1 Timothy
Responsibilities toward Believers
5 Hak wūkw qa qöhqöyat, naynihqat pan aw pās yuaatamantani; pu pay aṅ qa wūwukwmuy uhtupkomnihqat panʼi, 2 Pu aṅ wūwukwmuy momoymuy úṅumnihqat panʼi, pu pay qa wūwukwmuy uhsiwamnihqat panʼi, qanānaphin wūwank̇aṅwo. 3 Pu um aṅ koṅnanalvutuy pas antsa nanalvutuy k̇aptsiʼtani. 4 Kurs haqawa koṅnalavu tímuyʼtaqw, sen mö́muyʼtaqw, pay puma tuwat put pāsyeʼ, kiy aw wikyeʼ, pep taviʼyuṅwmantani. Yan puma God unaṅwveyani. Pi pam aṅ tuptsiwniʼyuṅqamuy amumi put tuṅlayʼta. 5 Noqw iʼ hapi pas antsa nalqatqa God aw yank̇aṅw, mimhikqat, pu talöṅwiwmaqat aṅ yūmosa put aw okiwhtimaṅwu, pu nāwakinmaṅwu. 6 Nawus pi koṅnalavu kwaṅwáewhqatqa nāt as tayk̇aṅw pay soñawnen mokpuniṅwu. 7 Yan um pumuy amumi hiṅqawmaqw, puma qa hihta akw hinyuṅwni. 8 Kurs haqawa sinomuy hihta akw yesniqat amuṅem qa hintsak̇eʼ, tis pi ōviy pas amum kiʼyuṅqamuy amuṅem pam qa pantsak̇eʼ, pam hapi tuptsiwniy ayo yukiʼtani; nihqe qatuptsiwniʼtaqat epnihqe pas qa súantani. 9 Pu iʼ hak koṅnalavu payhp sunat yahsaṅwniʼtaqa pas sūs puwsuṅwtaqw, pay um púmuy-sa koṅnanalvutuy pan pohtoylaniʼtani. 10 Iʼ hak pan pohtoylaniwhqa hapi hihta lolmat hintsakqey akw aw navotiwtamantani, timuy suan wuṅwnaqa pīwu, hakimuy kiy ep pās ōoyhqee, pu God sinomuyatuy kukyamuy pāhomhqee, pu hihta akw okiwhinyuṅqamuy ep amumi unaṅwtapqee, pu hihta lomahintsatskiwhqat aṅ ahsupoq aṅ hinmaqee. 11 Nīk̇aṅw um aṅ momoyhoymuy koṅnanalvutuy pay qa nakwhani, taq puma Christ qa hihtatoteʼ, pahsat puwsuṅwtotaniqey unaṅwtotiṅwu; 12 Nen qaanhtotiṅwu, motivasiwniy ayo yukuyaṅwuniqee. 13 Puma pantoteʼ, qa hihta hintsatsk̇at, panis tuwat kīnawit yuṅtinumyaṅwu. Pu puma qa panis panyuṅwt, hīhihta yuaatotaṅwu; qa nāp hihta himuy aṅ susʼitsyaṅwu, pay as hihta qa yuaatotanik̇aṅw soq pantsatsk̇aṅwu. 14 Paniqw ōviy nuyniqw puma puwsuṅwtoteʼ tiyʼooyyani; nen kiy, pu timuy amumi tunatyawyuṅwni. Noqw sinom amumiq hiṅqaqwaqam pāpu qa hiṅqaqwani. 15 Taq haqawat pay Satan aw lasya. 16 Kurs haqawat tāqat sen wuhtit tuptsiwniʼtaqat ahpiyviat koṅnalvutiqw, pay pam put aw unaṅwtaviʼtani; noqw God aw tōnawtaqam qa pumuy amumi enaṅ tūkwaiwyuṅwni. Nen puma aṅ pas qa atsat nanalvutuy amumi unaṅwtaviʼyuṅwni. 17 Pu ima aṅ wukwʼaʼyat pas suan nuhtumi tunatyawyuṅqam pas pavan k̇aptsitiwyani, tis ōviy God lavayiyat yuaatotaqamu, pu tūtutuqaynayaqamu. 18 Pi ura tutuvenit aṅ yan peyʼta: Um wākasit söhövosit muritaqat motsóvuat qa sommantani, kita; pu piw yanwata: Pay tumalayʼtaqa ahsatiy hihk̇ayʼtaṅwu, yanʼi. 19 Pu um wukwʼayat hihta qalománeveltoynayaqw, put qa kwúsumantani, ason pas lȫyöm sen pahyomhaqam put pas suyan navotiʼyuṅqey paṅqaqwaqw, puʼ um aw tuwantamantani. 20 Pu aṅ qaanhintsatsk̇aqamuy sinmuy sohsokmuy amutpip uʼnanamantani; noqw ahpiy sinom tsātsawnamantani. 21 Nu hapi God, pu Itahtutuyqawhqay Jesus Christ, pu pas namorstiwyaqamuy hoṅviaʼyatuy amutpik ūmi pas paṅqawni: Um hapi qa hakiy sūkw-sa pas hihtayʼk̇aṅw, yan hinmani, qa sūkw-sa eṅem tunatyawk̇aṅwo. 22 Pay um qa pas hakiy God tumalayat aw suhpanamantani, sen um qa pas aw hin suyan navotiʼtee. Taq k̇a pam qaanhinmaqw, sinom uṅ aṅvaiwtaqat wūwayani. Um nāmi tunatyawteʼ, suan hinmani. 23 Pay um pāpu qa kūyit-sa hīhikwt, pay hisaq wine hikwmantani, uhponoy qa kwaṅwáhintaṅwuniqw ōviyʼo; pi um piép hinhtiṅwu. 24 Haqawatuy qaantsakpiam yep qatsit ep susmataqtiqw God amuṅem qalolmat yúkuniqw, pam pay navotiwta. Noqw pay haqawatuy qaanhintsakpiam tupkiwyuṅwa; nik̇aṅw ason hin yukiltiniqat aw pituqw pep puʼ sohsoy mātaqtini. 25 Pu pay ōviy piw pan haqawatuy lomahintsakpiam aṅwu pay mātaqya, pu ahpiy pay qa mātaqyaqa soon qa nāto mātaqtini.