Hebrews
Faith
11 Itam qapēvewnit akw hihta itahṅöyiy aw yórikyaniqey navotiʼyuṅwa, pu put ahpiy hihta qa mātakqat pas suyan māmatsya. 2 Pi hisatsinom qapēvewniy ahpiy lomayuaatiwya. 3 Itam qapēvewnayaqey aw tutwaqw kurs tūwaqatsi God lavayiyat akw yukilti; noqw ōviy himu yaṅ mātakyaqa pay hihta mātakyaqat qa put aṅqw yukilti. 4 Ura Abel qapēvewnaqe Cain epnihqe pavan nukṅwat God aw hihta tavi; nihqe put ahpiy pay kurs pam súantaqey panwat mātakti; God put kuwahtipuyat ömahtaqey akw put paṅqawu; noqw pay as Abel mokpu-nik̇aṅw nāt put tuawiʼta. 5 Ura Enoch qapēvewnaqe mokiwuy aṅqw qa yuku, nīk̇aṅw ōmiqatsit aw nahlakiwa. Nihqe pam qa nātuwiwa, God paṅsoq put nahlaknaqw ōviyʼo. Pi pam nāt qa nahlakniwht, pam aw lomanavotniwta, pam God unaṅwve hinmaqe ōviyʼo. 6 Noqw pay hak qa tuptsiweʼ kurs hin God unaṅwveni; pi God awnihqa pay pam pas suyan qátuhqe put hepnumyaqamuy kuwahtiput máqaṅwuqat kurs hin qa tuptsiwniʼtani. 7 God nāt hihta qeʼyaqat aṅwu pay Noaht āawnaqw, pam qapēvewnaqe put k̇aptsita; nihqe pākihut mask̇ataqe timuy ayo nö́ṅakna. Put hapi akw pam yep qatsit tunatyayat aṅ hinwisqamuy qalomáhinwisqat mahtakna; noqw pam súantaniqat God yan put lavayhti, hak God aw tuptsiwhqa hin súantaqat panʼi. 8 Ura God Abraham wáṅwayhqe, put haqam tutskwat ason makiwniqey aqwniqat aw tutapta. Noqw ōviy pam qapēvewnaqe God aw tuqayvastaqe nāp tutskway aṅqw nakwsu, haqaminihqey qa navotiʼk̇aṅwo. 9 Ura pam qapēvewnaqe haqam tutskwat aw awiniwtaqat qa ep sínonihqey pan hinnuma; ura pam mötsápkit aṅ kiʼtinuma. Noqw ura Isaac-niqw pu Jacob puma piw put an hinnuma; ura God pumuy tutskwat máqaniqey piw āawnaqʼö. 10 Abraham pi wuhkokitsokit huruwunuhqat God ahpiy yayhniwhqat piw yukiwhqat aw tayma. 11 Ura God Sarah Abraham nȫmayat tiʼvaniqat put aw paṅqawu. Noqw pam put hinhtiniqat qapēvewnaqe nöʼyiltiqe tsākw tavi, nāmahin pi as pam pāpu pas aṅ ruhpakiwk̇aṅwo. 12 Paniqw hapi ōviy iʼ hak pay mokput antaqat ahpiy tokpelat aṅhqe sōtuy amún qaanʼewakw hintaqam aniwhti, pu pātuwaqatsit qalavaqe tūwat soon hak pohtoylaniqat panʼi. 13 Ima sohsoyam qapēvewnayak̇ahk̇aṅw qatsiy kūkuyva, himu amumi awiniwtaqat qa ep ökitʼa, pay pánis-sa yāvoq put tutwaqee; nihqe pas suyan put pantaqat pās nātuptsiwnaya, nihqe ömahtota, pay puma qa pep tūwaqatsit ep sínomnik̇aṅw pay paṅqe hāk hinnumyaqey paṅqaqwa. 14 Pi pan lavayiʼyuṅqam súyan pi haqam kiy hepnumya. 15 Kurs pi hin as puma haqaqw nöṅakqey aqwhaqami tunatyawyuṅweʼ, qa hisat pay ahoy aqwyeʼ qenitutwani. 16 Noqw puma hapi haqam pas nukṅwat qatsit ōveqatsit aṅqwnihqat tunatyawyuṅwa. Paniqw hapi ōviy God pumuy Tutuyqawhqaamnihqey pan túṅwantiwniqey suhtaqʼewa, pam pumuy amuṅem wuhkokitsokit naʼsastaqe ōviyʼo. 17 God Abraham aw tuwantaqw, pam qapēvewnaqe Isaac God aw tavi, nihqe iʼ hak tiy put aw awinit pasiwtaqa pas sūkw tiy kuwahti. 18 Ura God put aw paṅqawu: Ason Isaac timat uhsinomni, yanʼi. 19 Pay kurs pi hin God put ahoy tātaynaniqey qa panhtiniqat pam wūwa nāmahinpi as mokni; noqw ōviy paṅqawniqw pay soñawnen pi pam paṅqw put kwusu. 20 Ura Isaac qapēvewnaqe timuy Jacob-nik̇aṅw pu Esaut pumuy nāt hihta hintaniqat ep pumuy öqala. 21 Jacob qapēvewnaqe ura mokiwuy aqw hayiṅwnaqe, Joseph tímuyatuy lȫqmuy öqala, nihqe natöṅpiy akw motoʼk̇aṅw God aw okiwlawu. 22 Joseph qapēvewnaqe qatsísoʼṅwamiq pítuhqe, Israel tímuyatuy haqamiyaniqat mahtsikna; nihqe ȫqayat hin hinhtotiniqat pās tutapta. 23 Moses tihtiwhq, naat-niqw pu yuat puma God qapēvewnaqe payhkomuy mūmuyawhtuy aṅ put tupkiʼta, yaw pam súhimuniqw ōviyʼo, puma moṅwit hin yukiyat qa mamqasqee. 24 Moses wuṅwqe qapēvewnaqe Pharaoht tiyat mānat tíatnihqey pan túṅwantiwniqey qa nāwakna. 25 Tatam pay God sinomuyatuy amumum hīhihta aṅ k̇ānanvotniqey namorsta, qaantaqat hahlayhpit ep hihsavo hahlayniqey epnihqee, 26 Christ tutukpanhqatsiat Egypt epeq hīhihta núnukṅwat epnihqe pas pávannihqat pan aw wūwaqee, pi pam pan put tunatyat ep hihta akw tayawinpit pas antsayʼtaqe ōviyʼo. 27 Pam qapēvewnaqe ōviy Egypt-tutskwat tatamhta, moṅwit itsívuyat qa mamqastʼa; pas pam hakiy qataymataqpuvanihqat tuwayʼtaqe pan hihta aṅ kuyta. 28 Pam qapēvewnaqe mañat uṅwáyat hötsíwat ōvaqe pu ánanʼik wiwtsi, piw mañat sikwit tuhpet nȫsa; noqw ōviy motitihtiwyaqamuy tōtimuy qö́yatoqa qa pumuy amumi mayʼtat, amutsva yūmosa ahpiyʼo. 29 Ura Israel-sinom qapēvewnayaqe Palavatuphat aṅqeʼ tutskwat lakput aṅ ayo nö́ṅa; noqw as Egypt aṅqw sinom put tuwantotat, paöysoa. 30 Israel-sinom qapēvewnayaqe tsaṅeʼsikis tālat aṅ Jericho-kitsókit qöqönyaqw, ép kīhut tuhkwaat sapumhti. 31 Noqw ura tokoy huhyaqa, Rahab, qapēvewnaqe qatuptsiwniʼyuṅqamuy amumum qa súlawhti, pi hakim kitsókimi nanauyve pohtamaqam put aw pituqw, pam pumuy amumi unaṅwtapqee. 32 Noqw ya sen nu nāto piw hiṅqawni? Pi nu haqawatuy tuawiʼtaniqw soon aṅ tuwaniy imuy amuptsiwtani: Gideon, pu Barak, pu Samson, pu Jephthah, pu David pīwu, pu Samuel, pu God lavayʼaymuyatuyu. 33 Ima qapēvewnit ahpiy haqeʼ momṅwituy sinomuyatuy áṅwutota; súan yēsiwniqat aniwnaya; hihta awiniwyuṅqat ep öki; pu wukotohohtuy moayamuy útatota; 34 Uwiṅwuy aʼnö mukiyat tōk̇aya; sipwuvahpit qalayat aṅqw ayo ipwaniwya; qa öqawiʼk̇ahk̇aṅw aʼnö hoṅvitoti; nānaywaqe aʼnö öqaltoti; tuwqamuy taqʼoyiyamuy tatslakna. 35 Momoyam timuy soʼqe ahoy tātayyaqw amumi yórikya. Pētu mātaviwyaniqey qa nānakwhaqe, hihta qaanʼewakw aṅ okiwsaniwya; puma hisat ahoy yesvaniwniqat epeq pavan nukṅwat qatsit aw-sa taywisqe ōviyʼo. 36 Pu pētu amumi qaanʼewakw tututsiwya, pu wuvahtinumya; hikis pas sómiwya, pu sivikiva taṅatiwya. 37 Puma tatatupniwya; siyarat akw nāhoy tutkitiwya; unaheviwya; sipwuvahpit akw qö́yantiwya; okiw kanelvuhk̇at, pu kapirsvuhk̇at yuwsiʼk̇ahk̇aṅw aṅqeʼ hinnumya; hihta ṅastayak̇ahk̇aṅwo; hihta akw okiwhinyuṅqe k̇ānanapta. 38 Yep qatsi pumuy qa hihk̇ayʼta, puma okiw haqeʼ qayēsiwhpuve hinnumya, tuhtukwivaa, pu tuhsövaa, pu tutskwat aṅ koroiwyuṅqat aṅʼa. 39 Ima sohsoyam qapēvewniy ahpiy lomanavotniwya; noqw pay God pumuy hihta āawnaqe pumuy nāt qa maqa. 40 Nīk̇aṅw itamuṅem hihta pavan nukṅwat pasiwnaqe, puma itamum sumiyank̇ahk̇aṅw pasiwnayaniqat pan yuku.