Philippians
Christʼs Humility and Greatness
2 Ya uma Christ ahpiy hakiy öqalayaniqey tuwiʼvaya? Ya uma inumi unaṅwayʼyuṅwa? Ya uma inún Qahováriwtaqat Hikwsit makiwya? Ya uma nunʼokwatu? piw tūvāsya? 2 Kurs uma panyuṅweʼ, nuy pas hinhaqam hahlayhtapnayeʼ, sun wuwniʼyuṅwni, nānami unaṅwayʼyuṅwni, sun tunatyawyuṅwni. 3 Uma nanaqastunatyat, pu kwiviʼnaṅwat qeʼyani. Uma okiwʼunaṅwayʼyuṅwni. Hak ayam suhk̇a hakiy epnihqe pavan ṅasʼewnihqat pan aw wūwantamantani. 4 Qa hak nēṅem-sa hihta tunatyawtani; pay hak ayoʼ sukw eṅem piw hihta tunatyawtamantani. 5 Uma Christ Jesus an okiwʼunaṅwayʼyuṅwni. 6 Ura pam as pas God ank̇aṅw, put amum pas suntaqey qa k̇ahk̇awnat, 7 Qa nāhihtataqe, tūwikit an yukilti, pu sinot an tokoyʼva. 8 Pu sinot an tokoyʼvaqe, piw nāt nāqahihtata; nihqe pas hisat mokniqey aqw pahsavo Nay tunatyayat aṅ qa rohomma, nāmahin as nahoylehtsit ep mokniqeyu. 9 Paniqw hapi ōviy God put pas pavan ōmiq tsok̇a; nihqe put pas mohpeq tavi sohsokmuy sinmuy amuhpee. 10 Noqw ōviy sinom sohsoyam Jesus aw naokiwlalwani, ōveqatsit ep yesqamu, pu tūwaqatsit epyaqamu, pu maskiveyaqamu. 11 Nihqe sohsoyam pam Tutuyqawhqatnihqat tönay akw paṅqaqwani, put Nayat God pas hihtatotani.
Shining as Lights in the World
12 Noqw ōviyʼo, aw iunaṅwamu, uma yūmosa ilavayiy aṅ hinwisqamu, nu umuy it uʼnanani, qa umumumnīk̇aṅwo: Uma qaanhtiput aṅqw nö́ṅakqamuy amún lomatumalayʼyuṅweʼ, pas antsa ayo nö́ṅakqey nuhtumi mahtaknayani, tunatyawk̇ahk̇aṅw, God pas k̇aptsiʼk̇ahk̇aṅwo. 13 Pi God pas nāp umuhʼunaṅwpeq tumalayʼta. Pam hapi umuy put tunatyayat aṅ hinwisniqat pan umuy unaṅwtoynat, umuy pan hinwisniqat aw öqalmaqa. 14 Uma qa kolilitik̇ahk̇aṅw, qa nāṅwuyʼk̇ahk̇aṅw yesni. 15 Uma qa hihta ep tukopniwyeʼ, qa atsáyʼk̇ahk̇aṅw God tímatnik̇aṅw suan hinwisni. Nen uma yep nukpansinmuy qaunáṅwtalyesqamuy amunawit soñawnen talniʼyuṅwni. 16 Uma lavayit hakiy taytoynaṅwuqat sinmuy āawnayani. Noqw ason Christ pituqw nu hahlayhtini, kurs nu qa paysoq tumaltaqey navotee. 17 Uma pi umuhqapevewniy God aw noaya. Noqw kurs nu iqatsiy akw put aw antsanniqat God pan nāwaknaqw nu put ep tsúyak̇eʼ, umumum hahlayhtini. 18 Noqw paniqw ōviy uma piw inumum hahlayhtotini.
Timothy and Epaphroditus
19 Pay nu Tutuyqawhqat Jesus aw yank̇aṅw, soon pas hisat umumiq Timotheus távini, nen nu umuy hin hinyuṅqat navoteʼ, suyan unaṅwtini. 20 Pi inumumyaqamuy amuṅaqw qa haqawa put an umumi pas antsa tunatyawma. 21 Pi sohsoyam pas nenṅem-sa hihta tunatyawyuṅwa, nit Jesus Christ tumalayat qa aw tunatyawyuṅwa. 22 Noqw pay uma Timothy hin tumaltaqat navotiʼyuṅwa. Ura pam inumum lomatuawit yuaatinuma. Hakiy tiat nay amum hin tumaltaqat pan hapi pam inumum itumalay aṅ nuy paaṅwanta. 23 Noqw ōviy ason inuṅem hin yukiltiniqat nu navoteʼ pep puʼ nu umumiq put hōnani. 24 Nīk̇aṅw nu Tutuyqawhqat qapēvewnaqe, pas soon pas hísat umumiq pohtani. 25 Nu umumiq itupkoy Epaphroditus hōnaniqw pay pam nuyniqw súanta. Ura uma inumiq put ayatotaqw, nuy hihta hakniʼtaqw, pam inumi put ep unaṅwtavi. Itam nāma tumaltaqe, lomatuawit eṅem nāma rohomma. 26 Noqw pay pam umumi yórikniqey pas nāwakna, yaw uma put tūtuyhtiqat nanaptaqw put ep pam pas qahahlayhti, navotqee. 27 Pay pas antsa pam tūtuyhtiqe pēp mōki. Noqw God put ōkwatuwhqe, put qalaptsina. Yan pam nuy piw ōkwatuwa, pi as pam mokq, nu nānaṅumo k̇ānanvotpit akw māṅuyʼni. 28 Noqw ōviy nu umumiq put hōnaniqey pas kwaṅwtoyna, uma put aw yórikyeʼ, hahlayhtotiniqat ōviyʼo. Nen nu umuy hahlayyaqat navoteʼ, qa umuy akw soon unaṅwayʼtani. 29 Taay. Noqw ōviy uma Tutuyqawhqat aṅ hahlayk̇ahk̇aṅw, put pās taviyani, piw pan hinyuṅqamuy k̇aptsiʼyuṅwni. 30 Taq pam Christ tumalayat eṅem pēp mōki, qatsiy qa k̇ahk̇awnaqee. Pam umuhqeniy ep inumi unaṅwtavi, ispi uma yāvahaq yesqe, kurs hin inumi unaṅwtapyaniqʼö.