1 Corinthians

Lawsuits against Brothers

6 Is uti, kurs umuṅaqw haqawa sukw amum hihta ep hinhteʼ, momṅwituy qaanhinwisqamuy amutpip put hin hepniqey suhtaqʼewni? as pam God sinomuyatuy amutpip put mohti hepnik̇aṅwo? 2 God sinomat tūwaqatsit ep sinmuy amuṅem hinwat yukuniʼwisni. Ya uma put qa navotiʼyuṅwa? Noqw kurs pantaniqw, ya uma hinoqw aṅ hihta susqahinyuṅqat qa nāp hin yuykuya? 3 Itam hoṅviaʼyatuy hinwat yukunayani. Ya uma put qa navotiʼyuṅwa? Noqw tis pi ōviy itam yep qatsit ep hihta hinyuṅqat aw suan wūwayani. 4 Noqw ason uma hihta pay yep qatsit ep hinyuṅqat ep hin yukunayanik, ya uma God aw tōnawtaqamuy amuṅaqw haqawatuy suspevewinhinyuṅqamuy put aw oʼyani? 5 Nu umuy hamantoynaniqe ōviy yan lavayhti. Puyaw pas qa haqawa umuṅaqw pavan wuwniʼta? Puyaw pas qa haqawa nātupkomuy amutsve hihta aw hin wūwaniqey tuwiʼta? 6 Noqw ōviy soq tuwat nātupkom haqam hin yukiltiṅwuqat aw nāwikvaṅwu, hikis piw qatuptsiwniʼyuṅqamuy amumii. 7 Pay ōviy pas suyan uma it ep qaanhinwisa, ispi uma haqam hin yukiltiṅwuqat aw nātsamvantaqee. Ya hinoqw tis nāpi uma hihta ep qaantsaniwyeʼ, put ep nakwhaniʼyuṅwni? Ason hak umuy hihta nawhkiniqw uma put ep qa unaṅwtuyvayamantani. 8 Noqw uma soq qa suan hinwisa. Hikis pi uma pas umuhsinomuy hihta nawhkilalwa. 9 Aṅ qa suan hinwisqam soon God moṅwtunatyayat ep amuṅem qeʼnini. Ya uma it qa navotiʼyuṅwa? Uma qa nāunayʼyuṅwni. Soon tokot sokoptotaqam God moṅwtunatyayat aw yuṅni, pu nāp yukit aw nāwakinwisqamu, pu qa nāp himuy amum hintsatsk̇aqamu, pu wutihinyuṅqamu, pu tahtaqt tahtaqtuy amuhpaʼ nāhahlaynayaqamu, 10 Pu uuyiṅwtu, pu hihta k̇anʼewtunatyayʼyuṅqamuyu, pu honaqkuyit hīhikwyaqamu, pu nuhtumiq hiṅqaqwaqamu, pu hihta tusoqtukwhantotaqamu. Pan hinwisqam soon God moṅwtunatyayat ep amuṅem qeʼnini. 11 Noqw ura as uma haqawat panhaqam hinwisa. Noqw pay God Itana Hikwsiy ahpiy umuy pāhoma, umuy nēṅem sinota, umuy súanyuṅqat yuku, Itahtutuyqawhqay Jesus natṅwaniyat aṅʼa.

Use Your Bodies for Godʼs Glory

12 Haqawa k̇a paṅqawni: Pas as sohsoy himu inuṅem súanta. Antsaa; nīk̇aṅw pay qa sohsoy lomahinta. Pas as sohsoy himu inuṅem súanta; nīk̇aṅw pay nu qa hihtawat akw áṅwutiwniqey nakwhani. 13 Nȫsiwhqa hakiy ponoyat eṅem yukiwtaṅwu; pu hakiy ponoat nȫsiwhqat eṅem yukiwta; nīk̇aṅw pay God pumuy lȫpwatuy súlawhtani. Noqw hakiy tokoat hapi nuvöt qa eṅem yukiwta; pam Tutuyqawhqat eṅem yukiwta; noqw Tutuyqawhqa tokoy eṅem qatu. 14 Noqw God hapi Tutuyqawhqat ahoy tātayna; nihqe piw nāt itamuy ahoy tātaynani, nāp öqalay akwʼa. 15 Puyaw umuhtoko Christ tokoyat aw wiwyuṅqat uma put qa navotiʼyuṅwa? Noqw ya sen nu Christ tokoyat aw wiwyuṅqat ayo oyat, tokoy huhyaqat aw put awiwhtoynani? Sóoni. 16 Soh! Puyaw iʼ tokoy huhyaqat amum hintsakqa put amum sūk̇a tókoniṅwuqat uma put qa navotiʼyuṅwa? Pi puma lȫyöm sūk̇amantaniqat ura God paṅqawu. 17 Noqw pi Tutuyqawhqat aw hūrsʼiwtaqa put amum sūk̇a hikwsiniṅwu. 18 Huvam nuvöqatsit aṅqw watqaa. Sohsoy qaanhtipu sinot ahpiy hintsatskiwhqa qa tokoyat ep hintsatskiwa. Noqw pay nuvöhinmaqa hapi nāp tokoy ep qaantsakṅwu. 19 Soh! Ya uma it qa navotiʼyuṅwa? Qahováriwtaqa Hikwsi God ahpiy umumi noiwhqa umuhpe pakiwtaqw, umuhtoko put kīata? Noqw ōviy uma qa nāp nāhimuyʼyuṅwa. 20 Pi uma pas pavan hihta hihk̇ayʼtaqat akw tuiwya. Oviy uma umhtokoy, pu umuhhikwsiy God himuyat aṅ put tayawniʼyuṅwni.