1 John
The True and the False Spirit
4 Aw iunaṅwamu, pay uma qa pas sohsokmuy Qahováriwtaqat Hikwsit akw yuaatotaqey paṅqaqwaqamuy amumi tuptsiwyamantani. Nīk̇aṅw uma pumuy amumi pohtayamantani, sen puma pas antsa God aṅqwyaqata. Taq k̇aysiwhqam God lavayʼaymatnihqey atsáyʼyuṅqam tūwaqatsit aṅqeʼ nankwusa. 2 Noqw it akw hapi uma God Hikwsiyat māmatsyamantani: Haqawa Jesus Christ tokoyʼk̇aṅw pítuhqat paṅqawlawhqa hapi God Hikwsiyat ahpiy yuaatani. 3 Pu haqawa Jesus Christ tokoyʼk̇aṅw pítuhqat ayo yuykuqa hapi qa God Hikwsiyat ahpiy yuaatani, soq it hakiy Christ ehpewʼiwtaqat hikwsiyat ahpiyʼo. Ura nāt Christ ehpewʼiwtaqat pítuniqat uma nanapta. Noqw puʼ hapi pay pam yep qatsit ep hinnuma. 4 Noqw pay Christ umuhʼnaṅwpeq qátuhqa put epnihqe pas pavan hoṅvi. Noqw ōviy uma pumuy áṅwutota, pi uma God ahpiy tihtiwyaqee, itimhohyamu. 5 Christ ehpewʼiwyuṅqam yep qatsit tunatyayat ahpiyya; nihqe ōviy yep qatsit tunatyayat yuaatota. Noqw yep qatsit tunatyayat hinwisqam umumi tūqayyuṅwa. 6 Itam hapi God ahpiy tihtiwya. Noqw God tuwiʼtaqa itamumi tūqaytaṅwu. Pu God qa ahpiy tihtiwhqa itamumi qa tuqayvastaṅwu. It akw hapi itam it Hikwsit pas qa atsat mātsiʼyuṅwa, pu piw it atsat hikwsita.
God Is Love
7 Aw iunaṅwamu, itam nānami unaṅwayʼyuṅwni. Pi God hapi itamuy nuhtumi unaṅwayʼyuṅwniqat tutuwnaṅwu. Noqw haqam nuhtumi unaṅwayʼtaqa hapi suyan God ahpiy tihtiwṅwu, nihqe God tuwiʼtaṅwu. 8 Haqam nuhtumi qa unaṅwayʼtaqa hapi God qa tuwiʼtaṅwu, pi God namiʼnaṅwaniqʼö. 9 Noqw God nuhtumi unaṅwayʼtaqey itamumi mahtaknaniqe pas sūkw Tiy tūwaqatsit aw tavi, itam put atsviy yesniqat ōviyʼo. 10 Noqw it akw itam God itamumi unaṅwayʼtaqat māmatsya. Qa itam hapi God aw unaṅwayʼyuṅqw, pay pam itamumi unaṅwayʼtaqe ōviy Tiy tavi. Noqw pam itahqaanhtipuy ep mokqe itamuy God enaṅ namivöhikna. 11 Aw iunaṅwamu, God pas panhaqam itamumi unaṅwayʼta. Noqw ōviy pas hapi itam soon as tuwat nānami qa unaṅwayʼyuṅwni. 12 Qa haq hapi hak God aw yori. Kurs itam nānami unaṅwayʼyuṅqw, pep hapi puʼ God itaʼnaṅwpeq qátuni; nihqe itamuy nānami pas unaṅwayʼyuṅwniqat itamuy tutuqaynatima, itam put an nuhtumi unaṅwayʼyuṅwniqat aw pahsavoo. 13 Noqw itam put aṅ yesq pam itaʼnaṅwpeq qátuqw itam navotiʼyuṅwa, pi pam Hikwsiy itamumi nóaqw ōviyʼo. 14 Noqw itam hapi aw yórikya, piw Naat itamumi unaṅwayʼtaqat itam tuawiʼyuṅwa; ispi pam Tiy aṅqw pew taviqw pam sinmuy ayo oya. 15 Hak hapi haqam Jesus God Tíyatnihqat paṅqawhqa God aṅ qatu; noqw God put unaṅwpeq qatu. 16 Noqw itam hapi God itamumi unaṅwayʼtaqat nanaptak̇aṅw tūtuptsiwa. God hapi pas namiʼnaṅwa. Noqw nuhtumi unaṅwayʼtaqa hapi God aṅ qatu, noqw God put ep qatu. 17 Aw iunaṅwamu, kurs itam hin as nānami unaṅwayʼyuṅwniqey pan nānami unaṅwayʼyuṅweʼ pep puʼ ason hin yukiltiniqat aw pituqw itam qa ókiwyani. Pi Tiat yep qatsit ep hin hintaqw pay itam piw an yep hinyuṅwa. 18 Hak hakiy aw unaṅwayʼteʼ qa put mamqasṅwu; maqaswuwni súlawṅwu. Taq maqaswuwniʼtaqa hapi qa sun yantaṅwu. Noqw ōviy God mamqasqa hapi soon pas put aw unaṅwayʼtani, pam as put aw unaṅwayʼtanik̇aṅwo. 19 Itam put aw unaṅwayʼyuṅwa, ispi pam mohti itamumi unaṅwayʼtaqʼö. 20 Kurs hak haqam God aw unaṅwayʼtaqey yan lalvayk̇aṅw sinosṅway aw qa suhtaqʼewnihqa hapi atsátani. Ispi puyaw hak sinosṅway aw yórikiʼtaqey aw qa unaṅwayʼteʼ hin tis God aw qa yórikiʼk̇aṅw put aw unaṅwayʼtani? 21 Noqw yan hapi pam itamumi tutapta: God aw unaṅwayʼtaqa piw sinosṅway aw unaṅwayʼtaqata.