Romans
Life in Godʼs Service
12 Oviyʼo itupkomu, nu umumi okiwhiṅqawni: Uma God núokwayat uʼniʼk̇ahk̇aṅw homʼoyvihk̇at an soñawnen nāoʼyeʼ, umuhtokoy taytaqat God aw noayani. Yan uma put eṅem sūpwaiwyuṅweʼ, put unaṅwveyani. Yan hapi uma umuhʼunaṅwpeq put eṅem tumalayʼyuṅwni. 2 Piw uma yep qatsit tunatyayat qa aṅ hinwist puhutunatyayʼk̇ahk̇aṅw alöṅöt qatsit himuyʼyuṅqey pan hinwisni. Nen uma God tunatyaat hímunihqat navotiʼyuṅwni. Put tunatyaat lolma, súanta, piw pasiwta. 3 Pi nu God núokwayat makiwhqe sohsokmuy umumi paṅqawni: Pay qa hak pas hímunihqey namiwuwantamantani; nīk̇aṅw hak hin God aṅqw öqalat makiwhqey pan nāmi pās wūwamantani. 4 Pi hakiy tokoat qötöyʼk̇aṅw, mayʼk̇aṅw, piw kuhkuyʼtaṅwu; noqw qötöat nāp tumalayʼta; pu maat nāp tumalayʼta, pu kukʼat piw nāp tumalayʼta. 5 Pan hapi itam as k̇aysiwhk̇ahk̇aṅw Christ tokoyat anyuṅwa, piw nāvaaṅwantota. 6 God hapi núokway ahpiy itamuy nanāp öqalhuyta. Noqw ōviy itam nanāp put akw moṅwvasyani. Hak God eṅem yuaataniqey tuwiʼteʼ hin qapēvewnaqey pan yuaatani. 7 Hak sinmuy paaṅwaniqey tuwiʼteʼ put hintsakmantani; hak sinmuy tutuqaynaniqey tuwiʼteʼ tūtutuqaynamantani. 8 Pu tūökwhantaniqey tuwiʼteʼ tūökwhantani; pu hihta kuwaiwtaniqa piw suʼqawk̇aṅw pantsakni; pu nuhtumi moṅwʼiwtaqa piw tunatyawk̇aṅw moṅwʼiwtani; pu hihta ep hakiy ōkwatuwhqa piw hahlayk̇aṅw panhtimantani. 9 Pu uma qa suovaam nānami unaṅwayʼyuṅwni; uma hihta qalolmat aw qa suhtaqʼewyani; uma lolmat aw hūrs tsöpölöwyuṅwni. 10 Uma nāvāsyani; nānatupkomuy pan nānami unaṅwayʼyuṅwni; hak ayo sukwat tsok̇anamantani; nit qa nāp nātsotsk̇anani. 11 Qaȫönak̇ahk̇aṅw hihta hintsatsk̇ani; suʼqawk̇ahk̇aṅw Tutuyqawhqat eṅem tumalayʼyuṅwni. 12 Uma Christ amum k̇aptsiʼtiwyaniqey aw tunatyawk̇ahk̇aṅw hahlayyani; k̇ānanvotyaqey aṅ nakwhaniʼyuṅwni; yūmosa uma nāwakinwisni. 13 God sinomat hihta haqniʼyuṅqw pumuy uma aṅ paaṅwayamantani. Hak kiy ep sinmuy pās ōoymantani. 14 Umuy okiwsahsanyaqamuy uma amuṅem lolmat tūviṅtotamantani. Uma nuhtumi pās kwakwhat yuaatotamantani, nen amumiq qa hiṅqaqwamantani. 15 Uma hihta ep hahlayhtotiqamuy amumum hahlayhtotimantani; tsaykitaqamuy amumum piw tsaykitamantani. 16 Uma sunʼunaṅwat hinwisni; qa kwiviʼnaṅwayʼyuṅwt aṅ ókiwyaqamuy amumi unaṅwtaviʼyuṅwni. Uma pas pavan wuwniʼyuṅqey qa pan umuhkwiviʼnaṅway hinyuṅwni. 17 Hakiy umuhpewi qalomáhinhtiqw qa aw ahoy nāooyyamantani. Sohsokmuy sinmuy amutpik uma suan hinwisni. 18 Kurs pay hin pasiwtaniqw uma aṅ hin kuyyuṅweʼ pan sohsokmuy sinmuy amumum pās yesni. 19 Aw iunaṅwamu, uma hihta ep qa nāooyyamantani, pay uma God itsivuyat qenitoynayamantani; pi pan peyʼta: Ason nu hapi hakiy eṅem nāoyni, ason nu hihta ep hakiy aw ahoytamantani, kita Tutuyqawhqa. 20 Paniqw ōviy kurs uhtuwqa tsöṅmokiwtaqw um nopnani, pānaqmokiwtaqw um hikwnani; pan pam hamanhtini. Um panhteʼ soñawnen put qötömi tȫvut páṅalani. 21 Uma hihta qalolmat akw qa áṅwutiwyat, lolmat akw uma qalolmat áṅwuyʼyuṅwmantani.