1 Timothy
False Teachers
4 Noqw Qahováriwtaqa Hikwsi hapi pas suyan paṅqawu, yaw haqami soʼṅwamiq haqawat tuptsiwnit aṅqw lasyaniqata. Nen hakimuy nukpanhihikwsimuy akw tuyqawiwk̇ahk̇aṅw, tūunatotoynayaqamuy amumi puma tuqayvastotani, pu qasuan tutuqayhpiyamuy awʼi. 2 Ima pan tūtutuqaynayaqam God aw tuptsiwniʼyuṅqey atsáyʼk̇ahk̇aṅw paṅqaqwani; nihqe soon puma qaanhtotiqey unaṅwpeq navotiʼyuṅwni. 3 Piw puma hak haqam nȫmataniqat, piw puwsuṅwtaniqat tūmewantotani, pu hihta nȫsiwhqat nōnovaniqata. Noqw pay God hapi nȫsiwhqat yuku. Noqw ima tuptsiwniʼyuṅqam, pu God tunatyayat pas antsanihqat navotiʼyuṅqam hahlayk̇ahk̇aṅw put ömalalwani. 4 Pi sohsoy himu God ahpiy yukiwtaqa hapi lolma; noqw ōviy soon himu ayo yukiwni, hak put tsúyakniniqʼö. 5 Pi pam God lavayiyat akw pas hímuniwhtiṅwu, pu nāwakinpit akwʼa.
A Good Servant of Christ Jesus
6 Pay um īit yantaqat tuptsiwniʼyuṅqamuy uʼnantoyneʼ, um Jesus Christ eṅem suan tumalayʼtani, itahtuptsiwniy ahpiy lavayit akw öqawiʼk̇aṅwo, pu suan tutuqayhpit aṅ hinmaqey akwʼa. 7 Nīk̇aṅw um aṅ anʼewakw tūtuwutsit, pu momoymuy lavaysaskwiyamuy qa aw unaṅwtaviʼtani. Lolmat qatsit aṅ um nāöʼqawnani. 8 Hak wáriktuwanlawhqa pay hihsavo put akw moṅwvastiṅwu. Noqw pay hak God pas k̇aptsiʼtaqa hapi put sutsep akw aʼnö moṅwvasṅwu, it qatsit epʼe, pu qatsit nātoniqat ep pīwu. 9 Iʼ lavayi pas antsaniqw, tatam sinom sohsoyam put kwusuyani. 10 Pi itam paniqw maqsonlalwak̇aṅw, itamumiq hīhiṅqaqwaqat ep nakwhaniʼyuṅwa, ispi itam God qátuhqat aw yanyuṅqe ōviyʼo. Pam hapi sohsokmuy sinmuy ayo ōoya, tis pi ōviy imuy tuptsiwniʼyuṅqamuyu. 11 Iit um nuhtumi tutaplawni, put tūtutuqaynani. 12 Qa hak hapi ūmi qa kwaṅwátaytani, um nāto tsākwnihqat epʼe. Noqw um hapi nahpe imuy tuptsiwniʼyuṅqamuy hin hinyuṅwniqat amumi namtakniʼtani. Um pās yuaatani; um pās hinmani; um nuhtumi unaṅwayʼtani; um pasiʼnaṅwayʼtani; um tuptsiwnit aṅ hinmani, pu kwaṅwʼewakw qatsit aṅʼa. 13 Um nuy hisat aw pítuniqat aw pahsavo nuhtuni tutuvenit aṅ túṅwantaniqey aw unaṅwtaviʼtani, pu tūökwhaniqeyu, pu tūtutuqaynaniqeyu. 14 Um hihta nahpe uhmakiway qa tatamiʼtani; pam hapi pantaqa ura wukwʼaʼyat ūmi matyawk̇ahk̇aṅw, hin hintaniqat lavayhtotiqat ahpiy ūmi noiwa. 15 Um īit aw wūwantamantani; um awsa yukiʼtani; noqw uṅ öqawiʼmaqw, pam sohsokmuy amumi mātaktini. 16 Um nāmi tunatyawtani, pu tutuqayhpit awʼi. Um yūmosa panmeʼ hapi ayo nātaviʼmani; pu ūmi tūqayyuṅqamuy piw ayo óyani.