1 Corinthians

The Resurrection of Christ

15 Taay itupkomu, ura nu hapi lomatuawit umuy yuaaykuqey umuy uʼnana. Put hapi uma kwusuya; pu uma put ep hōñi. 2 Pu uma hapi piw put akw ayo nöṅa, kurs uma nuy hihta umumi yuaaykuqat uʼniʼyuṅwee, hal kurs uma paysoq tuptsiwyeʼ-saa. 3 Pi nu pay piw hihta kwúsuhqey ura put umumi mohti mātavi, iʼ Christ hin peyʼtaqat itahqaanhtipuy ep mokqata. 4 Pu ura pam hin peyʼtaqat an tūamiwhqe pu pāyis talq ahoy tātayi. 5 Pu ura pam Cephas aw namtakna, nit pu pakwt lȫq sihk̇ayʼtaqamuy ayaiwyuṅqamuy amumii. 6 Pantaqat atsve puʼ pam tuptsiwniʼyuṅqamuy tsivot tsivót-sikip súnatnihqamuy amuhpe hóyokiwtaqamuy sūsnik̇aṅw amumi namtakna. Noqw pumuy amuṅaqw suswuhaqnihqam nāt yēse; nīk̇aṅw haqawat pi pay soa. 7 Pantaqat atsve puʼ pam James aw namtakna, nit pep puʼ sohsokmuy ayaiwyuṅqamuy amumii. 8 Pu nuhtuṅk pam inumi piw namtakna, soñawnen nāt aw qa pituqw pay nu tihtiwhqat anʼi. 9 Pi nu ayaiwyuṅqamuy amuṅaqw susqahimuu. Soon pi as nu yanʼewaynīk̇aṅw ayaiwtaqey pan túṅwantiwni; pi nu God aw tōnawtaqamuy okiwsana. 10 Nīk̇aṅw kurs nu hímunen, nu God núokwayat ahpiy pamʼi. Nihqe nu qa paysoq put núokwayat makiwa; pi nu pumuy sohsokmuy amuhpenihqe pas pavan maqsonta, nīk̇aṅw pay qa nūu, pi God núokwaat inumum tumalayʼta. 11 Noqw itam yan yuaatota, sen púmaa, sen nūu. Noqw ōviy uma yan tūtuptsiwa.

Our Resurrection

12 Taay, noqw kurs itam Christ mokiwuy aṅqw ahoy tātayhqat yuaatotaqw, ya hintaqw ōviy umuṅaqw haqawat soʼpum soon ahoy tātayyaniqat paṅqaqwa? 13 Pi kurs soʼpum pay qa ahoy tātayyaniqw, pahsat kurs Christ pay qa ahoy tātayi. 14 Noqw kurs Christ pay qa ahoy tātayhq, pep puʼ itam haktonsa yuaatota; noqw piw uma kurs haktonsa aw tuptsiwniʼyuṅwa. 15 Noqw híkispi itam God qa súanyuaatotaqey pan núansaniwya. Oviypi pam Christ ahoy tātaynaqat paṅqaqwa. Noqw pay kurs ima soʼpum qa ahoy tātayyaniqw, pep puʼ piw Christ qa ahoy tātayniwa. 16 Ispi kurs soʼqam pay qa ahoy tātayyaniqw, pahsat hapi God Christ pay qa ahoy tātayna. 17 Pu kurs Christ pay qa ahoy tātayniwhq, uma haktonsa tuptsiwniʼyuṅwa; uma nāt umuhqaanhtipuy aṅ hinwisa. 18 Pu ōviy piw ima Christ ep soʼqam kurs pay pas súlawhti. 19 Kurs pay itam yep-sa qatsit ep Christ aw yanyuṅwnik, pas hapi itam sohsokmuy sinmuy amuṅaqw susʼokiwhinyuṅwni. 20 Noqw pi pas antsa Christ hapi mokiwuy aṅqw ahoy tātayi; nihqe imuy soʼqamuy piw ahoy tātayniqat mahtakna. 21 Pi sinom sūkw sinot atsviy soʼṅwu. Noqw pan hapi piw puma sūkw sinot atsviy ahoy yesvani. 22 Pi Adam aṅ sohsoyam sóʼiwmaqw, pay ōviy piw pan Christ aṅ sohsoyam mokiwuy aṅqw ahoy tātayyani. 23 Nīk̇aṅw nanāp qeniʼyuṅwni, Christ mohtini, aṅk puʼ Christ hisat pituqw put sinomat túwatyani. 24 Pep puʼ soʼṅwamiq pituqw, pam Nay God aw moṅwtunatyat mātapni, pam ahsupoq moṅwqeqnit ayo yúkutʼa, pu sohsokmuy aṅ moṅwʼiwyuṅqamuyu, pu aṅ öqalayʼyuṅqamuyu. 25 Ispi pam soon qa moṅwʼiwtani, pas hisat God sohsokmuy tuwqamuy aṅwutaqw, puma put aw maqaptsiʼyuṅwniqat pahsavoo. 26 Noqw nuhtuṅk mokiwu, itahtuwqanihqa, piw súlawhtini. 27 Pi God Christ pas sohsok hihta aw öqalmaqa. Nīk̇aṅw pam put sohsok hihta aw öqalmaqahqey kítahqe, pas nāp qa put aw maqaptsiy qatu, ōviy pi pam hapi put sohsok hihta aw öqalmaqahqee. 28 Nīk̇aṅw ason pam sohsok hihta áṅwutaqw, pep puʼ Tiat piw put aw maqaptsiy qátuni, it hakiy put sohsok hihta aw öqalmaqahqat awʼi. Noqw God hapi sohsokmuy amuhpenihqe suspavanni. 29 Taay, noqw kurs as soʼqam pay ahoy qa tātayyaniqw, ya ima soʼqamuy amuṅem kūyit akw tuvoylatotiqam hintsatsk̇a? Noqw pas piw puma hinoqw soʼqamuy amuṅem kūyit akw tuvoylatoti? 30 Noqw hinoqw pas piw itam yūmosa unahintaqat yēse? 31 Nu Jesus Christ Itahtutuyqawhqay ep umuy pihniʼtaqey ahpiy umumi pas súaṅqawni, itupkomu, Nu nāqavo mómoki. 32 Kurs nu Ephesus ep hakimuy iʼtsivutuy popkotuy amunyuṅqamuy qananahtsopk̇aṅw nāyawveʼ, ya sen nu hin put akw moṅwvasni, kurs soʼqam pay qa ahoy tātayyaniqʼö? Pay pi itam tatam nōnovani, piw hīhikwyani; taq itam qāvo soʼni. 33 Uma nāmi qa yētotani, hak qahopit aʼpuñalqw, pam hapi hakiy qatsiyat nukṅwat nukushintsanṅwu. 34 Uma suan hinwisniqey aw havivok̇alyani, nen qaanhtiput qeʼyani; taq haqawat God qa tuwiʼyuṅwa. Nu umuy hamantoynaniqe kita.

The Resurrection Body

35 Noqw haqawa soon qa paṅqawni: Noqw ya soʼpum hin hink̇ahk̇aṅw tātayyani? Puma hihta tokoyʼk̇ahk̇aṅw ö́kini? 36 Um hak qa wuwniʼtaqa, pi um hihta uyhq pu pam mokq, pu put aṅqw uyiwhqa wúṅwiwmaṅwu. 37 Pi um hihta ūyeʼ hintaqat tokoyʼtaniqat qa pantaqat uyṅwu. Um pay sivosiyat uyṅwu, sen söhövosita, sen himuvoshumita. 38 Noqw ason God put hintaniqat nāwakneʼ pan put tokotoynaṅwu. Pu sohsok hihta sivosiyat hintaqat tokoyʼtaniqat pam eṅem yúkuṅwu. 39 Sohsok sikwi qa sunyuṅwa. Sinom pas nāp sikwíʼyuṅwa; pu hihtu popkot piw pas nāp sikwíʼyuṅwa; pu pāvakiwht piw pas nāp sikwíʼyuṅwa; pu masayʼyuṅqam piw pas nāp sikwíʼyuṅwa. 40 Pu ōveqatsit ep yesqam piw nāp tokoyʼyuṅwa, pu tūwaqatsit ep yesqam nāp tokoyʼyuṅwa. Oveqatsit ep yesqam nāp lomavitsaṅwayʼyuṅwa; pu tūwaqatsit ep yesqam piw sukw lomavitsaṅwayʼyuṅwa. 41 Tāwa pas nāp tālawṅwayʼtaṅwu; pu mūyaw piw pas nāp tālawṅwayʼtaṅwu; pu sōtu piw pas nāp tālawṅwayʼyuṅṅwu. Noqw qa sohsoy sōtu sun tālawṅwayʼyuṅṅwu. 42 Noqw pan hapi iʼ hak mokt ahoy tātayhqa hintaṅwu. Pam as hovariwk̇aṅw āmiwht, qahováriwk̇aṅw ahoy tātayni. 43 Pam as hinʼeway āmiwht, lolmat pitsáṅwayʼk̇aṅw tātayni; pam qaöqálayʼk̇aṅw āmiwht, aʼnö öqalayʼk̇aṅw tātayni. 44 Pam yep qatsit aṅqw tokoyʼk̇aṅw āmiwht, Hikwsit aṅqw tokoyʼk̇aṅw tātayni. Itam puʼ yep qatsit aṅqw tokot pasiwyuṅwa. Noqw pep puʼ itam pas antsa Hikwsit aṅqw tokot pasiwyuṅwni. 45 Oviy pi ura yan peyʼta: Iʼ Adam mohtiʼmaqa tātayṅwuqey pan yukiwta, yanʼi. Noqw pay iʼ Adam nuhtuṅknihqa hikwsi hakiy tātaynaniqey pan yukiwta. 46 Nik̇aṅw Hikwsit aṅqwnihqa qa mohtii, pi yep qatsit aṅqwnihqa; pu Hikwsit aṅqwnihqa pay ason aṅkti. 47 Iʼ mohti sino tutskwat aṅqw yukilti; nihqe pam yep qatsit tunatyawta. Noqw aṅknihqa sino hapi Tutuyqawhqa, ōveqatsit aṅqʼö. 48 Pay pi tutskwat aṅqw yukiwtaqa hin hintaqw ima tutskwat aṅqw yukiwyuṅqam hapi pay piw panyuṅwa; pu ōveqatsit aṅqwnihqa hin hintaqw pay ōviy hapi ōveqatsit aṅqwyaqam piw panyuṅwa. 49 Noqw pay pi itam tutskwat aṅqw yukiwtaqat an yukiwyuṅqey pan hapi ōviy itam piw ōveqatsit aṅqwnihqat an yukiwyuṅwni. 50 Noqw it nu paṅqawni itupkomu: Pas kurs hin hak tokoyʼk̇aṅw piw uṅwáyʼk̇aṅw God moṅwtunatyayat himuyʼvani; piw pas soon hak hovariwk̇aṅw qatsit qahováriwtaqat himuyʼvani. 51 Meh, nu hihta tupkiwtaṅwuqat umuy āawnani. Itam qa sohsoyam soʼni; nīk̇aṅw itam sohsoyam alöṅtotini. 52 Nāt yank̇ahk̇aṅwo, hakiy pōsiyat uhpukqat pan halayvita, nuhtuṅk tötöqpit töqtiqʼö. Pi tötöqpi töqtiqw, pu soʼpum qahink̇ahk̇aṅw ahoy tātayyani, noqw itam alöṅtotini. 53 Pi itam itahtokoy sakwítiṅwuqat hihta pas qa sakwítiṅwuqat enaṅ nāhoyṅwayani; pu mokṅwuqat hihta pas qa mokṅwuqat énaṅʼa. 54 Noqw ōviy iʼ sakwítiṅwuqa pas qa sakwítiṅwuqat yuwsiqw, pu iʼ pay mokṅwuqa pas qa mokṅwuqat yuwsiqw, pahsat pu iʼ yan lavayi peyʼtaqa aw antsaniwni: Mokiwu áṅwutiwhqe súlawhti. 55 Taay, mokiwu, ya um hihta akw hakiy áṅwutani? Taay, mokiwu, ya um hihta akw hakiy múani, yanʼi. 56 Pi qaanhtipu hapi mokiwuy hōyat antaṅwu. Noqw hin hinwisniqa tutavo hapi qaanhtiput öqaltoynaṅwu. 57 Noqw pay kwakwhat pi God Itahtutuyqawhqay Jesus Christ aṅ itam hihta aṅ kūyuṅwniqat pan yukiʼta. 58 Yanta aw iunaṅwam itupkomu, ōviy uma hūrs hoṅni; pas qa wayayatotani; sutsep Tutuyqawhqat aṅ qaöwihinyuṅwni; pi uma qa paysoq Tutuyqawhqat eṅem tumalayʼyuṅqey navotiʼyuṅwa.