiava oi lalometau diba, to oi moale badina Iehova ese ia gwauhamatalaia gaudia oi laloatao. Bona iseda Tamana ese ita do ia durua ita moale noho totona.” Laloatao, ena be iseda mauri ai hekwakwanai be momo, to unai ibounai be do idia noho daudau lasi. Kone latanai idia noho aena maka be ranu ese ia huria oho haraga bamona.

11. Aposetolo Paulo ena haheitalai ese edena dala ai oi ia hagoadaia?

¹¹ Nega haida ita laloa hekwakwanai ita davaria, badina Iehova ese ita ia lalonamo henia lasi. Bema unai bamona ita mamia, namona be hekwakwanai idia davaria Iehova ena hesiai taudia ita laloa. Hegeregere aposetolo Paulo be Iesu ese ia abia hidi “bese idauidau, king taudia bona Israela besena dekenai” hereva momokani do ia gwauraia. (Kara 9:15) Unai be hahenamo badana! To, Paulo be hekwakwanai momo ia davaria. (2 Kor. 11:23-27) Ena be ena mauri ia auka, to Iehova ena lalonamo ia haboioa lasi. Bona iena haheauka karana ese ia hahedinaraia Iehova be ia ida ia noho. (Roma 5:3-5) Mani oi sibona oi laloa, ena be hekwakwanai momo oi davaria, to oi haheauka noho. Oi abia dae diba Iehova ese oi ia lalonamo henia.

12. Edena dala ai, iseda ura gauna ia guguru lasi ese iseda moale ia hadikaia?

¹² Moale ia hadikaia gauna: Iseda tahua gaudia idia guguru lasi. (Aon. 13:12) Iehova ita lalokau henia bona tanikiu karana ita hahedinaraia totona, iena hesiai gaukara lalonai tahua gaudia ita atoa. To, bema tahua gaudia be iseda noho dalana ida ia hegeregere lasi, ita lalohisihisi diba. (Aon. 17:22) Painia ta ladana Holly, ia gwau: “Lau ura Basileia Evanelia Sikuli lau vareai, tano ma ta dekenai hesiai gaukara lau karaia totona, eiava Ramapo konstraksen gaukara lau durua. To egu noho dalana ia idau dainai egu tahua gaudia lau hagugurua lasi. Unai dainai lau moale lasi.” Momo be unai bamona hemami idia abia danu.

13. Bema iseda noho dalana dainai ita hegeregere lasi gau haida ita karaia totona, edena bamona tahua gaudia ita atoa diba?

¹³ Dahaka ese ita do ia durua ita moale lou totona? Laloatao, Iehova be ita amo gau momo ia noia lasi. Danu ena be ena hesiai gaukara lalonai ita hegeregere lasi gaukara haida ita karaia totona, to ia ese ita ia laloa bada. Badina Iehova ia ura ita manau bona ia ita badinaia. (Mika 6:8; 1 Kor. 4:2) Ia be iseda lalohadai, iseda hemami, bona kara namodia ia laloa bada. Unai dainai namo lasi gaukara momo ita karaia lasi dainai ita lalometau.c To emu noho dalana bona goada hegeregerena tahua gaudia oi atoa. Hegeregere, matamata taudia oi hadibaia eiava buruka taudia oi durua. Reana ta oi vadivadi henia, fon amo ta oi rini henia eiava teks meseij amo ia oi hagoadaia. Unai bamona tahua gauna oi hagugurua totona, Iehova ese emu hekwarahi do ia hanamoa! Bona laloatao, kahirakahira tanobada matamata ai mai iseda goada ibounai ida Iehova ita hesiai henia diba! Guna ita herevalaia taihu Holly ia gwau: “Lau moale lasi neganai, inai lau laloa: ‘Lau be do lau mauri hanaihanai.’ Bona tanobada matamatana ai, hari lau hagugurua diba lasi gaudia lau hagugurua diba.”

14. Dahaka gau ma ta ese iseda moale ia hadikaia diba?

¹⁴ Moale ia hadikaia gauna: Sibona laloa bada karana. Haida be social media amo idia hahedinaraia sibona iseda ura gaudia ita karaia neganai, moale bada ita davaria diba. Unai dainai reana do ita laloa gau idauidau ita karaia, kohu idauidau ita hoia, bona gabu idauidau dekenai ita loaloa neganai, do ita moale. Unai gaudia ita karaia be kerere lasi. Badina Iehova ese ita ia karaia gau namodia ita moalelaia totona. To, momo idia davaria unai gaudia idia tahua eiava karaia momo dainai, idia moale lasi. Painia taihu ta ladana Eva, ia gwau: “Bema emu mauri lalonai oi ura sibona oi hamoalea, oi be gau idauidau momo do oi ura henia.” Bema nega ibounai sibona ita laloa bada, do ita lalohisihisi bona lalometau.

15. King Solomona amo dahaka ita dibaia?

¹⁵ King Solomona ena haheitalai ese ita ia durua diba, sibona laloa karana ese ia havaraia hekwakwanai ita diba totona. Solomona be ia ura sibona ia hamoalea dainai, aniani namodia ia ania, miusiki namodia ia kamonai, ena nega ai moni amo gau namodia momo ia hoia. To ia moale lasi. Badina ia gwau: “Matana ese gau ibounai ia moalelaia lasi, bona ena taiana be ia kamonai gaudia dekenai ia moale lasi.” (Had. 1:8; 2:1-11) Tanobada taudia idia laloa bema idia dekenai moni ia noho bona edia ura gaudia idia karaia, do idia moale. To unai be koikoi, unai gaudia ese moale korikorina do idia havaraia lasi.

16. Edena dala ai ma haida durua karana ese ita ia hamoalea diba? (Laulau itaia danu.)

¹⁶ Dahaka ese ita do ia durua ita moale lou totona? Iesu ese ita ia hadibaia: “Henia kara ena moale be bada, to abia kara ena moale be maragi.” (Kara 20:35) Elda ta ladana Alekos, ia gwau: “Ma haida totona gau maragidia lau karaia. Unai ese lau ia durua ma haida lau laloa bada, to sibona lau laloa bada lasi bona unai ese lau ia hamoalea.” Ma haida totona dahaka oi karaia diba? Bema oi itaia ta be ia hekwarahi noho, ia oi durua diba. Ena be unai tauna ena hekwakwanai ibounai do oi hanamoa lasi, to mai hebogahisi ida ia oi kamonai henia neganai ia oi hagoadaia diba. Danu ia oi hadibaia Iehova dekenai ena metau ia negea lao. (Sal. 55:22; 68:19) Bona ia oi hadibaia Iehova ese ia do ia rakatania lasi. (Sal. 37:28; Isa. 59:1) Reana gau haida oi karaia diba, hegeregere aniani oi henia eiava umui lao loaloa. Danu haroro gaukara umui karaia hebou neganai, unai ese ia do ia hagoadaia diba. Namona be Iehova ese oi ia gaukaralaia ma haida oi durua totona. Ma haida edia namo oi tahua neganai, moale korikorina oi davaria diba!—Aon. 11:25.

17. Ita moale totona dahaka ita karaia be namo? (Salamo 43:4)

¹⁷ Ita moale bema Iehova kahirakahira ita noho. Badina Baibel ia gwau Iehova be iseda moale ena Badina. (Salamo 43:4 duahia.) Unai dainai ena be hekwakwanai ita davaria, to ita laloa momo lasi eiava ita gari lasi. Namona be Iehova be iseda tura namona ai ita halaoa, unai amo do ita moale noho diba!—Sal. 144:15.