1 Peter
1 Nuʼ Peter, Jesus Christ ayaatnihqa, it penta. Nuʼ aṅ ahtsavalʼiwtaqamuy Pontus, Galatiat, Cappadociat, Asiat, pu Bithyniat aṅqeʼ hinnumyaqamuy öqalanta. 2 Ura Itana God aṅwu pay umuy tuwiʼtaqe, umuy namorstat, Qahováriwtaqat Hikwsit ahpiy umuy sutsvo oya, uma Jesus Christ uṅwáyat akw kwaṅwʼewayhtoteʼ, put aw tuqayvastotaniqat ōviyʼo. Nam núokwa, pu kwakwhaunaṅwa qaöwíhintaqa umumi pitsíwtaa.
A Living Hope
3 Nam Jesus Christ Itahtutuyqawhqay aw yantaqaat iʼ Naat God pas k̇aptsitiwaa. Kwakwhat pi pam hapi pas núokwanihqe itamuy tímuyʼvaqe, ṅȫyit qasoʼtaqat itamumi noa, Jesus Christ mokiwuy aṅqw ahoy tātaynaqee. 4 Pam itamuṅem pas qahinhtiṅwuqat, pu qahováriwtaqat, pu qasulawhtiṅwuqat hihta ōveqatsit ep waraniʼta. Put ōviy uma unaṅwvahsiʼyuṅwa, 5 God qapēvewnayak̇ahk̇aṅwo. Pi pam umuy ayo óyahqe, umumi soʼṅwamiq pahsavo tunatyawtaniqey öqalayʼta. Noqw soʼṅwaveq puʼ pam umuhmakiway umumi nóani. 6 Noqw ōviy uma pas hinhaqam hahlayya, pay nāmahin pi as uma k̇a puʼ hihsavo hīhihta aṅ k̇ānanvotyaqe putuiwyuṅwa. 7 Hak sik̇avalasivat aw pohtanik, qȫhit akw put aw tuwantaṅwu. Noqw tis pi ōviy God umuhqapevewniy sik̇avalasivat pay súlawhtiṅwuqat epnihqe pas pavan hihk̇ayʼtaqat aw pohtani. Nihqe pam put aw pohtaqw, uma tayawniwyani, pu k̇aptsitiwyani, pu lomayuaatiwyani, hisat Jesus Christ pítuniqʼö. 8 Put uma hakiy aw qa yórikiʼk̇ahk̇aṅw put aw unaṅwayʼyuṅwa. Uma as puʼ put aw qa tayk̇ahk̇aṅw aw tūtuptsiwaqe hahlayhtiwisa. Hahlayhpit pas kurs hin paṅqawiwniqat pas pavan nukṅwat pasiwtaqat pan uma hahlayya. 9 Pi umuhqapevewniy ahpiy aniwnit uma himuyʼvayani, umuhhikwsi ayo nö́ṅakniqat putʼa. 10 Noqw God lavayʼaymat put umuy ōkwatuweʼ ayo óyaniqat aṅwu pay yuaaykuyat, put pantaqat aṅ pās heptotaqe, pu aṅ pupriya. 11 Pi Christ Hikwsiat pumuy amuhpe pakiwtaqa Christ soon qa hīhihta aṅ k̇ānavotat, pep puʼ momiq taviwniqat aṅwu pay pumuy āawna. Noqw ōviy puma put hakiy yuaaykuqat, pu haqeʼ qalawmaqat aṅ pupriya. 12 Noqw pay puma qa nenṅemyat, umeṅem īit pēnayaqat pan amumi mātakti. Noqw hikis pi ōṅaqw hoṅviaʼyam it aw pupriyaniqey nānawakna. Noqw umumi hapi iʼ lomatuawi yuaatiwa, hakimuy lavayʼaʼyatuy amuhpiyʼo, Qahováriwtaqat Hikwsit ōṅaqw taviwhqat öqalayat aṅqʼö.
A Call to Holy Living
13 Noqw ōviy uma rohomhtotiniqe umuhwuwniy moṅwvasʼiwyuṅwni; pās umuʼnaṅway yesk̇ahk̇aṅw, hisat Jesus Christ mātaktiniqat aw taywisk̇ahk̇aṅw, it kuwahtiput pep makiwyaniqey ōviy yūmosa unaṅwvahsiʼwisni. 14 Uma God aw tūqayyuṅwni, put tímatnihqee. Ura as uma hisat God tunatyayat qa navotiʼyuṅqe nāp umuhtuṅlayiy aṅ hinwisa. Noqw puʼ hapi uma qa pan hinwist, 15 Aṅ ahsupoq suan hinyuṅwni, iʼ hak umuy wáṅwayhqa hin suan hintaqat panʼi. 16 Ispi yan ura peyʼtaqʼö: Uma qahováriwyuṅwni; pi nu qahováriwta. 17 Noqw ason uma Itanay qa sinonuiñanihqat aw nānawakneʼ it uʼniʼyuṅwni: Pam hapi sohsokmuy amuṅem hin yúkuni; hak hin tumalayʼtaqat pan put eṅem yúkuni. Noqw ōviy uma yep qatsit ep yesk̇ahk̇aṅw, put k̇aptsiʼk̇ahk̇aṅw hinwisni, 18 It navotiʼyuṅwee: God umuhhisatqatsiy anʼewakwnihqat aṅqw umuy mātavihqata, it qatsit umunamuy navotiyamuy ahpiy umumi mātaviwhqat aṅqʼö. Ura pam hihta pas hihk̇ayʼtaqat qahinhtiṅwuqat akw umuy mātavi, sik̇avalasivat, sen qötsásivat qa put akwʼa, 19 Nit Christ uṅwáyat akwʼa. Ura pam mañat pas qa hihta akw hovariwk̇aṅw qa hihta akw hintaqat ank̇aṅw umuṅem taviwa. 20 Pas hisatṅahaqaqw God tūwaqatsit nāt qa yukut, pepeq pay pan put eṅem yuku; nit yepehaq soʼṅwaveq puʼ umuṅem tūwaqatsit aw put tavi. 21 Noqw put ahpiy uma God aw tūtuptsiwa, put mokiwuy aṅqw ahoy tātaynaqe, pas pavan sinotaqat awʼi. Nihqe ōviy uma God qapēvewnayak̇ahk̇aṅw, put ahpiy hihta unaṅwvahsiʼwisa. 22 Noqw uma hapi Qahováriwtaqat Hikwsit ahpiy lavayit pas antsanihqat aw tuqayvastotaqe, umuhʼunaṅway kwaṅwʼewakwtotat, aṅ tuptsiwniʼyuṅqamuy amumi pas antsa unaṅwayʼyuṅwniqey tuwiʼvaya. Taa, uma pan hinwiseʼ, pas suyan unaṅwayʼk̇ahk̇aṅw pas pavan nānami unaṅwayʼyuṅwni. 23 Pi uma hapi puʼ pas puhutihtiwya, qa sinmuy súlawhtiṅwuqat amuhpiynit, hakiy qasulawhtiṅwuqat ahpiyʼo, God lavayiyat pas taytaqat, sútsepnihqat akwʼa. 24 (Pi tutuvenit aṅ yan peyʼta.) Sinom sohsoyam tūsaqat anyuṅwa; pu pumuy lomavitsaṅwaam tūsaqat siyat anta. Tūsaqa tsakq, siat ayo posṅwu; 25 Noqw Tutuyqawhqat lavayiat hapi pas qa haqami sōta, yanʼi. Noqw iʼ lavayi hapi lomatuawi, umumi mātaviwa.