Matthew
The Parable of the Wedding Feast (Lk 14.15-24)
22 Noqw Jesus tūwutsit hihta tuawiʼtaqat akw pumuy amumi lavayhtiqe paṅqawu: 2 Oveqatsit aṅqw moṅwtunatya hakiy moṅwit tiat nāaptsinaqw eṅem nōvatiwhqat anta. 3 Put naat nōviwhqat aw tūtsamiwyuṅqamuy wáṅwayyaniqat ōviy ayamuy aṅqeʼ ayata. Noqw tūtsamiwyuṅqam awyaniqey qa nānawakna. 4 Pahsat pu piw pam pētuy tumalʼaymuy ayataqe amumi paṅqawu: Uma tūtsamiwyaṅqamuy amumi paṅqaqwani: Taay, nōva pās yukilti; nu iwakasvokmuy, pu iwakashoymuy wiʼyuṅqamuy qöya; noqw shosoy himu pās yukiwta. Uma nāaptsinaqat ep nōviwhqat awyani. 5 Noqw puma put paysoqtotaqe, haqeʼ nankwusa, suhk̇a pāsay awʼi, pu suhk̇a huhyanpiy awʼi. 6 Noqw pētu tumalʼaymuyatuy ṅuahtotat, pumuy okiwsasnat, qöqya. 7 Noqw moṅwi put navotqe itsivuti; nihqe pumuy amumi solāwamuy ayataqw, puma tumalʼaymuyatuy qöqyaqamuy tuwat qöqya; nit kitsókiyamuy taqtsokya. 8 Noqw pahsat pu moṅwi tumalʼaymuy amumi paṅqawu: Pas nāaptsiniwhqat ep nōviwhqat pās yukiwta; noqw kurs tūtsamiwyaqam qahopitu. Noqw ōviy soon pumuy amuṅaqw haqawa nōviwhqat aṅqw nösni. 9 Taay, uma aṅqeʼ pöhut aṅ nankwuseʼ, hakimuy hihsaʼnihqamuy tutweʼ, uma pumuy nōviwhqat aw tūtsamtotani. 10 Noqw ōviy puma tumalʼaʼyat aṅqeʼ pöhut aṅ nankwusaqe, hakimuy hihsaʼnihqamuy tutwaqe, paṅso tsovalaya, qalomásinmuyu, pu lomasinmuyu. Noqw haqam nāaptsiniwhqat ep sinom ohpo. 11 Noqw moṅwi tūtsamiwyuṅqamuy amumi kuyvatoqe, ep pákihqe, hakiy tāqat nāaptsiniwhqat ep yuwsit qa yuwsiʼtaqat tuwa. 12 Nihqe pam put aw paṅqawu: Ikwátsi, ya um hin nāaptsiniwhqat ep yuwsit qa yuwsiʼk̇aṅw pew paki? Noqw kurs pam hiṅqawni. 13 Pahsat pu moṅwi tumalʼaymuy amumi paṅqawu: Huvam māyat, pu hok̇ayat somyat ayoʼhaqami ihpomi qalālat aw uma tūvayani. Pep tsaykitiwni, pu tama ṅuritiwni. 14 Pay as k̇aysiwhqam wáṅwayniwya; nīk̇aṅw pay híkiyom namorstiwya.
The Question about Paying Taxes (Mr 12.13-17; Lk 20.20-26)
15 Pahsat pu Pharisee-sinom ahpiyyaqe, hin as put lavayiyat akw núansanyaniqey ōviy namivavasiwnaya. 16 Nihqe puma hakimuy pumuy amumi nánatuwnayaqamuy pu Herod aṅqw wīsiwtaqamuy Jesus aw hōnayaqw, puma paṅqaqwa: Tūtutuqaynaqa, itam ūmi navotiʼyuṅqw, um pas qaatsatnihqat hintsaki; nihqe um God tuwiyat suan tūtutuqayna; pu um qa sinonuiña, ispi um sinmuy wuwniyamuy qa k̇aptsiʼtaqee. 17 Um kurs ōviy itamuy āawnani, Ya um hin wūwanta? Ya pay itam hihta aṅ sivit Caesar aw ōoyyaniqw pam súanta? Sen qa súanta? 18 Noqw Jesus pumuy nukpantunatyayamuy tuwayʼtaqe, amumi paṅqawu: Ya uma hinoqw nuy unaheptota, nawipʼew hintsatsk̇aqamu? 19 Kurs tax ep sīvat inumi mahtaknayaa. Noqw puma put aw put mahtaknaya. 20 Noqw pam amumi paṅqawu: Ya iʼ hakiy taywaata? Pu hakiy tuṅwniat aṅ peyʼta? 21 Noqw puma put aw paṅqaqwa: Caesar hapi. Pahsat pu pam amumi paṅqawu: Panta hápiniqw; ōviy uma Caesar himuyat Caesar aw noayani; pu uma God himuyat God aw noayani. 22 Noqw puma yan nanaptaqe, kurs hiṅqaqwaqe, k̇ātayuṅt, put mātapyat, ahpiyya.
The Question about Rising from Death (Mr 12.18-27; Lk 20.27-40)
23 Noqw pay put tālat ep hakim Sadducee-sinom, yaw soʼpum pay ahoy qa yesvaniqat paṅqaqwaqam, put aw ökihqe tūviṅtotaqe, 24 Aw paṅqaqwa: Tūtutuqaynaqa, ura Moses hapi paṅqawu: Kurs tāqa qa tímuyʼk̇aṅw mokq, put pāvaat, sen tupkoat put nȫmayatniṅwuqat amum qatupteʼ, put eṅem tíoymantani. 25 Noqw ura as hakim tsáṅeʼnihqam nānatupkom yēse. Noqw amuṅaqw suspavaam as nȫmatat, qa tímuyʼvat, pay mōki; nihqe tupkoy aw nȫmay mātavi. 26 Noqw aṅknihqa pay piw anhti; noqw pu amuṅknihqa pay piw amunhti. Noqw puma as tsáṅeʼnihqam put nȫmatotaqw, qa hihtawat eṅem wuhti tiʼva. 27 Noqw nuhtuṅk puʼ wuhti tuwat mōki. 28 Noqw ya ōviy sinmuy ahoy yesvaqw, pam hihtawat pumuy tsáṅeʼnihqamuy nȫmaatni? Pi puma sohsoyam put nȫmatota. 29 Noqw Jesus amumi paṅqawu: Suyan pi uma tutuvenit-nik̇aṅw pu God öqalayat qa tuwiʼyuṅwa. Nihqe paniqw hapi ōviy uma qa suan wūwaya. 30 Pi sinom ahoy yesveʼ, soon nȫmalalwani, piw soon puwsuṅwlalwani; pas puma ōveqatsit ep God hoṅviaymuyatuy amunyuṅwni. 31 Noqw kurs uma soʼqam ahoy yesvaniqat ep tūviṅtotaqw-ya uma qa hisat tutuvenit aṅ it tuṅwáya: Ura God umumi paṅqawu: 32 Nu hapi Abraham, pu Isaac, pu Jacob, pumuy Tutuyqawhqaamu, itʼa? (Noqw ōviy puma nāto yēse.) Oviy pi God qa soʼpumuy amumi tutuyqawi, pi yesqamuy amumii. 33 Noqw sinom it nanaptaqe, put tutuqayhpiyat ep k̇ātayuṅwa.
The Great Commandment (Mr 12.28-34; Lk 10.25-28)
34 Noqw yaw pam Sadducee-sinmuy moavöltaqat Pharisee-sinom nanaptaqe, puma sumitsovalti. 35 Noqw pumuy amuṅaqw suhk̇a tutavot aw tuvotiʼtaqa put unahepqe, tūviṅtaqe aw paṅqawu: 36 Tūtutuqaynaqa, ya tutavot ep himuwa pas suspavani? 37 Noqw Jesus put aw paṅqawu: Um God Uhtutuyqawhqay aw sohsok uhʼunaṅway akw unaṅwayʼtani, pu sohsok uhhikwsiy akwʼa, pu sohsok uhwuwniy akwʼa. 38 Iʼ hapi susmohti-nik̇aṅw pu suswuyoq tutavo. 39 Noqw aṅknihqa pay piw put anta: Um pas nāmi hin unaṅwayʼtaqey pan uhsinosṅway aw unaṅwayʼtani. 40 Pi sohsoy tutavo pu Tutuyqawhqat lavayʼaymuyatuy lavayiam imuy lȫqmuy tutavot hapi ahpiyʼo.
The Question about the Messiah (Mr 12.35-37; Lk 20.41-44)
41 Noqw nāt Pharisee-sinom tsovawtaqw, Jesus pumuy tūviṅtaqe, 42 Amumi paṅqawu: Ya uma hin Christ aw wūwantota? Ya pam hakiy tíata? Noqw puma put aw paṅqaqwa: David hapi pam tíata. 43 Noqw pam pumuy amumi paṅqawu: Noqw pantaqw hinoqw David Qahováriwtaqat Hikwsit ahpiy put Moṅwílawu? Oviy pi paṅqawu: 44 Tutuyqawhqa Imoṅwiy aw paṅqawu: Um hāk iputvaqewat qátuni, hisat nu uhtuwqamuy áṅwutaqw, puma ūmi maqaptsiʼyuṅwniqat pahsavoo. 45 Noqw kurs David put Moṅwílawhq, hin pam put tíatni? 46 Noqw soon kurs hak put huʼwani. Piw pāpu qa hak pahpiy put hihta tūviṅtaniqey aw unasaki.