2 Peter
The Promise of the Lordʼs coming
3 It hapi akw nu puʼ lȫs umumi pēna, aw iunaṅwamu. Nihqe nu put akw umuy ahoy uʼnantoynaqe umuhwuwniy súantaqat pavan öqalaniqey unaṅwti, 2 Uma imuy pās unaṅway yesqamuy God lavayʼaymuyatuy pay hisat hin lavayhtotiqat uʼniʼyuṅwniqat ōviyʼo, pu Itahtutuyqawhqay, itamuy ayo Oyahqat tutavoyata, itam put ayamat umumi hin put mātapyaqat panʼi. 3 It yantaqat uma mohti navotiʼyuṅwni: Pay nāt soʼṅwamiq hakim tututsiwyaqam nāp tunatyay aṅ hinwisqam hoṅvani; 4 Nen paṅqaqwani: Yaw pam pítuniqey paṅqawu. Noqw pan lavayi hisat aw antsaniwni? Taq itahwuʼyamuy hisat soʼq, hisat sohsoy himu yukiltiqa pay nāto panyuṅwa, kitotani. 5 Noqw pay iʼ navoti susmataqʼa: Pay iʼ yaṅ tokpela God lavayiyat ahpiy hisat yukilti. Noqw tūwaqatsi pāṅaqw wunuwk̇aṅw pāhut aṅqw yukiwta. 6 Noqw pu pay ura iʼ tūwaqatsi ephaqam yukiltiqat put akw pātsikq súlawhti. Noqw puma put navotit qa aw tunatyawyuṅwa. 7 Noqw God it yaṅ tokpelat, pu tūwaqatsit, puʼnihqat lavayiy akw waraniʼta. Nīk̇aṅw ason pam imuy put qa k̇aptsiʼyuṅqamuy hinwat amuṅem yukut, hovalani. Nen pep puʼ iʼ yaṅ tūwaqatsi taqtiniqat pan put eṅem yuku. 8 Nīk̇aṅwo aw iunaṅwamu, it hapi uma qa suhtokyani: Sūs tāla Tutuyqawhqatniqw sōmorit yahsaṅwuy anta, pu sōmorit yahsaṅw sūkw tālat anta. 9 Pay Tutuyqawhqa lavayiy aw antsanniqey ep qa sȫwuniṅwu, nāmahin pi sinmuyniqw pam pantaṅwu. Pi pam itamumi wuhko maqaptsiʼta, hakiy súlawhtiniqat qa suhtaqʼewṅwunihqee. Nīk̇aṅw pas as sohsoyam nāp tunatyay aṅqw lasyaniqat pam nāwakna. 10 Nīk̇aṅw hapi Tutuyqawhqat talöṅniyat aw suptuni, uyiṅwu mihikq pítuṅwuqat panʼi. Noqw ep puʼ tokpela aʼnö umumutat, haqami tūwayani. Noqw puʼ aṅ himu hin yukiwyuṅqa qȫhit akw pātini. Noqw tūwaqatsi, pu aṅ himu hinyuṅqa taqtini. 11 Noqw suyan hapi sohsoy himu pātiniqat uma navotiʼk̇ahk̇aṅw, ya uma hin as hinwisni? Soon uma qa ahsupoq qatsit aṅ suan hinwiseʼ God eṅem-sa yesni, 12 Hisat God talöṅniyat aw pítuniqat maqaptsiʼk̇ahk̇aṅw, kwaṅwtotoynayak̇ahk̇aṅwo. Pi put talöṅniyat ep yaṅ tokpela taqteʼ, pātini; pu aṅ himu hin yukiwyuṅqa qaanʼewakw mukit akw súlawhtini. 13 Noqw pay as pi panta. Noqw itam pi pūhut tokpelat, pu pūhut tūwaqatsit itamuy āawnaqat ōviy maqaptsiʼyuṅwa; pep hapi himu súantaqa-sa pasiwtani. 14 Noqw uma hapi īit yantaqat ōviy maqaptsiʼyuṅwa, aw iunaṅwamu. Nihqe ōviy uma tunatyawyuṅqw, ason pam piteʼ umuy kwakwhaiwyuṅqat umuy túwani, qa haqam hihta akw itséheiwyuṅqʼö, kurs hak umuy hihta ep tukopnaniqʼö. 15 Itahtutuyqawhqa umuy ayo nö́ṅakniqat ōviy umumi maqaptsiʼtaqat uma pan wūwantotani. Pay ura aw itaʼnaṅwa Paul piw pan umumi pēna, suan wuwniy put aw noiwhqat ahpiyʼo. 16 Pay pi aṅsakis pēneʼ it yuaaykuṅwu. Noqw tutuveniyat aṅ pēhu māmatsniqw qatūvosi. Noqw ima aṅ qanavótiʼyuṅqam, qa hūrs hoṅqam put hīhin namtökintotaqe nukushintsahtsanya; nihqe nankiwakw panhtoti, pay ahpiy pēhut tutuvenit pantsatsk̇aqey panʼi. 17 Noqw ōviyʼo, aw iunaṅwamu, uma hapi aṅwu pay it navotiʼyuṅqe ōviy qanāunayʼyuṅwni; taq nāp hisat sen hakim qaanhinwisqam it pöhut pas antsanihqat aṅqw umuy lasnayaqw, uma hūrs hoṅqey mātatveʼ, aṅqw ruhpakyani. 18 Uma qa panhtotit, God aṅqw núokwat makiwyeʼ, put aṅ wuṅwyani, Itahtutuyqawhqay Jesus Christ itamuy ayo Oyahqat tuwiʼyuṅqey aṅ suyhtsepṅwat öqawiʼwisk̇ahk̇aṅwo. Nam pam k̇aptsitiwaa, pay pūu-nik̇aṅw pu yūmosa aqwhaqamii. Nam antaa.