2 Peter

False Teachers

2 Nīk̇aṅw pay ura Israel-sinmuy amuhpaʼ hakim God lavayʼaymatnihqey atsáyʼyuṅqam hoṅva. Noqw pan piw hakim umuhpaʼ hoṅveʼ hihta átsatnihqat hakiy hovalaṅwuqat sinmuy tutuqaynayani; nīk̇aṅw sohsok hihta nanauyve hintsatsk̇ani. Híkispi puma Tutuyqawhqat pumuy túihqat ayo yuykuyani. Nīk̇aṅw nāp nāhovalayaniqey aw suyʼkini. 2 Puma qaunáṅwtalqatsit aṅ hinwisq, k̇aysiwhqam pumuy amumi nanawinyani. Noqw pumuy amutsviy Jesus pöhuat pas antsanihqa qalomáyuaatiwni. 3 Puma sīvat tuṅlayʼyuṅqey ōviy kwaṅwálvayiy akw umuy ūnatoynayani, umutsviy k̇āhaktotiniqe ōviyʼo. Noqw pay hisatṅahaqaqw pumuy qalomáyukuniwyaniqat pan amuṅem yukiwta; noqw pumuy qö́yantaniqa pumuy pas pay wihkini. 4 Pi ura God hoṅviaʼyatuy qaanhtotiqamuy qa ayo nö́ṅaknat, pumuy maskimiq maspaqe, hisat pam hin yúkuniqey aw pahsavo pumuy somhtaqe, tupqat qatālat epeq pumuy taṅayʼta. 5 Pu piw ura pam hisatsinmuy qa ayo nö́ṅaknat, put qa k̇aptsiʼyuṅqamuy pātsikiwuy akw kīqöta. Nīk̇aṅw pam it hakiy Noaht, sinmuy as suan hinwisniqat yuaataqat ayo tavi, pu tsáṅeʼnihqamuy sinomuyatuy pīwu. 6 Pu ura pam Sodom-nik̇aṅw pu Gomorrhat wuhkokitsokit qöhtsaptaqe kīqöta. Pan pumuy hintsanhqe, hakim ahpiy put qa k̇aptsiʼyuṅqamuy amuṅem hin hintaniqat amumi put akw mātakta. 7 Nīk̇aṅw pam it suan qátuhqat Lot nukpansinmuy tusk̇apqatsiyamuy ep amumi puhtsemokiwtaqat ayo tavi. 8 Pi pam tāqa súantaqa pumuy amumum qátuhqe, pumuy qaanhintsakpiyamuy aṅ tayk̇aṅw, pu nanvotqe put akw nāqavo nāunaṅwmokinta. 9 Noqw ōviy Tutuyqawhqa suyan pi put k̇aptsiʼtaqat k̇ānavotpit aṅqw hin ayo táviniqey tuwiʼta, pu qaanhinwisqamuy oyiʼtaniqeyu, hisat hin amuṅem yukeʼ pumuy sivintoynaniqey aw pahsavoo. 10 Nihqe tis pi ōviy pam aṅ hakimuy nāp tuyoyʼewakw tuṅlayiy aṅ hinwisqamuy pan hintsanni, pu aṅ momṅwituy qa hihtayʼyuṅqamuy pīwu. Puma pi kwīkwivitu; nāp tunatyay hinwisniqey anyuṅwa. Puma ōṅaqw hihtuy k̇aptsitiwyaqamuy amumiq qalomáhiṅqaqwaniqey qatuhtusya. 11 Noqw hikispi God hoṅviaymat pumuy amuhpenihqe pavan pas öʼqalt-nik̇aṅw, pu hóhoṅvit, Tutuyqawhqat atpip pumuy amumiq qa nānap hin hiṅqaqwak̇aṅw hihta aqw tsotsk̇anaya. 12 Noqw ima sinom hihtuy popkotuy hihta aw qa wūwayaṅwuqamuy amunk̇ahk̇aṅw, hin unaṅwtoteʼ pan yukuyaṅwu; ṅuiwyeʼ, nīniwyaniqey ōviy aniwhtoti. Noqw puma hihta as qa mātsiʼk̇ahk̇aṅw qalomáhiṅqaqwaṅwu; nihqe nāp qaanhinwisqey ep súlawhtini, 13 Nen qaanhintsakpiy aṅqw ahsatit ömahtotani. Tālöʼ puma qaunáṅwtalqatsit ep hahlayya. Ima hihta itséheet panyuṅwa, himu hihta akw qa pasiwtaqat pank̇ahk̇aṅwo; qaantunatyay ep himuiwk̇ahk̇aṅw haqam umumum nophomikiwtaṅwu; 14 Novöwuy-sa taynumya; piw soon pōsiam qaanhtiput qeʼtini. Puma tuptsiwnit aṅ qa öʼqaltuy ūnatotoynaya. Puma hihta tuṅlayiy himuyʼvayaniqey tuwiʼyuṅwa. Oviy puma God itsívuyat akw soʼniqw pan amuṅem yukiwta. 15 Ima hakim pöhut súantaqat aṅqw lasyat nāp súhaqamiyaqe, hakiy Bosor tiyat Balaam kukyat aṅqeʼ hinwisa. Ura pam hihta qaantsatskiwhqat aṅqw hihta himuyʼvaniqey unaṅwti. 16 Noqw ura himu pohko put qaantunatyayat ep put mēwa. Mōro qayuáataqa tāqat tönayat akw God lavayʼayayat qaunáṅwtalqat mēwa. 17 Ima hapi nöṅanvatñit aṅqw pāhut súlawhtiqat anyuṅwa, wisioomawht huhukwhoyaqat anʼi. Noqw pumuy amuṅem God pas haqam qatālat naʼsasta. 18 Puma hihta anʼewakw kwiviyuaatotaqe, tuptsiwnit aṅ qa öʼqaltuy tusk̇apqatsit akw ūnatotoynaya, hakimuy qaanhinwisqamuy amuṅaqw híhin ayo nö́ṅakqamuyu. 19 Puma as pumuy qenivo ōoyyaniqey paṅqaqwat, nāp hihta tuyoyʼewakw hintsatskiwhqat aw tūwikʼiwyuṅwa. Pi hak hihta akw áṅwutiweʼ, pay put aw tūwikʼiwtaṅwu. 20 Ispi kurs pay as hak Jesus Christ Itahtutuyqawhqay, ayo Tūooyhqat tuwiʼveʼ, yep qatsit ep hihta qalomáhintsatskiwhqat aṅqw mātaviweʼ, pay piw put ap ahoy kwiseʼ áṅwutiwhq, pay pep puʼ soʼṅwamiq qatsíat pas qalomáhintaṅwu, mohtiwat qatsíyat epnihqee. 21 Pay tatam pi as puma hin suan hinwisniqat qa nanaptani. Ispi puma as suan tutavot nanaptat, kwusuyat, aṅqw ahoy lasyaqw pam pas qalomáhinta. 22 Noqw pay pi it yan lavayit puma súanhtoti: Pohko nāyöiy aw ahoy pitu; piw pitsōtit as pāhomyaqw, pay piw tsöqakuyit aqw waööykuniqey aqw ahoy paki.