Mark
Jesus Rejected at Nazareth (Mt 13.53-58; Lk 4.16-30)
6 Pu pam paṅqw ahpiynihqe, nāp tutskway aw pitu; noqw put aw nánatuwnayaqam put ámumya. 2 Pu nasuṅwintalöṅnit aw pituqw, pam tsotsvalkive sinmuy tutuqaynativa. Noqw k̇aysiwhqam put aw tūqayyuṅqe, put aw k̇ātayyuṅqe paṅqaqwa: Ya sen iʼ haqam īit hihta tuwiʼva? Pu ya sen iʼ súanwuwni put aw noiwtaqa hímuu? Is uti pam may akw qaanʼewakw k̇ātumalta! 3 Puyaw qa iʼ wunavutsit tumaltuwiʼtaqa, it Maryt tíata, imuy James, nit Joses, nit pu Judat, nit pu Simon, pumuy pāvaamu? Puyaw siwamat qa yep itamumya? Kitotaqe, put aw qaán unaṅwtoti. 4 Noqw Jesus pumuy amumi paṅqawu: Pay God lavayʼayaat soon qa k̇aptsitiwṅwu, hal pay nāp tutskway ep-saa, pu sinomuy amuhpaa, pu nāp kiy epʼe. 5 Noqw pay pam kurs hin pep aʼnö hihta tumaltaniqe, ōviy pay panis pam híkikwmuy tūtuyyaqamuy amumi may akw tóṅokqe qalaptsina. 6 Nihqe pam pumuy qatuptsiwniyamuy ep amumi k̇ātayta. Pu pam paṅ kitsókinawit sinmuy tutuqaynatinuma.
Jesus Sends out the Twelve Disciples (Mt 10.5-15; Lk 9.1-6)
7 Pu pam pakwt löq sihk̇ayʼtaqamuy wáṅwayhqe, pahsat pumuy lȫlöqmuy aṅqeʼ ayativa; nihqe tuyoyʼeʼwakw hīhikwsimuy amumi pumuy öqalat huyta. 8 Nihqe pay pumuy qa hihta hinwisniqat amumi paṅqawu. Pay panis natöṅpiʼwisni, qa tukpuyʼwisni, qa nitk̇ayʼwisni, qa sivamokiʼwisni. 9 Pu puma tōtsiʼwisni; pu qa löq napnayʼwisni. 10 Pu pam pumuy amumi paṅqawu: Umuṅaqw lȫyöm haqam kīmi pak̇eʼ, hisat pep kitsókit aṅqw ahpiyniqey pahsavo qátumantani. 11 Pu ason kurs haqawat umuy qa pās taviyat, umumi qa tūqayyuṅqw, uma paṅqw ahpiynen, umuhkukqölṅaqw qöat ayo tsatswimantani, pumuy amunkiwakw hihta sutuawiʼtani. Nu umumi pas antsa paṅqawni: Hisat hin yukiltiniqat aw pituqw, pep kitsókit ep sinmuy amuṅem pas is óhini. Puma Sodom-nik̇aṅw pu Gomorrhat ep sinmuy amuhpenihqe pas pavan amuṅem nuhtselʼewayhtini. 12 Noqw puma paṅqw ahpiyyaqe, sinmuy tunatyay aṅqw lasyaniqat amumi yuaatinumya. 13 Pu puma sinmuy amuṅaqw k̇aysiwhqamuy nukpanhihikwsimuy ipwanwisa, pu k̇aysiwhqamuy tūtuyyaqamuy wihkuyit akw lelwiyat, qalaptsintiwisa.
The Death of John the Baptist (Mt 14.1-12; Lk 9.7-9)
14 Noqw Jesus natṅwaniat ahsupoq nanaptiwhq, pep tutskwat ep Moṅwi, Herod yan mātsiwhqa, put navotqe paṅqawu: Iʼ hapi kūyit akw tūtuvoylalawhqa John. Pam mokiwuy aṅqw ahoy tātayhqe, ōviy pas pavan öqaltumalat hintsaki. 15 Noqw sinom pētu paṅqaqwa: Pam Elias, piw pētu paṅqaqwa: Pam God lavayʼayaata, imuy lavayʼaymuyatuy hisatṅahaqaqw yesqamuy amuni. 16 Noqw Herod put navotqe paṅqawu: Ura nu John qötötkuqw, iʼ pamʼi; kurs pam mokiwuy aṅqw ahoy tātayi. 17 Iʼ Herod pi ura tupkoy Philip nȫmayat hakiy Herodias amum qatuptuqw, John put aw paṅqawu: Um uhtupkoy nömanawhkiqw pam pas qa suanta. Noqw ōviy Herodias pas John ṅȫyiʼta. Noqw Herod put unaṅwve hinhtiniqe, John aw hakimuy hōnaqw, puma put ṅúayaqe, sivikimi panaya. Noqw Herodias as John nīnaniqey ank̇aṅw, Herod atsviy kurs hin panhtini. 18 See 6:17 19 See 6:17 20 Pi Herod John aw tunatyawmaqʼö. Pi John súanhinmak̇aṅw pās unaṅway qatu. Noqw Herod put aw navotiʼtaqe, put k̇aptsiʼta; nihqe put aw tūqaytaqe, nāmi soon unaṅwti. Nīkaṅw pam hahlayk̇aṅw put aw tūqaytaṅwu. 21 Noqw hisat nukwáṅwʼew Herod tihtiwhpuyat aw pituqw, pam nuhtumi moṅwʼiwyuṅqamuy nōviwhqat aw tūtsama, imuy pavan solāwamomṅwituyu, pu Galilee-tutskwat ep pavansinmuy pīwu. 22 Noqw Herodias tiat māna ep pákihqe, wunimaqw, Herod put aw nahyoṅwa, pu put amum yesqamu. Noqw Moṅwi mānat aw paṅqawu: Um hihta nāwakneʼ, put ōviy inumi tūviṅtaqw, nu uṅ put máqani, kita. 23 Nihqe pas pam put aw qaöwílvayhtiqe paṅqawu: Pay um pas nāp hihta ōviy inumi tūviṅtaqw, soon nu uṅ qa máqani, hikis pas imoṅwtunatyay nāsamiq yantaqata. 24 Noqw pam paṅqw ahpiynihqe, yuy aw paṅqawu: Ya nu hihta ōviy tūviṅtani? Noqw pam aw paṅqawu: Pay aw kūyit akw tūtuvoylalawhqat John qötöyat awu. 25 Noqw pahsat pay pam k̇aktayk̇aṅw, Moṅwit aw pákihqe, aw paṅqawu: Um kūyit akw tūtuvoylalawhqat John qötöyat inpit ep íniwtaqat pay puʼ nuy máqaniqat nu nāwakna. 26 Noqw pas as Moṅwi qahahlayhtik̇aṅw pay nuṅwu pi pas aw qaöwílvayhtiqe, pu imuy pep put amum yesqamuy tuwayʼtaqe, ōviy kurs hin nawus qa huʼwanani. 27 Nihqe pahsat pay hakiy nīnaṅwuqa put qötöyat kwistoniqat Moṅwi aw paṅqawu. Noqw pam ahpiynihqe, sivikive put qötöyat ayo túkuhqe, 28 Inpit ep íniwtaqat kwusivaqe mānat aw put tavi. Noqw māna yuy put maqa. 29 Noqw John aw nánatuwnayaqam put nanaptaqe, ep ö́kihqe, tokoyat haqami taviwisa.
Jesus Feeds the Five Thousand (Mt 14.13-21; Lk 9.10-17; Jn 6.1-14)
30 Noqw ima ayaiwyuṅqam Jesus aw natsvalayaqe, hihta hinhtotiqey, pu hihta tūtutuqaynayaqey sohsok put āawnaya. 31 Noqw pam pumuy amumi paṅqawu: Túmai, nuhtuṅaqw haqami qayēsiwhpumiya. Nen itam hihsavo pep nāsuṅwnayani. Pas pi sinom k̇aysiwhqam ökiwk̇ahk̇aṅw, ahpiy sasqayaqw, ōviy soon kurs hisat qenitiqw puma ṅasʼew nȫnösani. 32 Pu ōviy puma pay nanalt pākihut akw haqami qayēsiwhpumiya. 33 Noqw pumuy ahpiyyaqw, sinom k̇aysiwhqam amumi tāyuṅqe, Jesus tuwiʼyuṅqe, sohsokivaqw kitsókit aṅqw paṅso nāp yuhtukqe, amuhpeqtotaqe, aw tsovalti. 34 Noqw Jesus pākihut aṅqw yámakqe, sinmuy qaanʼewakw hintaqamuy túwahqe, pumuy ōkwatuwa, soñawnen pi puma kanelmuy amumi qa hak tunatyawtaqat panyuṅqw ōviyʼo. Nihqe pahsat pu pam pumuy hīhihta tutuqaynativa. 35 Noqw pay nuṅwu tapkiwmaqw, put aw nánatuwnayaqam put awyaqe aw paṅqaqwa: Pas hapi yep qayēsiwa; noqw hapi pay pas hísatniqti. 36 Um as sinmuy hōnaqw, puma aṅqeʼ tutskwava nankwusani, pu kitsókinawita; nen nenṅem hihta tunöstuiyani; taq puma qa hihta nitk̇ayʼyuṅwa. 37 Noqw pam lavayhtiqe amumi paṅqawu: Huvam nopnayaa. Noqw puma put aw paṅqaqwa: Ya itam haqami huhyawiseʼ, lȫp sunat sīvat akw pölavikit tuiyeʼ, pumuy nopnayani? 38 Noqw pam pumuy amumi paṅqawu: Ya uma hihsaʼhaqam pölavikiʼyuṅwa? Kurs aw pohtayaa. Noqw puma nanaptaqe paṅqaqwa: Tsivot pölavikita, pu lȫqmuy pākiwhtuyu. 39 Noqw puma sinmuy sakwátusaqat aṅ tōnawyuṅqamuy yesvanayaniqat pam amumi paṅqawu. 40 Noqw sinom nānanʼik tōnawk̇ahk̇aṅw yesva, hahqeʼ tsivót-sikip susnatya, pu hahqeʼ lȫp sunat pakwt sihk̇ayʼyuṅqamu. 41 Noqw pam tsivot pölavikit pākiwhtuy enaṅ ömahtat, ōmiq tayk̇aṅw, put ep hahlayhtit, pölavikit yóṅoyhtat, put aw nánatuwnayaqamuy amumi put oya. Noqw puma sinmuy amuhpaʼ oʼya. Pu pam lȫqmuy pākiwhtuy sohsokmuy aṅ huyta. 42 Noqw sinom sohsoyam nȫnösaqe ȫöya. 43 Noqw puma pölavikit akwsiṅput tsovalayaqe, pakwt löq sihk̇ayʼtaqat hoaput aqw opomnaya, pu pākiwhtuy akwsiṅput pīwu. 44 Noqw tahtaqt pölavikit aṅqw nȫnösaqam tsivot-sikip sōmorit pahsaʼhaqamo.
Jesus Walks on the Water (Mt 14.22-33; Lk 6.15-21)
45 Noqw nāt pam sinmuy aṅqeʼ hōnantaqw, put aw nánatuwnayaqam pay aṅwu pākihut aqw yuñeʼ, put ahsavo ayoqwat Bethsaidat aqwyaniqat pam pahsat pay pumuy tusoqhona. 46 Pu ōviy pam sinmuy aṅqeʼ hōnaqe, nāwaknaniqe tsomomiqʼa. 47 Noqw masiphiqw, pākihu wuhkovatuphat nāsavaqe hinma; noqw pam tutskwava nālaa. 48 Noqw pumuy amuhpewi hūhukq, ōviy puma aṅqeʼ kwetstiwisqe pas qa nātusiʼwisa. Noqw Jesus pumuy pantsakwisq amumi tātayhqe, tālawiwmaqw pāvaqe waymak̇aṅw, pumuy amumi pituto; nihqe as pay soon pumuy amuhpeq qa yūmosani. 49 Noqw puma put pāvaqe waymaqw tutwaqe, pay himu tualaṅwnihqat wūwayaqe, aʼnö hiṅqaqwa, 50 Ispi puma sohsoyam put tutwaqe tsātsawnaqee. Noqw pahsat pay pam pumuy amumi yuaaykuqe paṅqawu: Pay uma qa hin unaṅwayʼyuṅwni. Pay nūu. Uma qa tsawiniwyuṅwni. 51 Pu pam pumuy amumiq pākihut aqw wūvi; noqw hūk̇aṅw qeʼti. Noqw puma hīhin wūwank̇ahk̇aṅw k̇ātayyuṅwa, 52 Puma aʼnö unaṅwayʼk̇ahk̇aṅw pölavikit ep k̇ātumaltiwhqat qa mātsiʼyuṅqe ōviyʼo.
Jesus Heals the Sick in Gennesaret (Mt 14.34-36)
53 Noqw puma ayoqwat nö́ṅakqe, haqami tutskwat Gennesaret aw ö́kihqe, pāhut qalavoq hoyoyotota. 54 Noqw puma pākihut aṅqw nöṅakq, pahsat pay sinom Jesus māmatsya. 55 Nihqe tutskwat aṅ ahsupoq yuhtukqe, hakim tūtuyyaqamuy ahpat aṅ qatsyaqamuy put háqamnihqat nanaptaqe, paṅso pumuy tsamvanta. 56 Noqw pam haqami kitsókimi pituqw, sen pas wuhkokitsokit, sen tutskwave kitsókit aw pituqw, sinom ȫöputuy kīsonve oʼyaqw, pay ṅasʼew yuwsiyat qalawṅwayat aw tóṅokyaniqey put aw öʼqalya. Noqw hakim hihsaʼnihqam aw tóṅokyaqam qalaptuya.