Romans
Duties toward the State Authorities
13 Uma sohsoyam aṅ momṅwituy amumi tūqayk̇ahk̇aṅw yesni; taq qa haqam hak öqalat pasiwtaqa qa God aṅqw put makiwa. Pi sohsoy moṅwqeqni God ahpiy pasiwyuṅwa. 2 Paniqw ōviy moṅwit aw rohomnumqa God yukiyat aw rohomnumṅwu; noqw rohomnumyaqam nankiwakw pantsatsk̇a. 3 Pi lomahinwisqam aṅ momṅwituy qa mamqasyaṅwu, qalomáhinwisqam pi pumuy mamqasya. Noqw ya um hinoqw nāt moṅwʼiwyuṅqamuy mamqasni? Um lomahinmeʼ put ahpiy tayawniwni. 4 Pi pam God aṅqw uṅem lolmat ōviy tumalʼaya. Nīk̇aṅw kurs um hihta qaantsak̇eʼ pay um maqasʼiwtani; taq pam qa paysoq tunipiʼta. Taq pam God eṅem hakiy qalomáhintsakqat aw nāoyniqey ep wunu. 5 Paniqw ōviy uma soon aw qa tūqayyuṅwi, nen uma itsívuyat aṅqw ayo nö́ṅakiwtani, piw umuhʼunaṅwa pasiwyuṅwni. 6 Pi yantaqw ōviy uma hihta aṅ momṅwituy amumi siviwisni; pi puma God tumalʼaymat it yantaqat yūmosa tumalayʼyuṅwa. 7 Paniqw ōviy uma aṅ sohsokmuy hakimuy amumi put ōoyyani; hakiy moṅwit eṅem sīvat ömalawhqat aw pammantani; pu pay hīhihta aṅ sīvat ömalawhqat aw pammantani; hakiy k̇aptsiwtaniqat k̇aptsiʼyuṅwmantani; pu hakiy tayawniwniqat uma tayawnayamantani.
Duties toward One Another
8 Uma qa hakiy aw hihta pöiwyuṅwni, hal pay nānami unaṅwayʼyuṅwniqey-saa, pi nuhtumi unaṅwayʼtaqa hapi God tutavoyat anmaṅwu. 9 Pi yanta: Um nömaqtsit qa sokoplawni, um hakiy qa nīnani, um hihta qa ūuyni, um hakiy hihta qa atsátoynani, um hihta qa uhhimuy qa tuṅlayʼtani, pu sen pay piw himuwa tutavoniqw pay hapi pam sohsoy it yanwat lavayit ep taṅawta, itʼa: Um pas nāmi hin unaṅwayʼtaqey pan uhsinosṅway aw unaṅwayʼtani, it epʼe. 10 Nuhtumi unaṅwayʼtaqa sinosṅway qa yūyuyhnaṅwu; paniqw ōviy nuhtumi unaṅwayʼtaqa God tutavoyat aw antsaniʼta. 11 Itam navotiʼyuṅqw hisat God itamuy ayo oyeʼ itahtokoy alöṅtaniqat aw hayiṅwiwta. Pay as qa pas itamuhaypniqw itam tūtuptsiwa. Soñawnen pi tōkila haqruhpa pay talhayiṅwti. Noqw ōviy itam soon qa havivok̇alyani, nen qatalpuve hintsatskiwhqat ayo yúkuyani, piw talpuve hintsatskiwhqat God tunipiyat antaqat ömahtotani. 12 See 13:11 13 Itam pās unaṅwat yesni, tālöʼnihqat panʼi; haqam hihta qaunáṅwtalhintsatskiwhqat ep qeʼyani, honaqkuyit akw qa hōnaqʼiwyuṅwni; nuvöʼqatsit pu qaunáṅwtalqatsit aṅ qa hinwisni; qa nāṅwuyʼyuṅwni; qa nānami unaṅwtutuyyani. 14 Itam qa panyuṅwt Tutuyqawhqat Jesus Christ qatsíyat tututsk̇anayani, nen itahtunatyay eṅem qa hihta hintsatsk̇ani, nen itam itahtokoy tuṅlayiyat qa aṅ hinwisni.