Luke

Jesus Heals a Sick Man

14 Pu hisat nasuṅwintalöṅnit ep Jesus Pharisee-sinmuy amuṅaqw hakiy pas mohpeqnihqat kīyat ep tūmoyta. Noqw puma put aw pās tunatyawyuṅwa. 2 Noqw meh, hak tāqa pāmoktuyat tūtuyhqa Jesus apyeve qatu. 3 Noqw Jesus lavayhtiqe tutavot aw tuvotiʼyuṅqamuy-nik̇aṅw pu Pharisee-sinmuy amumi paṅqawu: Ya pay hak nasuṅwintalöṅnit ep hakiy qalaptsinaniqw pam súanta? 4 Noqw puma qa hiṅqaqwa. Noqw Jesus put ṅuahqe, qalaptsinat, mātavi; 5 Nit pumuy amumi paṅqawu: Kurs uma haqawa moropkoyʼtani, sen wakasvokoyʼtani. Noqw kurs pokʼat nasuṅwintalöṅnit ep hötsit aqw posni. Ya sen put pohkoyʼtaqa qa āpiy pay paṅqw pu hóroknani, nāmahin pi nasuṅwintalöṅniniqʼö. 6 Noqw puma kurs hiṅqaqwani.

Hospitality and Humility

7 Pu pam tūtsamiwyaqamuy amumi tātayhq, kurs puma núnukṅwat qenit namorstotaqw, pam amumi tutaptaqe, amumi paṅqawu: 8 Ason hak nāṅuiwhqat ep nōviwhqat ep uṅ tūtsamq, um qa pas susnukṅwat qenit ep qátuptuni, taq nāp hisat pi sen uṅ tūtsamqa uhpenihqe hakiy pas pavan sinot tūtsamht, 9 Uminen ūmi paṅqawni: It qenitoynaa, kítani. Noqw pahsat pu um hamanhtini, susqalaveq qatuptuniqee. 10 Um qa panhtiqw, ason hak uṅ tūtsamq, um susqalaveq qatuptumantani. Noqw uṅ tūtsamqa piteʼ, ūmi paṅqawni: Ikwatsi, um pavan ayo nukṅwat aw hóyokni, kítani. Noqw pep puʼ umum nōnovaqam uṅ k̇aptsiʼyuṅwni. 11 Taq haqawa pavan nāhihtataqa hapi qahimuniwhtini; pu nāqahihtataqa hapi aʼnö hímuniwhtini. 12 Pu Jesus piw put tūtsamqat aw paṅqawu: Um wukonovateʼ, qa uhkwatsmuy tūtsammantani, piw uhsinomuyu, piw uqlaq k̇ahaksinmuyu; taq k̇a puma soon qa uṅ tūtsamyaqw, pay pam ūmi ahoytiwni. 13 Ason um tūnopnanik, aṅ ōokiwyaqamuy tūtsammantani, pu qapasiwyuṅqamuyu, pu qayaktaqamuyu, pu qapostalyaqamuyu. 14 Nen um hahlayhpit epni. Pi puma kurs hin ūmi put aṅ ahoytotaniqʼö. Pay ason aṅ súanyuṅqam ahoy yesvaniwhq, pep puʼ God ūmi put ep ahoytani.

The Parable of the Great Feast (Mt 22.1-10)

15 Noqw put amum nōnovaqamuy amuṅaqw haqawa it navotqe, put aw paṅqawu: Pas hak God moṅwtunatyayat ep nösniqa hahlayhpit epni. 16 Noqw pam put aw paṅqawu: Hak tāqa wukonovataqe, k̇aysiwhqamuy tūtsama. 17 Nihqe nonopsattiqw, tūtsamiwyaqamuy amumi tumalʼayay hōnaqw, pam amumi paṅqawu: Huvam pewyaa; pay sohsoy himu yukiwta. 18 Noqw puma sohsoyam sun hihta akw qeʼyaniqey pan unaṅwtoti. Noqw mohtiʼmaqa put aw paṅqawu: Piw nu hihsaq tutskwat túihqe, pas soon qa aw kuyvatoni. Himu nu as pay qa awni. 19 Noqw suhk̇a paṅqawu: Piw nu tsivót-sikip nanasṅwamuy tumalwawakastuy túihqe, pas piw soon amumi qa pohtani. Himu nu as pay qa awni. 20 Noqw suhk̇a paṅqawu: Piw nu nȫmataqe, ōviy kurs hin awni. 21 Noqw ōviy pam tumalʼaya pítuhqe, īit moṅwiy āawna. Pahsat pu kiʼtaqa itsívutiqe, tumalʼayay aw paṅqawu: Yupa k̇aktayii, kīmii, kihkisonva, pu kīkisk̇at awʼi; nen um aṅ ōokiwyaqamuy, pu hihta akw qapasiwyuṅqamuy, pu qayaktaqamuy, pu qapostalyaqamuy aṅqw tsamni. 22 Noqw tumalʼaya panhtiqe paṅqawu: Moṅwi, pay um hintaniqat paṅqawhq, nu as anhti; noqw pay nāt ep qeni. 23 Noqw moṅwi tumalʼayay aw paṅqawu: Yupa, kurs pö́nawita, pu kwiyauyʼuhtsit awʼi, nen um aṅqw sinmuy tusoqtsamhq, ikiy ep ohpokni. 24 Pi nu ūmi paṅqawni: Imuy tahtaqtuy as tūtsamiwyaqamuy amuṅaqw qa haqawa inovay aṅqw nösni.

The Cost of Being a Disciple (Mt 10.37-38)

25 Noqw sinom qaanʼewakw hintaqam Jesus ámumya. Noqw pam namtökqe amumi paṅqawu: 26 Inuminihqa nawus nay, pu yuy, pu nȫmay, pu timuy, pu pāvamuy, pu tupkomuy, pu qȫqamuy, pu siwamuy, pu hikis pas nāp qatsiy enaṅ aw qa suhtaqʼewni. Hak qa panhtinik, soon inuṅk wīsiwtani. 27 Pu nahoylehtsiy qa yank̇aṅw inuṅknihqa pas soon inuṅk wīsiwtani. 28 Kurs uma haqawa ōmi wupakitaniqey tunatyawteʼ, ya sen pam qa mohti qatupteʼ, hin hihk̇ayat aṅ wūwani, sen aw aptsiʼnitaqeyu? 29 Nāphisat pi pam as qaqatspiyat yukut, pay kurs hin put aw yúkuniniqw, aw yorstotaqam sohsoyam akw tututsiwtivayeʼ, 30 Paṅqaqwani: Iʼ as kītivat, pay kurs hin aw yúkuni. 31 Hal kurs hak haqam moṅwi sukwat moṅwit aqw kihpokteʼ, ya sen pam qa mohti qatupteʼ aṅ wūwani, sen pay pam pakwút-sikip sōmorit pahsaʼ sinoyʼk̇aṅw, put ahsawvatoqat áṅwutaniqeyu, pam sunát-sikip sōmorit pahsaʼ sinoyʼtaqʼö? 32 Noqw kurs pay hinniniqw, nāt miʼ pas yāvaqwniqw, pam aqw hakiy tuawʼayhteʼ, pay hintaqat akw puma qa nāmi mayʼtaniqat aw tūviṅtani. 33 Noqw ōviy pay pan hapi kurs uma haqawa sohsok hihta himuy qa tatamhteʼ, pas soon inuṅk wīsiwtani.

Worthless Salt (Mt 5.13; Mr 9.50)

34 Öṅa as lolma; nīk̇aṅw kurs pam suhuviweʼ, sen hihta akw suhutiwni? 35 Pam tutskwat aw qa nukṅwa, piw kwitatsvalnit awʼi. Pay pánis-sa pi hakim put maspayaṅwu. Tuqayvastotaa! Uma pi naqvuyʼyuṅwa.