Jude
1 Nuʼ Jude, Jesus Christ tūwikiat, pu James tupkoat it penta. Nu umuy Itanay God ahpiy sutsvo oyiwyuṅqamuy öqalanta. Ura pam umuy wáṅwayhqe, Jesus Christ eṅem umumi tunatyawma. 2 Nam núokwa, kwakwhaunaṅwa, pu namiʼnaṅwa qaöwíhink̇aṅw umumi pitsíwtaa.
False Teachers
3 Aw iunaṅwamu, nu as itamuy hin sun ayo nöṅakqat umumi pēnaniqey unaṅwti. Nīk̇aṅw pay kurs nu soon umumi qa pēneʼ, uma itahtuptsiwniy eṅem pas rohomnumyaniqat umuy uʼnanani, itahtuptsiwniy God sinomuyatuy amumi sūs mātaviwhqat éṅemi. 4 Taq haqawat God qa k̇aptsiʼyuṅqam nanauyve itamumi yuña. Yaw puma God aw yank̇ahk̇aṅw qahopíyese; nihqe God sūkw Moṅwit ayo yuykuya, pu Itahtutuyqawhqay Jesus Christ pīwu. Nihqe ōviy aṅwu pay hisat puma qalomáyukiltiniqat aw oyiwyuṅwa. 5 Noqw ōviy nu umuy it ep ahoy uʼnananiqey nāwakna; pay as pi uma hisat it yantaqat pās nanapta. Ura hin Tutuyqawhqa haqaqw tutskwat Egypt aṅqw sinomuy nöṅaknat, put pantaqat atsve puʼ haqawatuy qa tuptsiwniʼyuṅqamuy haqami hintsana. 6 Pu ima ōṅaqw hoṅviaʼyat tumalay tatamhtotat, pas nāp qeniy mātatveyaqamuy sūs somhtaqe, qatalpumi taṅata, hisat aw wukotalöṅvaqat ep pumuy hin yukunaniqey aw pahsavoo. 7 Noqw ura Sodom-niqw, pu Gomorrha-niqw, pu amunanʼik kitsókit aṅ sinom piw pumuy amún tusk̇apqatsit aw tahkukq, tahtaqt nāp nānami tokoy aṅ písoqya. Noqw God qȫhit qa tokṅwuqat akw pumuy sivintoyna, sinmuy ökwhaniqe ōviyʼo. 8 Noqw piw nāt ima pumuy amún hihta itséheet aṅ kwaṅwáwuwantotaqe, tokoy tuyoyʼewakwtotaṅwu; aṅ moṅwʼiwyuṅqamuy qa hihtayʼyuṅwa, pu aṅ öqalat pasiwyuṅqamuy amumiq nānap hin qalomáhiṅqaqwa. 9 Noqw híkispi God pas sushoṅviayaat Michael Nukpanat amum nāṅwuyʼta, Moses tokoyat ōviyʼo. Nihqe nānaqasqe soon pay nanāpʼunaṅw put aw qalomáhiṅqawniqe, ura put aw paṅqawu: Nam Tutuyqawhqa uṅ mēwaa. 10 Noqw ima hihta aw qa mātsiʼk̇ahk̇aṅw, soq tuwat put ep qalomáhiṅqaqwaṅwu; pu pay hīhihtuy popkotuy amún hīhihta nāp tuwiʼyuṅqey akw nāhovalayaṅwu. 11 Is okiw púmaa! Puma Cain kukyat aṅqeʼ hinwisa; pu Balaam an hihta súantaqat aṅqw lasya, hihta as himuyʼvayaniqe ōviyʼo; pu Core an God aqw kolilitotat, put an súlawhtini. 12 Ason uma sūp haqam nōnoveʼ, Tutuyqawhqat uʼniʼk̇ahk̇aṅw pölavikit yóṅoyhtotaqw, puma umumum nōnoveʼ, pep hihta itséheet anyuṅṅwu; nānami-sa tunatyawyuṅwt, qa hihta tuhtusyak̇ahk̇aṅw nōnovaṅwu. Puma wisioomahwt huhukwhoyaqat anyuṅwa. Puma himutskit talʼaṅwnawit aṅ qa hihta sipalayʼvaṅwuqat anyuṅwa, ṅáipwaniwyuṅqee; soñawnen lȫs soa. 13 Pātuwaqatsit aṅqeʼ aʼnö walalataqat anyuṅwa. Pumuy hintsakpiam pāhut walalataqat qȫtöyat anta. Puma sōtuy nānahoy yuyutyaqat anyuṅwa; nihqe puma haqami míhikqat aṅ pas qatālat aqw sūs yuṅni. Pep puma nawus aqwhaqami yesni. 14 Noqw Adam aṅqw tsaṅeʼsikis nānaṅumo qatsívaptsiwyuṅqat pep Enoch tihtiwa. Nit pam aṅwu pay imuy ura lavayhtiqe paṅqawu: Meh, Tutuyqawhqa pas qaanʼewakw hintaqamuy qahováriwyuṅqamuy tsamk̇aṅw aṅqʼö, 15 Sinmuy sohsokmuy amuṅem hin yúkuniqee. Pam sohsokmuy qa k̇aptsiʼyuṅqamuy qalomáhintsakpiyamuy sohsok ep pumuy hin yúkuni. Taq puma God qa k̇aptsiʼk̇ahk̇aṅw put ehpewi qaanhtoti, piw anahaat lavayit akw put aqw hiṅqaqwa. 16 Ima hapi pas sutsép-sa hihta aṅ hiṅqawwisa; panis tuwat tūovelanhiṅqawwisa; nāp tuṅlayiy-sa aṅ hinwisa; hihta aʼnö kwiviyuaatotaṅwu; hihta nukwáṅwʼewyaniqey ōviy sinmuy amumi kwaṅwáyuaatotaṅwu.
Warnings and Instructions
17 Nīk̇aṅwo aw iunaṅwamu, pay ura Itahtutuyqawhqay Jesus Christ ayamat hin hintaniqat yuaatotaqat uma uʼniʼyuṅwni. 18 Pay soʼṅwamiq ima hakim tututsiwyaqam hoṅvani. Puma God qa k̇aptsiʼyuṅwni; nāp tuṅlayiy aṅ hinwisni, ura kitota. 19 Ima hapi aṅ sinmuy tsīk̇antotani; nāp tunatyay aṅ hinwisa, Qahováriwtaqaʼ Hikwsi pumuy unaṅwayamuy qa aw pákiqʼö. 20 Noqw ūmaa, aw iunaṅwamu, uma umuhtuptsiwniy God aṅqwnihqat aṅ nāwuṅwintani; Qahováriwtaqat Hikwsit aṅ nāwakinwisni. 21 Itahtutuyqawhqa Jesus Christ núokway ahpiy umuy qatsit qasoʼtaqat máqani. Noqw put talöṅvaqat aw pahsavo uma maqaptsiʼk̇ahk̇aṅw, God aṅqw nāmiʼnaṅwat aṅ hinwisni. 22 Aṅ qa súyanyaqamuy uma ókwatutwani; 23 Qȫhit aṅqw pumuy ayo laṅamintotani. Pu aṅ pētuy piw uma maqasneveq ayo ōoyyani. Nīk̇aṅw piw yuwsiyamuy tusk̇apqatsit akw tuyoyʼewakwtiwhqat uma aw qa suhtaqʼewyani.
Prayer of Praise
24 Taay. Kwakwhat pi God umuy qa lasyaniqat aw öqalat pasiwta. Pan hapi umuy hahlayk̇ahk̇aṅw, qa hihta akw hinyuṅqat pam natpipo lomaqatsit aw umuy ökínani. 25 Pam-sa hapi nāla suan unaṅwtalwuwniʼta, pu itamuy ayo oya. Nam sinom sohsoyam put pas hihtatotat, k̇aptsiʼyuṅwni. Nam puma put Moṅwílalwani; pam-sa hapi öqalat pasiwtaqat paṅqaqwani. Nam puʼ yantani, pu yūmosa aqwhaqamii. Nam antaa.