2 Corinthians

Paul and the False Apostles

11 Is as uma inumi hihsavo tūqayyuṅwni, noqw nu tuwat anʼeʼwakw nāyuaatani. Hal owi, uma inumi tūqayyuṅwni. 2 Nu God aṅqw pan unaṅwtiqe umuy k̇ahk̇awnaqe, umuy qahováriwyuṅniqat nāwakna. Hak tāqa tiy mānat qahovalniwtaqat sūkw tiyot aw nóahqat pan nu umuy Christ aw noa. 3 Nīk̇aṅw nu tusiiwta, taq k̇a uma Christ qaatsayʼk̇ahk̇aṅw aw unaṅwayʼyuṅwniqey qeʼtotini, hak umuy ūnatoynaqʼö, ura tsūa unatwiy akw Eve hin ūnatoynaqat panʼi. 4 Uma itamuṅaqw lomatuawit hímunihqat pay kwusuya. Noqw ōviy kurs piw hak piteʼ, alöṅöt tutuqayhpit umumi mātapq, sen piw sukw ayo tūooyhqat itam qa yuaatotaqat umumi yuaataqw, sen sukw hikwsit uma qa kwusuyaqat umumi kwusivaqw, uma k̇a put aw súunaṅwtapyani. 5 Ima ayaiwyuṅqamnihqey pan nātsok̇aniʼyuṅqam pas puma pāsyaqey yuaatota; noqw nu pay nāpnihqe qa pumuy amuṅk pitsíwta. 6 Yaw uma nuy qa lavayhtuwiʼtaqat paṅqaqwa. Ka pi nu panta. Nīk̇aṅw nu navotit pasiwta. Oviy pi itam hihta umuhpaʼ tumaltotaqey akw itahnavotiy aṅ ahsupoq tunvotnaya. 7 Ura nu umumi pítuhqe lomatuawit umumi yuaataqe umuṅaqw qa hihta tūkwata. Nu umuy hihtataniqe ōviy nāqahihtata. Ya nu it ep umuhpewi qaanhti? 8 Nu umumum tumalayʼtaniqe ōviy ayeʼ God aw tōnawtaqamuy amumi tūkwayʼta, puma sīvay akw nuy paaṅwantotaqw ōviyʼo. 9 Nihqe ura nu umumum yank̇aṅw hihta haktaqe qa hakiy aw put ep tūkwayʼta; pi ima tuptsiwniʼyuṅqam Macedoniat aṅqw ö́kihqam nu hihta hakniʼtaqw put ep nuy paaṅwaya; noqw ōviy uma nuy qa maqsontota. Noqw pay nu k̇a sutsep panmani. 10 Christ iunaṅway ep qatuqw nu sutsep qaatsayʼk̇aṅw it yuaatani: Nu qa hakiy aw hihta ep tūkwayʼtat, sinmuy amumi lomatuawit yuaataniqey ep hahlayhtimani. Noqw soon hak nuy put ep sóontsanni. Nu Achaiat aṅ ahsupoq pan yuaatinumni. 11 Noqw ya nu hinoqw panhti? Sen nu pay umumi qa unaṅwayʼtaqe ōviyʼo? Asʼa. God inumi pas suyan navotiʼta. 12 Haqawat súitamun God eṅem tumalayʼyuṅqey paṅqaqwa. Noqw as pumuy aʼtsatnihqat mahtaktotiniqw ōviy nu God lavayiyat qa hihta ōviy yuaatinuma; pay piw nu nāto pan yuaatinumni. 13 Puma Christ eṅem ayaiwyuṅqamnihqey paṅqaqwa, nīk̇aṅw unatwit hintsatsk̇a, pi puma qa pas pas antsa God eṅem tumalayʼyuṅwa. 14 Noqw pay soon qae, pi Satan pas nāp tālat ep hoṅviayanihqey pan namtakniʼta. 15 Paniqw ōviy put eṅem hintsatsk̇aqam hihta suan hintsatsk̇aqey pan namtaknayaqw, pay uma qa aw k̇āwuwantotani. Noqw pay pumuy hin tumaltotaqw, God pan hapi pumuy amumi ahoytani.

Paulʼs Sufferings as an Apostle

16 Noqw nu piw paṅqawni: Qa hak hapi nuy pay núanhimunihqat pan inumi wūwantani, hal kurs pantanik pay nu núanhimunihqat pan inumi tuqayvastotani; noqw nu hihsavo kwiviyuaatani. 17 Nu puʼ pay sinot an lavayhtini, qa Tutuyqawhqat wuwniyat ahpiyʼo; nu hakiy núanhimunihqat an kwiviyuaatani. 18 Ima hakim Christ eṅem ayaiwyuṅqamnihqey yuaatotaqam yep qatsit ep hímuyaqey, piw hihta hintsatsk̇aqey ep kwiviyuaatota; noqw ōviy nu tuwat kwiviyuaatani. 19 Uma hakimuy aṅ núanhihtuy amumi suhtaqʼewyak̇ahk̇aṅw tūqayyuṅwa, sam pi uma pas nāp súanwuwniʼyuṅqee. 20 Ima nātsotsk̇anayaqam umuy núantuwiktota, umuy hihta kwahantota; umuy nukwáṅwhintsatsk̇a; pu nāhihtatota, umuhtayway wuvahtota. Puma umuy pan hintsatsnaqw uma aṅ kūyuṅwa. 21 Is uti! Puma aʼnö öʼqaltu, noqw nu okiw qaöqála; ispi nu umuy qa pan hintsahtsanhqe ōviyʼo. Nīk̇aṅw kurs puma hihta ep kwivilavayhtotiqw pay nu piw panhtini. (Nu pay hakiy núanhimunihqat an yuaata.) 22 Ya puma Hebrew sinom, Israel tímatu? Pay nu piw pamʼi. Ya puma Abraham natkomatu? Pay nu piw pamʼi. 23 Ya puma Christ eṅem tumalayʼyuṅwa? Piw nūu. Nu pas aʼnö tumalayʼta. (Nu núanhimunihqey pan lalvaya.) Sinom hihsakishaqam nuy wuvahtota; piép sivikimiq nuy panayaṅwu; pu nu qa sūs pēp mōki. 24 Tsivot-sikis ima Jew-sinom nuy sūkw akw qa lȫp sunát-sikis wuvahtota. 25 Sinom pāyis nuy murikhot akw wuvahtota; sūs nuy tatatupya; pāyis pātuwaqatsit ep pākihut itamuneṅ sakwíti; sūs nu tōkilnawit-nik̇aṅw pu tālöʼ pātuwaqatsit aʼnö hö́tsit aṅqeʼ pāyawnuma. 26 Nu wuhkonakwsu; pāvaqe nu unahinnuma, piw uuyiṅwtuy amuhpaa, nāp isinomuy amuhpaa, piw aṅqeʼ hīhihtuy sinmuy amuhpaa; nu wuhkokitsokit aṅ unahinnuma, pu qayēsiwhpuvaa, pu pātuwaqatsit aṅʼa; piw aṅ tuptsiwniʼyuṅqamuy atsáyʼk̇ahk̇aṅw paṅqaqwaqamuy amuhpaa. 27 Okiw nu maqsonteʼ maṅwúiwtaṅwu, qa sūs nu qa pūwi; pu nu tsöṅmokiwtaṅwu, pānaqawuy nu aṅ k̇ānanvotya; nu qa sūs napwala; tūsuṅwʼiwtaṅwu; nu ephaqam qa yuwsiʼtaṅwu. 28 Noqw nu īit sohsok aṅ kuyvaqe nawus nu nāqavo Jesus aw tōnawtaqamuy amumi tunatyawtani. Nihqe nu put akw putuiwta. 29 Kurs hak haqam qaöqáwiʼtaqw nu put amum qaöqáwiʼta. Kurs hak haqam tuptsiwnit aṅqw lasq, nu put ep pas unaṅwmokiwtaṅwu. 30 Nīk̇aṅw pay kurs nu hihta ep kwivihiṅqawlawnik, pay nu tatam qaöqálanihqey pan namtakniʼtani. 31 God Jesus Christ Itahtutuyqawhqay Naat inumi navotiʼtaqw nu súaṅqawu. (Okiw nam pam yūmosa tayawintiwaa!) 32 Ura nu Damascus-kitsókit epniqw, pep tutskwat ep moṅwi Aretas yan mātsiwhqa nuy ṅuaniqey nāwakna; nihqe ōviy pam pan tutaptaqw pep kikmoṅwi Damascus-sinmuy kitsókiyamuy ep tukwʼuhtsit ep aw hötsíwat ep solāwamuy tūwalayaniqat ōviy oya. 33 Noqw nu tutsáysivut aṅqw pakiwtaqw, hakim ikwátsim tuhpelvaʼ nuy hawnayaqw nu moṅwit māyat aṅqw ayo yama.