1 Thessalonians

Be Ready for the Lordʼs Coming

5 Nīk̇aṅw hísatniqat, pu haqeʼ qalawmaniqat uma pay navotiʼyuṅwa, itupkomu. Noqw ōviy kurs nu hin hihta umuy piw āawnani, pēnee. 2 Pi uma pay navotiʼyuṅqw, hak qa pan tunatyawtaqw, pep hapi puʼ Tutuyqawhqat talöṅniyat aw suptuni, uyiṅwu mihikq ūuytoqat panʼi. 3 Pi sinom paṅqaqwani: Pay kwakwhat yēsiwa, qa haqam hinta, kitotani. Nīk̇aṅw suhpahsat pay súlawhtotini, wuhti tihtaʼniqa tūyay suptsinaṅwuqat panʼi. Nen puma soon ayo nö́ṅakni. 4 Noqw uma pi qatālat aṅ qa hinnumyaqw, ōviy soon pam talöṅni uyiṅwut an umumi suptuni, itupkomu. 5 Pi uma sohsoyam tālat ep sinoiwta. Itam qa tōkilat ep sinoiwta, piw qa qömawnit epʼe. 6 Oviy itam aṅ tokqamuy qa amún tokni. Itam havivok̇aliwk̇ahk̇aṅw yesni. 7 Pi tokqam mihikq tokṅwu; pu honaqkuyit akw hōnaqʼiwyuṅqam mihikq hōnaqʼiwyuṅṅwu. 8 Itam qa pan hinnumyat, tālat ep sinoiwtaqey pan yesni; qapēvewnit, pu namiʼnaṅwat akw itahtawitsqay tupkiʼyuṅwni; pu ayo nö́ṅakniqey tunatyawyuṅqey qa naṅʼekniʼyuṅwni. Pam tunatya itamuṅem sivavitanaqtsit anta. 9 Pi God itamuy qa itsívut aw ökinaniqe ōviy itamuy namorsta, pi itam Itahtutuyqawhqay Jesus Christ ahpiy ayo nö́ṅakniqat ōviyʼo, 10 Itamuṅem mokqat ahpiyʼo. Noqw ōviy sen itam tayyuṅwni, sen toknik̇aṅw, itam sutsep put amum yesni. 11 Noqw ōviy uma nānami unaṅwtaviʼyuṅwni; naʼqalantotani; pay uma hinwisqey panyuṅwni.

Final Instructions and Greetings

12 Pu úmaa, itahtupkomu, uma hakimuy umuhpaʼ tumalayʼyuṅqam Tutuyqawhqat ep umumi moṅwʼiwyuṅqe, umuy uʼnantoynayaqamuy k̇aptsiʼyuṅwni. 13 Pu uma pumuy amumi unaṅwayʼk̇ahk̇aṅw, tumalayamuy ep pas pavan hihtayʼyuṅwni. Uma qa nānami hinyuṅwni. 14 Noqw itam umumi paṅqaqwani, itahtupkomu: Uma aṅ nanaönhtuy uʼnantoynayani; aṅ unaṅwmokiwyuṅqamuy amumi unaṅwtaviʼyuṅwni; aṅ qaöʼqaltuy öqalayani; sohsokmuy sinmuy amumi wuhkomaqaptsiʼyuṅwni. 15 Uma tunatyaltotiqw, qa hak haqam hihta qalolmat ep tuwat hakiy qalomáhintsanni. Pay uma sutsep hihta lolmat aṅ hinwisni, nānahpaa, pu sinmuy sohsokmuy amuhpaa. 16 Uma sutsep hahlayyani. 17 Yūmosa nāwakinwisni. 18 Sohsok hihta aṅ kwakwhatiwisni, pi pan God umuṅem tunatyawta, Christ Jesus aṅʼa. 19 Uma Qahováriwtaqat Hikwsit ūwiwuy antaqat qa tōk̇ayani. 20 Hak Qahováriwtaqat Hikwsit ahpiy yuaataqw, uma qa aw yeʼtuqayyuṅwni. 21 Uma sohsok hihta aw tuwantiwisni; hihta lolmat hūrs ṅuyʼyuṅwni; 22 Pu hīhihta qalolmaʼeʼwakwnihqat qeʼyani. 23 Noqw nam God hakiy kwakwhat unaṅwtoynaṅwuqa pas nāp umuy nēṅem-sa sutsvo óyahtani. Noqw nam umuhhikwsi, pu umuhʼunaṅwa, pu umuhtoko qa hihta akw hink̇ahk̇aṅw qa hihta ep tukopniwyuṅwni, hisat Tutuyqawhqa Jesus Christ pituniqʼö. 24 Noqw God umuy wáṅwayhqa pan umuṅem yúkuni. Pi pam soon qa lavayiy aw antsanni. 25 Itahtupkomu, uma itamuṅem nāwakinwisni. 26 Uma nānatupkomnihqey pan sohsokmuy tuptsiwniʼyuṅqamuy öqalantotani. 27 Nu hapi Tutuyqawhqat aw yank̇aṅw umumi paṅqawni: Uma it tutuvenit pas sohsokmuy God sinomuyatuy amumi aṅ túṅwantotani. 28 Nam Itahtutuyqawhqay Jesus Christ núokwaat umumum yantaa. Nam antaa.