Galatians
Preserve Your Freedom
5 Christ tutavot aṅqw itamuy mātavi. Noqw ōviy uma qenive hūrs hoṅni, nen Moses tutavoyat pāpu qa akw nātuwikiʼyuṅwni. 2 Meh, nu Paul hapi umumi pas paṅqawni: Kurs uma poṅotkit akw tuvoylatotiqw, pay Christ umumi qa hihk̇ayʼvani. 3 Pi nu piw nāt umuy haqawat poṅotkit akw tuvoylatotiqamuy amumi paṅqawni: Panhtiqa hapi pas pay soon Moses tutavoyat aṅ qa ahsupoq hinmani. 4 Pi Christ umumi qa hihk̇ayʼva, uma hakim Moses tutavoyat aṅ hinwisqey akw God awwat súanhtotiniqey anyuṅqamu. Uma God núokwayat aṅqw lasya. 5 Pi itam hapi Qahováriwtaqat Hikwsit ahpiy Christ aw tuptsiwyaqe God atpip suan hoṅvaniqey unaṅwvahsiʼyuṅwa. 6 Pi Jesus Christ aw tōnaltiqamuy amuṅem poṅotkit akw tuvoyla qa hihta apiti, piw put akw qa tuvoyla. Noqw pay qapēvewni namiʼnaṅwat ahpiy lolmat tumalayʼtaqa hapi-sa pasʼi. 7 Pas as uma suan hinwisa. Noqw ya hak umuy soontsanhq, ōviy uma lomatuawit pas antsanihqat aṅ hinwisqey qeʼtoti. 8 God umuy wáṅwayhqa qa pan hapi umuy unaṅwtoyna. 9 Hihsay pēk̇eni sohsok paqwrit pēk̇enaṅwu. 10 Pas nu Tutuyqawhqat ep umuy qapēvewna, pas uma soon alöṅöt wuwniʼyuṅwniqata. Noqw pay ason God it hakiy umuy yūyuyhnaqat aw tuwat nāoyni, hak pi pamʼi. 11 Pu nūu, itupkomu, kurs nu as nāt sinmuy soon poṅotkit akw qa tuvoylatotiniqat yuaatanik, ya nu hinoqw pas piw nāt hihta ep okiwsahsaniwa? Pep hapi puʼ nu nahoylehtsit yuaataqey ep soon okiwsaniwni. 12 Is pas as umuy yūyuyhnayaqam tatam pi umuṅaqw ayo natkuyanīk̇aṅwo. 13 God umuy waṅwayhq, uma qenive hōñi, itupkomu. Nīk̇aṅw uma tutavot aṅqw mātaviwyaqey qa aw yank̇ahk̇aṅw pay umuhtokoy tuṅlayiyat aṅ hinwisni. Uma qa pan hinwist nānami unaṅwayʼyuṅweʼ nāhoy nātumalayʼyuṅwni. 14 Pi hin hinwisniqa tutavo sūkw lavayit ep yan lavayhti; itʼa: Um pas hin nāmi unaṅwayʼtaqey pan uhsinosṅway aw unaṅwayʼtani, it epʼe. 15 Nīk̇aṅw kurs uma nāṅwuyʼk̇ahk̇aṅw, nānayweʼ, uma tunatyaltotini; taq k̇a uma nāhoy hovalayani.
The Spirit and Human Nature
16 Noqw ōviy nu paṅqawni: Uma Hikwsit tunatyayat aṅ hinwiseʼ, pep puʼ umuhtokoy tuṅlayiyat qa aṅ hinwisni. 17 Pi Qahováriwtaqat Hikwsit tunatyaat hakiy tokoyat tunatyayat amum qa súnahpaniqʼö, puma nehpewʼiwta. Noqw ōviy uma as hihta hinhtotinik kurs hin put panhtotini. 18 Nīk̇aṅw kurs uma Qahováriwtaqat Hikwsit ahpiy tsāmiwyeʼ, uma soon Moses tutavoyat aw umuhmaqaptsiy yesni. 19 Itam navotiʼyuṅqw, hak nāp tunatyay aṅ hinmaqa hapi īit hintsaki: Nömaqtsit sokoplawu; tokot sokoplawu; itséhee qatsit, pu qaunaṅwtalqatsit aṅ hinmaṅwu; 20 Nāp yukit aw nāwakinta; powaqhintsaki; nuhtumi qa suhtaqʼewa; nāṅwuyʼtaṅwu; k̇anʼewhtunatyawta; suyʼtsiptiṅwu; nanaqastunatyawta; nātsiktunatyawta; pu pas sutsk̇e tuptsiwnit aw lasṅwu; 21 Hihta aw kwaṅwáyʼtusyaṅwu; tukwyantunatyawta; honaqkuyit akw hōnaqʼiwtaṅwu; qaunáṅwtalawvaṅwu; pu ahpiy yantaqat aṅ hinmaṅwu. Noqw ura nu mohtihaqam umuy put āawnaqey umumi paṅqawu: Pan hinwisqam hapi pas pay soon God moṅwtunatyayat aw yuṅni. 22 Noqw pay Qahováriwtaqa Hikwsi hakiy qatsíyat ep yan aniwnani: Hak nuhtumi unaṅwayʼtani; yūmosa hahlayni; kwakwhat unaṅwayʼk̇aṅw qátuni; wuhko maqaptsiʼtani; hakiy pāsniṅwu; lomahintsakni; hihta aṅ pas antsayʼmani. 23 Okiw unaṅwayʼk̇aṅw qátuni, namitutuyqawni. Noqw qa haqam himu tutavo it yantaqat tūmewanta. 24 Noqw Christ sinomat hapi tokoy tunatyayat-nik̇aṅw pu tuṅlayiyat nahoylehtsit aw muaya. 25 Kurs itam Qahováriwtaqat Hikwsit aṅ yēseʼ pay itam piw put aṅ hinwisni. 26 Itam qa nāhihimuyani; qa nāvuhtsemokintotani; qa nāhoy nāismamqasyani.