1 Peter
Wives and Husbands
3 Pu úmaa, momoyamu, pay uma piw pan nāp umuhpuwsuṅwmuy amumi maqaptsiʼk̇ahk̇aṅw yesni. Noqw kurs haqawat God lavayiyat aw qa tuqayvahsiʼ yēseʼ, puma umuy pās yesk̇ahk̇anw pumuy k̇aptsiʼyuṅqat aw tayyuṅweʼ, 2 God lavayiyat aw tūtuptsiwani, nāmahin as puma qa hisat put aw tūqayk̇ahk̇aṅwo. 3 Uma qa suovaamnihqat lomayuyahiwtani, umuhhömiy aw hīhin yuykuyaniqeyu, pu sik̇avalasivat yuwsiʼyuṅwniqeyu, pu lomayuwsita. 4 Uma qa panyuṅwt, umuhʼnaṅway qamātaqpuvenihqat nasitoynayani. Uma okiwʼunaṅwayʼk̇ahk̇aṅw kwakwhat yesni. Pam pantaqat God-niqw hihta aʼnö hihk̇ayʼtaqat pas qa hinhtiṅwuqat anta. 5 Pi yan hapi hisat ima momoyam qahovárstunatyat hinwisqam God aw yanyuṅqam nāyuyuwsinaya, puwsuṅwmuy amumi maqaptsiʼk̇ahk̇aṅwo. 6 Oviy pi ura Sara Abraham aw tūqaytaqe put moṅwílawu. Noqw uma hapi súan hinwiseʼ put timatni, nen soon hihta ep tusiiwyuṅwni. 7 Pu úmaa, aṅ tahtaqtu, uma pahsiʼkwa pumuy amumum yesni, pumuy k̇aptsiʼk̇ahk̇aṅwo; pi puma qa umún öʼqaltu. Noqw umuhnawakinpi qa haqami hihta akw sóonhtotini. Pi uma pumuy amumum qatsit, God kuwahtipuyat, makiwayʼyuṅwa.
Suffering for Righteousnessʼ Sake
8 Taa, noqw ōviy uma sun tunatyawk̇ahk̇aṅw, tūokwatuwiʼyuṅwni. Uma nānatupkomnihqey pan nānami unaṅwayʼyuṅwni. Uma nunʼokwatni; nāvāsyani. 9 Ason uma qalomáhintsaniwyeʼ, sen nāphinsasviwyeʼ, qa túwatyamantani. Uma qa panyuṅwt umuhpewʼiwyuṅqamuy amuṅem lolmat tunatyaltotimantani. Pi God umuṅem lolmat tunatyaltiqe ōviy umuy wáṅwayi. 10 Pi yantaqʼö: Qatsit nāvok̇awink̇aṅw, lomatalöṅnit aṅ taymaniqey nāwaknaqa hihta qalolmat aw leñiy ṅuyʼtani; noqw himu atsa soon moaṅaqw nȫṅantani. 11 Hihta qalolmat qa hintsakt, lolmat hintsakni. Pam uyiwawqatsit tunatyawk̇aṅw, put aqwhaqam ṅö́yiʼmani. 12 Pi Tutuyqawhqa aṅ suan hinwisqamuy amumi tayma, piw pumuy nāwakinpiyamuy aw tūqaytaṅwu. Nīk̇aṅw pam aṅ qaanhinwisqamuy amumi qa kwaṅwátayta. 13 Noqw puyaw uma hihta lolmat aṅ öʼqalyaqw, hak umuy hintsanni? 14 Noqw kurs uma suan hinwiseʼ, put ep hihta aṅ k̇ānanvotyeʼ, uma hapi hahlayhpit epyani. Oviy uma pumuy qa mamqasyani; piw uma qa hin unaṅwayʼyuṅwni. 15 Uma qa panyuṅwt umuʼnaṅwpeq God Tutuyqawhqalalweʼ, k̇aptsiʼyuṅwni. Pu ason hak umuy hinoqw umuhʼunaṅwpeq God aw unaṅwvahsiʼyuṅqat umuy tūviṅtaqw, uma put aw hin lavayhtotiniqey sutsep pās pasiwyuṅwni. Nīk̇aṅw uma pahsiʼkwa tūk̇aptsiʼk̇ahk̇aṅw, yuaatotamantani, 16 Suyan unaṅwayʼk̇ahk̇aṅwo. Noqw umuy qaanhinwisqat paṅqaqwaqam hamanhtotini, umuy Christ eṅem lomahinwisqat qalománeveltoynayaqey epʼe. 17 Ispi kurs God pan tunatyawtaniqw pay pi uma tatam hihta lolmat hintsatsk̇aqey ep okiwsaniwyani, nen hihta qalomáhintsatsk̇aqey qa put epyani. 18 Pi pay ura Christ súantaqanik̇aṅw aṅ qa súanhinwisqamuy qaanhtipuyamuy ep sūs k̇ānavota, itamuy God aw ökinaniqe ōviyʼo. Ura put tokoat mokiwuy aṅ kuyvaqw, God put hikwsiyat taytoyna. 19 Noqw pam pank̇aṅw hīhikwsimuy sivikive taṅawtaqamuy amumi lomatuawit yuaata. 20 Ura puma hisat qa tuqayvastota, Noaht qatsiyat epʼe, ephaqam ura God sinmuy amumi wuhko maqaptsiʼtaqʼö, nāto Noah pākihut yuykuqʼö. Noqw ura híkiyom, pay nánalnihqam, put aṅqw taṅawtaqe pātsikqat aṅ kūkuyva. 21 Noqw puʼ hapi itam pumuy amún ayo nö́ṅakiwta, kūyit akw tuvoylatotiqee, Jesus Christ mokiwuy aṅqw ahoy tātayhqat ahpiyʼo. Hak tokoy pāhomhtaqat nu qa put paṅqawht, hakiy unaṅway kwaṅwʼewakwtat, God atpip suan hinmaqat hapi nu paṅqawu. 22 Ura Jesus Christ ōveqatsit aw pákihqe, God putvaqe qatuptu. Noqw God hoṅviaymat, pu hihta aṅ moṅwʼiwyuṅqam, pu öqalat pasiwyuṅqam, puma sohsoyam put aw maqaptsiʼyuṅwa.