2 Corinthians

1 Nuʼ Paul, God tunatyayat ahpiy Jesus Christ ayaatnihqa it penta, itahtupkoy Timothyt ámuma. Itam Corinth epeq God aw tōnawtaqamuy öqalanta, pu sohsokmuy God sinomuyatuy aṅ ahsupoq Achaia-tutskwat ep yesqamuy pīwu. 2 Nam núokwa, pu kwakwha unaṅwa God Itanay aṅqw umumi pitsíwiwtaa, pu Jesus Christ Itahtutuyqawhqay aṅqʼö.

Paul Gives Thanks to God

3 Nu God, Itahtutuyqawhqay Jesus Christ Náyatnihqat aw hahlayhtima. Kwakwhat pi pam Itananihqe itamuy ōkwatuwa, pu itamumi unaṅwtaviʼma. 4 Itamuy hīhihta aṅ k̇ānanvotq, ahsupoq put aṅ pam itamumi unaṅwtaviʼma; noqw ōviy itam piw tuwat hakimuy hīhihta aṅ k̇ānanvotyaqamuy amumi unaṅwtapyaniqey tuwiʼyuṅwa, God itamumi hin unaṅwtapqat panʼi. 5 Pi kurs itam Christ amum hīhihta aṅ k̇ānanvotq, puʼ pas pavan pam itamumi soon qa unaṅwtaviʼtani. 6 Pu kurs itam haqam hihta aṅ k̇ānavoteʼ, pay hapi umuy suyan unaṅwtotiniqat, pu ayo nö́ṅakniqat ōviy itam put aṅ kuyvaṅwu. Noqw ason God itamumi unaṅwtaviqw, itam umumi unaṅwtapniqey tuwiʼvaniqat ōviy panta; noqw itam umumi unaṅwtapq, uma itamun k̇ānanapteʼ qa naṅʼeknayeʼ, aṅ kūkuyvani. 7 Itam qanánatsopk̇aṅw God aw yanta, it navotiʼtaqee: Kurs uma itamun hihta aṅ k̇ānanaptaqw, God umumi unaṅwtapni, itamumi hin unaṅwtapqey panʼi. 8 Pi itam Asiat ep hin k̇ānavotqat uma navotiʼyuṅwniqat itam nāwakna, itahtupkomu. Pas pi itam as soon aṅ kuytani, itahʼöqalay yupqöyva putuhtiqʼö. Noqw ōviy itam okiw itahqatsiy aṅ nánahtsopti. 9 Panta, nihqe ōviy itam qa qátuniqey paṅso pitu, itam nāp itahʼöqalay qa aw yantat, God aw yantaniqe ōviyʼo, it hakiy soʼpumuy ahoy tātaynaṅwuqat awʼi. 10 Pam hapi mokiwuy aṅqw itamuy ayo távihqe, nāt itamuy ayo tahtaptima; nihqe pay nāt soon pam itamuy ayo qa táviniqat itam aw tuptsiwniʼta. 11 Okiw as uma God itamuy nāt ayo táviniqat ōviy itamuṅem nāwakinwisni, aṅ k̇aysiwhqamuy amumuma; noqw ason pam panhtiqw, pep puʼ uma pumuy amumum put ep God aw hahlayhtiwisni.

The Change in Paulʼs Plans

12 Itam it ep hahlayhti, itahtupkomu. Itam súaṅqawniqey itahʼunaṅwpeq navotiʼta. Itam qa atsáyʼmak̇aṅw, suan hinma, qa nāp itahwuwniy aṅʼa, panis God núokwayat-sa aṅʼa. Pan itam hinma sinmuy amuhpaa, pu umuhpaʼ pīwu. 13 Pay nu umuy hihta mātsiʼyuṅwniqat pan umumi pēna. Pay hisnen uma yūmosa put mātsiʼwisni. 14 Pay uma itamuy qa pas tuwiʼyuṅwa. Pay as uma itamuy suyan tuwiʼyuṅweʼ, Itahtutuyqawhqay Jesus pítuhqat ep uma itamuy hahlaytotini, itam umuy hin hahlayhtiqat panʼi. 15 Noqw it yantaqat nu qapēvewnaqe as ōviy pay mohti umumiqniqey pan unaṅwti, pu umuhpiy Macedoniat awnit, Macedoniat aṅqw umumi piw áhoyniqeyu; nen nu lȫs umuy paaṅwani. Noqw nu umuṅaqw Judeat aqwniqw uma nuy paaṅwayani. 16 See 1:15 17 Nu umumiqniqey qa paysoq nanawini. Nu yep qatsit ep haqawatuy qa amún lȫq lavayiʼta-Kurs antsaa, itʼa, pu piw Qae, itwata. 18 God pas qa átsanihqa inumi navotiʼtaqw, nu súaṅqawu. Nu qa lȫq layayiʼta. 19 Ura Sylvanus, pu Timotheus, pu nūu, itam umuy it Jesus Christ God Tiyat āawnaya. Noqw pam hapi pas antsaa. Pam pas qa hihta ep wiṅwhinta. 20 Pi God sinmuy hihta āawnaqw, Christ hapi amumi put antsanṅwu. Noqw paniqw hapi ōviy itam put tuṅwniyat aw yank̇ahk̇aṅw, Nam antani, kitotaṅwu, God tayawintiwniqat ōviyʼo. 21 God hapi itamuy, pu umuy Christ aw sinotaqe itamuy asna; 22 Piw itahʼunaṅwpeq Qahováriwtaqat Hikwsit akw tuvoylata. Yan pam hin itamuy āawnaqey pan itamuṅem yúkuniqey itamumi mahtakna. 23 God inumi navotiʼtaqw nu umumi súaṅqawni: Nu hapi umuy óokwatuwhqe ōviy pay hāk Corinth qa aqwʼa. 24 Nu umuhtuptsiwniy ep umumi tuyqawiʼtaqey qa paṅqawu; pi uma tuptsiwnit ep hōñi; nīk̇aṅw okiw as umuy hahlayhtotiniqat ōviy itam umumum tumalayʼta.