Philippians

1 Nuʼ Paul, Timotheus amum it penta. Itam Jesus Christ tūwikimatu. Noqw itam sohsokmuy Christ Jesus sinomuyatuy Philippi ep yesqamuy öqalanta, pumuy amumi tunatyawyuṅqamuy-nik̇aṅw pu imuy ókiwyaqamuy tumalayʼyuṅqamuy énaṅʼa. 2 Nam núokwa, pu kwakwa unaṅwa Itanay God aṅqw umumi pitsíwtaa, pu Jesus Christ Itahtutuyqawhqay aṅqʼö.

Paulʼs Prayer for His Readers

3 Nu aṅsakis umuy uʼneʼ God Inay aw hahlayhtiṅwu. 4 Ahsupoq inawakinpiy aṅ nu sohsokmuy umuṅem nāwakinma, hahlayhtimak̇aṅwo. 5 Kwakwhat pi uma mohtihaqaqw pew inumi unaṅwtaviʼyuṅwa, nuy lomatuawit yuaataqat aṅʼa. 6 Noqw it nu navotiʼtaqw, God umuhpe lolmat tumaltivaqe, pas kurs hin Jesus Christ talöṅniyat aw qa pitsíwtaqat umuhpe pās aṅ antsaniʼmani, 7 Pay kurs pi nu hin qa yan sohsokmuy umumi wūwantaniqee, pi nu umumi pas unaṅwayʼta. Pi uma God aṅqw umumi kuwahtiput ahpiy nuy akw paaṅwaya, nu sivikive pakiwk̇aṅw, lomatuawit eṅem rohommaqʼö, pu piw nu qa sivikive pakiwk̇aṅw lomatuawit nuhtumi yuaatinumqʼö. 8 Pi God pas nāp inumi navotiʼtaqw, Jesus Christ nuy pan unaṅwtoynaqw, nu umuminiqey pas kwaṅwtoya. 9 Okiw as uma nānami unaṅwayʼk̇ahk̇aṅw öqawiʼwiseʼ, itahtuptsiwniy aṅ nānaṅumo hihta pūhut tuwiʼvayeʼ, suyhtsepṅwat suan wuwnit aṅ öqawiʼwisniqat nu umuṅem nāwakinma. 10 Noqw pep puʼ uma hihta nukṅwat māmatsyani. Uma yan qa atsáyʼk̇ahk̇aṅw, Christ hisat pítuniqat aw pahsavo suan hinwisni, qa hakiy unaṅwmokniʼk̇ahk̇aṅwo. 11 Uma Jesus Christ öqalayat akw suan hintsakpit aṅ qaöwíhinwisniqat nu pan umuṅem nāwakna. Noqw God put ahpiy pas k̇aptsiʼtiweʼ, tayawintiwni.

To Live is Christ

12 Noqw nu umuy it nāvotnani, itupkomu: Nu k̇ānavotpit aṅ kuyvaqw, lomatuawi put ahpiy pas pavan öqalani. 13 Noqw ōviy moṅwit kīyat ep tuwalanʼaʼyat-nik̇aṅw pu ahpiy pētu inumi navotiʼyuṅwa, nu Christ aṅqw lomatuawtit yuaataqey ep sivikive pakiwtaqata. 14 Piw k̇aysiwhqam Tutuyqawhqat aw tuptsiwniʼyuṅqam nuy sivilawhqat ahpiy aʼnö unaṅwtotiqe qa tuhtusyak̇aṅw, qa hakiy mamqasyak̇ahk̇aṅw, lavayit yuaatota. 15 Haqawat pi pas ōviy qa tsutsúyaqe, pu nanaqasʼunaṅway ahpiy yuaatota, noqw pu haqawat pay pas lolmat tunatyawk̇ahk̇aṅwo. 16 Ima pētu Christ nanaqasyuaatota, pay qa pas antsayʼk̇ahk̇aṅwo, hin pas pavan nu k̇ānavotniqat tunatyawk̇ahk̇aṅwo. 17 Noqw pu mímawat Christ aw unaṅwayʼyuṅqe, ōviy lavayit yuaatota, it navotiʼyuṅqee, nu lomatuawit eṅem rohomnumniqey aw taviwtaqata. 18 Noqw hintani? Pay pi nāp hinwata, sen haqawat paysoq hintsatsk̇a, sen haqawat-sa pas qa atsáyʼk̇ahk̇aṅw Christ yuaatinumya. Noqw nu put ep hahlayhti; nihqe soon nu nāt qa hahlayni. 19 Pi nu navotiʼtaqe put pantaqat ahpiy nu sivikiṅaqw ayo yámakni, umuhnawakinpiy ahpiyʼo, Jesus Christ Hikwsiat inumi unaṅwtapqʼö. 20 Pi nu yan tunatyawk̇aṅw hinma, nu qa haqam Christ ep hamanhtiniqeyu. Nu put eṅem qananahtsopk̇aṅw yuaataniqey aṅ suhtaqʼewniqey nāwakna, piw yūmosa put pas hihtataniqeyu, sen nu nāt qátee, sen nu mōk̇ee. 21 Pi nu qátunik Christ eṅem qátuni; nīk̇aṅw nu mokq, pam inuṅem pas pavan nukṅwani. 22 Noqw ōviy kurs nu hihsavo qateʼ, nu pas pāpu Christ eṅem tumalayʼtani. Nīk̇aṅw nu hihta namorstaniqey qa navotiʼta. 23 Nu lȫk wuwniʼta. Nu as yaṅqw ahpiynen Christ ámumniqey nāwakna; pam inuṅem pas pavan nukṅwa. 24 Nīk̇aṅw pay nu as hāk yepnen, hihta aṅ umumi unaṅwtaviʼmaniqw, pam pantaqa umuṅem lomahintani. 25 Nihqe ōviy nu God aw tuptsiwniʼtaqe, nu hāk qeʼnen sohsokmuy umumum hinnumni, umuy öqawhtotaniqat ōviyʼo; piw uma umuhtuptsiwniy ep pas pāpu hahlayyaniqata. 26 Noqw nu kurs nāt qa mōk̇eʼ umumi ahoy pituqw, uma put ep Christ aw hahlayhtotini. 27 Noqw Christ aṅqw lomatuawit aw tuptsiwniʼyuṅqam hin hinwisqat pan uma hinwisni. Uma sun tunatyawk̇ahk̇aṅw, sun wuwniʼk̇ahk̇aṅw lomatuawit ep tuptsiwnit eṅem rohomhtiwisni. Noqw pep puʼ sen nu umumumnik̇aṅw umuhlomaqatsiy tuwayʼtani, pu qa umumumnik̇aṅw umuy hin hinwisqat soon qa navotni. 28 Uma umuhtuwqamuy qa mamqasyani. Pay pam pantaqa pas suyan pumuy hihta qalomáhintaqat aqw ökiwiwtaqat tuawiʼta, pu uma God ahpiy ayo nö́ṅakiwtaqata. 29 Pi uma hapi Christ aw tūtuptsiwaniqey qa put-sa aw wáṅwayniwyat, piw put eṅem hihta aṅ k̇ānanvotyaniqey aw wáṅwayniwya. 30 Pi itam sohsoyam lomatuawit eṅem sun rohomhtiwisa. Uma navotiʼyuṅqw nu pay put ep hīhihta aṅ k̇ānavota, pu nāto nu k̇ānavotiʼmani.