Ephesians

Living in the Light

5 Paniqw ōviy uma God aw nanawinyani, pas aw unaṅwamat tímatnihqey panʼi. 2 Pu uma nānami unaṅwayʼyuṅqey qa qeʼtotit, Christ itamumi hin unaṅwayʼtaqat pan uma nānami unaṅwayʼyuṅwni. Ura pam itamuṅem mokqe God aw nātavi. Noqw God put ep nahyoṅwa. Pi Christ qatsiy távihqe soñawnen God aw hihta kwaṅwáhovaktuqat noa. 3 Uma tokot sokoptiwisniqey, pu qahopqatsit aṅ hinwisniqey qeʼyani; pu hihta qa umuhhimuy uma qa tuṅlayʼyuṅwni. Uma īit yantaqat qa yuaatotani; pi pam pantaqa lavayi God sinomuyatuy qa súamuhpee. 4 Uma itséheelavayit, pu anʼeʼwakw lavayit, pu honaqlavayit ayo yukuyani; taq pam pantaqa qa súumuhpee. Uma qa pan yuaatotat, hihta aṅ God aw hahlayhtiwisni. 5 Pi uma it navotiʼyuṅwa: Iʼ hak tokot sokoplawhqa, pu tuyoyʼewakw tunatyayʼtaqa, pu k̇anʼewtunatyayʼtaqa, nāp yukiwhput aw nāwakinmaqat antaqa soon Christ moṅwtunatyayat ep qeniʼtani, God moṅwtunatyayat epʼe. 6 Put pantaqat ep hapi qatuqáyvastotaqamuy amumi God itsívuat pitsíwta. Noqw ōviy uma tunatyaltotini, taq k̇a hak haqam anʼewakw lavayit akw umuy ūnatoynani. 7 Oviy uma pan hinwisqamuy qa umuʼpuñalyani. 8 Náwuspi ura hisat as uma qaunáṅwtalqatsit aṅ hinwisa. Nīk̇aṅw puʼ hapi uma Tutuyqawhqat tālayat tayyuṅwa; ōviy uma tālat tayyuṅqey pan hinwisni. 9 Pi God Hikwsiat hakiy unaṅwayat aw tālawnaṅwu; nihqe pam hapi lomaqatsit, pu súanqatsit, pu hihta pas antsanihqat aw hakiy wikvaṅwu. 10 Noqw ōviy uma Tutuyqawhqat unaṅwveyaniqey tuwiʼvayani. 11 Pu uma it qatālat ahpiy hintsatskiwhqat qa hihta nukṅwayʼtaqat ep qa nuhtumyani. Uma qa panyuṅwt, pumuy tuhtualyani. 12 Taq puma qamātaqpuve hihta hintsatsk̇aqw, put yuaataniqw pam hamanʼewayʼo. 13 Pi tāla put sohsok mātaqtani; noqw pep puʼ pam hímuniqey mātaqtini. 14 Pi tāla hapi hihta hímunihqat mātaktaṅwu. Paniqw hapi ōviy tutuvenit aṅ yan peyʼta: Um puwhqa tātayii; nen um soʼpumuy amuṅaqw qatuptuqw Christ ūmi tālawnani. 15 Noqw ōviy hapi uma tunatyaltoteʼ pās umuhʼunaṅway yesni; uma ṅasta wuwniʼyuṅqey qa pan hinwist, pās wuwniʼyuṅqey panyuṅwni. 16 Uma qa paysoq yest, hihta apiiwyuṅwni, taq qalomátalöṅwintiwa. 17 Paniqw ōviy uma hihta aṅ pās wuwniʼyuṅweʼ, Tutuyqawhqat tunatyayat haqeʼ qatsqat mātsiʼyuṅwni. 18 Uma honaqkuyit akw qa hōnaqʼiwyuṅwni, taq put akw hak nāhovalaṅwu. Uma qa panyuṅwt Hikwsit akw ahsaliwyuṅwni. 19 Uma God lavayiyat nānami yuaatotani, pu tātawit God tawsomiʼtaqata, pu unaṅwvahsit tātawita. Uma umuhʼunaṅwpeq Tutuyqawhqat aw tātawlalweʼ, sosonkiwyani. 20 Uma yūmosa sohsok hihta aṅ God Itanay aw kwakwhatiwisni, Itahtutuyqawhqay Jesus Christ natṅwayiyat aṅʼa.

Wives and Husbands

21 Uma nānami maqaptsiʼyuṅwni, God k̇aptsiʼk̇ahk̇aṅwo. 22 Uma momoyamu, uma pas nāp umuhpuwsuṅwmuy amumi maqaptsiʼyuṅwni, pas Tutuyqawhqat aw hin maqaptsiʼyuṅqey panʼi. 23 Pi tāqa hapi nȫmay qötöata, pas Christ put aw tōnawtaqamuy qötöamnihqat panʼi; pu pam hapi sinomuy put tokoyat anyuṅqamuy ayo oya. 24 Noqw Christ aw tōnawtaqam put aw maqaptsiy yesq, pan ima momoyam aṅ pas nāp puwsuṅwmuy amumi sohsok hihta aṅ maqaptsiʼyuṅwni. 25 Pu uma tahtaqtu, uma umuhnömamuy amumi unaṅwayʼyuṅwni, pas Christ put aw tōnawtaqamuy amumi hin unaṅwayʼtaqat panʼi. 26 Ura pam amuṅem nātapqe, pumuy nēṅem sutsvo óyahqe, lavayiy kūyit antaqat akw pumuy pāhoma. 27 Pam sinomuy qa hihta akw hinyuṅqat pas hihtunihqat nāmi ökinaniqey nāwakna, pas qa hihta akw tuyoyʼewakʼíwtaqata, qa tsokviiwyuṅqata, pas qa hihta akw hovalniwyuṅqata. 28 Noqw pan hapi as tahtaqt nȫmamuy amumi unaṅwayʼyuṅwni, nāp tokoy aw hin pas unaṅwayʼyuṅqey panʼi. Pas nȫmay aw unaṅwayʼtaqa hapi nāp nāmi unaṅwayʼtaṅwu. 29 Qa hisat pi hak haqam nāp tokoy aw qa suhtaqʼewa; pam put nōnopnaṅwu, pu aw unaṅwtaviʼtaṅwu, hin Tutuyqawhqa put aw tōnawtaqamuy amumi unaṅwtaviʼtaqat panʼi. 30 Itam pi put öqayat pu tokoyat anyuṅwa. 31 Ura yan peyʼta: Yaniqw hapi ōviy tāqa nay, pu yuy pumuy mātapt nȫmay aw hūrstimantani; noqw puma lȫyöm sūk̇a tókoniwhtimantani. 32 Iʼ hapi himu pas pavan tupkiwtaṅwuqa; noqw nu Christ-nik̇aṅw pu put aw tōnawtaqamuy hapi lavayhti. 33 Noqw pan hapi hak nȫmay aw unaṅwayʼtamantani, pas nāmi hin unaṅwayʼtaqey panʼi; noqw pu wuhti kōñay k̇aptsiʼtani.