1 Corinthians

Rights and Duties of an Apostle

9 Ya pay nuʼ qa ayaiwtaqa? Ya nu qa qenive wunu? Ya nuʼ Jesus Christ Itahtutuyqawhqay qa aw yori? Puyaw qa uma Tutuyqawhqat ep itumaltipumu? 2 Kurs nu pay haqawatuyniqw qa ayaiwtaqanik pay úmuyniqw pi nu suyan panta. Pi Tutuyqawhqat ahpiy uma hapi nuy pas antsa ayaiwtaqat mahtakniʼyuṅwa. 3 Hakimuy inumi tuwantotaqw nu amumi yan lavayhtiṅwu. 4 Ya itam nösniqey pu hikwniqey qa makiwayʼta? 5 Ya itam haqawat tuptsiwniʼtaqat nȫmayʼteʼ, put wiknumniqey qa makiwayʼta aṅ pētuy ayaiwyuṅqamuy amunʼi, pu Tutuyqawhqat tupkomuyatuy-nik̇aṅw pu Cephas pumuy amunʼi? 6 Hal pay sen nuʼ-niqw pu Barnabas, ya ítam-sa pay qa tumalayʼtanik pam itamumi uhtsiwta? 7 Ya hak hisat haqami tuwvöhtaqa nāp hihta himuy aw tūkwayʼta? Ya hak ōvat uyht, aniwnit qa aṅqw tūmoyta? Ya hak pokmuy tumalayʼk̇aṅw pīhuyamuy qa aṅqw hīhikö? 8 Ya nu pay sinot an lavayhti? Hal ya Moses tutavoyat aṅ piw qa pan lalvaya? 9 Oviypi Moses tutavoyat aṅ yan peyʼta: Um wākasit söhövosit muritaqat motsóvuyat qa sommantani. Ya God pas pay wākasit-sa tunatyawk̇aṅw ōviy paṅqawu? 10 Hal sen pi pam itamuy tunatyawk̇aṅw paṅqawu? Pay kurs pi hin qa itamuṅem iʼ yan pēniwa. Noqw ōviy uylawhqa okiw hihta túwaniqey tunatyawk̇aṅw uylawṅwu; piw muritaqa okiw aniwnit aṅqw hihta himuyʼvaniqey tunatyawk̇aṅw muritaṅwu. 11 Itam soñawnen hihta it Hikwsit ahpiynihqat umuy huyta. Noqw kurs itam yep qatsit ep umuhhimuy ömahteʼ, ya itam pas qaanhtini? 12 Noqw kurs uma haqawatuy umuhhimuy aṅqw maqayeʼ, tis pi ōviy uma soon itamuṅem qa piw panhtotini. Pay as pi panta; noqw pay itam it yantaqat qa akw moṅwvasi. Itam hīhihta aṅ nakwhaniʼta, taq nāp hisat k̇a itam lomatuawit Christ yuaataqat aw sóontsanni. 13 Imuy Jew-sinmuy amuṅaqw hihta pas k̇aptsiwyuṅqat tumalayʼyuṅqam God kīyat ep hihta oyiwhqat akw yēse. Ya uma put qa navotiʼyuṅwa? Pu ima homʼoyvihk̇at ep hintsatsk̇aqam hihta God aw noiwhqat akw yēse. 14 Noqw Tutuyqawhqa hapi pay piw pan yuku: Ima lomatuawit yuaatotaqam lomatuawit ahpiy hihta akw yesniqata. 15 Nīk̇aṅw pay nuʼwa it yantaqat qa akw moṅwvasi; pu piw nu qa pan umumi tuṅlayʼk̇aṅw paniqw it yan pēna. Pi nu qa hihta aw tūkwayʼk̇aṅw lomatuawit yuaataqey ep himuiwta. Noqw kurs hak put pisviwnaniqw pay pi nu tatam mokni. 16 Pay as pi nu lomatuawit yuaatak̇aṅw pay kurs nu hihta ep nātsotsk̇anani. Pay nu pas put aw tusoqʼayatiwa. Pay panta. Pas nu lomatuawit qa yuaataqw pam inuṅem pas is óhini. 17 Pi nu suhtaqʼewnik̇aṅw it hintsak̇eʼ hihta ahsatani. Pu kurs as pay nu qa suhtaqʼewnik̇aṅw put hintsak̇q, pas pi suyan iʼ tumala inumi noiwtaqʼö. 18 Noqw pep puʼ nu hihta ahsatani? Pay hapi nu Christ aṅqw lomatuawit aṅqw yuaateʼ, qa hakiy aw hihta tūkwayʼk̇aṅw pantsakni; nen nu lomatuawit yuaataqey ahpiy imakiway soon akw moṅwvasni. 19 Pay nāmahin pi as nu qa hakiy aw tūwikinik̇aṅw pay nu sohsokmuy amumi nānuantuwikiʼta, pas pay nu as okiw wūhaqnihqamuy Jesus aw tuyqawvaniqe ōviyʼo. 20 Nihqe nu Jew-sinmuy amumiwat Jew-sinoniwhti, pas pay nu Jew-sinmuy tuyqawvaniqe ōviyʼo. Pu tutavot aṅ hinwisqamuy nu amumiwat tutavot aṅ hinmaqey panhti, pas pay nu tutavot aṅ hinwisqamuy tuyqawvaniqe ōviyʼo. 21 Pu imuy tutavot qa aṅ hinwisqamuy nu amumiwat pay tutavot qa aṅ hinmaqey panhti, pas pay nu as okiw tutavot qa aṅ hinwisqamuy tuyqawvaniqe ōviyʼo. Pay as pi nu God tutavoyat qa hin qa aw tunatyawk̇aṅw, nu Christ tutavoyat aṅ hinma. 22 Pu nu aṅ qaöʼqaltuy amumiwat pay qaöqáwiʼtaqey panhti, pas pay nu as okiw qaöʼqaltuy tuyqawvaniqe ōviyʼo. Nu sohsokmuy amumi sohsoy hímuniwhti, pas pay nu as okiw nāp hintaqat akw haqawatuy tuyqawvaniqee. 23 Nu lomatuawit tunatyayat ōviy yanhaqam hinma, pas pay nu as okiw put hahlayhpiyat aṅ umumum hinmaniqee. 24 Ya sohsoyam nanamunwaqam yuhtukq pay sūk̇a hihta ahsataniqat uma put qa navotiʼyuṅwa? Pay uma yuhtuk̇eʼ uma hihta ahsatotaniqey ōviyyaṅwu. 25 Noqw sohsoyam nanamunlalwaqam pās nāmitunatyawwisṅwu, hóhoṅvitniqe ōviyʼo. Noqw puma pay wihk̇at súlawhtiṅwuqat ōviy panhtotiṅwu. Noqw itam pi hihta pas qa súlawhtiṅwuqat makiwyani. 26 Noqw nu pas suyan hihta ahsataniqey ōviy pan warikiwta. Nu qa tusoqnayawhqe, paniqw ōviy hapi nu qa nanāp haqeʼ savinuma. 27 Nu qa pan hintsakt itokoy wuvahtinumqe aw tuyqawiʼta, taq nāphisat as k̇a nu nuhtumi lomatuawit yuaatat, nu hihta ep öwihiniwhtiqw, God nuy ayo tūvani.