1 Peter
The Flock of God
5 Nu umuhpaʼ hakimuy wukwʼaʼyatuy uʼnanani, pay nu piw wukwʼayanik̇aṅwo, pu Christ okiwsaniwhq aw yórikiʼtaqa; pu ason pam mātaktiqw, nu nuhtum put amum k̇aptsiʼtiwni. 2 Uma God sinomuyatuy amumi tunatyawyuṅwni. Oviy uma qa tusoqtumalayʼyuṅwt, suʼqawk̇ahk̇aṅw amumi tunatyawyuṅwni. Uma qa sīvat ōviy tumalayʼyuṅwt, pas kwaṅwtoynayak̇ahk̇aṅw God eṅem tumalayʼyuṅwni. 3 Pam umuy put sinomuyatuy amumi tunatyawyuṅwniqat aw oyaqw, uma pumuy amumi qa tutuyqawyaqey qa pan hinyuṅwni. Uma qa panyuṅwt, pumuy hin hinwisniqat amumi hin nāmahtakniʼyuṅwni. 4 Noqw ason Christ sohsokmuy itamumi tunatyawtaqa mātakteʼ, pam hihta pas pavan nukṅwat, qa hinhtiṅwuqat ahsatit umumi nóani. 5 Piw uma aṅ tsātsayomu, uma umuhpe wūwukwmuy amumi maqaptsiʼyuṅwni. Uma sohsoyam nānami maqaptsiʼyuṅwni, okiwʼunaṅwayʼk̇ahk̇aṅwo. Taq God aṅ kwiviʼnaṅwayʼyuṅqamuy amumi rohomhtiṅwu; nīk̇aṅw pam haqam okiwʼunaṅwayʼyuṅqamuy núokway máqaṅwu. 6 Paniqw ōviy uma God öqalayat ehpewi nāqahihtatotani. Noqw hisat aw pituqw, pam soon qa umuy hihtatani. 7 Uma umuhtusiwuwniy sohsok God aw noiʼyuṅwni; pi pam umumi tunatyawma. 8 Uma namituyqawiʼyuṅweʼ, tunatyaltotini; taq umuhtuwhqa, Nukpana, wukotohot höykinumqat an hakiy hovalaniqe hepnuma. 9 Put aw uma rohomhtotimantani, umuhtuptsiwniy aṅ hūrs hoṅk̇ahk̇aṅwo, it navotiʼyuṅwee: Pay ahsupoq tūwaqatsit aṅ umún tuptsiwniʼyuṅqam piw umún hihta aṅ k̇ānanvotya. 10 Noqw uma hihsavo hihta aṅ k̇ānanvotyaqw, God umuy pās pasiwani; umuy öqaltoyneʼ, hūrs hoṅnani. Pi pam umuy ōkwatuwhqe, umuy wáṅwayi, uma aqwhaqami Christ Jesus amum k̇aptsiʼtiwyaniqat ōviyʼo. 11 Nam sinom aqwhaqami sutsep put pas hihtatotat, Moṅwílalwaa. Nam antaa.
Final Greetings
12 Nu pay tsāvat umumi pēna, Silvanus nuy paaṅwaqʼö. Nuyniqw pam itupkoy anta, piw sohsok hihta aṅ qa atsat hinma. Nu umuy öqawhtoynaniqey nāwaknaqe ōviy yan pēna, God núokwaat hímunihqat umuy suan āawnaniqee. Put akw uma hūrs hoṅni. 13 Aṅ tuptsiwniʼyuṅqam Babylon ep yesqam, umún God namoramat, umuy öqalantota, pu iti Mark pīwu. 14 Uma nānatupkomnihqey pan nānami unaṅwayʼk̇ahk̇aṅw naʼqalantotamantani. Nam God sohsokmuy Christ Jesus sinomuyatuy kwakwhat unaṅwat máqani. Nam antaa.