John
Jesus Washes His Disciplesʼ Feet
13 Noqw Amutsva Yūmosanihqat ep nōviwniqat nāt aw qa pituqw, Jesus yep it qatsit aṅqw Nay awniqey navotiʼta; nihqe sinomat it qatsit ep hinnumyaqamuy amumi unaṅwayʼtaqe pam yūmosa soʼṅwamiq pumuy amumi unaṅwayʼta. 2 Noqw tapkiqw pumuy nȫnösaqw, Nukpana Simon tiyat Judas Iscariot Jesus momṅwituy amumi mātapniqat pan unaṅwtoyna. 3 Noqw Jesus navotiʼtaqw, Naat sohsok hihta aw öqalat put aw noa; noqw pam God aṅqw pítuhqe piw God aw áhoyniqey navotiʼk̇aṅw, 4 Tunösvoñat aṅqw wunuptut, napnay tavi; nit höhönpit kwusut, put kwewhta; 5 Nit pu tsaqaptat aqw kuyht, pahsat pu put aw nánatuwnayaqamuy kukyamuy pāhomhtivat, nihqe höhönpit kwewhtaqey akw kukyamuy hönhta. 6 Pu ōviy pam Simon Peter aw pituqw, Peter put aw paṅqawu: Tutuyqawhqa, ya pas pay um ikukuy pāhomni? 7 Noqw Jesus lavayhtiqe aw paṅqawu: Pay nu hihta hintsakq um nāt qa mātsiʼta; pay ason um soon qa māmatsni. 8 Noqw Peter put aw paṅqawu: Pay um pas soon hisat ikukuy pāhomni. Noqw Jesus put aw paṅqawu: Pas nu uhkukuy qa pāhomqw pay nawus um qa isinoni. 9 Simon Peter put aw paṅqawu: Tutuyqawhqa, turs qa ikukuy-sa-nit imay iqötoy enaṅ pīw um pāhomni. 10 Noqw Jesus put aw paṅqawu: Pay pāhomʼiwhqa soon pas sohsovik pāhomʼiwni, pay kukʼat-sani, pi pay sohsovik kwaṅwʼewayʼo. Noqw uma hapi kwaṅwʼeʼwayomu, nīk̇aṅw pay qa sohsoyamu. 11 Pam hakiy momṅwituy amumi put mātapniqat navotiʼtaqe ōviy paṅqawu: Uma qa sohsoyam kwaṅwʼeʼwayomu, kita. 12 Pu ōviy pam pumuy kukyamuy pāhomt, pu napnay aṅ pakit, pu qatuptut, amumi paṅqawu: Ya nu umuy hintsanqat uma māmatsya? 13 Uma nuy Tutuqaynalalwak̇ahk̇aṅw pu Tutuyqawhqalalwa; nihqe uma súaṅqaqwa, pi nuʼ pamʼi. 14 Noqw kurs nu umumi tutuyqawhqa, pu umuy tutuqaynaqa umuhkukuy pāhomqw, soon tis uma umuhkukuy nāhoy qa nāvahomnayamantani. 15 Pi nu umuy hinyaniqat umumi mahtakna, nu umuy hin yúkunaqw pan uma hinwisni. 16 Pas antsaa, pas antsa nu umumi paṅqawni: Pay tūwiki moṅwiy epnihqe qa pavan pasniṅwu, pu ayatiwhqa put ayataqat epnihqe qa pavan pasniṅwu. 17 Noqw uma īit navotiʼk̇ahk̇aṅw aṅ hinwiseʼ hahlayyani. 18 Nu umuy qa sohsokmuy lavayhti; nu hakimuy namorstaqey tuwimuyʼta. Noqw pay pi tutuvenit anhtiniqw ōviy iʼ hak inumum tūmoytaqa inumi nukpanhtini. 19 Noqw nāt put qa aw pituqw nu aṅwu pay umuy āawna. Noqw hisat put paniwhtiqw, nu Christ-nihqat uma tuptsiwyani. 20 Pas antsaa, pas antsa nu umumi paṅqawni: Ason nu hakiy haqami ayataqw, hak put pās távihqa hapi nuy pās távini; pu nuy pās távihqa hapi nuy aṅqw távihqat pās távini.
Jesus Predicts His Betrayal (Mt 26.20-25; Mr 14.17-21; Lk 22.21-23)
21 Yan Jesus lavayhtit, qahahlayhtiqe paṅqawu: Pas antsaa, pas antsa nu umumi paṅqawni: Uma haqawa momṅwituy amumi nuy mātapni. 22 Pahsat pu put aw nánatuwnayaqam haqawat pa pam paṅqawhqat wūwantotaqe nānahpaʼ yoyrikya. 23 Noqw suhk̇a put aw nánatuwnaqa pep Jesus tawitsqayat aw tahtsikiwta, pas Jesus aw unaṅwaata. 24 Noqw Jesus hakiy paṅqawhqat pam put tūviṅtaniqat Simon Peter put aw māmasa. 25 Pu ōviy pam Jesus tawitsqayat aw tahtsikiwk̇aṅw put aw paṅqawu: Tutuyqawhqa, ya hakni? 26 Jesus huʼwaqe aw paṅqawu: Pay nu nōvat móroknat, hakiy put maqaqw pamni. Pu pam nōvat móroknaqe, Simon tiyat Judas Iscariot put maqa. 27 Noqw pam panhtiqw, pahsat pu Satan put unaṅwmiq paki. Noqw pahsat pu Jesus put aw paṅqawu: Um hihta hinhtiniqey īts panhtini. 28 Noqw qa haqawa tunösvoñat aw qátuhqa put hinoqw pan lavayhtiqat māmatsi. 29 Judas pi sivamokit taviʼta; noqw suhpan pam pumuy nōviwhqat ep hihta hinhtotiniqat Jesus put aw paṅqawhqat haqawat wūwaya, pu sen pam ōokiwyaqamuy hihta huytaniqat paṅqawhqata. 30 Noqw ōviy pam nōvat mórokput sowat, pahsat pay paṅqw yama. Noqw míhikiwta.
The New Commandment
31 Pu ōviy pam yámakmaqw, Jesus paṅqawu: Puʼ hapi nuʼ Sinot Tiat pas pavan hímuniwhtini; noqw God piw inuhpiy panhtini. 32 Noqw kurs God inuhpiy hímuniwhteʼ, pay soon pam tuwat qa nahpiy nuy pas pavan hihtatani; nihqe soon qa pay put panhtini. 33 Itimu, nāt nu hihsavo umumum yantani. Noqw uma as nuy hepyani; noqw ura nu Jew-sinmuy amumi hin lavayhtiqe pay nu hapi piw pan umumi lavayhtini: Nuy haqaminiqw soon uma paṅsoyani, ura nu kita. 34 Nu umumi pūhut tutaptani: Uma nānami unaṅwayʼyuṅwni; nu umumi hin unaṅwayʼtaqat pan piw uma nānami unaṅwayʼyuṅwni. 35 Umuy nānami unaṅwayʼyuṅqw pantaqat ahpiy sinom sohsoyam uma inumi nánatuwnayaqat nanaptani.
Jesus Predicts Peterʼs Denial (Mt 26.31-35; Mr 14.27-31; Lk 22.31-34)
36 Simon Peter put aw paṅqawu: Tutuyqawhqa, ya um haqamii? Jesus lavayhtiqe aw paṅqawu: Pay nuy haqaminiqw um kurs hin nāt inuṅkni; nīk̇aṅw pay ason um soon qa inuṅkni. 37 Peter put aw paṅqawu: Tutuyqawhqa, ya hinoqw nu soon pay puʼ uṅkni? Nu uṅem iqatsiy táviniqey suhtaqʼewa. 38 Jesus lavayhtiqe aw paṅqawu: Haw um inuṅem uhqatsiy táviniqey suhtaqʼewa? Pas antsaa, pas antsa nu ūmi paṅqawni: Pay ason pas um nuy qa tuwiʼtaqey pāyis paṅqawhq puʼ taqákowāko töqtini.